1, 2. a) ¿Filipenses 4:6, 7-pi nishca shinaca mana preocuparishpa causachunca Diosca imatataj rurashca? b) ¿Romanos 5:1-pi nishca shinaca Diosman mingarishcamantaca ima bendiciontataj chasquishcanchij? c) ¿Imamantataj achca llaquicunata charinchij? (Jahuapi tiyaj fotota ricui).

TUCUICUNAMI mana preocuparishpa alli causaita charishun ninchij. Chaimantami ama yalli preocuparingapaj Jehová Diosca shuj ayudata cun. Chai ayudataca Bibliapica “Diospaj sumaj causai” ninmi. Taita Dios chashna ayudashcamantami pagui ninchij (Filipenses 4:6, 7). Shinallataj bautizarishpaca Diosmanmi ñucanchij causaita mingarcanchij. Chashna rurashpami Diospaj ñaupajpi alli ricurishpa ‘paihuan sumaj causaita’ charinchij (Romanos 5:1).

² Tucuri punllacunapimi causacunchij. Shinapish Jehová Dios tucui llaquicunata anchuchina horasca manaraj chayamushcachu. Chaimantami achca millai gentecuna, problemacunapish tiyan (2 Timoteo 3:1-4). Shinallataj Diabloca gentecunatami pandata yachachishpa llaquichicun. Chaimantami  Diablopaj llullacunata ama cringapaj achcata esforzarina canchij (2 Corintios 10:4, 5). Chai jahuapish mana crij familiacuna ñucanchijmanta burlarijpi, ‘familiatami chꞌicanyachicungui’ nishpa rimajpimi ashtahuan preocuparinchij. Mana cashpaca ‘ña mana ñucanchij familia canguichu’ rimashpami llaquichincuna. Shinaca, ¿Diosta sirvishcamanta familia ucupi jarcaicuna tiyajpica imatataj rurana canchij?

3, 4. a) ¿Jesusca imatataj yacharca? b) ¿Jesusta catinaca imamantataj huaquinpica sinchi cagrirca?

³ Jesusca pai yachachishcacuna mana tucui gentecuna chasquinatami yacharca. Shinallataj paita catijcunata llaquichigrishcatami yacharca. Familia ucupipish jarcaicunami tiyana carca. Chaimantami paica cashna nirca: “Cai pachapi sumaj causai tiyachun shamushcataca ama yuyanguichij. Sumaj causai tiyachunca mana shamurcanichu, ashtahuanpish macanacui tiyachunmi shamurcani. Runacunapica churica yayata, ushushica mamata, nuerapish suedrata pꞌiñachunmi shamurcani. Runacunapi chashna pꞌiñajca quiquin huasi ucupurallapitajmi canga” nircami (Mateo 10:34-36).

⁴ Jesusca familiacunata chꞌicanyachingapaj mana shamurcachu. Ashtahuanpish “mana llullata huillangapajmi” shamurca (Juan 18:37). Shinapish ¿imamantataj Jesusca “cai pachapi sumaj causai tiyachun shamushcataca ama yuyanguichij” nirca? Paica maijanpish paita catij tucusha nishpaca jarcaicunata charinatami yachachisha nirca. Por ejemplo, huaquin familiacuna o amigocuna Diospaj Shimita ama yachachun jarcajpica llaquimi can. Caita yachashpami Jesusca, ñucata catijcunaca jarcaicunatami charinga nirca.

5. ¿Jesusta catijcunaca ima llaquicunatataj charishcanchij?

⁵ Jesusca, ñucata catisha nishpaca llaquicunatami chꞌimbapurana canguichij nircami (Mateo 10:38). Jesusta catishcamantami achcacunataca familiallataj chanzata rurashcacuna, mana ricunayachisha nishcacuna. Pero ahuantashpa catishcacuna. Chashna ahuantashcamantami Jesuspaj ñaupajpi alli ricurishcacuna. Paicunaca Diosta sirvingapajca huaquin cosascunatami huashaman saquishcacuna. Pero cunanca achca bendicioncunatami chasquishcacuna (Marcos 10:29, 30-ta leyipai).

6. ¿Ñucanchij familiacunata cꞌuyashpapish picunatataj ashtahuan cꞌuyana canchij?

⁶ Diosta sirvichun jarcajpipish ñucanchij familiacunataca cꞌuyanchijmi. Pero Diostapish Jesustapishmi paicunata yalli cꞌuyana canchij (Mateo 10:37). Caitapishmi yuyaipi charina canchij: Familiataraj ashtahuan cꞌuyashpa Diosta mana cazuchunmi Diabloca munan. ¿Diosta sirvishcamanta familia ucupica ima jarcaicunatataj ricuri tucun?

