1, 2. Moisés huañushca qꞌuipaca ¿Josueca ima responsabilidadtataj chasquirca?

JEHOVÁ DIOSCA Josuetaca: “Ñucapajta ruraj Moisesca ñami huañun. Cunanca israelcunaman ñuca cusha nishca allpata japingapajca, canmi paipaj randi shayarishpa tucui israelcunandij cai Jordán jatun yacuta chꞌimbana cangui” nircami (Josué 1:1, 2). Josueca casi cuarenta huatacunatami Moisesta sirvishpa causashca carca. Pero ñapishmi israelcunata pushaj tucurca.

² Moisesca achca huatacunatami israelcunata pushaj cashcarca. Chaimi Josueca, cunanca ñuca pushacujpica israelcunaca imatashi ningacuna nishpa yuyashcanga (Deuteronomio 34:8, 10-12). Bibliamanta parlaj shuj libroca Josué 1:1, 2-manta parlashpami: “Ñaupa punllacunapish cunan punllacunapish shuj llajtata pushachun mushuj mandajta churan punllacunami ashtahuan problemacunaca tiyan” ninmi.

3, 4. a) Josué paipi confiashcamantaca ¿Jehová Diosca ima shinataj paita bendiciarca? b) ¿Imatataj tapurinata pudinchij?

 ³ Josueca mana yangamanta manchaita charircachu. Shinapish Yaya Diospi confiashpami pai mandashcacunataca utca pajtachirca (Josué 1:9-11). Jehová Diosca Josué paipi confiajpimi bendiciarca. Chaimantami paitapish israelcunatapish pushachun shuj angelta cacharca. Chai angelca “Rimashca” shuti, Diospaj punta Churimi cashcanga (Éxodo 23:20-23; Juan 1:1).

⁴ Josué paicunata mandai callarijpica Jehová Diospaj ayudahuanmi israelitacunaca acostumbrarircacuna. Cunan punllacunapish achca cambiocunami tiyan. Ñucanchijpish, “Diospaj organizacionca ñaupajmanmi caticun. Chaimanta ¿Jesús ñucanchijta pushacushcapi confianaca imamantataj alli canga?” nishpami tapurinata pudinchij (Mateo 23:10-ta liyipai). Chaita yachangapajca, ñaupa tiempopi paipaj pueblo ucupi cambiocuna tiyajpi Jehová Dios ima shina pushashcata ricushun.

5. ¿Jericó llajta cꞌuchullapi cashpaca Josueca pihuantaj tuparca? (Página 16-pi tiyaj dibujota ricui).

⁵ Jordán jatun yacuta chꞌimbashca qꞌuipa israelitacunahuan ima tucushcata ricushun. Jericó llajta cꞌuchullapi cashpaca Josueca shuj runatami ricurca. Chai runaca shuj espadatami maquipi charicurca. Chaimi Josueca: “¿Canca ñucanchijpurachu cangui? ¿Mana cashpaca ñucanchijta pꞌiñajcunapuramantachu cangui?” nishpa tapurca. Paica, “Mandaj Diospaj soldadocunata mandajmi cani” nishpami cutichirca. Diospaj pueblota difindingapaj shuj angelmi carca. Chaimi Josueca mancharirca (Josué 5:13-15-ta liyipai). Shujtaj versocunapica Jehová Dios Josuehuan parlashcatami nin. Pero Yaya Diosca shuj angelta cachashpami Josuehuan parlashcanga. Shujtaj cutincunapish Jehová Diosca paipaj randi parlachunmi shuj angelta cachaj carca (Éxodo 3:2-4; Josué 4:1, 15; 5:2, 9; Hechos 7:38; Gálatas 3:19).

6-8. a) Diospaj mandashcacunaca ¿imamantataj mana tanto alli cashca laya ricurishcanga? b) ¿Diospaj mandashcacunaca imamantataj alli carca? (Notatapish ricui).

⁶ Chai angelca Jericó llajtata mishangapaj imallata rurana cashcataca ñami Josuemanca huillashca carca. Pero callaripica huaquin mandashcacuna mana tanto alli cashca shinami ricurishcanga. Por ejemplo, angelca tucui soldadocunata circunsicionta rurachunmi mandarca. Shina rurajpica soldadocunaca huaquin punllacunatami macanacungapaj fuerzata mana charinman carcacuna. Chaimanta, ¿chai punllacunapi circuncisionta ruranaca allichu carca? (Génesis 34:24, 25; Josué 5:2, 8).

