1, 2. ¿Zacarías millai huarmita canastapi ricushca qꞌuipaca israelitacunaca ima shinataj causacurca?

¿MILLAI huarmi canasta ucupi tiyacujta ricushca qꞌuipaca Zacariasca imatataj rurarca? Llullashpa mana allita rurajcunata Jehová tucuchigrishcatami yuyashpa saquirishcanga. Chaipi yuyashpami contento cashca canga. Pero israelitacunaca mana allita rurashpami causacurcaraj. Jehová Dios templota cutin shayachichun mandashcatapish mana cazushcacunachu carca. ¿Israelitacunaca imamantataj mana cazushcacuna canga? ¿Paicunapaj alli causaita mashcangapajllachu Jerusalenman tigrashcacuna canga?

² Babiloniamanta Jerusalenman tigraj israelitacuna Diospi crishcataca Zacariasca allimi yacharca. Shinallataj ‘Mandaj Diosmi huasicunata, alli causaita mashcanata saquichun israelitacunapaj shungupi yuyaita cushca carca’ (Esdras 1:2, 3, 5). Paicunaca alli rijsishca llajtata saquishpami Jerusalenman rircacuna. Achcacunacarin Jerusalenmanca shuj cutinllapish mana rishcacunachu carca. Israelitacunapajca Jerusalenpi Diospaj templota  cutin shayachinaca importantemi carca. Chaimantami, Jerusalenman rina ñancuna llaqui cajpipish, caruta purina cajpipish rishunllami nishcacuna carca.

3, 4. ¿Jerusalenman tigraj israelitacunaca ima jarcaicunatataj charirca?

³ Ñaupa yaya mamacunaca paicunapaj huahuacunamanca Jerusalenpish chaipi tiyaj templopish sumajmi carca nishpami parlashcacuna canga. Chaimantami israelitacunaca Jerusalenman ricushpaca ¿chai llajtaca cunanca ima shinashi canga? nishpa tapurishcacuna canga (Esdras 3:12). ¿Canpish paicunahuan Jerusalenman chayashpaca ima shinashi sintiringuiman carca? ¿Mapa qꞌuihua jundashca, pircacuna urmashcata ricushpaca llaquiringuimanchu carca? Pungucunapish torrecunapish urmashcami carca, patacunapipish jatun jutcucunami tiyarca. ¿Chaita ricushpaca mana Babilonia llajta layachu cashca ninguimanchu carca? Jehová Diosca israelitacunataca viajepica cuidarcami. Chaita yuyarishpami israelitacunaca mana desanimarircacuna. Chaimantami Jerusalenman chayashcahuan ñaupa tiyashca templo jahuapi shuj altarta rurarcacuna. Chaipimi tucui punllacuna Jehová Diosman sacrificiocunata rurai callarircacuna (Esdras 3:1, 2). Tucuicunami Jerusalenta cutin shayachingapaj cushilla, listo carcacuna.

⁴ Diospaj templota shayachina cashpapish israelitacunaca tucui llajtatami allichina carca. Paicunapaj huasicunatapishmi rurana carca. Familiata cuidangapajca allpacunatapishmi tarpuna carca (Esdras 2:70). Diospaj enemigocunaca israelitacuna chayashca qꞌuipallami Jerusalenta ama cutin shayachichun jarcaicunata churai callarircacuna. Shina cajpipish israelitacunaca trabajashpami caticurcacuna. Pero 15 huatacunatami enemigocunaca israelitacunata llaquichishpa catircacuna. Chaimantami paicunaca pꞌichi pꞌichi desanimarircacuna (Esdras 4:1-4). Chai llaquicuna jahuapish, Jesús manaraj huacharishca 522 huatapica Persia llajtata mandajpish Jerusalenpi ama imata rurachun nishpami mandarca. Chaimi Jerusalenta cutin shayachinaca nunca mana tucurigrishca laya parecirca (Esdras 4:21-24).

5. ¿Israelitacunata animangapajca Diosca imatataj rurarca?

⁵ Israelitacunaca animotami minishtirca. Chaimantami Jehová Diosca Zacariasmanca cutin muscuipi shina ricuchirca. ¿Imatataj ricuchirca? Cai último muscuipica israelitacunata cꞌuyashcata, paicuna tucui imalla rurashcamanta agradicishcatami ricuchirca. Shinallataj israelitacuna pai mandashcata cutin rurai callarijpi cuidanatapishmi huillarca. Chaimi Zacariasca: “Mandaj Dios mandashcata uyashpa cazujpica, cashnatajmi tucunga” nirca (Zacarías 6:15). Chashna nishpami Diosca israelitacuna templota cutin shayachi tucushcata huillarca.