7. ¿Cusa o huarmi Diosta mana sirvijpica imatataj rurana canchij?

⁷ Bibliapica cazarashcacunaca problemacunatami charinga ninmi (1 Corintios 7:28). Cusa o huarmi Diosta mana sirvijpicarin ashtahuan problemacunatachari charishun.  ¿Chaipica imatataj rurana canchij? Cusa o huarmi Diosta mana sirvijpipish mana separarina o divorciarinachu canchij. Chaita ruranaca Diospaj ñaupajpica mana alli canchu (1 Corintios 7:12-16). Mana crij cusaca manachari Dios mandashca shina familiata ñaupajman pushanga. Shinapish familiapaj uma cashcamantami huarmica paitaca respetana can. Shinallataj cusaca paipaj huarmi Diosta mana sirvijpipish cꞌuyaihuanmi cuidana can (Efesios 5:22, 23, 28, 29).

8. ¿Cusa o huarmi Diospajta mana tanto rurachun saquijpica imatataj rurana canchij?

⁸ ¿Cusa o huarmi Diospajta mana tanto rurachun saquijpica imatataj rurashun? Por ejemplo, shuj panipaj cusaca, ‘asha punllacunallatami huillanaman llujshina cangui’ nircami. ¿Cambaj cusapish o huarmipish chaillatataj nijpica imatataj ruranguiman? Chaipica, “¿Diosta ama sirvichun nishpachu chashna nicun? Mana chashna cajpica ¿pai mañashcata rurai tucunillachu?” nishpami tapurina cangui. Imatapish alli yuyashpa decidishpaca mana tanto problemacunata charishunchu (Tito 3:2).

9. ¿Shuj cusa o huarmi Diosta mana sirvijpipish huahuacuna paicunata respetachunca imatataj rurana canchij?

⁹ Cusa o huarmi Diosta mana sirvijpica huahuacunata yachachinaca sinchichari canga. Por ejemplo, huahuacunataca Efesios 6:1-3-pi nishcata cazuchunmi yachachina canchij. Chaipica: “Cambaj yaya mamata alli ningui” ninmi. Pero cusa o huarmi Bibliapi yachachishcacunata mana pajtachijpica paita alli nina o respetanaca sinchichari canga. Chaimantami ñucanchijraj respetashpa huahuacunaman alli ejemplota cuna canchij. Shinallataj mana ñucanchij cusapaj o huarmipaj pandarishcacunallata ricunachu canchij. Ashtahuanpish ima allita rurashcamantami pagui nina canchij. Huahuacunapaj ñaupajpipish mana malpi quedachinachu canchij. Chaipaj randica cada cual Diosta sirvinata o mana sirvinata agllana cashcatami huahuacunaman yachachina canchij. Alli  huahuacuna cajpica mana crij cusa o huarmica Diosta rijsinatachari munanga.

10. ¿Cusa o huarmi mana crij cajpipish ima shinataj huahuacunaman Diosmanta yachachi tucunchij?

¹⁰ Maipica mana crij cusa o huarmica huahuacuna mana alli fiestacunapi participachunmi munanga. Shinallataj panda religionpi yachachishcata crichunchari munanga. Maijan cusacunaca huahuacunaman Diosmanta ama yachachichunchari huarmita mandanga. Chashna cajpipish huarmica huahuacunaman Diosmanta yachachingapajmi sinchita esforzarina can (Hechos 16:1; 2 Timoteo 3:14, 15). Cusaca uchilla huahuacunaman Bibliamanta estudiota cuchun o tandanacuicunaman pushachunca manachari saquinga. Pai nishcata huarmi cazushpapish huahuacunamanca Diosmanta parlanataca mana saquinachu can. Chashnami Jehová Diosta cꞌuyachun, pai nishcacunatapish cazuchun yachachinga (Hechos 4:19, 20). Chashna yachachijpipish jatunyashpaca huahuacunallatajmi Diosta sirvinata o mana sirvinata agllangacuna * (urapi tiyaj notata ricui) (Deuteronomio 30:19, 20).

11. ¿Imamantataj ñucanchij familiacunahuan problemacunata chari tucunchij?

