1. ¿Ima shinataj agápe cꞌuyaita charishcata ricuchinchij? (Jahuapi tiyaj fotocunata ricui).

CꞌUYAICA Diosmantami shamun (1 Juan 4:7). Dios mandashcacunata cazushpami cꞌuyashcata ricuchinchij. Griego rimaipi ñaupa quillcashcacunapica cai cꞌuyaimanta parlangapajca agápe nishpami quillcashcacuna. Agápe cꞌuyaita ricuchingapajca mana ‘llaquinimi’ nishpalla saquirinachu canchij. Ashtahuanpish mana imata shuyashpa ruraicunahuanmi cꞌuyashcata ricuchinchij. Shuj diccionariopica: “Agápe cꞌuyaitaca ruraicunallahuanmi ricuchina can” ninmi. Cashna cꞌuyaita ricuchishpaca cushillami causashun.

2, 3. ¿Jehová Diosca ima shinataj cꞌuyaj cashcata ricuchishca?

² Jehová Diosca gentecunata manaraj rurashpallatajmi cꞌuyaita ricuchirca. Por ejemplo, gentecuna cai Allpapi causachunmi puntapica tucui minishtishcataraj rurarca. Diosca mana paillapi yuyarcachu. Ashtahuanpish gentecuna cushilla causachun munashpami tucuita alhajata rurarca. Cai Allpata rurashca qꞌuipaca Adán Evatami rurarca.  Gentecunataca huiñai huiñaita cushilla causachunmi Diosca rurarca.

³ Adán Eva mana cazujpipish Diosca gentecunataca cꞌuyashpami catirca. Adanpaj huahua huahuacunamanta shujllapish paita cꞌuyanataca allimi yacharca. Chaimantami gentecunata quishpichingapaj shuj quishpichijta cachasha nirca (Génesis 3:15; 1 Juan 4:10). Gentecunata quishpichisha nishca punllamantaca Jehová Diosca pai nishcacunaca pajtarinataj cashcatami yacharca. Casi cuatro mil huatacuna qꞌuipaca Diosca Jesustami cai Allpaman cacharca. Paipaj shungupi dimastij nanarishpapish ñucanchijta quishpichingapajmi paipaj Churi huañuchun saquirca (Juan 3:16). Chaita rurashcamantami agradecido sintirinchij.

4. ¿Juchayujcuna cashpapish imamantataj cꞌuyaj cashcata ricuchi tucunchij?

⁴ Jehová Diosca ñucanchijtaca paiman rijchajtami rurarca. Chaimantami mana imata shuyashpa cꞌuyaita ricuchi tucunchij. Juchayuj cashcamantami maipica cꞌuyaita ricuchinaca sinchi laya ricurin. Shina cajpipish cꞌuyaitaca ricuchi tucunchijmi. Por ejemplo, ñaupa punllapi Diosta sirvij Abelca pai charishca ashtahuan allicunata cushpami Diosta cꞌuyashcata ricuchirca (Génesis 4:3, 4). Noepish Diosmanta mana uyasha nijpipish achca huatacunaca tucuicunaman huillashpami cꞌuyaj cashcata ricuchirca (2 Pedro 2:5). Abrahampish tucuimanta yallimi Diosta cꞌuyarca. Chaimantami Diosmanca, ñuca churi Isaactaca canman cushallami nirca (Santiago 2:21). Cai runacuna shinallatajmi sinchi ricurijpipish tucuimanta yalli Diosta cꞌuyashcata ricuchina canchij.

5. ¿Cꞌuyaj cashcata ricuchingapajca imatataj rurana canchij?

⁵ 1 Juan 3:18-pica: “Ama shimillahuan, cꞌallullahuan cꞌuyanimi nishunchij. Ashtahuanpish imatapish rurashpataj cꞌuyashcata ricuchishunchij” ninmi. Shinaca ¿manachu palabracunallahuan cꞌuyanimi ni tucunchij? (1 Tesalonicenses 4:18). Ari, cꞌuyanimi ninaca allimi. Pero huaquinpica ñucanchij shimicunahuan cꞌuyanimi nishca jahuapish ruraicunahuanmi cꞌuyashcata ricuchina canchij. Por ejemplo, shuj huauqui o pani ropa illajlla o micuna illajlla cajpica paicunata ayudashpami cꞌuyashcata ricuchinchij (Santiago 2:15, 16). Shinallataj Jehová Diostapish, shujtajcunatapish cꞌuyashcamantami ashtahuan huillajcuna tiyachun Diosta mañanchij. Pero mana mañashpallachu saquirina canchij. Ashtahuanpish gentecunaman huillangapajmi achcata esforzarina canchij (Mateo 9:38).