⁷ Chai soldadocunaca enemigocuna ñucanchijta llaquichijpica ima shinataj familiataca cuidashun nishpami yuyashcangacuna. Pero Jericó llajtamanta cꞌaricunaca llaquichinapaj randica mancharcacunami. Bibliapica: “Jericopi causajcunaca israelcunata manchashcamantami, chai puebloman yaicuna pungucunataca allitaj huichcarishcacuna carca. Chaimantami chai pueblopi causajcunaca pi mana yaicui tucurcacuna, mana llujshi tucurcacuna” ninmi (Josué 6:1). Chaimi israelcunaca Dios alli pushaj cashcata ricushpa ashtahuan paipi confiashcangacuna.

⁸ Yaya Diosca israelcunataca Jericó llajtataca ama llaquichinguichij nishpami mandarca. Ashtahuanpish paicunaca chai llajtapaj pirca huashatami sujta punllacunataca cada punlla shuj cutin muyuna carcacuna. Cutin canchis punllapica canchis cutinmi muyuna carcacuna. Shinapish maijan soldacunaca chaita rurashpaca tiempota, fuerzastami yangamanta pirdicunchij nishpami yuyashcangacuna. Pero  Israel llajtata pushaj Jehová Diosca imata ruracushcataca allimi yacharca. Dios nishca shina rurashcamantami israelcunaca chai llajtata japircacuna. Paicunapaj crishcacunapish ashtahuanmi sinchiyarca. Ashtahuancarin Jericó soldadocunahuan macanacunamantami librarircacuna (Josué 6:2-5; Hebreos 11:30) * (urapi tiyaj notata ricui).

9. ¿Imamantataj Diospaj organización ima nishcataca cazuna canchij? Shuj ejemplomanta parlai.

⁹ ¿Josuehuan israelcunahuan ima pasashcamantaca imatataj yachacunchij? Diospaj organizacionpi ima cambiocuna tiyajpica maipica mana alli intindinchijchu. Por ejemplo, ñaupaca Bibliata estudiacushpa, huillacushpa y tandanacuicunapica celularta tabletacunata utilizanaca mana tanto alli canchu nishpachari yuyarcanchij. Pero cunanca chaicunata utilizashpami beneficiocuna tiyashcata tal vez ricui pudishcanchij. Chaimantami callaripi ima dudata charishpapish Diospaj organización nishcacunataca cazuna canchij. Cambiocuna tiyashcamanta alli resultado tiyashcata ricushpaca ñucanchij crishcacunami ashtahuan sinchiyan. Huauqui panicunahuanpish ashtahuanmi tandalla canchij.

10. ¿Circuncisionmanta imata rurana cashcata yachachunca pitaj cuerpo gobernantepi cajcunata ayudacurca?

¹⁰ Cornelio runa Jesusta catij tucushcamantaca 13 huatacunami pasashca carca. Chai punllacunapica Jesusta catij huaquin judiocunaca circuncisionta rurana cashcatami difindishpa catircacuna (Hechos 15:1, 2). Antioquía llajtapi caj huauquicunaca cai yuyaimantami pꞌiñarinacurcacuna.  Chaimi chai llajtamanta ancianocunaca apóstol Pablotaca Jerusalenman cacharca. Cuerpo gobernantepi caj huauquicunata circuncisionta rurana o mana rurana cashcata tapuchun. Pero ¿paicunachu cachashca canga? Pabloca Jesús ricuchishcamantami Jerusalenman huichiyashcata nirca. Circuncisionta rurana o mana rurana yuyaimanta cuerpo gobernantepi caj huauquicuna allichichunca Jesucristomi ayudacurca (Gálatas 2:1-3, NM).

11. a) Achca judiocunaca circuncisionmantaca ¿imatataj yuyashpa catircacuna? b) Jerusalenmanta ancianocunata apoyashcata ricuchingapajca ¿Pabloca imatataj rurarca? (Notatapish ricui).

