ÑUCACA 1934 huatapimi huacharircani. Ñuca yaya mamaca Fred y Edna Molohan shuticunami carca. Paicunaca ña 20 huatacunatami Estudiantes de la Biblia (testigos de Jehová) carcacuna. Paicuna Diosta cꞌuyanata yachachishcamantami achcata agradicini. Ñucanchijca Kansas llajtapi saquirij Parsons pueblopimi causarcanchij. Ñucanchij congregacionpica casi tucuicunami ungidos carcacuna. Tandanacuicunaman, Diospaj Shimita huillanamanpish mana faltajchu carcanchij. Sábado chishicunataca callecunapimi huillaj carcanchij. Cunanca chashna huillanataca predicación pública nishpami rijsinchij. Huaquinpica shaicushcami sintirij carcanchij. Pero huillashca qꞌuipaca ñuca yayaca siempremi heladota micunaman pushaj carca.

Ñucanchij uchilla congregacionca achca pueblocunapi, achca granjacunapimi Diosmanta huillana carca. Publicacioncunata cujpica gentecunaca legumbrecunata, atillpa luluncunata, causaj atillpacunatapishmi cuj carca. Ñucanchijca mana tanto cullquita charircanchijchu. Publicacioncunata charingapajpish ñuca yayaca cullquitami cuj carca. Chaimi gentecuna cushcacunahuanca micunitapaj pajtaj carca.

Ñuca yaya mamaca shuj gramófono nishcahuanmi huillajcuna carca. Ñucaca uchillaraj cashcamantami chaitaca mana utilizai pudircani. Pero revisitacunaman, estudiocunaman pushajpica huauqui Rutherfordpaj grabashca conferenciata churashpa ayudanatami munaj carcani.

Ñuca yayaca 1936 huatapi llujshishca Ford carrotami charirca. Chaica huillangapajmi shuj alli ayuda carca. Paica shuj jatun parlantetami carro jahuapi churaj carca. Puntaca shuj musicatami churaj carcanchij. Gentecuna ña uyai callarijpica shuj grabashca conferenciatami churaj carcanchij. Conferencia tucurijpica yachanata munajcunamanmi publicacioncunata cuj carcanchij.

Cherryvale (Kansas) pueblopimi ñuca yayaca domingocunapi grabacioncunata uyachingapaj shuj parqueman rij carca. Chai punllacunami achca gentecunaca chai parquepi samarinaman rijcuna carca. Policiaca grabacioncunata parque ucupi ama churachun nishpapish canllaman churachunca saquircallami. Chaimi ñuca yayaca mana imata nishpa parque cꞌuchullapi carrota shayachirca. Chaipimi gentecunaca  grabacionta alli uyashpa catircacuna. Ñuca yayahuan, ñuca jatun huauqui Jerryhuan chashna huillashpa purinaca sumajmi carca.

Manaraj 1940 huatacuna cajpimi “campañas relámpago” nishcapi participaj carcanchij. Huillanata jarcashca lugarcunapi ashalla tiempopi huillana cashcamantami chaipi participarcanchij. Callaripi parlashca shinaca manaraj pacarijpimi jatarishpa huasi pungu ucucunapi tratadocunata, folletocunata upalla saquij carcanchij. Qꞌuipaca chai llajtamanta llujshishpami maijanta policía japishcanman nishpa tucuicuna tandanacuj carcanchij.

Chai huatacunallapitajmi “marchas de información” nishcapi huillashpa participaj carcanchij. Hombros jahuapi letrerocunata aparishpami llajtacunapi marchaj carcanchij. Ñuca pueblopipish chashna rurashcatami yuyarini. Huauqui panicunaca “La religión es un lazo y un fraude” nishca letrerocunatami aparishpa rijcuna carca. Ñucanchij huasimanta llujshishpami shuj kilómetro yallita purishpa tigrajcuna carca. Paicunataca antes ni pi mana jarcarcacunachu. Pero achca gentecunami ima pasacushcata ricushpa saquirijcuna carca.

Ñuca familiaca Texas llajtamanmi asambleacunaman rijcuna carca. Ñuca yayaca ferrocarril empresapimi trabajaj carca. Chaica Misuri, Kansas, Texas llajtacunatami rij carca. Chaimantami familiacunata visitanaman, asambleacunamanca gratis rij carcanchij. Ñuca mamapaj jatun turi Fred Wismar, paipaj huarmi Eulalieca Temple (Texas) llajtapimi causajcuna carca. Tío Fredca 1900 callari huatacunapimi joven cashparaj Diospaj Shimimanta yachai callarishca carca. Bautizarishpaca imalla yachacushcatami paipaj panicunaman parlashca carca. Ñuca mamamanpishmi parlashca carca. Ñuca tiotaca Texas centromanta huauqui panicunaca allimi rijsijcuna carca. Chaipimi paica siervo de zona (superintendente de circuito) shina sirvirca. Paica alli shungu, cushilla runami carca. Diosta sirvinataca achcatami munarca. Ñucapajca shuj alli ejemplomi carca.