6, 7. a) ¿Ima shinataj mana nij tucushpalla cꞌuyashcata ricuchinchij? b) ¿Picunataj nij tucushpalla cꞌuyashcata ricuchircacuna?

⁶ Apóstol Juanca: “Imatapish rurashpataj cꞌuyashcata ricuchishunchij” nircami. Chaimantami ama nij tucushpalla tucui shunguhuan cꞌuyanacuna canchij (Romanos 12:9; 2 Corintios 6:6). Maijancunaca nij tucushpallami cꞌuyanimi nincuna. Pero paicunapaj ruraicunahuanca mana cꞌuyashcatami ricuchincuna. Shimillahuan cꞌuyanimi nishpa purinaca imapajpish mana valinchu.

⁷ Huaquincunaca cꞌuyanimi nishpapish mana cꞌuyaj cashcatami ricuchishcacuna. Por ejemplo, Diabloca preocuparij shinami  Evamanca mishqui shimicunahuan parlarca. Pero mana chashnachu carca. Paipaj shungupica mana allitami yuyacurca (Génesis 3:4, 5). Ahitofel runapish rey Davidpaj amigomi cani nishpami purij carca. Pero paillapi yuyashpami Davidpaj contra tucurca (2 Samuel 15:31). Cunan punllacunaca huaquincunaca Diosmanta yachashca jahuapish paipaj contrami tucushcacuna. Paicunapish shujtajcunapish congregacionpi huauqui panicunatami chꞌicanyachisha nincuna. Chaimantami mishqui shimihuan parlashpa huauqui panicunamanta preocuparishcata yuyachisha nincuna. Pero chai gentecunaca paicunapaj allita mashcangaraicullami ayudaj tucuncuna (Romanos 16:17, 18).

8. ¿Imatataj tapurina canchij?

⁸ Shujtajcunata llaquichingapaj nij tucushpalla cꞌuyaita ricuchinaca mana allichu can. Gentecunatami umai pudinchij, pero Jehová Diostaca mana umai pudinchijchu. Jesusca, ‘nij tucushpalla cꞌuyanimi nijcunaca jatunta llaquichishcami canga’ nircami (Mateo 24:51). Diosta sirvijcunaca mana nij tucushpallachu cꞌuyaita ricuchina canchij. Chaimantami, “¿shungumantachu cꞌuyaita ricuchicuni?” nishpa tapurina canchij. Mana nij tucushpalla cꞌuyaita ricuchingapaj 9 yuyaicunata ricushun.

9. ¿Tucui shunguhuan huauqui panicunata cꞌuyashpaca imatataj rurana canchij?

⁹ Pi mana ricujpipish cushicushpa allita rurashunchij. Shujtajcunata ayudashcata ni pi mana yachaj chayajpipish ayudanallami canchij (Mateo 6:1-4-ta leyipai). Ananías y Safiramanta parlashun. Paicunaca allpata cꞌatushpami apostolcunaman cullquita curca. Pero paicunaca gentecunapaj ñaupajpi alli ricuringaraicullami chaita rurarcacuna. Shinallataj mashna cullquita cushcatapish llullashpami huillarcacuna. Chaimantami Diosca paicunata huañuchirca (Hechos 5:1-10). Huauqui panicunata tucui shunguhuan cꞌuyashpaca shujtajcuna mana yachajpipish paicunamanta allicunatami rurana canchij. Cuerpo Gobernanteta ayudaj huauquicunata yuyarishunchij. Paicunaca Diospaj puebloman yachachingapajmi achcata trabajancuna. Pero mana shujtajcunapaj ñaupajpi alli ricuringaraicullachu chashna rurancuna. Shinallataj ‘huauqui panicunata yachachingapaj caita o chaitami rurarcani’ mana nincunachu.

10. ¿Ima shinataj shujtajcunata valorashcata ricuchi tucunchij?

¹⁰ Shujtajcunata valorashunchij (Romanos 12:10-ta leyipai). Jesusca apostolcunapaj chaquicunata maillashpami paicunata valorashcata ricuchirca (Juan 13:3-5, 12-15). Apostolcunaca espíritu santota chasquishca qꞌuipami Jesús imamanta chaita rurashcata intindircacuna (Juan 13:7). Ñucanchijpish Jesús shinami humildes cana canchij. Shujtajcunatapish valoranami canchij. Chaimanta estudiashca cashpapish, cullquiyujcuna cashpapish o Diospaj pueblopi huaquin asignacioncunata chasquishca cashpapish shujtajcunamanta yalli cashcataca mana yuyanachu canchij (Romanos 12:3). Tal vez maijan huauquita o panitaca allita rurashcamantami felicitangacuna. Pero pai rurashcacuna alli llujshichunca ñucanchijchari ayudarcanchij. Paillata felicitajpipish mana envidianachu  canchij. Ashtahuanpish paicunahuanmi cushicuna canchij.

