1, 2. a) ¿Ñucanchij causaipi mana yuyashca cambiocuna tiyajpica ima shinataj sintirinchij? (Jahuapi tiyaj fotota ricui). b) Salmo 131-pi ricushca yuyaicunaca, ¿ima shinataj shungu ucupi tranquilo sintirichun ayudanga?

LLOYD Y ALEXANDRA huauqui panica 25 huatacuna yallitami Betelpi sirvishcarcacuna. Pero shujtaj asignacionman cachajpica callaripica llaquillami sintirircacuna. Huauqui Lloydca: “Betelpi causanata, chaipi trabajanataca achcatami munarcani. Shujtaj trabajotaca mana charisha nircanichu. Imamanta cambiocuna tiyashcataca allimi intindircani, pero semanacuna pasajpi, quillacuna pasajpica tauca cutincunami ñucata imapaj mana valichishcata laya sintircani. Maipica alli, maipica llaquillami carcani. Tucui alli canapi yuyashpapish asha rato qꞌuipaca yallitajmi desanimarij carcani” ninmi.

² Ñucanchij causaipica maipica mana pensashca cambiocunami tiyai tucun. Chaimantami sustarishca o yuyaipi shaicushca  sintiri pudinchij (Proverbios 12:25). Chashna cambiocuna tiyajpimi chaicunata pajtachinaca sinchi cai tucun. ¿Pero ama yalli sustarishpa, tranquilo cangapajca imataj ayudanga? (Salmo 131:1-3-ta liyipai). Cambiocuna tiyajpi ñaupa punllacunapi, cunan punllacunapi Diosta sirvijcuna shungu ucupi tranquilo sintiringapaj imata rurashcata yachashun.

3. ¿Josepaj causaihuanca imataj tucurca?

³ Jacobca paipaj churi Josetaca achcatami cꞌuyaj carca. Chaimantami Josepaj caishuj huauquicunaca paita envidiashpa esclavota shina cꞌatushpa cacharcacuna. Chaipajca Joseca 17 huatacunatami charirca (Génesis 37:2-4, 23-28). Joseca casi 13 huatacunatami Egipto llajtapica puntaca esclavo shina, qꞌuipaca prezupi llaquita aparca. Paipaj cꞌuyashca yayamantapish carupimi carca. Pero ¿ama yallitaj llaquiringapaj, ama pꞌiñaringapajca imataj paita ayudarca?

4. a) ¿Prezupi cashpaca Joseca imapitaj yuyashcanga? b) ¿José mañashcacunataca Yaya Diosca ima shinataj cutichirca?

⁴ Prezupi llaquita apacushpaca Joseca de seguromi Yaya Dios paita ima shina chai llaquipi cuidacushcata yuyashcanga (Génesis 39:21; Salmo 105:17-19). José joven cashpaca huaquin muscuicunatami charirca. Chaita yuyarishpami llaquita apacushpaca Diospi ashtahuan confiashcanga (Génesis 37:5-11). Shinallataj cutin cutin Yaya Diosta mañashpami shungu ucupi ima shina sintirishcata huillashcanga (Salmo 145:18). Jehová Diosca José mañashcacunataca, ima pasajpipish paipaj ladopi canata tucui shunguhuan crichun ayudashpami contestarca (Hechos 7:9, 10) * (urapi tiyaj notata ricui).

5. ¿‘Diospaj sumaj causaica’ ima shinataj Diosta alli sirvishpa catingapaj ayudan?

⁵ Cunan punllacunapica sinchi problemacunatami chari tucunchij. Shina cajpipish ‘Diospaj sumaj causai’ ñucanchij yuyaicuna tranquilo cachun ayudaj cashcatami ricui tucunchij (Filipenses 4:6, 7-ta liyipai). Chaimanta dimastij sustarishca cashpaca Diosta ayudahuai nishpa mañashunchij. Shinami Diospaj sumaj causaica paita alli sirvishpa, ama shaicurishpa catingapaj fuerzata cunga. Huaquin huauqui panicunaca chaitami pasashcacuna. Paicunapaj ejemplomanta yachashun.

6, 7. ¿Diosta mañanaca ima shinataj ñucanchijcuna cutin tranquilo sintirichun ayudan? Shuj ejemplomanta parlai.

⁶ Huauqui Ryan pani Juliette ña mana precursores especiales shina sirvina cashcata yachaj chayashpaca yallitaj llaquillami sintirircacuna. Ryanca: “Chai ratomi Yaya Diosta mañarcanchij. Chaipimi Diospi mashnata confiashcata ricuchina oportunidadta charircanchij. Congregacionpi achca huauqui panicunaca cunanllami Diosta sirvi callarishcacuna carca. Ñucanchijca paicunamanmi Yaya Diospi tucui shunguhuan confiashcata ricuchina carcanchij. Chaipajca Diostami ayudahuai nishpa mañarcanchij” ninmi.