6. a) ¿Zacariasca último muscuipi shinaca imatataj ricurca? (Página 21-pi tiyaj dibujota ricui). b) ¿Zacarías ricushca caballocunaca imamantataj chꞌican chꞌican colorcuna can?

⁶ Zacarías último muscuipi ricushcacunamanta yachashpaca Jehová Diospimi ashtahuan confiashun (Zacarías 6:1-3-ta leyipai). Cai profeta imata ricushcata yuyashun. Paica chuscu carretacuna ishqui urcu chaupimanta llujshicujtami ricurca. Chai urcucunaca cobrehuanmi rurashca carca * (urapi tiyaj notata ricui). Chai carretacunata aisaj  caballocunaca chꞌican chꞌican colorcunami carca. Chaimi cada carreta maijan cashcata yachai tucunchij. Chaicunata ricushpami Zacariasca angeltaca: “Ñuca amito, ¿imatataj cai tucuica ricuchinri?” nishpa tapurca (Zacarías 6:4). Zacarías muscuipi ricushcaca cunan punllacunapipishmi pajtaricun. Chaimantami Zacarías shinallataj chai muscuicuna imata nisha nishcata yachashun ninchij.

7, 8. a) ¿Zacarías ricushca ishqui urcucunaca imatataj ricuchin? b) ¿Urcucunaca imamantataj cobrehuan rurashca can?

⁷ Bibliapica gobiernocunamanta parlangapajmi huaquinpica urcucunahuan chꞌimbapuran. Zacarías libropi parlashca ishqui urcucunaca Daniel libropi parlashca urcucuna shinallatajmi can. Shuj urcuca Jehová Dioslla huiñaicama tucuita mandaj cashcatami ricuchin. Caishuj urcuca Dios churashca Mandanatami ricuchin (Daniel 2:35, 45). Jesusca 1914 huatapimi jahua pachapi mandai callarirca. 1914 huatamantami cai ishqui urcucunaca tandalla Diospaj munai pajtarichun ayudacushca.

⁸ ¿Imamantataj cai urcucunaca cobrehuan rurashca can? Cobreca oro shinallatajmi achca valishca can. Chaimantami Jehová Diosca paipaj carpa huasitapish Jerusalenpi templotapish cobrehuan rurachun mandarca (Éxodo 27:1-3; 1 Reyes 7:13-16) * (urapi tiyaj notata ricui). Jehová Dioslla huiñaicama mandanapish pai churashca Mandanapishmi achca valishca can. Chaimantami cai ishqui mandanacunata ricuchij urcucunaca cobrehuan rurashca can. Ishquindijmi gentecuna cai pachapi achca bendicioncunata charichun ayudanga.

9. a) ¿Picunataj carretacuna pushajcunaca can? b) ¿Imatataj paicunaca ruranga?

⁹ ¿Carretacunapish carretata pushajcunapish imatataj ricuchin? Carretata pushajcunaca angelcunami can. Paicunaca grupocunapi organizadosmi canga (Zacarías 6:5-8-ta leyipai). Paicunaca cai pachata mandaj Jatun Diospaj ñaupajmantami llujshincuna. Jehová Diosca chꞌican chꞌican puestocunamanmi paipaj pueblota enemigocunamanta cuidachun cachan. Ashtahuantajca ‘janaj lado’ Babilonia llajtamanmi paicunata cachan. Jehová Diosca paipaj pueblo ama cutin Babiloniapi prezu shina cachunmi cuidagrirca. Caita yachashpami Zacariaspaj punllapi templota shayachijcunaca achcata cushicushcanga. Paicunapaj enemigocuna mana jarcana cashcatami alli yacharcacuna.

10. ¿Zacarías huillashca profeciaca ima shinataj cunan punllacunapi pajtaricun?

