1, 2. a) ¿Diosta servijcunaca imatataj shuyanchij? b) ¿Gentecunaca imatataj shuyancuna? c) ¿Cai yachaipica imatataj yachashun?

JEHOVÁ DIOSCA ñuca shutitaca alli nishca cachun, jahua pachapipish, cai pachapipish ñuca munashcatami rurasha ninmi (Mateo 6:9, 10). Cai shimicuna pajtarichunmi tucui shunguhuan shuyanchij. Shinallataj Diosca huaquincunaca paraíso Allpapi causachun, shujtajcunaca jahua pachapi causachunmi huiñai causaita cusha nin (Juan 10:16; 2 Pedro 3:13). Cai tucuri punllacunapi Dios ima shina ayudajtami ricushpa catisha ninchij.

² Bibliapica ‘crinaca imata japisha nicushcata japinataj cashcata shuyanami’ nin (página 20-pi tiyaj cuadrota ricui). Dios cusha nishcacunaca pajtarinataj cashcatami tucui shunguhuan crinchij (Hebreos 11:1). Cunan punllacunapi achca gentecunaca huaquin cosascunatami charinata munancuna. Pero chai cosascunata shuj punlla charinataca mana yachancunachu. Por ejemplo, gentecunaca loteriata gananatachari munancuna, pero paicuna gananata o mana gananataca mana yachancunachu. Cai  yachaipica Dios cusha nishcacunapi crishpa catingapajca imata rurana cashcatami yachashun. Shinallataj Dios cusha nishcacunapi tucui shunguhuan crinaca ñucanchijta ima shina ayudashcatami ricushun.

3. ¿Dios cusha nishcacuna pajtarinataj cashcataca imamantataj crinchij?

³ Diospi crishpaca ni pi mana huacharinchu. Diospi cringapajca paipaj espíritu ñucanchijta ayudachunmi saquina canchij (Gálatas 5:22). Diosta rijsingapajca paipaj espíritu santomi ayudai tucun. Diosca tucuita rurai tucuj, tucuita alli yachaj cashcata entendishpaca, paica tucuita pajtachi tucushcatami crishun. Pai imata rurasha nishcacunataca ña pajtachishca shinami parlan. Chaimantami paica: “¡Ñami tucuita rurani!” nin (Apocalipsis 21:3-6-ta leyipai). Jehová Diosca pai nishcacunataca tucuitami “pajtachin”. Chaimantami shamuj punllacunapi imallata cusha nishcacunataca tucui shunguhuan crinchij (Deuteronomio 7:9).

4. ¿Ñaupa tiempopi Diosta servijcunaca imatataj tucui shunguhuan shuyarcacuna?

⁴ Hebreos capítulo 11-pica ñaupa tiempopi 16 cꞌaricunapish huarmicunapish Dios cusha nishcacunapi tucui shunguhuan crishcatami parlan. Diosta servij shujtaj runacunapish crishcamantami Diospaj ñaupajpi alli ricurircacuna ninmi (Hebreos 11:39). Paicunaca Dios cusha nishca ‘huahuatami’ shuyacurcacuna. Cai huahuaca Diospaj tucui enemigocunata tucuchina cashcata, cai Allpatapish shuj sumaj paraisota rurana cashcatami yacharcacuna (Génesis 3:15). Shinallataj paicuna huañujpipish Diosca cutin causachinatami tucui shunguhuan crircacuna. Paicunaca Jesús manaraj cai Allpaman shamujpimi huañurcacuna. Chaimantami jahua pachaman rinataca mana shuyarcacuna (Gálatas 3:16). Ashtahuanpish paicunaca cai Allpa sumaj paraíso tucujpi cushilla causanatami shuyacurcacuna (Salmo 37:11; Isaías 26:19; Oseas 13:14).

5, 6. a) ¿Abrahampish paipaj familiapish imatataj shuyarcacuna? b) ¿Paicunaca Diospaj nishcacunapi tucui shunguhuan crishpa catingapajca imatataj rurarcacuna? (Página 15-pi tiyaj dibujota ricui).

