1. ¿Jehová Diospi tucui shunguhuan cringapaj pai ayudashcamantaca imatataj rurana canchij?

JEHOVÁ DIOSPICA mana tucuicunachu crincuna (2 Tesalonicenses 3:2). Jehová Diosca paita adorajcunataca pai nishcacunapi crichunmi ayudan (Romanos 12:3; Gálatas 5:22). Chaimanta paipi tucui shunguhuan cringapaj ayudashcamantaca pagui ninami canchij.

2, 3. a) ¿Diospi tucui shunguhuan crishpaca ima bendicioncunatataj charishun? b) ¿Ima tapuicunatataj yachashun?

² Tucui Jesuspi crijcunaca paicunapaj juchacunamanta perdonashca cachunmi Jehová Diosca paipaj shujlla churita curca. Jesuspi crishpami Diospaj amigocuna cai tucunchij, huiñai causaitapish chari tucunchij (Juan 6:44, 65; Romanos 6:23). Jehová Diosca ñucanchijta achcatami cꞌuyan. Ñucanchij juchayuj cashcamanta huañuna cajpipish allicunata rurai tucushcatami Diosca ñucanchijpi ricushca (Salmo 103:10). Chaimantami Jesusmanta, Jesús ñuchanchij juchacunamanta huañushcatapish Diosca yachachishca. Chaita yachashpaca Jesuspi tucui shunguhuan crishpami paipaj catijcuna tucushcanchij. Huiñai causaitapish charinata shuyanchij (1 Juan 4:9, 10-ta leyipai).

 ³ Shinashpaca ¿Diospi tucui shunguhuan crishcataca ima shinataj ricuchinchij? Diospi tucui shunguhuan cringapajca ¿Dios tiyashcallatachu yachana canchij? ¿Shamuj punllacunapi pai imata ruragrishcallatachu yachana canchij? Cai yachaipica cai tapuicunamantami yachashun.

4. ¿Diospi, Jesuspi tucui shunguhuan crishpaca imatataj rurashun?

⁴ Jehová Diospi, Jesuspi tucui shunguhuan crishpaca paicuna imata rurashcata, imata ruragrishcallata yachashpaca mana saquirishunchu. Ashtahuanpish paicunapaj mandashcacunataca ñucanchij causaipimi pajtachishun. Shinallataj Diosmanta Jesusmantapish shujtajcunamanmi yachachishun. Apóstol Pabloca: “Jesusca mandajmari nishpa cambaj shimihuan huillashpaca, huañushcacunapaj chaupimanta paita Taita Dios causachishcatapish tucui shunguhuan crishpaca, quishpichishcami cangui. Tucui shunguhuan crijpimi, paihuan alli tucuchun Diosca chasquinga. Shinallataj Jesuspajmi cani nishpa huillajpica, quishpichingami” nircami (Romanos 10:9, 10, QC, 1989; 2 Corintios 4:13).

5. a) ¿Imamantataj Diospi tucui shunguhuan crina canchij? b) ¿Ñucanchij crishcata sinchiyachingapajca imatataj rurana canchij? Shuj chꞌimbapuraihuan parlai.

⁵ Paraíso Allpapi huiñai causaita charingapajca Diospimi tucui shunguhuan crina canchij. Shinallataj ñucanchij crishcataca sinchiyachishpami catina canchij. Caipi yuyashun, shuj planta alli, sinchi huiñachunca cutin cutinmi yacuta jichana canchij. Yacuta mana jichajpica plantaca chaquishpami huañunga. Chashnallataj ñucanchij crishcataca shuj plantapi yacuta jichaj shinami sinchiyachishpa catina canchij (Tito 2:2; 2 Tesalonicenses 1:3; Lucas 22:32; Hebreos 3:12).

6. ¿Hebreos 11:1-pica crinamantaca ima ishqui yuyaicunatataj yachachin?