¹⁰ Zacariaspaj punllacunapi shinami Jehová Diosca paipaj angelcunata cachashpa paipaj llajtata ayudacushca (Malaquías 3:6; Hebreos 1:7, 14). 1919 huatamantami ungidocunaca ña mana Babilonia jatun pueblopi prezu shina cashcacuna. Enemigocuna pꞌiñashpa llaquichicujpipish Diospaj llajtaca  mirashpami catishca (Apocalipsis 18:4). Ñucanchijta angelcuna cuidacushcamantami panda religión ucupi prezu shina cutin canataca ña mana manchanchij (Salmo 34:7). Zacariaspaj profeciami Jehová Dios ñucanchijta ishqui urcucuna chaupipi shina cuidacushcata ricuchin. Chaimantami muyundij Allpapi Diosta sirvijcunaca cushilla paita sirvishpa catinchij.

11. ¿Diosta sirvijcunaca imamantataj jatun llaqui punlla shamunataca mana manchanchij?

¹¹ Ñallami cai mundopaj gobiernocunaca tandanacushpa Diospaj llajtata tucuchisha ningacuna (Ezequiel 38:2, 10-12; Daniel 11:40, 44, 45; Apocalipsis 19:19). Ezequiel ricushca profeciapica: ‘Mandajcunaca pꞌuyu shinami cai Allpata tapangacuna, caballocunapi tiyarishcacuna shamushpami Diospaj llajtata llaquichingacuna’ ninmi (Ezequiel 38:15, 16) * (urapi tiyaj notata ricui). ¿Chaita yachashpaca mancharinachu canchij? Mana. Jehová Diosmi ñucanchijhuan canga. Jatun llaqui punllacuna chayamujpica Diosta sirvijcunataca angelcunami cuidanga. Cutin, Diosta mana cazujcunataca tucuitami chingachinga (2 Tesalonicenses 1:7, 8). Chaipi yuyashpami alli sintirinchij. Shinashpaca ¿pitaj angelcunataca mandacunga?

12, 13. a) ¿Jehová Diosca imata rurachuntaj Zacariasta mandarca? b) ¿Ima shinataj ‘Retoñacuj yuraca’ Jesús cashcata yachanchij?

¹² Zacariasllami cai tucui muscuipi shinacunataca ricurca. Qꞌuipaca templota shayachicujcunata  ayudangapajca ¿imatataj rurarca? (Zacarías 6:9-12-ta leyipai). Jehová Diosca Heldai, Tobías, Jedaiashuan parlai nircami. Cai runacunaca Babiloniamantami cunanlla chayamushcacuna carca. Paicunatami cullquita, orotapish mañai nirca. Zacariasca caicunahuanmi shuj sumaj coronata rurana carca (Zacarías 6:11). ¿Cai coronaca pipajtaj cana carca? ¿Davidpaj huahuapuramanta shamuj mandaj Zorobabelpajchu cana carca? Mana. Curacunata mandaj o sumo sacerdote Josuemanmi cuchun nishpa Jehová Diosca Zacariasta mandarca. Caita ricujcunaca, ¿imamantashi Zacariasca chaita ruran? nishpami yuyashcacuna canga.

¹³ ¿Sumo sacerdote Josuechu rey cagrirca? Mana. Paica mana Davidpaj huahuacunapuramantachu carca. Paiman coronata cushpaca shamuj punllapi pi sumo sacerdote canata, huiñaipaj mandaj canatami ricuchirca. Paica “Retoñacuj yura” nishcami can. ¿Chaica pitaj can? Bibliapica Jesucristo cashcatami ricuchin (Isaías 11:1).

14. ¿Cunan punllacunapica Jesusca imatataj ruracun?

¹⁴ Jesusca sumo sacerdote, reymi can. Paimi Diospaj angelcunata mandacun. Shinallataj Diosta sirvijcuna cai millai mundopi alli causaita charichunmi ayudacun (Jeremías 23:5, 6). Ñallami cai Allpata mandajcunata mishashpa tucuchinga. Chashnami Diosta sirvijcunata cuidanga, Dioslla mandana cashcatapishmi ricuchinga (Apocalipsis 17:12-14; 19:11, 14, 15). Chai punlla chayangacamaca “Retoñacuj yura” o Jesusca achca trabajotami rurana can.

15, 16. a)  ¿Alli shungu gentecuna Diosta cutin alli adorachunca pitaj ayudashca? b) ¿Alli shungu gentecuna Diosta cutin alli adorachunca Jesusca imatataj rurashca? c) ¿Huaranga huatata Jesús mandashca qꞌuipaca gentecunaca ima shinataj causanga?