¹¹ Testigo de Jehovacunahuan Bibliata yachai callarishpaca manachari ñucanchij familiacunaman huillarcanchij. Pero chai yachaicuna ñucanchij shunguman chayajpica ‘Diostami sirvisha nini’ nishpachari familiacunaman huillarcanchij (Marcos 8:38). ¿Diosta cazusha nishcamanta familia ucupi problemacunata charishcanguichu? Shinaca, ¿familiahuan tandalla cangapaj, Diosmantapish ama caruyangapajca imatataj rurana cangui? Huaquin yuyaicunata ricushun.

12. a) ¿Bibliata yachai callarijpica imamantataj familiacunaca preocuparingacuna? b) ¿Bibliata ama yachachun familiacuna jarcasha nijpica imatataj rurai tucunchij?

¹² Ñucanchij familiacuna imata yuyashcata alli intindishunchij. Bibliamanta yachai callarishpaca cushillami sintirircanchij ¿nachu? Shinapish ñucanchij familiacunaca pandata yachacushcata yuyashpa, mana alli religionta caticushcata yuyashpachari preocuparingacuna. Shinallataj huaquin fiestacunata ña mana rurajpichari paicunata mana cꞌuyashcata yuyangacuna. Chai jahuapish, “huañujpica Diosca castigangami” nishpachari preocuparingacuna. Paicuna imata nijpipish alli uyashpami imamanta preocuparishcata alli intindina canchij (Proverbios 20:5). Ñucanchijpish apóstol Pablo layami cai tucunchij. Paica Diosmanta tucui gentecunaman huillangapajmi paicuna imata yuyashcata intindingapaj esforzarirca. Ñucanchij familiacuna imata yuyashcata, ima shina sintirishcata alli intindishpaca paicunamanpish Diosmanta huillai tucushunmi (1 Corintios 9:19-23).

13. ¿Ima shinataj ñucanchij familiacunahuan parlai tucunchij?

¹³ Alli shimicunahuan parlashunchij. Colosenses 4:6-pica: “Cancunapaj rimaicunaca cachihuan mishquichishca shina uyananqui cachun” ninmi. Ñucanchij  familiacunahuan uyananqui o alhaja shimicunahuan parlanaca huaquinpica sinchimi can. Chaimantami mana pꞌiñarishpa parlangapaj Jehová Diosta paipaj espirituhuan ayudachun mañana canchij. Shinallataj paicunapaj crishcacuna panda cajpipish “pandaricunguimi” nishpalla mana purinachu canchij. Chaipaj randica apóstol Pablo nishcatami catina canchij. Paica: “Llaqui tucunman nijcunatapish paicunapish llaqui tucushca canman mana ninchijchu. Ñucanchijta catirashpa llaquichijpipish, apanchijllami. Ñucanchijta millaita rimajpipish, cꞌuyaihuanmi cutichinchij” nircami (1 Corintios 4:12, 13).

14. ¿Allita rurashpa causajpi familiacunaca ñucanchijmantaca imatataj yuyangacuna?

¹⁴ Dios mandashca shina causashunchij. Alli shimicunahuan parlashpaca ñucanchij familiacunahuan allimi apanacushun. Pero Dios mandashca shina causashpami paicunata ashtahuan ayudai tucushun (1 Pedro 3:1, 2, 16-ta leyipai). Cusandij huarmindij cꞌuyanacushpa causajpi, huahuacunatapish alli huiñachijpi, allita rurashpa causajpica testigo de Jehovacunaca cushilla causaj cashcatami familiacunaca ricungacuna. Ñucanchij familiacuna mana nunca testigo tucujpipish Jehová Diosta cazushcamantami cushilla sintirishun.

15. ¿Ñucanchij familiacunahuan ama pꞌiñanacungapajca imatataj rurai tucunchij?

¹⁵ Ama pꞌiñanacungapaj imata ruranata yuyashunchij. Ñucanchij familiacunahuan parlana cajpica paicunahuan ama pꞌiñanacungapajmi imata ninata alli yuyana canchij (Proverbios 12:16, 23). Australia llajtapi causaj shuj panica: “Ñuca suedroca Bibliamanta yachachunca mana munajchu carca. Chaimantami paihuan manaraj parlashpa ama rimanacungapaj Diosta mañaj carcanchij. Shinallataj imamanta parlanatami alli yuyaj carcanchij. Huaquinpica paihuan achca tiempota parlashpaca religionmanta rimanacujllami carcanchij. Chaimantami ashalla tiempota paihuan parlanata yuyarircanchij” ninmi.

16. ¿Ñucanchij familiacunahuan pꞌiñanacushcamanta llaquilla sintirishpaca imatataj rurai tucunchij?