1941 huatapica San Luis (Misuri) pueblomanmi shuj jatun asambleaman trenpi rircanchij. Chaipica tucui huambracunata, jovencunatami plataforma cꞌuchullapi tiyarishpa huauqui Rutherfordpaj “Hijos del Rey” nishca conferenciata uyachun invitarcacuna. Chaipica 15.000 yalli jovencunami carcanchij. Conferencia tucurishca qꞌuipaca huauqui Rutherfordca paipaj ayudajcunandijmi cada unoman shuj mushuj librota curca. Chai libroca Hijos (Huahuacuna) nishcami carca.

Abril de 1943-taca Coffeyville (Kansas) pueblopimi “Llamada a la Acción” nishca shuj uchilla asambleata charircanchij. Chai asambleapimi Escuela del Ministerio Teocrático parteta tucui congregaciocunapi charingacuna nishpa huillarca. Shinallataj 52 leccionesta charij shuj folletotami chasquircanchij. Chai folletotami escuelapica utilizana carcanchij. Ñucaca chai huatallapitajmi punta asignacionta curcani. Chai asambleapimi shujtaj gentecunandij shuj chiri yacupi bautizarircanchij. Chai yacuca shuj cꞌuchulla granjapimi saquirirca. Chai punllaca ñucapajca yallitaj sumajmi carca.

1951 huatapi colegiota tucuchishca qꞌuipaca ñuca causaipi imata ruranatami decidina carcani. Ashtahuantajca Betelpi sirvinatami munarcani. Ñuca jatun huauqui Jerryca chaipimi sirvishca carca. Chaimi Brooklynpi caj Betelman enseguida shuj solicitudta cacharcani. Asha tiempo qꞌuipalla invitajpimi 10 de marzo de 1952 huatamanta Betelpi sirvi callarircani. Chai decisionta agllashcamantami Diosta ashtahuan sirvi pudircani.

Betelpica revistacunata y shujtaj publicacioncunata imprimishpa trabajanatami munarcani. Pero nunca mana chaipi trabajarcanichu. Betelpica puntaca mesero shina, qꞌuipaca cocinapimi trabajarcani. Chaipi trabajanataca achcatami munarcani y achcatami yacharcani. Shinallataj turnopi trabajaj cashcamantami punllaca bibliotecaman rishpa achca librocunahuan Bibliata estudiaj carcani. Chaimi Yaya Dioshuan alli amigo cachun, ñuca crishcacuna sinchiyachun, Betelpi mai pudishcacama sirvina munaita charichun ayudarca. Ñuca jatun huauqui Jerryca 1949 huatapi Betelmanta llujshishpami Patricia shuti panihuan cazararca. Pero Brooklyn llajtallapitajmi causai callarircacuna. Betelpi sirvi callarijpica paicunami achcata animashpa ayudarca.

Betelman chayashca asha tiempo qꞌuipallaca huauquicunaca shujtaj ladopi conferenciata cunaman richunmi ashtahuan huauquicunata agllacurcacuna.  Agllashca huauquicunataca Brooklynmanta 322 kilometroscama saquirij congregacioncunata shuj huatata visitachunmi cacharca. Paicunaca shuj horasta conferenciata cushca qꞌuipami huauqui panicunahuan huillanaman llujshina carcacuna. Ñucatapish chaita rurachunmi agllarcacuna. Visitacunata rurai callarishpa, conferenciacunata cui callarishpaca achcatami manchaj carcani. Congregacioncunamanca trenpimi rij carcani. 1954 huatapi invierno horas shuj domingo chishi ima tucushcatami yuyarini. Nueva York llajtamanca trenpimi tigracurcani. Betelmanca amsayacujtami chayana carcani. Pero achca razu, sinchi huaira jatarishpami trenpaj motorcunata dañarca. Chaimi estacionmanca lunes casi las 5 de la mañanata chayarcani. Qꞌuipaca metropimi Brooklynman rircani. Tucui tuta trenpi mana dormishca, shaicushca, asha qꞌuipayashca chayashpapish cocinapi trabajangapajmi directo rircani. Pero chai problemacunata pasanaca mana ima carcachu. Fin de semanacuna huauqui panicunata animana, ayudana, achca amigocunata charinaca mai sumajmi carca.