⁶ (Hebreos 11:1-ta leyipai). Bibliaca Diospi crinamantaca: 1) Crinaca, ‘imata japisha nicushcata japinataj cashcata shuyana’ ninmi. Caica shamuj punllacunapi Dios cusha nishcacunata shuyanatami nin. Por ejemplo, mana allicuna ña mana tiyanata, shuj mushuj paraíso tiyanatami tucui shunguhuan crinchij. 2) Crinaca, “manapish ricushcata chai shinataj cana cashcata crina” ninmi. Jehová Diosta, angelcunata mana ricushpapish tiyashcataca yachanchijmi. Jesús ña mandacushcata mana ricushpapish crinchijmi (Hebreos 11:3). ¿Dios cusha nishcacunapi, mana ricushcacunapipish tucui shunguhuan crishcataca ima shinataj ricuchinchij? Ñucanchij causaihuan, parlashcacunahuan, rurashcahuanmi tucui shunguhuan crishcata ricuchinchij.

7. ¿Noé Diospi tucui shunguhuan crishcamantaca imatataj yachanchij? (Página 21-pi tiyaj dibujota ricui).

⁷ ¿Noé Diospi tucui shunguhuan crishcamantaca imatataj yachanchij? Apóstol Pabloca: Noeca “Dios llaquita cachasha nijpica, chai punllacunapi manaraj ima chashna tiyashcata ricushpapish Diosta manchashpami huambuj huasita rurarca. Chaipimi paipaj familiandij quishpirirca” nircami (Hebreos 11:7). Noeca Diospi tucui shunguhuan crishcamantami shuj jatun huambuj huasita rurarca. Paipaj vecinocunaca ¿imamantataj chai huambuj huasita ruracunguichij? nishpami tapushca canga. Noeca imamanta ruracushcatami huillashca canga. Chaimantami  Bibliapica Noetaca “huillaj” nin (2 Pedro 2:5). Noeca tucui millaita rurajcunataca yacu juilluhuanmi Diosca tucuchigrin nishpami huillarca. Jehová Diosca: ‘Cai pachapi causajcuna yallitaj millaita rurana yuyailla cashcamantami chingachigrini. Cai pachapi causaiyuj caj tucuicunata chingachingapajca cai pachamanca yacu juillutami cachagrini. Cai pachapi tucui ima tiyajcunami huañunga’ nircami. Noepish caitami gentecunaman huillashca canga. Jehová Diosca: “Chai jatun huambuj huasiman yaicunguichij” nishpami mandarca. Chaimantami Noeca gentecuna quishpirichun imata rurana cashcatapish huillashca canga (Génesis 6:13, 17, 18).

8. ¿Tucui shunguhuan Diospi crinamantaca imatataj Santiagoca nirca?

⁸ Hebreo huauquicunaman panicunaman Apóstol Pablo quillcashca qꞌuipami Santiagopish Diospi tucui shunguhuan crinamanta quillcarca. Santiagoca: “Allicunata mana rurashpa cambaj crishcata ricuchi. Ñuca crishcataca allicunata rurashcahuanmi ricuchisha” nircami (Santiago 2:18). Paica Diospi tucui shunguhuan cringapajca Dios tiyashcallataca mana crinachu nishpami yachachirca. Supaicunaca Dios tiyashcata crincunami. Pero Diospi mana shunguta churancunachu. Diospaj munai pajtarichunpish manataj munancunachu (Santiago 2:19, 20). Tucui shunguhuan Diospi crijcunaca alli ruraicunata rurashpami paipaj ñaupajpi alli ricurincuna. Chaitami Abrahamca rurarca. Santiagoca: ‘¿Manachu ñucanchij yaya Abrahamca, paipaj churi Isaacta altarpi rupachinapaj cushpa pai crishcataca ricuchirca? Paica chashna rurashpami crishcataca ricuchishca. Pai crishcapish allicunata rurashcahuan tandalla cashpa ashtahuan alli tucushcataca ¿manachu ricungui?’ nishpami quillcarca. Qꞌuipaca Santiagoca Diospi tucui shunguhuan crishcataca alli ruraicunahuan mana ricuchishpaca yangamanta cashcatami parlarca. Ima shinami ‘espíritu illaj cuerpoca huañushca. Chashnallatajmi ima rurashcacuna illajlla crijca huañushcallataj’ nircami (Santiago 2:21-23, 26, NM).