¹⁶ Ñucanchij familiacunahuan alli causasha nishpapish huaquinpica problemacunatami charinchij. Paicunata cꞌuyashcamantami paicunahuan mana pꞌiñanacusha ninchij. Familiacunahuan pꞌiñanacushpaca llaquillami sintirishun. Chashna sintirishpaca tucuimanta yallica Diosta cꞌuyana cashcatami yuyarina canchij. Diosta achcata cꞌuyajta ricushpaca cambaj familiacunaca Diosta sirvina ashtahuan importante cashcatami ricungacuna. Ima shina cajpipish Diosta sirvichunca ni pita mana obligai tucunchijchu. Pero Diosta sirvishpa alli causana cashcatami ricuchi tucunchij. Jehová Diosca gentecunataca achcatami cꞌuyan. Chaimantami cada uno paita sirvinata o mana sirvinata agllachun saquin (Isaías 48:17, 18).

17, 18. ¿Shuj familia Diosmanta caruyajpica imatataj rurai tucunchij?

¹⁷ Shuj familia juchata rurashcamanta congregacionmanta llujshichijpi, o testigo de Jehová ña mana casha ninichu nishpa paillataj Diosmanta caruyajpica shungu ucupi nanarishcami sintirishun. ¿Chashna tucujpica imatataj rurashun?

¹⁸ Diospajta rurashpa catishunchij. Diospi tucui shunguhuan crishpa catingapajca Bibliatami tucui punllacuna leyina canchij. Shinallataj tandanacuicunaman alli prepararishpa rinata, huillanaman llujshinata, Diosta mañanatapish mana cungarinachu canchij (Judas 20, 21). Pero chashna ruracushpapish llaquillaraj sintirishpaca ¿imatataj rurashun? Diospajta rurashpa catishunchij. Chashnami mana tanto llaquirishun. Salmo 73-ta quillcaj runata yuyarishun. Paica yallitaj preocuparishpami llaquilla puricurca. Pero Diospajta rurashpami catirca. Chashnami pandata yuyanata saquishpa alli sintirirca (Salmo 73:16, 17). Cai Salmota quillcaj runa layallataj rurashpami ñucanchijpish alli sintirishun.

19. ¿Jehová Dios disciplinajpica ima shinataj cazushcata ricuchinchij?

¹⁹ Jehová Dios disciplinajpi cazushunchij. Ima juchata rurashcamanta disciplinajpica llaquillami sintirinchij. Pero qꞌuipaca ñucanchijpajpish, juchata rurajpajpish alli cashcatami ricushun (Hebreos 12:11-ta leyipai). Jehová Diosca: ‘Juchata rurashcamanta mana arrepintirijcunahuanca ama tandanacuichijchu’ nishpami mandan (1 Corintios 5:11-13). Sinchi cajpipish Jehová Diosta cazunami canchij. Chaimantami congregacionmanta shuj familiata llujshichishca cajpica imamantapish paicunahuan ama parlangapaj cuidadota charina canchij. Por ejemplo, telefonoman cayashpa, mensajecunata cachashpa, cartacunata escribishpa o Internetpi paicunahuan mana parlanacunallachu canchij.

20. ¿Imatataj shuyashpa catina canchij?

²⁰ Ama shaicushpa shuyashunchij. Cꞌuyaica “tucuita shuyanllami”. Chaimantami ñucanchij familia Diospajman tigrachun shuyacunchij (1 Corintios 13:7). Congregacionmanta llujshichishca familiaca ñachari paipaj causaipi cambiocunata ruracun. Chashna cajpica pai Bibliata leyishpa, alli yachashpa Diospajman cutirichunmi Diosta mañai tucunchij (Isaías 44:22).

21. ¿Ñucanchij familiacuna Jesusta catichun jarcajpica imatataj rurai tucunchij?

²¹ Jesusca paita catijcunamanca, tucui runacunamanta yallica ñucatami ashtahuan cꞌuyana canguichij nircami. Familiacuna jarcajpipish paimanta mana caruyanatami Jesusca alli yacharca. ¿Jesusta catishcamanta ñucanchij familiacuna contra tucushcachu? Chashna cajpica Jehová Diospi tucui shunguhuan crishpa paipaj ayudata mashcashunchij (Isaías 41:10, 13). Tucuipi cazujpica Jehovapish Jesuspish cushillami cangacuna. Paicunaca ñucanchijtaca achcatami bendicianga. Caita yachashpaca ¿manachu cushilla sintirinchij?