1923 huatapimi Hemsworth pueblopi huacharircani. Cai puebloca Inglaterra llajtapimi saquirin. Ñuca turica Bob shutimi carca. Iglesiata pushajcuna paicuna yachachishcata mana rurajta ricushpaca ñuca yayaca achcatami pꞌiñarij carca. Shuj punllaca religioncuna ima shina gentecunata pandachijta parlaj librocunatami japishca carca. Chaipi yachashcataca achcatami munarca. Asha huatacuna qꞌuipaca Bob Atkinson runami ñucanchij huasiman shamurca. Paica turi Rutherford rimashca conferenciatami shuj gramofonopi uyachirca. Chai conferenciata uyashca qꞌuipaca ñuca yaya charishca librocunapish chaillatataj parlashcatami cuentata curcanchij. Bobtaca, ‘tucui tutacuna ñucanchij huasipi micunaman shamungui, qꞌuipaca ñucanchij tapuicunata cutichingui’ nishpami ñuca yaya mamaca invitarcacuna. Bibliamantaca achca tapuicunatami ruraj carcanchij. Shinallataj Bobca tandanacuicunaman richunmi invitarca. Tandanacuicunataca shuj turipaj huasipimi rurajcuna cashcarca. Caru cajpipish tandanacuicunamanmi ri callarircanchij. Qꞌuipaca shuj uchilla congregacionmi tiyai callarirca. Shinallataj qꞌuipacunaca siervo de zona nishca turicunatami ñucanchij huasipi chasquij carcanchij (cunanca, paicunataca superintendente de circuito nishpami rijsinchij). Precursorcunatapishmi ñucanchij huasiman invitaj carcanchij. Paicunami ñucataca achcata ayudarca.

Ñuca familiaca shuj negociotami churarcacuna. Pero ñuca turica precursor tucunatami munarca. Chaimantami ñuca yayaca, ‘precursor cangapajca cai negociota saquinami cangui’ nirca. Chaimi ñuca turica 21 huatacunata charishpaca precursor shina shujtaj ladopi sirvinaman rirca. Ishqui huatacuna qꞌuipaca 16 huatacunata charishpami ñucapish precursora tucurcani. Casi tucui semanami ñucalla huillaj carcani. Huillangapajca gramofonota, tarjeta de testimoniotapishmi apashpa rij carcani. Chai tarjetapica Bibliamanta shuj yuyaimi escribishca tiyarca. Chaihuanmi gentecunaman huillaj carcani. Ñucalla huillanaman llujshijpipish Jehová Diosca achcatami bendiciarca. Por ejemplo, shuj huarmica Bibliamanta yachashpaca Jehová Diostami ashtahuan sirvisha nirca. Asha tiempo qꞌuipaca paipaj familiacunapishmi testigocuna tucurca. Qꞌuipaca ñucataca precursora especial shina sirvichunmi nombrarcacuna. Chaimi Cheshire llajtapi huillachun cacharcacuna. Chaimanca Mary Henshall ñañahuanmi rircani.

Segunda Guerra Mundialpica, huarmicunatapishmi soldadocunata ayudachun mandarcacuna. Shujtaj religioncunapica, huaquincunataca guerrapi participachunca mana obligarcachu. ‘Ñucanchijtapish mana obligangachu’ nishpami yuyarcanchij. Pero soldadocunata mana ayudasha nishcamantami ñucataca 31 punllacunata carcelpi churarcacuna. 19 huatacunata charishpaca ishqui cutinmi juezcunapajman rircani. Chaipica: ‘Ñucaca Diosta sirvij cashcamantami guerrapi mana participai tucuni’ nircanimi. Chashna nijpica mana prezu churarcacunachu. Tucui chai tiempopi  Jehová Dios paipaj maquihuan charirashpa ayudacushcatami sintircani (Isaías 41:10, 13).