¹¹ Jesucristo ayudajpica ¿cuerpo gobernantepi caj huauquicunaca imatataj rurarcacuna? Paicunaca Jesusta catij mana judiocuna circuncisionta rurana mana minishtirishca cashcatami huillarcacuna (Hechos 15:19, 20). Shinapish huaquin huatacuna qꞌuipaca achca judiocunami paicunapaj huahuacunata circuncisionta rurashpa catircacuna. Shinallataj Jerusalenmanta ancianocunaca apóstol Pablo Moisesman cushca leyta mana cazucushcatami uyarcacuna. Chaimantami Pablotaca mana yuyashcata rurachun cacharcacuna * (urapi tiyaj notata ricui) (Hechos 21:20-26). ¿Imatataj rurana carca? Chuscu cꞌaricunatami Diospaj huasipi maillarichun pushana carca. Chaimi Moisesman cushca leyta respetacushcata gentecunaca ricuna carca. Pabloca chaita ruranaca mana allichu can, judiocuna circuncisionmanta mana alli intindishcamantami chai problemaca tiyan ninmanmi carca. Pero mana chaita rurarcachu. Ashtahuanpish huauqui panicuna tandalla cachunmi ancianocunataca humildemente apoyarca. Jesús huañushcamantami Moisesman cushca leyca ña tucurirca. Pero ¿imamantataj Jesusca cai problema achca tiempota tiyashpa catichun saquirca? (Colosenses 2:13, 14).

12. ¿Imamantataj Jesucristoca circuncisionmanta problema allichirichunca achca tiempo pasachun saquishca canga?

¹² Mushuj yachachishcacunata alli intindingapajca achca tiempotachari minishtinchij. Jesusta catij judiocunaca Moisesman cushca leyta ña mana pajtachina cashcata intindingapajca achca tiempotami minishtircacuna (Juan 16:12). Huaquincunapajca Dioshuan alli cashcata ricuchingapaj circuncisionta rurana mana minishtirishca cashcata intindinaca sinchimi carca (Génesis 17:9-12). Shujtajcunaca chaita ruranata saquishcamanta paicuna causan llajtapi judiocuna llaquichinatami mancharcacuna (Gálatas 6:12). Shinapish tiempohuanca Jesucristoca apóstol Pablopaj cartacunapimi imata rurana cashcata ashtahuan intindichirca (Romanos 2:28, 29; Gálatas 3:23-25).

13. ¿Jesús congregacionta pushacushcata apoyangapajca imatataj yuyarina canchij?

¹³ Diospaj organizacionpi huaquin cambiocuna imamanta tiyashcata mana intindishpaca, ñaupa tiempo Diosta sirvijcunata Jesús ima shina pushashcatami yuyarina canchij. Jesusca Josuepaj punllacunapipish punta siglopipish  siempremi Diospaj pueblotaca alli pushashca. Chaita rurashpami paicunataca alli cuidashca, sinchi feta charichun, tandalla cachun ayudashca (Hebreos 13:8).

14-16. “Alli cazuj alli yuyaiyuj” sirvij huauquicuna mandashcacunaca, ¿ima shinataj Jesús ñucanchijmanta preocuparishcata ricuchin?

¹⁴ “Alli cazuj alli yuyaiyuj” sirvij huauquicunaca minishtirishca horaspimi imata ruranata ricuchin (Mateo 24:45, QC, 1989). Paicuna chashna rurashpami Jesús ñucanchijta cꞌuyashcata, Dioshuan alli cachun cuidashpa preocuparishcata ricuchin. Marc shuti huauquica chuscu huahuacunatami charin. Paica: “Congregación ama sinchi cachunca Satanasca familiacunatami llaquichin. Chaimantami familiahuan Diosta adoranata cada semana charichun Diospaj organizacionca siempre yuyachicushca. Yayacuna, cancunapaj familiata cuidaichij” ninmi.