11. ¿Imamantataj shungumanta felicitana canchij?

¹¹ Tucui shunguhuan felicitashunchij. Maijan imata alli rurajpica felicitanataca mana cungarinachu canchij. Chashnami paicunata sinchiyachishun (Efesios 4:29). Pero alli sintirichun nishpalla alhaja shimicunata ninaca mana allichu can. Ashtahuanpish imata nishpapish shungumantami verdadta nina canchij. Shinallataj ima consejota cuchun minishtijpica consejanallami canchij (Proverbios 29:5). Maijantaca paipaj ñaupajpica alli shimicunahuanchari parlanchij. Pero shujtajcunahuan cashpaca paimantaca mana allitachari rimashun. Chaita ruranaca mana allichu. Shungumanta cꞌuyangapajca apóstol Pablomantami yachai tucunchij. Shuj cutinca Corinto llajtapi causaj crijcunataca allita ruracushcamantami felicitarca (1 Corintios 11:2). Pero paicuna mana allita ruracujta yachaj chayashpaca cꞌuyaihuanmi pandaricushcata ricuchirca (1 Corintios 11:20-22).

12. ¿Ima yuyaihuantaj shujtajcunata ayudana canchij?

¹² Cꞌuyaihuan chasquinacushunchij. Jehová Diosca mana mitsashpa cujcuna cachunmi munan (1 Juan 3:17-ta leyipai). Pero ¿ima yuyaihuantaj chaita rurana canchij? Yuyashun. ¿Amigocunallata, ñucanchij ñahuipi alli ricurijcunallatachu ñucanchij huasiman invitanchij? o ¿ñuca imata minishtijpica paicunami ayudanga nishpachu invitanchij? Mana cashpaca ¿manaraj alli rijsishca huauqui panicunatachu ayudanchij? o ¿ñucanchijta mana ayudai tucujpipish paicunata ayudanchijchu? (Lucas 14:12-14). Por ejemplo, shuj huauqui o pani mana alli decidishcamantachari ayudachun minishtin. O ñucanchij huasiman invitajpipish manachari agradicishca canga. Chashna cajpipish Bibliapi nishcata pajtachishunchij. Chaipica: “Pozadata mañajpipish, ama huashalla rimarishpa caishuj chaishuj chasquinacuichijlla” ninmi (1 Pedro 4:9, QC, 1989). Caita pajtachishpaca shungumanta cꞌuyashcatami ricuchishun. Shinallataj cushillami sintirishun (Hechos 20:35).

13. a) ¿Picunatataj pacienciahuan ayudana canchij? b) ¿Ima shinataj manaraj sinchi crijcunataca ayudai tucunchij?

¹³ Manaraj sinchi crijcunata ayudashunchij. Bibliapica: ‘Manaraj sinchi crijcunata yachachipanguichij. Tucuicunallahuantaj ama utca pꞌiñarij caichijchu’ nishpami mandan (1 Tesalonicenses 5:14, QC, 1989). Maijancunaca utcami sinchi crijcuna tucuncuna. Pero shujtajcunaca sinchi crijcuna tucungapajca pacienciahuan  ayudachunmi minishtin. ¿Ima shinataj ayudai tucunchij? Paicunataca Bibliahuan sumajta yachachishpami ayudai tucunchij. Shinallataj paicunahuan huillanaman llujshishpa, paicunata alli uyashpami ayudai tucunchij. Chashnallataj, ‘cai huauquica ñami sinchi crij, cutin caishujca manaraj sinchi crijchu’ ninaca mana allichu can. Tucuicunami imapica sinchi canchij, cutin imapica sinchiyanarajmi canchij. Apóstol Pablopish huaquin cosascunapi manaraj sinchi cashcatami nirca (2 Corintios 12:9, 10). Sinchi crijcuna cashpapish manaraj sinchi crijcuna cashpapish tucuicunami ayudachun, animota cuchun minishtinchij.

14. ¿Huauqui panicunahuan sumajta causangapajca imatataj rurana canchij?

