JOHNCA Gujarat pueblopimi paipaj familiandij causarca. Chai puebloca India llajtapimi saquirin. Pai 13 huatacunata charijpimi paipaj yayaca testigo de Jehová tucurca. Johnpaj mama, ishqui huauqui, quimsa panicunapish catolicocunami carca. Paicunaca testigo de Jehovacunataca mana ricunayachijcunachu carca.

Shuj punllami Johnpaj yayaca paipaj amigopajman shuj cartata apachun mañarca. Chai punllallatajmi Johnca barril latata pascacushpa maqui dedo chugririrca. Shinapish paipaj yayata cazusha nishcamantami paipaj maquita trapohuan huatarishpa chai cartata saquinaman rirca.

Chai huasiman chayajpica chai amigopaj huarmimi chasquirca. Paipish testigomi carca. John chugririshcata ricushpami chugrita maillashpa, jambishpa huatarca. Chai qꞌuipaca mishqui yaquituta rurashpami paiman curca. Mishqui yaquituta ubyangacamaca cꞌuyaihuanmi Bibliamanta chai huarmica parlarca.

Chai pani cꞌuyaita ricuchishcamantami Johnca testigocunamanta panda yuyaicunata saquirca. Chaimantami: “¿Jesusca Diosllatajchu can?” “¿Mariatapish rezanachu canchij?” nishpa tapurca. Chai panica gujarati shimitami yachashca carca. Chaimantami gujarati shimipi chai tapuicunata Bibliahuan contestarca. Chai huashaca “Estas buenas nuevas del reino” folletotami paiman curca.

Chai folletota leyishpaca Johnca paipaj crishcacuna panda cashcatami cuentata curca. Chaimantami iglesiaman rishpa curataca: “¿Jesusca Diosllatajchu can?” “¿Mariatapish rezanachu canchij?” nishpa tapurca. Curaca colerashpa Bibliata ñahuipi shitashpami: “¿Canca Diablochu tucushcangui, imamí? ¿Maipitaj Jesusca mana Diosllataj can nin? a ver ricuchi. ¿Maitashi Mariataca mana rezana canchijyari?” nishpa caparirca. Cura chashna ninataca Johnca mana yuyarcachu. Johnca, “caimanca nunca mana tigramushachu” nishpami iglesiamanta llujshishrirca. Paica cunancamami shuj chaquillatapish mana chai iglesiapi churashca.

Johnca Bibliata yachashpami testigo de Jehová tucurca. Paipaj huaquin familiacunapishmi testigocuna tucurca. Johnpaj maqui dedo alliyashca cashpapish shuj señalmi saquirirca. Chai punllamantaca 60 huatacunami pasashca. Cunancamami chai señalta ricushpaca paiman cꞌuyaita ricuchishpa Diosmanta yachachishcata yuyarin (2 Corintios 6:4, 6).