9, 10. ¿Diospaj Churipi tucui shunguhuan cringapajca imatataj rurana canchij?

⁹ 30 yalli huatacuna qꞌuipami Juanca chuscu librocunata quillcarca. Bibliata quillcaj shujtaj runacuna shinami Juanca tucui shunguhuan crinaca ima cashcata alli entendirca. Paica griego shimipica achca cutinmi crina shimita quillcarca.

¹⁰ Juanca: “Maijanpish Churita crijca, huiñai causaitami charin. Ashtahuanpish Churita mana crijca, huiñai causaitaca mana charinchu. Taita Diosca paitaca pꞌiñacunllami” nircami (Juan 3:36). Diospaj Churipi tucui shunguhuan cringapajca paipaj mandashcacunatami cazuna canchij (página 25-pi tiyaj cuadrota ricui). Jesusca paipi, paipaj Yayapipish tucui shunguhuan crina cashcatami yachachirca. Chaitaca Juan quillcashcata leyishpami ricunchij (Juan 3:16; 6:29, 40; 11:25, 26; 14:1, 12).

11. ¿Jehová Dios ayudashcamantaca imatataj rurana canchij?

¹¹ Jehová Diosca paipaj espíritu santohuanmi paimanta, paipaj Churimantapish yachachishpa ayudashca. Shinallataj paicunapi tucui shunguhuan cringapajpish ayudashca  (Lucas 10:21-ta leyipai). ¿Jehová Dios chashna ayudashcamantaca imatataj rurana canchij? Paitami pagui nina canchij. Jesusca ‘crij canata callarichij, alli crijta rurajmi’ can. Diosca Jesusmantami paipaj amigocuna tucuchun saquishca (Hebreos 12:2). Ñucanchij crishcata sinchiyachingapajca Diostami mañana canchij. Shinallataj punllantami Bibliata estudiana canchij (Efesios 6:18; 1 Pedro 2:2).

12. ¿Tucui shunguhuan Diospi crishpaca imatataj rurana canchij?

¹² ¿Jehová Dios cusha nishcacunapi tucui shunguhuan crishcataca ima shinataj ricuchinchij? Alli huillaicunatami gentecunaman huillana canchij, paicuna Jesusta catijcuna tucuchunpishmi ayudana canchij. Shinallataj ‘tucuicunapaj allita rurashpa. Ashtahuantajca crijcunapaj allita rurashpami’ catina canchij (Gálatas 6:10). Diospaj amigocuna cashpa catingapajca shungumantami ñucanchij “mauca causaitaca, rurashcacunandij anchuchishpa” catina canchij (Colosenses 3:5, 8-10).

13. a) ¿Imamantataj Diospi tucui shunguhuan crina canchij? b) ¿Hebreos 6:1-pica crinamantaca imatataj yachachin?

¹³ Bibliapica Diospaj ñaupajpi alli ricuringapajca paipimi tucui shunguhuan crina canchij ninmi. Ashtahuanpish “Diospajman maijanpish cꞌuchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can” ninmi (Hebreos 11:6). Bibliapica Jesusta catijcunaca puntapica Diospimi tucui shunguhuan crina can ninmi. Crinaca huasichingapaj ucujta allashpa sinchi pircacunata ruraj shinami can (Hebreos 6:1, NM). Pero Diospaj amigocuna cashpa catingapajca mana paipi tucui shunguhuan crinallachu minishtirin. ¿Imataj ashtahuan minishtirin? (2 Pedro 1:5-7-ta leyipai; Judas 20, 21).

14, 15. ¿Crinatapish yallica imamantataj cꞌuyaita ricuchina canchij?

¹⁴ Bibliata quillcajcunaca achca cutinmi crinamanta parlarcacuna. ¿Crinaca tucuimanta yalli alli cashcamantachu paicunaca chashna quillcarcacuna?