⁵ Pabloca Diosta tucui shunguhuan servijcunamantaca: ‘Tucuicunami paicunaman Dios cusha nishcata manaraj japishpapish cunataj cashcata crishpa huañurcacuna. Paicunaca ima shina crishca shinallataj cashcatami carullamanta ricushpa cushicushcacuna’ nircami (Hebreos 11:13). Paicunaca paraíso Allpapi ña causacushcata yuyashpami shuyarcacuna. Abrahamca Diosta servijmi carca. Jesusca, Abrahamca paraíso Allpata ricusha yuyashpami cushicurca nircami (Juan 8:56). Sara, Isaac, Jacobo (Jacob), shujtajcunapish Jesús cai Allpata mandana punlla chayamuchunmi shuyarcacuna (Hebreos 11:8-11).

⁶ ¿Abrahampish paipaj familiapish Diospaj nishcacunapi tucui shunguhuan crishpa catingapajca imatataj rurarcacuna? Jehová Diosmanta yachanataca manataj saquircacunachu. Diosmanta yachashpa catingapajca paicunaca angelcunahuan, Diosmanta shamuj muscuicunahuanmi yachashpa catircacuna. Shinallataj Diosta servij yuyajcunamanta, ñaupa quillcashcacunamantami yachashcacuna canga. Abrahampish paipaj familiapish Jehová Dios cusha nishcacunataca manataj cungarircacunachu. Ashtahuanpish cutin cutinmi chaipi yuyajcuna carca. Chaimanta Jehová Dios nishcacunata pajtachinataca tucui shunguhuanmi crircacuna. Chaipi crishpami paicuna sinchi llaquicunata  charishpapish Diosta servishpa catircacuna.

7. a) ¿Paipi tucui shunguhuan crishpa catingapajca Jehová Diosca imatataj cushca? b) ¿Imatataj rurashpa catina canchij?

⁷ Jehová Diosca paipi tucui shunguhuan crishpa catingapajca Bibliatami cushca. Bibliapica shamuj punllacunapi imata cusha nishcata, cushilla causangapajpish imata rurana cashcatami yachachin. Chaimantami tucui punllacuna Bibliata leyina, chaipi mandashcacunatapish cazuna canchij (Salmo 1:1-3; Hechos 17:11-ta leyipai). Jehová Diosca “alli cazuj alli yuyaiyuj” huauquicunamanmi micunata ñucanchijman “carana horaspi” cuchun mingashca (Mateo 24:45, QC, 1989). Ñaupa tiempopi Diosta servijcuna shinami ñucanchijpish tucui punllacuna Diospaj Shimita leyina canchij. Imata leyishcapipish cutin cutinmi yuyana canchij. Chaipi yuyashpaca Diostami servishpa catishun. Jesús cai Allpata mandana punlla chayangacamami shuyashpa catishun.

8. ¿Ñucanchij mañashcacunata Dios cutichijta ricushpaca ima shinataj sintirishun?

⁸ Ñaupa tiempopi Diosta servijcunaca tucui shunguhuan crishpa catingapajca: 1) Diostami mañarcacuna. 2) Paicuna mañashcata Dios ima shina cutichishcatami ricurcacuna (Nehemías 1:4, 11; Salmo 34:4, 15, 17; Daniel 9:19-21). Ñucanchijpish Diostami ayudahuai nishpa mañana canchij. Ñucanchij mañaicunata minishticushca horaspi cutichijta ricushpaca Diospimi tucui shunguhuan crishun (1 Juan 5:14, 15-ta leyipai). Diospi ashtahuan crishpa catingapajca paipaj espíritu santota mañashpa catishunchij (Lucas 11:9, 13).

9. ¿Imacunamantataj Diosta mañana canchij?

⁹ Jehová Diosta mañashpaca mana ñucanchij minishtishcacunallamantachu mañana canchij. Ashtahuanpish Dios tucuita sumajta rurashcamanta pagui ningapaj, paita alabangapajmi mañana canchij (Salmo 40:5). Shinallataj tucui ñucanchij huauquicunamanta panicunamantami mañana canchij. ‘Prezu cajcunamanta’, congregacionpi yachachij huauquicunamantapishmi mañana canchij (Hebreos 13:3, 7).

10. ¿Achca Diosta servijcunaca llaquicunata charishpapish imamantataj Diosta servishpa catircacuna?