1946 huatapica Arthur Matthews turitami rijsircani. Paitaca guerrapi mana participashcamantami quimsa quillacunata carcelpi churashcacuna carca. Arthurca paipaj huauquindijmi ñuca huacharishca llajtapi sirvinaman rishcarca. Paipaj yayaca huahuaraj cajpimi Diosmanta yachachishca carca. Chaimantami huambraraj cashpa bautizarishcacuna carca. Hemsworth llajtapi asha tiempota sirvicujpica paipaj huauquitaca Irlandapi sirvichunmi cachashcacuna carca. Arthurca trabajador, Diosta alli sirvij, alli huambrami carca. Chaimi ñuca yaya mamaca pailla causacujta ricushpaca: ‘Ñucanchijhuan causanaman shamui’ nishcarcacuna. Ñuca yaya mamata visitanaman rishpaca, micushca qꞌuipaca ishquindijmi platocunata maillashpa ayudaj carcanchij. Chai huatacunamantaca asha ashami cartacunapi parlanacuj carcanchij. 1948 huatapica Arthurtaca cutinmi quimsa quillacunata carcelpi churarcacuna. Carcelmanta llujshishca qꞌuipami enero de 1949 huatapi cazararcanchij. Diosta ashtahuan sirvisha nishpami cullquitaca mana yangamanta gastaj carcanchij. Shinallataj lugarta charishpaca frutacunata pallashpami trabajaj carcanchij. Taita Amito ayudajpimi precursor cashpa catircanchij.

Casi shuj huata qꞌuipaca Irlanda del Norte llajtapi sirvichunmi cacharcacuna. Puntapica Armagh pueblomanmi rircanchij. Qꞌuipaca Newry pueblomanmi rircanchij. Chaipica casi tucuicunami catolicocuna cashcarca. Shujtaj religioncunataca mana ricunayachisha nijcunachu carca. Chaimantami Diospaj Palabramanta huillacushpaca cuidadota charina carcanchij. Tandanacuicunataca shuj turipaj huasipimi ruraj carcanchij. Chaiman ringapajca carumi carca. 8-puracunallami tandanacuj carcanchij. Maijan chishicunaca chai turipaj huasipimi saquirij carcanchij. Pambapimi dormij carcanchij. Cayandijtaca chai turihuahuaca achcatami caraj carca. Cunanca chai llajtapi achca turi ñañacuna tiyajta yachashpami cushilla sintirini.

Ñuca turica paipaj huarmindijmi Irlanda del Nortepi precursores carcacuna. Chaimi 1952 huatapica paicunandij Belfast llajtapi shuj jatun tandanacuiman rircanchij. Shuj turimi pozadata curca. Chai huasipica Pryce Hughes turipishmi saquirishcarca. Paica Gran Bretaña llajtapi tiyaj sucursalpimi sirvij cashcarca. Shuj tutaca El camino de Dios es el de amor mushuj folletomantami parlanacucurcanchij. Chai folletoca Irlanda gentecunapajmi rurashca carca. Pryce turica, ‘Irlandapi Diosmanta huillanaca mana jahuallachu. Huauqui panicunatapish paicuna causacushca huasicunamantami llujchishpa cachacun. Curacunapish ñucanchijta ama ricunayachichunmi gentecunata animacun. Chai llajtapi causajcunaman cai folletota saquingapajmi carrota charij huauquicuna ayudachun minishticunchij’ nircami * (urapi tiyaj notata ricui). Chaimi “ñucanchijpish ayudai tucunchijmi” nircanchij.

Dublín llajtapica Ma Rutland ñañami causaj carca. Paica achca huatacunatami Diosta sirvishca carca. Paipaj huasipimi precursorcunata chasquij carca. Ñucanchij charishca ashalla cosascunata cꞌatungacamami ñucanchijpish paipaj huasipi saquirircanchij. Cꞌatushca  qꞌuipaca ñuca turipaj motopimi carrota randinaman chuscundij rircanchij. Shuj maucalla pero alli carrotami randircanchij. Carrota manejanataca mana yacharcanchijchu. Chaimantami cꞌatuj runataca carrota ñucanchij huasiman apachun mañarcanchij. Ñuca cusaca manejanata practicangapajmi camapi tiyarishpa, carrota manejacuj laya tucui chishi pasarca. Cayandijtaca ñuca cusa carrota llujchinata mana valicujpimi Mildred Willet ñaña chayarca. Paimi manejanata yachashcarca. Chaimi ñucanchijtaca ima shina manejanata ashahuan yachachirca. Chashnami Irlanda llajtaman ringapaj listo carcanchij. Mildred Willet ñañaca John Barr shuti turihuanmi cazararca.