Betelpi punta huatacunata sirvicujpimi WBBR radiopi participachun invitarcacuna. Chai radioca calle Columbia Heights, edificio 124, segundo pisopimi carca. Chaipica cada semanami Bibliata estudiangapaj shuj grupo tiyarca. Ñucapish chaipimi participaj carcani. Huauqui Alexander H. Macmillanpish chai programapimi participaj carca. Cai huauquitaca Mac nishpami rijsij carcanchij. Paica achca huatacunatami Betelpi sirvirca. Ima llaquicunahuan cashpapish Diosta alli sirvishpami catirca. Chaimantami asha tiempollata Betelpi cajcunapajca shuj alli ejemplo carca.

1958 huatapica Escuela de Galaadpi ayudachunmi ñucata invitarcacuna. Ñuca trabajoca Galaadmanta rij misionerocunapaj visata llujshichishpa cuna, viajecunata organizanami carca. Chai punllacunapi avionpi viajanaca achca cullquimi valirca, chaimantami ashalla graduashcacuna avionpi viajai pudircacuna. África ladopi, Asia ladopi sirvinaman rij misionerocunaca cargata apaj barcocunapimi rina carcacuna. Avionpaj pasajecuna ña uriyajpica cachashca llajtacunamanmi misionerocunaca avionpi ri callarircacuna.

1960 huatapica ashtahuanmi trabajota charircani. 1961 huatapajca Estados Unidosmanta Europaman asambleas internacionalesman avionpi viajangapajmi fletecunata organizana carcani. Ñucallatajmi shuj viajepica Nueva York llajtamanta Hamburgo (Alemania) llajtaman rircani. Chai llajtapi jatun tandanacui tucurishca qꞌuipaca Betelmanta chuscu sirvijcunapurami shuj autota alquilashpa Italiaman rircanchij. Chaipimi sucursalta visitarcanchij. Chai llajtamantaca Franciamanmi rircanchij. Qꞌuipaca Pirineos urcucunata pasashpami Españaman chayarcanchij. Chai llajtapi Diosmanta huillanaca mana permitidochu carca. Barcelona llajtapi huauquicunamanca pacallami publicacioncunataca shuj regalota shina cuj carcanchij. Chai huauquicunata rijsinaca sumajmi carca. Españamantaca Ámsterdam llajtamanmi rircanchij. Cutin chaimantami Nueva York llajtaman tigrarcanchij.

1962 huatapica 583 huauqui panicuna muyundij allpapi huaquin jatun tandanacuicunaman representante shina richunmi viajeta organizana carcani. Chai  jatun tandanacuicunaca 1963 huatapi “Buenas Nuevas Eternas” nishca tematami charirca. Cai huauqui panicunaca Europa, Asia, Pacífico sur lugarcunapimi jatun tandanacuita charigrircacuna. Cutin ultimotaca Honolulú (Hawái) y Pasadena (California) llajtacunapimi charigrircacuna. Chai viajecunapica Líbano y Jordania llajtacunamanpishmi rina carcacuna. ¿Imapaj? Bibliapi parlashca lugarcunata visitangapaj. Avionpaj pasajecunata randishpa, hotelpi cuartocunata alquilana cashpapish ñuca trabajaj departamentopica huaquin llajtacunapaj visatapishmi llujchina carcani.

1963 huataca ñucapajca sumajmi carca. Chai huatapimi 29 de juniota Misuri llajtamanta Lila Rogers shuti panihuan cazararcani. Paica ñami quimsa huatacunata Betelpi sirvicurca. Cazarashca shuj semana qꞌuipaca jatun tandanacuicunaman representante shina rij huauqui panicunahuanmi tandanacurcanchij. Grecia, Egipto, el Líbano llajtacunatami visitarcanchij. Qꞌuipaca Beirut nishca llajtamantaca Jordania llajtapi tiyaj aeropuertomanmi rircanchij. Chai llajtapica Diosmanta huillanatami jarcashcacuna carca. Chaiman yaicuchunpish Testigocunamanca visata mana curcacunachu. Chaimantami chaiman chayashpaca imashi tucushun nishpa yuyarcanchij. Pero terminalman chayajpica shuj grupo huauqui panicunami, “Testigo de Jehovacuna, alli shamushca caichij” nishpa cartelcunahuan shuyacushcacuna carca. Chaita ricushpami cushilla sintirircanchij. Bibliapi parlashca lugarcunata ricuna; Abraham, Isaac, Jacob causashca lugarcunata ricuna; Jesuspish paipaj apostolcunapish maillapi huillashcata ricuna; Diosmanta “tucui cai pachapi” huillai callarishca lugarcunata ricunaca sumajmi carca (Hechos 13:47).

