10 de diciembre de 1936 huatapimi Estados Unidos llajtapi Wichita nishca pueblopi huacharircani. Chuscu churicunamantaca ñucami punta churi cani. Ñuca yaya mamaca Jehová Diosta tucui shunguhuan servijcunami carca. Ñuca yayaca Wiliam, ñuca mamaca Jean shutimi carca. Cunan punllacunapi congregacionpi ancianocunata pushaj huauqui rurashcatami ñuca yayaca ruraj carca. Ñuca abuelitami ñuca mamitaman, achca gentecunamanpish Bibliamanta yachachirca. Paihuan shuj yachacujca Gertrude Steelemi carca. Qꞌuipaca Gertrudeca Puerto Rico llajtapimi misionera shina Diospaj Shimita huillanaman rirca * (urapi ricurij notata ricui). Ñucaca Diosta servingapajmi alli ejemplocunata charircani.

Shuj sábado chishimi ñuca yayahuan huillanaman rircanchij. Pichca huatacunallatami charircani. Callepimi La Atalaya, Consolación (cunanca ¡Despertad! shutimi can) nishca revistacunata gentecunaman cucurcanchij. Ñucanchij llajtaca Segunda Guerra Mundialpimi participacurca. Ñuca yayaca chai guerrapica imapi mana participarcachu. Ñucanchij huillacujpica shuj doctormi cꞌuchuyarca. Machashcami carca. Paica: “Guerraman mana ringapajmi canca imatapish ninguilla” nishpami ñuca yayata rimarca. Qꞌuipaca ñahuita ricushpami: “¡Valishpaca ñucata macayari, mana vali!” nirca. Chaita ricushpami achcata mancharircani, shinapish ñuca yayaca chaipi caj gentecunaman revistacunata cushpa catircallami. Ñuca yaya mana manchajta ricushpami cushilla sintirircani. Machashca runaca shuj soldado pasacujta ricushpami: “¡Cai mana vali runata apashpa ri!” nirca. Soldadoca, chai runa machashca  cashcata ricushpami: “¡Huasiman ri!” nirca. Ñuca yayaca Wichita pueblopimi ishqui peluqueriacunata charirca. Chai machashca doctorca ñuca yayapaj peluqueriamanmi rij carca. Ñuca yaya mana manchashpa huillachun ayudashcamantami Jehová Diosta pagui nini.

Ñuca 8 huatacunata charijpica ñuca yaya mamaca huasitapish ishquindij peluqueriacunatapishmi cꞌaturcacuna. Shuj carro shina llantacunayuj huasitami rurarcacuna. Chashnami Colorado llajtapi Diosmanta huillashpa ayudangapaj rircanchij. Ñuca yaya mamaca precursorcuna shina servingapajmi agriculturapi, animalcunata huiñachishpa trabajajcuna carca. Jehová Dios ayudashcamanta paicunapish tucui shunguhuan huillashcamantami chaipica shuj congregación tiyai callarirca. 20 de junio de 1948 huatapimi ñucatapish shujtajcunatapish ñuca yayaca shuj uchilla riopi bautizarca. Chai punllaca Bili Nichols paipaj huarmipishmi bautizarirca. Qꞌuipamanca paica superintendente de circuito shinami servirca. Paipaj churipish huarmindijmi chashnallataj servirca.

Ñucapish ñuca familiapish Diosta tucui shunguhuan servij amigocunatami charircanchij. Paicunapuramantaca Don, Si, Dave paicunapaj huarmicunapishmi ñucanchij alli amigocuna carca. Paicunahuan Diosmanta parlanatami achcata munarcanchij. Paicunaca Diosta tucui shunguhuan servishpami cushilla causarcacuna. Ñucapish chashnallatajmi Diosta servisha nircani.

Ñuca 19 huatacunata charijpimi, Bud Hasty shuti amigoca shujtaj pueblopi precursor shina jacu servinaman nirca. Ña chaipi servicujpimi superintendente de circuito huauquica Ruston pueblopi huillanaman richij nirca. Chai pueblopica achca testigocunami congregacionmanta caruyashcacuna carca. Superintendente huauquica mana pi tandanacuicunaman shamujpipish tandanacuicunataca tucui semanacuna ruranguichijlla nircami. Chaimantami tandanacuicunata maipi ruranata mashcashpa alli allichircanchij. Callaripica ñucanchij ishquillami carcanchij. Conferenciacunata cungapajca turnanami carcanchij. Shuj ñaupajmanta tapushpa yachachicujpica caishujca tucui tapuicunatami cutichij carca. Mana pi tandanacuipi tiyajpipish ñaupajpi shuj presentacionta rurana cajpica ishquindijmi pasaj carcanchij. Shina cajpipish shuj punllaca shuj yuyajlla panimi tandanacuicunaman shamui callarirca. Asha ashami huaquin Bibliamanta yachacujcunapish congregacionmanta caruyashca testigocunapish tandanacuicunaman shamui callarirca. Qꞌuipaca ñami shuj congregación tiyai callarirca.