¹⁴ Sumajta causashunchij. Shuj huauqui o shuj pani mana allita rurashpa ñucanchijta pꞌiñachijpipish o llaquichishcata yuyashpapish paicunahuan alli apanacungapajmi esforzarina canchij (Romanos 12:17, 18-ta leyipai). Ñucanchij imapi pandarishpa shujtajcunata pꞌiñachishpaca shungumantami perdonahuai nina canchij. Por ejemplo, maipica “pai pꞌiñarichunca mana imata rurashcanichu, pero alli sintirichunllami perdonahuai nigrini” nishunchari. Shinapish mana chashna yuyanachu canchij. Chaipaj randica, “ñucami imata rurashpa canta pꞌiñachishcani yuyachini” nishpami tucui shunguhuan perdonachun mañana canchij. Cazarashcacunaca alli apanacushpa causangapajmi shuj esfuerzota rurana can. Por ejemplo, huaquin cazadocunaca shujtajcunapaj ñaupajllapimi cꞌuyanacushpa causaj laya purincuna. Pero huasipica mana parlanacunllapishchu, ashtahuanpish rimanacushpalla, macanacushpallami causancuna. Chashna causashpaca Diospaj ñaupajpi mana alli ricurincunachu.

15. ¿Ima shinataj tucui shunguhuan perdonaj cashcata ricuchinchij?

¹⁵ Perdonajcuna cashunchij. Pi ñucanchijta  pꞌiñachijpica resintirishca puricunapaj randica perdonanami canchij. Huaquincunaca mana cuentata cushpami imatapish rurashpa pꞌiñachincuna. Paicunatapishmi perdonana canchij. Imata rurashca cajpipish pandarishcacunata cungaringapajmi esforzarina canchij. Efesios 4:2, 3-pi nishca shinaca Diosta sirvijcunaca, cꞌuyaimantami caishujmanta chaishujmanta mana pꞌiñarishpa causana canchij. Shinallataj Diospaj espíritu yachachishcamantami shuj yuyailla causana canchij. Shungumanta perdonajcuna cangapajca shujtajcunapaj pandarishcacunata mana yuyaipi charicunallachu canchij (1 Corintios 13:4, 5). Huauqui panicuna pandarishcata mana cungarishpaca Diosmantapish paicunamantapishmi caruyashun (Mateo 6:14, 15). Shinallataj tucui shunguhuan perdonajcuna cangapajca ñucanchijta pꞌiñajcunamantapishmi mañana canchij (Lucas 6:27, 28).

16. ¿Ima asignacionta chasquishpaca imatataj rurana canchij?

¹⁶ Shujtajcunapaj allita rurashunchij. Diospaj pueblopi ima asignacionta chasquishpapish ñucanchijpaj allipajllaca mana mashcanachu canchij. Ashtahuanpish shujtajcunapaj allipajmi mashcana canchij. Chashnami shungumanta cꞌuyashcata ricuchishun (1 Corintios 10:24). Por ejemplo, jatun tandanacuicunapica maijan huauquicunaca chaipi ayudangapajmi utca chayancuna. Paicunaca, “ñucaraj chayashcamantaca alli asientocunatami ñuca familiapaj japigrini” nishpachari yuyancuna. Pero achca huauquicunaca paicunaraj punta chayashpapish ashtahuan alli asientocunataca mana mashcancunachu. Chashna rurashpami shujtajcunapaj allita ruraj cashcata ricuchincuna. ¿Ñucanchijpish imallapitaj paicuna laya cai tucunchij?

17. ¿Juchata rurashca cashpaca imatataj rurana canchij?

¹⁷ Juchapi urmashca cashpaca ancianocunaman huillashunchij. Maijan huauqui panicunaca mana pingai tucusha nishpa, familiatapish mana llaquichisha nishpami paicuna rurashca juchata mana ancianocunaman huillancuna (Proverbios 28:13). Juchacunata mana huillashpaca mana cꞌuyaj cashcatami ricuchincuna. Shinallataj paicunallataj, familiatapishmi llaquichincuna. Diospish paipaj espirituta cushpa mana ayudangachu. Congregacionpipish huauqui panicunaca mana tandalla cangacunachu (Efesios 4:30). Tucui shunguhuan cꞌuyaj cashpaca ima juchata rurashca cashpaca ancianocunamanmi huillana canchij. Paicunami Diospaj ñaupajpi alli ricurichun ayudanga. Shinallataj cutin juchapi ama urmangapajmi esforzarina canchij (Santiago 5:14, 15).

18. ¿Imamantataj mana shimillahuan cꞌuyanimi nishpa purina canchij?

¹⁸ Tucuimantaca cꞌuyaimi ashtahuan yalli can (1 Corintios 13:13). Jehová Dios cꞌuyajpimi ñucanchijpish cꞌuyaita ricuchi tucunchij. Cꞌuyajcuna cajpica Jesusta catijcuna cashcataca tucuicunami cuentata cunga (Efesios 5:1, 2). Pabloca cꞌuyaita mana charishpaca imapajpish mana valinichu nircami (1 Corintios 13:2). Chaimanta ama shimillahuan cꞌuyanimi nishunchij. Ashtahuanpish rurashcacunahuan cꞌuyaj cashcata ricuchishunchij.