55 huatacunatami ñuca huarmica tucui asignacioncunapi apoyashca. España y Portugal llajtacunapi Diosmanta huillachun mana saquijpipish tauca cutinmi chai llajtacunata visitarcanchij. Huauqui panicunataca achcatami animarcanchij. Publicacioncunata, ima minishtirishcacunata apashpami ayudarcanchij. Cádiz (España) llajtapi prezupi caj huauqui panicunatapishmi visitagrircanchij. Shuj animachij conferenciata paicunaman cushcamantami cushilla sintirircani.

1963 huatamantami África, América Central, América del Sur, Australia, Europa, Hawái, Asia, Nueva Zelanda, Puerto Rico llajtacunapi jatun asambleacunaman huauqui panicuna viajachun organizashpa ayudashcani. Ñuca huarmipish ñucapish sumaj asambleacunapimi cashcanchij. Por ejemplo, 1989 huatapi Varsovia (Polonia) llajtapica shuj jatun asambleami tiyarca. Chaipica Rusiamanta caj achca huauqui panicunami carca. Paicunaca chai asambleamanca punta cutinmi rishcacuna carca. Paicunamanta maijancunaca Unión Sovieticapaj carcelcunapimi, paicunapaj crishcacunamanta achca huatacunata pasashcacuna carca.

Ñucanchij caishuj asignacionca shujtaj llajtacunapi caj betelitacunata, misionerocunata visitashpa animanami carca. Último visitapica Corea del Sur llajtamanmi rircanchij. Chaipimi Suwon ciudadpi caj carcelpi 50 huauquicunata rijsircanchij. Tucuicunami animarishca carcacuna. Chaimanta llujshishpaca Yaya Diosta cutin sirvishpa catinatami munarcacuna. Paicunata rijsishpami ñucanchijpish ashtahuan animarircanchij (Romanos 1:11, 12).

Cai tucui huatacunataca Jehová Dios bendiciashcamanta paipaj pueblo ima shina mirarijtami ricushcani. 1943 huatapi ñuca bautizarijpica casi 100 mil publicadorcunallami tiyarca. Pero cunanca 8 millón yallimi 240 llajtacunapi Yaya Diosta sirvinchij. Cashna mirarishpa catichunca ashtahuantajca Galaadmanta graduashcacunami ayudashca. Cai tucui huatacunata misionerocunata apoyana, paicunapaj asignacionman chayachun ayudanaca, ñucapajca yallitaj sumajmi cashca.

Joven cashparaj Diosta sirvinata, Betelpi sirvinata decidishcamantami cushilla cani. Chai pachamantami Jehová Diosca ñucataca achcata bendiciashca. Betelpi ñuca huarmihuan sirvishcamanta, Brooklyn llajtapi caj congregacioncunapi achca huatacunata sirvishcamantaca cushillami canchij. Tucui vidapaj amigocunata tarishcamantapish cushillami canchij.

Betelpica ñuca huarmipaj ayudahuanmi sirvishpa catini. Ñami 84 huatacuna yallita charini. Pero shuj trabajotami ruracuniraj. Sucursalpaj cartacunata cachashpa, chasquishpami trabajani.

Diospaj organizacionpi cana, Malaquías 3:18 pajtarijta ricunaca mai sumajmi can. Chaipica: “Ñucapajman cutirishpami cashcata rurajtapish, millaita mana rurajtapish, Diosta sirvijtapish, Diosta mana sirvijtapish yachaj chayanguichij” ninmi. Cai mundoca punllantami llaquinai can. Gentecunapish ima esperanzata mana charincunachu, mana cushilla causancunachu. Pero Diosta sirvijcunaca shamuj punllapaj sumaj esperanzata charishcamantami, cai llaqui punllacunapipish cushilla causanchij. Diospaj Mandanamanta huillanaca shuj bendicionmi can (Mateo 24:14). Chai gobiernoca ñallami tucui mana allicunata tucuchishpa cai Allpataca shuj alaja paraisota ruranga. Chai punlla ña chayamuchunmi shuyacunchij. Chaipica ungüicuna illaj, huiñai huiñaitami cai Allpapi causashun.