Shuj punllaca Iglesia de Cristo nishcata pushajhuanmi parlanacurcanchij. Paica ñuca mana rijsishca versocunamantami tapurca. Mana imata yachashca shinami sintirircani. Ashtahuan yachanatami minishtircani. Chai runa tapushcacunata yachangapajmi achca horascunata tutacama shuj semanata Bibliata estudiarcani. Chaita rurashpaca ashtahuanmi Jehová Diosman cꞌuchuyarcani, shinallataj shuj iglesiata pushaj runahuanmi parlanacunata munacurcani.

Asha tiempo qꞌuipaca superintendente de circuito huauquica El Dorado llajtapimi shuj uchilla congregacionpi ayudachun cacharca. Chaipi causacushpaca achca cutinmi Colorado llajtapi tiyaj cuartelpi, imamanta mana cuartelman ri tucushcata parlanaman rina carcani. Shuj punllaca huauquicunahuan ricushpami carrohuan chocarcani. Ñuca carroca imapaj mana valircachu. Chai llaqui tucushca qꞌuipaca shuj huauquitami cayarcanchij. Paica paipaj huasiman pushashpami tandanacuimanpish aparca. Tandanacuipimi carropi chocashcata huillarca chaimantami huauqui panicunaca asha cullquita convidarca. Ñucanchijta apaj huauquica 25 dolarcunapimi ñuca carrotaca cꞌaturca.

Qꞌuipaca Wichita pueblomanmi rircanchij. Chaipica ñucanchij alli amigo huauqui McCartney shutimi causarca. Paica precursormi carca. Ishqui churicunatami charirca, paicunahuanca cunancamami alli apanacunchij. McCartney huauquica pai charishca mauca carrotami 25 dolarcunapi ñucaman cꞌaturca. Ñuca carrota cꞌatushca  cullquillapitajmi cꞌaturca. Jehová Diosta tucui shunguhuan servicushcamanta ñucata bendiciacushcatami ricurcani. Cai visitapimi ñuca amigocunaca Bethel shuti shuj sumaj panita rijsichirca. Bethelpaj mamaca Ruthmi carca. Paica cushillami Diosta servij carca. Ruthca 90 yalli huatacunacamami precursora carca. Bethelta rijsishca qꞌuipami 1958 huatapi paihuan cazararcani. Bethelhuan cazarashca qꞌuipaca El Dorado llajtapimi precursorcuna shina servircanchij.

Achca huatacunata Diosta servij huauquicuna panicuna shinallatajmi ñucanchijpish Diosta servisha nircanchij. Chaimantami maipi servinaman cachajpipish rishunllami nircanchij. Arkansas llajtamanmi puntapica precursor especial shina servinaman cacharca. 1962 huatapica shuj sumaj invitaciontami chasquircanchij, clase número 37 de la Escuela de Galaadmanmi rircanchij. Ñucanchij amigo Don Steelepish chai Escuelallamantaj ricujta yachashpami achcata cushicurcanchij. Cai Escuelamanta graduarishca qꞌuipaca Kenia llajtapaj capital Nairobimanmi cacharca. Ñucanchij llajtamanta ricushpaca achcatami llaquirircanchij. Pero Nairobiman chayashpaca huauquicuna panicuna shuyacujta ricushpami achcata cushicurcanchij.

Ratomi Kenia llajtapica amañarircanchij. Chaipi huillanapish sumajmi carca. Puntaca Cris Kanaiyami paipaj huarmindij Bibliata ñucanchijhuan yachai callarircacuna. Qꞌuipaca bautizarircacunami. Paicunaca cunancamami tucui shunguhuan Jehová Diosta alli servishpa caticun * (urapi tiyaj notatapish ricui). Catij huatapica Uganda llajtapaj capital Kampalamanmi cacharca. Ñucanchijmi chai llajtapica punta misionerocuna carcanchij. Chai punllacunaca sumajmi carca, achca gentecunami Bibliamanta yachasha nircacuna. Achcacunami testigo de Jehová tucurca. Shinapish ña casi chuscu huatacunata Africapi cajpimi ñuca huarmica chichu saquirirca. Chaimantami Estados Unidos llajtaman tigrana carcanchij. Llaquillami sintirircanchij. Africapi causaj gentecunata  achcata cꞌuyashcamantami ima hora tigranata yuyarcanchij.