 ⁷ ¿Jehová Diosca ima shinataj paicuna mañashcata cutichirca? Ryanca: “Diosta mañashca qꞌuipallaca, ña mana sustarishca, llaquilla sintirircanchijchu. Diospaj sumaj causaimi ñucanchij yuyaicunata, ñucanchij shunguta cuidacurca. Jehová Diospi confiashpaca paita sirvishpa cati tucushcatami cuentata curcanchij” ninmi.

8-10. a) ¿Diospaj espirituca ima shinataj ama yallitaj sustarishca cachun ayudan? b) ¿Yaya Diosta sirvishpa catinata decidido cajpica paica ima shinataj ayudanga?

⁸ Diospaj espirituca ama yallitaj sustarishca cachun ayudashpapish, alaja versocunata yuyarichunmi ayudan. Chaicunami ñucanchij causaipi ima ashtahuan importante cashcata yuyarichun ayudan (Juan 14:26, 27-ta liyipai). Huauqui Philip pani Marypaj experienciata ricushun. Paicunaca Betelpimi casi 25 huatacunata sirvircacuna. Betelta saquishca qꞌuipaca ishquindijpaj mamacunami huañurca. Philippaj shuj familiapishmi huañurca. Chai llaquicunaca casi chuscu quillacunallapimi pasarca. Shinallataj Marypaj yayatapishmi cuidana carcacuna, paica uma ungujllami can.

⁹ Philipca: “Problemacunataca alli chꞌimbapuracushcatami yuyarcani. Shuj punlla Huillaj revistata estudiacushpami Colosenses 1:11 versopi yuyashpa saquirircani. Problemacunataca ahuantashpami caticurcani. Pero ima faltaj layami carca. Chai versomi cushilla, pacienciahuan ahuantana cashcata intindichun ayudarca. Chaimantami cushilla cangapajca mana tucui alli cachun shuyana cashcata, ashtahuanpish ñucanchij causaipi Diospaj espíritu ayudachun saquina cashcata intindircani” ninmi.

¹⁰ Huauqui Philip pani Marypish Diosta sirvishpa catinatami decidido carcacuna. Chaimi Diosca paicunataca achcata bendiciarca. Por ejemplo, Betelmanta llujshishca asha tiempo qꞌuipallami Bibliamanta achcata yachanata munaj gentecunahuan tuparca. Pani Maryca: “Chaimantami cushilla sintirircanchij. Yaya Dios tucuimi alli llujshinga nicushca layami carca” ninmi.

11, 12. a) ¿Jehová Dios bendiciachunca Joseca imatataj rurarca? b) ¿Josetaca Jehová Diosca ima shinataj bendiciarca?

¹¹ Mana yuyashca cambiocuna ricurijpica, shamuj punllapi ima tucunata yuyashpachari manchaihuan cashun. Jacobpaj churi Josepish chashnami pasanman carca. Pero paica Jehová bendiciachunmi tucui pudishcata rurarca. Chaimantami prezupi cashpapish paita mandaj imata rurachun nishcataca tucuita pajtachirca. Potifarpaj trabajacushpapish chashnallatajmi tucuita alli pajtachirca (Génesis 39:21-23).

 ¹² Shuj punllaca Josetaca prezupi caj ishqui runacunata cuidachunmi churashca carca. Chai runacunaca manaraj prezupi cashpaca faraonta sirvijcunami cashca carca. José alli tratashcamantami paicuna ima shina sintirishcataca tucuita huillarcacuna. Shuj mancharina muscuita charishcatapishmi Joseman huillarcacuna (Génesis 40:5-8). Joseca chaipi parlanacushcamanta paipaj causai allipaj cambianataca mana yacharcachu. Ishqui huata pasashca qꞌuipa, prezumanta llujshishca punllallatajmi Josetaca Egiptopi jatun mandaj cachun nombrarca. Paica faraonllatami mana mandana carca (Génesis 41:1, 14-16, 39-41).

13. ¿Llaquicunahuan cashpapish Jehová Dios bendiciachunca imatataj rurana canchij?

¹³ Ñucanchijpish José shinallatajmi huaquinpi llaquicunahuan cashpaca mana imata rurai pudishun. Pero pacienciata charijpi tucui ima pudishcata rurangapaj esforzarijpica, Jehová Diosca ñucanchijtapish bendiciangami (Salmo 37:5). Huaquinpica musparishca shinachari sintirinchij. Shinapish “mana llaquirishcalla canchijchu” (2 Corintios 4:8). Huillanapi ashtahuan ocupado cajpica Jehová Diosca ñucanchijta mana saquingachu.

14-16. ¿Paipaj causaipi cambiocuna tiyajpipish Felipeca imatataj rurashpa catirca?