¹⁰ Apóstol Pabloca: “Crishcamantami huarmicunapish paicunapaj familiacuna huañushca cajpipish causachishcata chasquircacuna. Shinallataj shujtajcunaca jatun llaquita apacushpapish, Dios causachijpi ashtahuan alli causaita japina yuyailla cashcamantami, cacharishun nijpipish mana nishpa huañurcacuna” nircami (Hebreos 11:35). Achca Diosta servijcunaca paicuna huañujpipish Dios causachinatami tucui shunguhuan crircacuna. Chaimantami sinchi llaquicunata charishpapish Diosta servishpa catircacuna. Shamuj punllacunapi paraíso Allpapi Dios causachijpica huiñai huiñaita causana cashcatami yacharcacuna. Nabot runapish, Zacarías runapish Diosta cazushcamantami paicunataca rumihuan macashca huañuchircacuna (1 Reyes 21:3, 15; 2 Crónicas 24:20, 21). Danieltapish leoncunapaj  jutcumanmi shitarcacuna. Paipaj quimsa amigocunatapish ninapimi shitarcacuna. Paicunaca huañunata mana mancharcacunachu. Diosta cazunami paicunapajca ashtahuan valishca carca. Paicuna charishca llaquicunata ahuantachunca Dios paipaj espíritu santohuan ayudanatami crircacuna (Daniel 3:16-18, 20, 28; 6:13, 16, 21-23; Hebreos 11:33, 34).

11. ¿Huaquin profetacunaca Diospi crishcamantaca ima llaquicunatataj ahuantarcacuna?

¹¹ Achca profetacunaca sinchi llaquicunatami ahuantarcacuna. Micayapish Jeremiaspish gentecuna chanzata rurajpi prezupi churajpipish ahuantarcacunami. Eliaspish shujtaj profetacunapish ‘shitashca pambacunapi, urcucunapi, jutcucunapi, ucujta jutcushcacunapi llaquinayajtami causarcacuna’. Tucuicuna sinchi llaquicunata charishpapish Dios cusha nishcacunata ‘japinataj cashcata shuyashpami’ ahuantarcacuna. Chashnami Diosta servishpa catircacuna (Hebreos 11:1, 36-38; 1 Reyes 18:13; 22:24-27; Jeremías 20:1, 2; 28:10, 11; 32:2).

12. a) ¿Tucuicunamanta yallica pipaj ejemplotataj catina canchij? b) ¿Jesús llaquicunata ahuantachunca imataj ayudarca?

¹² Jesucristoca ñucanchijpaj alli ejemplomi can. Paica tucuimanta yalli sinchi llaquicunatami charirca. Chashna llaquicunata charishpapish Diosta servishpami catirca. ¿Chai llaquicunata ahuantachunca imataj ayudarca? Pabloca: ‘Crij canata callarichij, alli crijta ruraj Jesusta ricurashpa catishunchijlla. Paica huañushca qꞌuipaca, cushicuna cashcata yachashpami paita asicujpipish mana pinganayachishpami caspipi huarcushca huañurca. Chaimantaca Dios mandashpa tiyana alli ladopimi tiyarirca’ nircami (Hebreos 12:2, NM). Pabloca Jesuspaj ejemplota catichunmi animarca (Hebreos 12:3-ta leyipai). Jesusta punta achca catijcunapish Jesús shinami Diosta cazushcamanta huañurcacuna. Antipaspish Diosta servij cashcamantami huañurca (Apocalipsis 2:13). Abrahampish Micayapish Jeremiaspish shujtaj Diosta servijcunapish paraíso Allpapi causana bendiciontami shuyacurcacuna. Cutin Jesusta punta catijcunaca shujtaj bendiciontami chasquircacuna (Hebreos 11:35). 1914 huatapi Jesús mandai callarishca qꞌuipami paicunataca jahua pachapi causachun Diosca causachirca. Jahua pachapica manataj huañungacunachu. Paicunaca Jesushuanmi jahua pachamanta gentecunata mandangacuna (Apocalipsis 20:4).

13, 14. a) ¿Huauqui Rudolf Graichenca ima llaquicunatataj ahuantarca? b) ¿Imamantataj chai llaquicunata ahuantarca?

¹³ Cunan punllacunapipish achca testigo de Jehovacunami Jesuspaj ejemplota catincuna. Paicunaca Dios cusha nishca bendicioncunapi yuyashpami sinchi llaquicunata charishpapish Diosta servishpa catincuna. Huauqui Rudolf Graichenca sinchi llaquicunatami charirca. Paica 1925 huatapimi Alemania llajtapi huacharirca. Pai joven cashpaca  paraíso Allpamanta dibujocunata paipaj huasipi charishcatami yuyarin. Paica shuj dibujopica: ‘Ovejapish, chivopish, bizipish, sacha animalcunahuanmi tandalla carcacuna. Uchilla huahuallami michicujta’ ricurcani nircami (Isaías 11:6-9). Chai dibujocunapi cutin cutin yuyashpami huauqui Rudolfca paraíso tiyanata tucui shunguhuan crirca. Policiacuna achca huatacunata paita llaquichijpipish Diosta servishpami catirca.