Ñuca yaya mama causacushca Colorado llajtapimi causanaman rircanchij. Asha quillacuna qꞌuipaca ñuca punta ushushi Kimberlymi huacharirca. Casi shuj huata chaupi qꞌuipaca ñuca ushushi Estefanymi huacharirca. Ñucanchij huahuacunataca allimi huiñachisha nircanchij. Chaimantami Jehová Diosmanta alli yachachircanchij. Diosta servij shujtaj huauquicuna panicuna shinallatajmi ñucanchijpish rurasha nircanchij. Ñucanchij allita rurajpica huahuacunapish chashnallataj rurachunmi munarcanchij. Huaquinpica yaya mamacuna Diosta alli servijpipish huahuacunaca mana chaita ruranchu. Ñuca huauquipish ñuca panipish Jehová Diosta mana servircacunachu. Ima hora paicunapish cutin Jehová Diosta servichunmi shuyani.

Ñucanchij ushushicunata huiñachinaca sumajmi carca. Paicunahuanmi imatapish ruraj carcanchij. Aspen pueblo cꞌuchullapimi causarcanchij. Chaipica achca razu tiyashcamantami gentecunaca razu jahuapi pugllajcuna carca. Ñucanchijpish chaimanmi rij carcanchij. Shinami ñuca ushushicunahuan parlanacuj carcanchij. Huaquinpica canllapimi ninata japichishpa muyundijpi tiyarishpa parlanacuj carcanchij. Qꞌuipaca carpacunapimi dormijcuna carcanchij. Paicunaca huahuaraj cashpapish “¿jatunyashpaca imatashi rurashun?” “¿pihuanshi cazarashun?” nishpami tapujcuna carca. Jehová Diosta tucui shunguhuan cꞌuyachunmi yachachircanchij. Paicunataca Diostami cancunapaj causaipica puntapi churana canguichij. Cancuna shinallataj Diosta servijhuanmi cazarana canguichij nijmi carcanchij. Shinallataj 23 huatacunata charishpami cazarana canguichij, huambraraj cazaranaca mana allichu nijmi carcanchij.

Ñucanchij yaya mamacuna shinallatajmi rurarcanchij. Chaimantami ñucanchij ushushicunataca tandanacuicunaman, huillanamanpish pushashpa rij carcanchij. Diosta tucui shunguhuan servij huauquicunata panicunatami huasiman invitaj carcanchij. Shinallataj Africapi huillanaca sumaj cashcatami paicunaman parlaj carcanchij. Ima horaca Africamanmi rina canchij nijmi carcanchij, chaita uyashpaca cushillami sintirijcuna carca.

Cada semanami familiahuan Bibliata yachaj carcanchij. Escuelapi shuj tapuita rurajpi ima shina cutichinatami huahuacunaman yachachij carcanchij. Paicunaca chashna yachanataca achcatami munajcuna carca. Chashnami mana manchashpa huillangapaj listos carca. Ashtahuan huiñarishpaca huaquinpica mana yachanata munajcunachu carca. Shuj punllaca pꞌiñarishpami ña mana yachagrinchijchu cancunapaj cuartoman richij nircani. Chashna nijpica mancharishpami huacashpa yachasha ninchijmi nircacuna. Chaita ricushpaca Jehová Diosta cꞌuyachun alli yachachicushcatami entendircanchij. Asha tiempo qꞌuipaca familiahuan Bibliata yachanataca achcatami munarcacuna. Paicunaca ima shina sintirishcata, imata yuyashcatapish parlajcunallami carca. Huaquinpica Bibliapaj huaquin yachachishcacunaca mana ciertochu canga nijcunami carca. Chaita  uyashpaca llaquillami sintirircanchij. Pero paicuna imata shungupi charishcatami yachaj carcanchij. Imamanta chaipi crina cashcata Bibliallahuantaj yachachijpica Jehová nishcaca ciertomi can nijcunami carca.

Ñucanchij ushushicunaca ratomi huiñarca. Diospaj ayudahuanpish huauquicuna panicunapaj ayudahuanpishmi Jehová Diosta tucui shunguhuan cꞌuyachun yachachircanchij. Colegiota tucuchishpaca precursora shina servingapajmi shuj trabajota mashcarcacuna. Chaimantami cushilla sintirircanchij. Cleveland llajtapimi ashtahuan huillajcunata minishticurca, shujtaj ishqui panicunahuanmi chaipi servinaman rircacuna. Paicuna rishcamanta llaquilla sintirishpapish precursoracuna cashcamantami cushilla sintirircanchij. Ñuca huarmi Bethelhuanca cutinmi precursorcuna tucurcanchij. Chaimantami jatun tandanacuicunapi ayudai tucurcanchij, congregacioncunata visitashpapish superintendente de circuito huauquita ayudaj carcanchij.