¹⁵ Pabloca: “Urcucunata shujtajman churangapaj tucui shunguhuan crij cashpapish, cꞌuyaita mana charishpaca, imapish mana canichu” nircami (1 Corintios 13:2). Jesuspish Diosta cꞌuyanami tucui mandashcacunamanta yalli alli can nircami (Mateo 22:35-40). Chaimanta cꞌuyaita charishpami alli crijcuna tucushun. Bibliapica cꞌuyaica tucuita crinllami  ninmi. Cꞌuyaita charishpaca Bibliapi nishcacunatami tucui shunguhuan crishun (1 Corintios 13:4, 7).

16, 17. a) ¿Imamantataj Bibliapica crinapish cꞌuyaipish minishtirishca can nin? b) ¿Crinamanta, cꞌuyaimantaca maijantaj ashtahuan valishca can? c) ¿Imamantataj cꞌuyaica ashtahuan minishtirishca can?

¹⁶ Bibliapica Diospi tucui shunguhuan crinapish cꞌuyaita charinapish minishtirishca cashcatami yachachin. Chaimantami Bibliata quillcajcunaca crinamanta, cꞌuyaimanta achca cutin parlarcacuna. Pabloca Jesusta catijcunataca: ‘Churanata soldado churarij shinami Jesusta alli crishpa cꞌuyashpa causana canchij’ nishpami animarca (1 Tesalonicenses 5:8, QC, 1989). Pedroca: ‘Cancunaca mana ricushpapish, Jesucristotaca cꞌuyanguichijmi. Cunan mana ricushpapish paipi cringuichijmi’ nircami (1 Pedro 1:8). Santiagoca ungido huauquicunataca: ‘Cancunataca cai pachapica huajchacunatami Diosca agllashca. Crishcapica charijcuna cachun, pai cusha nishca mandanapi japijcuna cachunmi, paita cꞌuyajcunaman cusha nishca’ nircami (Santiago 2:5). Juanpish ‘Diosca: Paipaj Churi Jesucristopi crichun, caishuj chaishuj cꞌuyanacuchunmi mandarca’ nircami (1 Juan 3:23).

¹⁷ Pabloca: “Cunanca crinapish, shuyanapish, cꞌuyaipishmi tiyan. Cai quimsamanta ashtahuan yalli allica, cꞌuyaimari” can nircami (1 Corintios 13:13, QC, 1989). ¿Imamantataj tucuimanta yallica cꞌuyaita charinami ashtahuan valishca can nirca? Shamuj punllacunapi paraíso Allpapi Dios cusha nishcacunapi crinataca ña mana minishtishunchu. Chaipica Bibliapi parlashca shinami sumaj causaita charishun. Jehová Diostapish, gentecunatapish cꞌuyanataca manataj saquishunchu. Paraisopica cꞌuyaitami ricuchishpa catishun.

18, 19. a) ¿Diospi tucui shunguhuan crishcamantaca ima shinataj causanchij? b) ¿Ñucanchij huauquicunahuan panicunahuan tandalla cashcamantaca pitataj alabana canchij?

¹⁸ Cunan punllacunapi Diosta servijcunaca ñucanchij causaipi Diospaj espíritu ayudachunmi saquinchij. Ashtahuanpish Dios churashca mandanapi tucui shunguhuan crishpami Diospaj lado tucunchij (Gálatas 5:22, 23). Shinallataj muyundij Allpapimi 8 millón yalli huauquicunahuan panicunahuan alli apanacushpa tandalla causanchij. Chaimantami Diospi tucui shunguhuan crishpa, cꞌuyanacushpapish causana canchij.

¹⁹ Jehová Dios ayudajllapimi huauquicunahuan panicunahuan alli apanacushpa tandalla causai tucunchij. Chaimantami Diosta alabana canchij (Isaías 55:13). Bibliapica: ‘Crishcamantami quishpichishcacuna canguichij’ ninmi. Chaimantapish Jehová Diostaca pagui ninami canchij (Efesios 2:8). Jehová Diosca achca gentecuna paipi tucui shunguhuan crichunmi ayudashpa catinga. Chashnami shuj punllaca paraíso Allpapica jucha illaj gentecunalla cashcata rurashpa, Diosta alabashpa huiñai huiñaita causashun.