¹⁵ Jehová Diosmi Jesustaca rey cachun, sumo sacerdote cachun agllarca. Shinallataj Diosca ‘paipaj huasita’ shayachichunmi agllarca (Zacarías 6:13, NM). ¿Ima shinataj caitaca rurarca? Jesusca 1919 huatapimi Babilonia jatun pueblomanta llujshichun Diospaj llajtata ayudarca. Shinallataj Diosta alli sirvijcuna cutin tiyachunmi ayudarca. ‘Alli cazuj alli yuyaiyuj sirvij’ nishca huauquicunatapishmi nombrarca. Paicunatami Diospaj llajtata ñaupajman pushachun mingarca (Mateo 24:45). Jesusca cunancamami Diospaj pueblo alli adorachun, Dios munashca shina causachun ayudacushca (Malaquías 3:1-3).

¹⁶ Jesuspish 144 mil ungidocunapish  huaranga huatatami cai Allpata mandangacuna. Ungidocunaca reycuna sacerdotecunapishmi canga. Jesuspish ungidocunapish Diosta cazujcunataca jucha illaj cachunmi ayudangacuna. Chai huashaca cai Allpapica alli shungu gentecunallami saquiringacuna. Chaipimi tucuicuna Jehová Diosllata cutin adorangacuna.

17. a) ¿Jehová Diosca imatataj israelitacunamanca huillarca? b) ¿Zacarías huillashca profeciaca ima shinataj israelitacunapajca ricurirca?

¹⁷ ¿Zacarías huillashca profeciaca ima shinataj israelitacunapajca ricurirca? Jehová Diosca templota tucuchichunmi ayudasha, cuidasha nircapish. Chaimi paicunataca ñaupajman catichun animashcanga. Ashallacuna cashpami chai tucuita ruranataca manchashcacuna canga. Chaimantami Jehová Diosca: ‘Achca runacunami Heldai, Tobías Jedaias shina ñuca huasita shayachichun ayudanga’ nirca. Zacarías chaita huillajpimi israelitacunaca manchanata saquishcacuna canga (Zacarías 6:15-ta leyipai). Jehová ayudanatami israelitacunaca crircacuna. Chaimantami Persia llajtata mandaj jarcasha nijpipish cutin trabajai callarircacuna. Jehová Diosmi paicunapaj jarcaicuna jatun urcu shina cajpipish tucuita anchuchirca. 515 huatapimi templotaca shayachinata tucuchircacuna (Esdras 6:22; Zacarías 4:6, 7). Cunanca cai profeciacuna ima shina pajtaricujta ricushun.

18. ¿Zacarías 6:15-ca ima shinataj cunan punllacunapi pajtaricun?

¹⁸ Cunan punllacunapica achca gentecunami paicunapaj cullquihuan, tiempohuan, fuerzahuan Diosta sirvicuncuna. Shinami Jehová Diosta jatunyachishcata, ‘tucui imalla charishcacunata’ paiman cushcata ricuchincuna (Proverbios 3:9). Jehová Diosca paicuna tucui shunguhuan cushcataca mana cungaringachu. Por ejemplo, Heldai, Tobías, Jedaiasca Zacarías coronata rurachunmi cullquitapish orotapish curca. Chai coronata ricushpami paicuna Jehová Diosta tucui shunguhuan apoyashcata gentecunaca yuyarircacuna. Jehová Diospish chai runacuna imata rurashcataca mana cungarircachu (Zacarías 6:14). Chashnallatajmi ñucanchijcuna cꞌuyaihuan paipaj imalla rurashcataca mana cungaringa (Hebreos 6:10).

19. ¿Zacarías muscuipi shina ricushcacunamantaca imatataj yachashcanchij?

¹⁹ Jehová Dios ayudajllapi, Jesucristo ñucanchijta ñaupajman pushacujllapimi cai tucuri punllacunapica Diospajta rurashpa catinchij. Zacarías nishca shinaca Diospaj puebloca mana chingaringachu. Chai pueblo ucupi cashcamantaca tranquilomi sintirinchij. Chaimantami Diospaj pueblopi imata ruracushpapish Dios rimashcata alli uyana, tucui shunguhuan imatapish rurana canchij. Chashna rurajpica ñucanchij Rey Jesucristopish angelcunapishmi ñucanchijta cuidanga. Jehová Diosllata jatunyachingapaj tucuita alli rurashunchij. Chashna rurajllapimi Jehová Diospish ñucanchijta cai tucuri punllacunapi huaquichinga. Shinallataj huiñaitapishmi cuidanga.