Cleveland llajtaman manaraj rishpami ñucanchij ushushicunaca Inglaterra llajtapi tiyaj Betelman rircacuna. Estefanyca, chaipi trabajaj Paul Nortontami rijsirca. Estefanyca 19 huatacunallatami charirca. Asha huatacuna qꞌuipaca cutinmi Inglaterra Betelman rircacuna. Chaipimi Kimberlyca Paulhuan trabajaj Brayan Llewellynta rijsirca. Estefanyca 23 huatacunata charishpami Paulhuan cazararca. Catij huatapica Kimberlymi 25 huatacunata charishpa Brayanhuan cazararca. Ishquindijmi 23 yalli huatacunata charishpa cazararcacuna. Diosta alli servijcunahuan cazarashcamantami cushilla sintirircanchij.

Ñucanchij ushushicunaca: “Cancunapish abuelitocunapish ayudashcamantami cunancama ashalla cullquita charishpapish Jehová Diosta tucui shunguhuan servicunchij” nircacunami (Mateo 6:33). Abril de 1998 huatapimi Paultapish Estefanytapish clase 105 de la Escuela de Galaadman invitarca. Chaimantami Malaui llajtaman paicunataca cacharca. Chai punllacunallapitajmi Brayantapish Kimberlytapish Inglaterra llajtapi tiyaj Betelman invitarca. Qꞌuipa huatacunapica paicunataca Malaui Betelmanmi cacharca. Ñucanchij ushushicuna Diosta tucui shunguhuan servicushcamantami achcata cushicurcanchij.

Callaripi parlashca shinaca enero de 2001 huatapimi huauqui Marais ñucata cayarca. Paica Departamento de Servicios de Traduccionpimi ayudaj carca. Caipi trabajaj huauquicunaca, inglesmanta traducijcunata ayudangapajmi shuj cursota ruragrincuna nircami. 64 huatacunata charijpipish chai cursopi profesor cachunmi ñucata yachachisha nircacuna. Caita huillashca qꞌuipaca Jehová Diostami ñuca huarmindij mañarcanchij. Ñucanchij yaya mamacuna imata yuyashcata yachangapajmi paicunaman huillarcanchij. Ña yuyajllami carcacuna, paicunalla saquirinata yachashpapish richijlla nircami. Chaimantami pagui invitashcamanta, ri tucunchijmi ningapaj Pattersonpi caj oficinacunaman cayarcani.

Chai punllacunallapitajmi ñuca mama cancerta charishcata yachaj chayarcani. Chaimantami ña mana rigrinchijchu ñuca panihuan canta cuidangapajmi saquirigrinchij nishpa paihuan parlanacurcanchij. Pero ñuca mamaca, “cancuna mana rijpica ashtahuanmi llaquilla sintirisha” nircami. Ñuca pani Lindapish chashnallatajmi nirca. Ñuca mamatapish Lindatapish paicunata ayudaj huauquicunata panicunatapish achcata pagui nircani. Qꞌuipaca Pattersonpi saquirij Centro Educativo de la Watchtowermanmi rircanchij. Ña shuj punllata chaipi cajpimi ñuca panica, mamaca huañunmi nishpa huillangapaj cayarca. Ñuca mamitaca caipi cachunmi munarca. Chaimantami chaipi saquirircanchijlla.

Malaui sucursalpimi punta cursota cugrichun mañarca. Chaita uyashpaca achcatami cushicurcanchij. Chaipimi ñucanchij ushushicunapish paicunapaj  cusandij carcacuna. Paicunahuan cutin tandalla canaca alhajami carca. Qꞌuipaca Zimbabue, Zambia llajtacunapimi cursota curcanchij. Casi chuscu huatacunata chai llajtacunapi cursota cucujpimi Malaui llajtaman tigrachun mañarca. Chaipica politicapi mana chagrurishcamanta, llaquichishca Testigocunapaj causaimantami quillcashpa ayudarcanchij * (urapi tiyaj notata ricui).

2005 huatapica Estados Unidos llajtaman tigrashpaca llaquillami sintirircanchij. Caipimi cunancama ñuca huarmindij precursor shina servicunchij. Kimberlypish paipaj cusandijmi ñucanchij ladollapi causancuna. Paicunapaj ishqui ushushicunata huiñachingapajmi 2006 huatapi shamurcacuna. Estefanyca paipaj cusandijmi cunancama Malaui sucursalpi servicuncuna. Paulca miembro del Comité de Sucursalmi can. Ñucaca ñami casi 80 huatacunata charini. Ñucata ayudaj joven huauquicunami cunanca ñuca ñaupa rurashcata ruracuncuna. Chaita ricushpaca cushillami sintirini. Ñucanchij ushushicunatapish nietacunatapish Diosta alli servichunmi ayudashcanchij. Diosta alli servij shujtaj huauquicuna panicunapaj ejemplotami catishcanchij. Chaita rurashcamantami cushilla causashcanchij.