Qꞌuipaca maipi causanatami mashcana carcanchij. Carrohuan aisachishpa puringapaj uchilla huasicunami tiyarca. Pero turi ñañacunaca, ‘chai huasicunapica ama causanguichij, testigocunataca pꞌiñancunami. Ñataj carrotapish cancunatapish rupachinman’ nircacunami. Punlla enterotami shuj huasita mashcashpa purircanchij. Pero mana japircanchijchu. Chaimantami carro ucullapitaj dormircanchij. Cayandij punllaca carrohuan aisachishpa puringapaj shuj uchilla huasitami randircanchij. Chai huasica ishqui camacunatami charirca. Chaipimi causarcanchij. Maijan campesinocunaca paicunapaj allpapimi ñucanchij apanalla huasita shayachichun saquircacunalla. Huasi shayachishca pushtumantaca caruta rishpami huillaj carcanchij. Qꞌuipaca shujtaj ladomanmi huasita apaj carcanchij. Huasita chaipi saquishpami ñaupa causashca lugarcunapi huillangapaj tigraj carcanchij.

Chai pueblocunapica achca familiacunamanmi Diospaj Palabrata huillarcanchij. 20 mil yalli folletocunatami saquircanchij. Shinallataj Bibliamanta yachasha nijcunapaj shuticunataca Gran Bretañapi tiyaj sucursalmanmi cacharcanchij. Cunan punllapi achca testigocuna chai llajtapi tiyashcata yachashpaca cushillami sintirini.

Asha huatacuna qꞌuipaca Londres llajtapi huillachunmi cacharcacuna. Ña chaipi cajpica asha semanacuna qꞌuipallami ñuca cusataca sucursalmanta cayarca. Sucursalmanta turicunaca, ‘caya punllallataj superintendente shina sirvishpa callari’ nishpami mañarcacuna. Shuj semanallapimi turicunaca superintendentecuna imalla ruranata ñuca cusaman yachachircacuna. Chai qꞌuipami Escocia llajtaman cacharcacuna. Ñuca cusaca congregacioncunapimi conferenciacunata uyachina carca. Prepararingapajca asha tiempollatapish mana charircachu. Pero Dios mingashcacunata pajtachina sinchi laya ricurijpipish cushicushpami ruraj carca. Diospajta ruracushcata ricushpaca cushillami sintirij carcani. Achca huatacunatami manaraj Diosmanta huillashca llajtacunapi Bibliamanta yachachircanchij. Escocia llajtapica achca turi ñañacunami tiyarca. Paicunahuan tandanacunaca alhajami carca.

Arthurtaca 1962 huatapimi Escuela de Galaadman invitarcacuna. Pero ñucataca mana invitarcacunachu. Arthurca chaiman rishpami 10 quillacunata Bibliamanta yachashpa pasana carca. Chaimantami imata ruranataca ishquindij decidina carcanchij. Parlanacushca qꞌuipaca ñucalla shuj huatata saquirina cashpapish Galaadman rilla nircanimi. Ñuca cusa tigrangacamaca Hemsworth llajtapimi precursora especial shina huillachun cacharcacuna. Arthur ña tigramujpica superintendente de distrito cachunmi nombrarcacuna. Escocia, Inglaterra, Irlanda del Norte llajtacunapimi ayudana carcanchij.