¹⁵ Jesús ñucanchijta pushacushcata ricushpami, ñucanchijcuna sinchi feta charichun ayudasha nishcata intindinchij. Patrick shuti shuj ancianoca: “Sábado y domingo uchilla grupocunapi huillanaman llujshina cashpami, callaripica huaquincunaca asha desanimado sintirircacuna. Pero chashna uchilla grupocunapi llujshishpami Jesús humildecunamanta preocuparishcata ricunchij. Cunanca asha pingaita charij huauqui panicuna o mana tanto huillanaman llujshijcunaca paicunata valorashcata, paicunapish huillashpa ayudai tucushcatami sintincuna. Chaimantami Diosmanta huillanapi ashtahuan participashpa catincuna” ninmi.

¹⁶ Jesusca huillanapi ocupado cachunpishmi ayudashca. Cunan punllacunapi Diosmanta huillashpa participanaca ashtahuan importantemi can (Marcos 13:10-ta liyipai). André shuti cunanlla nombrashca ancianoca Diospaj organizacionpi mushuj mandashcacunata pajtachingapajmi siempre esforzaricushca. Por ejemplo, “Betelpi sirvij tauca huauqui panicunata chaipi sirvinata saquichun mañashcamantami, tucuri punllacunapi causacushcata yuyachin. Chaimantami huillanapi ashtahuan ocuparina canchij” ninmi.

17, 18. Mushuj mandashcacunata cazushpaca achca beneficiocunatami charishcanchij. ¿Imamantataj chaita yuyarina canchij?

¹⁷ Apunchij Jesucristopaj mandashcacunaca siempremi ñucanchijta ayudanga. Chaimanta Diospaj organizacionpi cunanlla tiyashca cambiocunata pajtachishcamanta ima shina beneficiarishcata yuyarishunchij. Familiahuan Diosta adoracushpaca tandanacuicunapi, huillanapi tiyashca cambiocuna ima shina ñucanchij familiata ayudashcatami yachai tucunchij. Chaita yachashpami achcata animarishun.

¹⁸ Diospaj organizacionpi mandashcacunata cazushpaca achca beneficiocunatami chari tucunchij. Chaita yuyarishpami cushilla cazushun. Por ejemplo, publicacioncunataca ña mana tanto ñaupa shina impriminchijchu. Shinami cullquita ahorranchij. Shinallataj mushuj tecnologiata utilizashcamantami ashtahuan gentecunaman Diosmanta huillai tucunchij. Pudirijpica ¿ima nishpataj mana publicación electronicacunata, videocunata, audiota ashtahuan utilizanchij? Chaita rurashpaca Jesús shinallatajmi Diosman cushca donacioncunataca alli utilizashun.

19. ¿Imamantataj Jesús ñucanchijta pushachun apoyana canchij?

¹⁹ Jesús ñucanchijta pushachun tucui shunguhuan apoyajpica ñucanchij crishcacunami sinchiyanga, huauqui panicunahuanpish tandallami catishun. Párrafo 16-pi parlashca André shuti huauquica Betelpi sirvinata saquijcunamantaca: “Paicuna cushicushpa mushuj mandashcacunata cazushcatami ricushcani. Shinami Jesús pushacushcapi ashtahuan confiani, paicunatapish ashtahuan respetani. Ima asignacionpi cashpapish cushillami cancuna. Shinami Diospaj organizacionhuan igual catincuna” ninmi.

20, 21. a) ¿Imamantataj ñucanchijta pushaj Jesucristopi confiana canchij? b) ¿Catij yachaipica imatataj ricushun?

²⁰ Ñucanchijta pushaj Jesucristoca ñallami tucuita mishanga (Apocalipsis 6:2; Salmo 45:4). Chaicamaca Diosta sirvijcunatami paraisopi causanata, chaipi ima shina trabajanata yachachicun. Chaipica cada unomi causarishcacunaman Bibliamanta yachachishun, cai pacha sumaj paraíso tucuchunpish ayudashun.

²¹ Ñucanchijta pushaj Rey Jesucristopi confiashpa catijpica, ima pasajpipish mana saquingachu. Paraisopi yaicungacamami paipaj maquihuan pushanga (Salmo 46:1-3-ta liyipai). Pero ñucanchij causaipi mana yuyashca cambiocuna tiyajpi chaita pajtachinaca mana jahuallachu can. ¿Chaipica ima shinataj shungu ucupi casilla cashpa Jehovapi confiashcata ricuchishun? Catij yachaipimi chaita ricushun.