¹⁴ Huauqui Rudolfca achca llaquicunatami ahuantarca. Paipaj mamaca prezu cashpami shuj millai ungüihuan huañurca. Qꞌuipaca paipaj yayaca ña mana testigo de Jehová casha ninichu nishpami shuj papelpi firmarca. Chai llaquicunata charishpapish huauqui Rudolfca tucui shunguhuanmi Diospi crishpa catirca. Pai prezumanta llujshishpaca superintendente de circuito shinami servirca. Qꞌuipaca Escuela de Galaadmanmi rirca. Chaimantami Chile llajtaman cacharcacuna. Chilepica cutinmi superintendente de circuito shina servirca. Chaipica Patsy shuti misionerahuanmi cazararca. Paicunaca shuj ushushitami charircacuna. Chai huahuaca llullu cashparajmi huañurca. Qꞌuipamanca paipaj  huarmipish 43 huatacunallata charishpami huañurca. Huauqui Rudolfca cai sinchi llaquicunata charishpapish Diosta servinataca manataj saquircachu. Paica ungushca cashpapish, yuyaj cashpapish precursor regular shina, congregacionpipish anciano shinami servirca. Paimanta ashtahuan yachangapajca La Atalaya del 1 de agosto de 1997, página 20 a 25-pimi leyi tucungui ^[1] (página 20-pi notata ricui).

15. ¿Achca huauquicuna panicunaca ima llaquicunatataj charincuna?

¹⁵ Cunan punllacunapipish achca huauquicuna panicunaca sinchi llaquicunata ahuantashpapish cushicushpami Diosta servishpa catincuna. Eritrea, Singapur, Corea del Sur llajtacunapica achcacunami prezu can. Paicunaca Mateo 26:52-pi mandashcata cazushcamantami prezupi can. Por ejemplo, Isaac, Negede, Paulos huauquicunapish 20 yalli huatacunatami Eritrea llajtapi prezu cancuna. Chaipica llaquinaitami causacuncuna. Cai tucui huatacunata prezu cashcamantami mana cazarai tucushcacuna, paicunapaj familiatapish mana cuidai tucushcacunachu. Chashna cashpapish paicunaca Diospi tucui shunguhuan crishpami paita servishpa catincuna. Guardiacunapish paicunata respetanmi. Paicunata rijsingapajca jw.org paginapimi fotota ricui tucungui. Chaipica paicuna sinchi llaquicunata charishpapish cushillami ricurincuna.

16. ¿Dios cusha nishcacunapi tucui shunguhuan crishpaca imatataj rurashun?

¹⁶ Cai huauquicuna shinaca mana tucui Testigocunachu llaquichishca o carcelpi can. Pero achcacunami pobre cashcamanta, guerracunamanta, allpa chujchuicunamanta shujtaj llaquicunamantapish llaquilla causancuna. Cutin shujtaj huauquicuna panicunaca Abraham, Isaac, Jacobo, Moisespaj ejemplotami catincuna. Paicunaca Diosta ashtahuan servingapajmi rijsishca canata, ashtahuan charina munaita saquishcacuna. Shinallataj Diosta tucui shunguhuan cꞌuyashcamanta, pai cusha nishcacunapi crishcamantami cushicushpa Diosta servincuna. Paraíso Allpapi huiñai causaita Dios cunatapish tucui shunguhuanmi crincuna. Chaipica cashcata rurajcunallami causangacuna (Salmo 37:5, 7, 9, 29-ta leyipai).

17. a)¿Diospi tucui shunguhuan crishpa catingapajca imatataj rurashpa catina canchij? b)¿Catij yachaipica imatataj yachashun?

¹⁷ Cai yachaipica ‘crinaca imata japisha nicushcata japinataj cashcata shuyana’ cashcatami yachashcanchij. Diospi tucui shunguhuan cringapajca paitami mañana canchij. Pai cusha nishcacunapipish cutin cutinmi yuyana canchij. Chashnami llaquicunata charishpapish Diosta servinataca manataj saquishun. Catij yachaipica Diospi crishpa catingapajca imata ashtahuan rurana cashcatami yachashun.