1964 huatapica ñuca cusataca Irlanda sucursalpi pushaj cachunmi mañarcacuna. Ñuca cusa superintendente cajpica cushillami paita ayudaj carcani. Pero Betelpi sirvigrishcata yachashpaca asha manchaitami charircani. Shinapish Betelpi sirvishpaca cushillami sintirircani. Ñucanchij mana tanto munashpapish Jehová imata rurachun nijpica ruranallami canchij, paica siempremi bendician. Betelpica oficinapi, publicacioncunata cachashpa, yanushpa, limpiashpami trabajaj carcani. Betelpi trabajacushpapish huaquinpica ñuca cusaca superintendente de distrito shinami sirvij carca. Chaipica Irlanda llajtapi achca huauqui panicunatami rijsircanchij. Shinallataj ñucanchijhuan Bibliata estudiajcunapish bautizarircacunami. Chaipica tucuicunami ñucanchij familia laya tucurca. Jehová Diosca achcatami bendiciashca.

1965 huatapimi Dublín llajtapi punta cutin shuj jatun tandanacui tiyarca. Chaimantami shujtaj llajtacunamanta 3.500 turi ñañacuna shamurcacuna * (urapi tiyaj notata ricui). Chaipica 3.948–mi tandanacurcacuna, 65 mushujcunapishmi bautizarircacuna. Achcacuna chai tandanacui ama tiyachun jarcasha nishpapish mana pudircacunachu. Shujtaj llajtacunamanta shamuj turi ñañacunataca Dublín llajtapi causajcunami paicunapaj huasicunapi pozachirca. Huasipi pozachijcunamanca shuj cartata cachashpami agradicircacuna. Testigocuna alli comportarishcamantaca achcacunami allita parlarcacuna. Chai jatun tandanacui qꞌuipaca achca gentecunami Diosmanta yachasha nircacuna.

1966 huatapica Dublín llajtapi tiyaj sucursalmi tucui Irlanda llajtata ricui callarirca. Chai huatacunaca Irlandapi causaj gentecunaca chꞌicanyarishcami carcacuna. Pero testigo de Jehovacunaca tandallami Diosta sirvicurcacuna. Achca catolicocunapish, protestantes nishcacunapish testigomi tucurcacuna. Paicunaca tandallami Diosta sirvi callarircacuna.

2011 huatapica Gran Bretaña sucursalpish, Irlanda sucursalpish shujllami tucurca. Chaimantami Londrespi tiyaj sucursalman cacharcacuna. Chai punllacunapica ñuca cusa ungushca cashcamantami achca preocuparishca carcani. Doctorcunaca Parkinson nishca ungüita charishcatami japircacuna. Ñuca cusaca 20 de mayo de 2015-pimi huañurca. Ishquindijmi 66 huatacunata Diosta sirvircanchij.

Ñuca cusa huañushcamantaca dimastij llaquillami cashcani. Paica siempremi ñucamanta preocuparij carca. Paitaca achcatami llaquini. Cai llaquipica Jehová Diospajmanmi ashtahuan cꞌuchuyashcani. Chashnallataj Irlanda, Gran Bretaña, Estados Unidos llajtacunapi causaj turi ñañacunamantami cartacunata chasquishcani. Achca turi ñañacuna ñuca cusata achcata cꞌuyashcata yachashpaca cushillami sintirini. Shinallataj ñuca cusapaj huauquipish paipaj huarmipish, ñuca sobrinacunapish achcatami ayudashcacuna. Chaimantami achcata agradicini.

Isaías 30:18-ta leyishpami alli sintirini. Chaipica: “Mandaj Diosca cancunata llaquingapaj shuyacunmi. Paica cancunata chashna llaquishpaca cꞌuyaj cashcatami ricuchinga. Mandaj Diosca cashcata ruraj Diosmi. Paipi shunguta churajcunaca tucuicunami cushichishca canga” ninmi. Cai versoca tucui llaquicunata tucuchingapaj Jehová Dios shuyacushcatami yuyachin. Paraisopi sumaj trabajocunata ruragrishcata yachashpaca allimi sintirini.

Irlanda llajtapica achcacunami Diosta rijsishcacuna. Paicunataca Jehová Diosca achcatami bendiciashca. Ñuca ashallatapish ayudashcata yuyarishpami cushilla sintirini. Jehová Diosta cazushpaca sumajtami causashun.