¹⁴ Jesusta catij Felipemanta yachashun. Paica cambiocuna tiyajpipish huillanapi ocupado canamantami shuj alli ejemplota ricuchirca. Felipeca Jerusalenpi caj congregacionpimi shuj mingashcata pajtachicurca (Hechos 6:1-6). Shinapish Estebanta huañuchishca qꞌuipaca Jesusta tucui catijcunata llaquichingapajmi contracuna jatarirca. Chaimi paicunaca Jerusalenmanta llujshishpa rircacuna. Pero Felipeca Diosmanta huillashpa catinata munashcamantami Samaria llajtaman rirca. Chai llajtapica manaraj tanto Diosmanta huillashcacunachu carca (Mateo 10:5; Hechos 8:1, 5).

¹⁵ Felipeca Diospaj espíritu maiman pushajpipish chaiman ringapajmi munarca. Chaimi Yaya Diosca manaraj huillashca ladocunapi huillachun paitaca cacharca. Chai punllacunapica judiocunaca samaritano gentecunataca mana ricunayachijchu carca. Pero Felipe tucuicunata igual trataj cashcata ricushpami samaritano gentecunaca alli sintirishcacuna canga. Chaimi Felipe Diosmanta huillajpica paicunaca alli uyarcacuna (Hechos 8:6-8).

¹⁶ Chai qꞌuipaca Diospaj espirituca Azoto (Asdod) llajtaman, Cesarea llajtamanmi pusharca. Cai ishqui llajtacunapica achca mana judío gentecunami causarca (Hechos 8:39, 40). Samaria llajtapi huillai callarishcamantaca casi 20 huatacunami pasashca carca. Chai tiempocunapimi Felipeca cutin paipaj causaipi cambiocunata charirca. Cunanca ña paipaj familiahuanmi pai huillashca ladopi causai callarirca. Paipaj causaipi  cambiocuna tiyajpipish Felipeca siempremi Diosmanta huillashpa ocupado carca. Chaimantami paitapish paipaj familiatapish Jehová Diosca achcata bendiciarca (Hechos 21:8, 9).

17, 18. ¿Causaipi cambiocuna tiyajpipish huillanapi ocupado canaca ima shinataj ayudanga?

¹⁷ Tiempo completopi Diosta sirvij achca huauqui panicunaca, cambiocuna tiyajpipish huillanapi ocupado canami cushilla sintirichun, ñaupajman catichun ayudashca nincunami. Sudáfrica llajtamanta Osborne y Polite huauqui panipaj experienciamanta yachashun. Betelta saquishca qꞌuipaca ratomi maipi causanata, medio tiempo trabajota japishun nishpa yuyarcacuna. Pero ¿imataj pasarca? Huauqui Osborneca: “Mana ñucanchij yuyashca shinachu shuj trabajotaca rato japircanchij” ninmi. Cutin pani Politeca: “Quimsa quillacunatami trabajo illaj carcanchij, huaquichishca cullquitapish mana charircanchijchu. Sinchimi carca” ninmi.

¹⁸ ¿Chai llaqui horascunapica imataj paicunata ayudarca? Huauqui Osborneca: “Huauqui panicunahuan huillanaman llujshinami animota charichun, ñaupajman catichun ayudarca. Sustarishpalla tiyacunapaj randica huillanapi ocupado canatami decidircanchij. Chashnami cushilla carcanchij. Trabajota taringacamami ura janaj mashcashpa purircanchij” ninmi.

19-21. a) ¿Shungu ucupi tranquilo sintiringapajca imataj ayudanga? b) ¿Causaipi cambiocuna tiyajpi amañaringapaj esforzarishpaca ima shinataj beneficiarishun?

¹⁹ Cai ejemplocunapica sumaj experienciacunatami ricushcanchij. Ñucanchijcunapish ima pudirishcata rurashpa, Jehová Diospi confiashpaca shungu ucupimi tranquilo sintirishun (Miqueas 7:7-ta liyipai). Shinallataj cambiocuna tiyajpi amañaringapaj esforzarishpaca espiritualmente sinchi tucushcatami cuentata cushun. Pani Politepish chai experienciata pasashcamantami: “Mushuj  asignacionta chasquishpami Jehovapi shuyanata yachashcani. Tucui ñuca munashca shina mana llujshijpipish Diospimi shuyashcani. Shinami paihuan ashtahuan alli amigo tucushcani” nin.

²⁰ Párrafo 8-pi parlashca pani Maryca, paipaj ungujlla yayata cuidacushpapish precursora shinami sirvishpa catin. Paica: “Yallitaj preocuparishca cashpaca Diosta mañana cashcata, tranquilo sintirina cashcatami yachashcani. Pero tucuimantaca cambiocuna ñuca causaipi tiyajpi Diospaj maquipi saquina cashcatami alli yachashcani. Chaita ruranami shamuj punllacunapicarin ashtahuan minishtiringa” ninmi.

²¹ Callaripi parlashca huauqui Lloyd pani Alexandrapish, paicunapaj causaipi mana yuyashca cambiocuna tiyashcamantami sinchi fe charishcata ricuchina carcacuna. Chai pruebacunami allipaj ayudashca. Cunanca ima problemacuna ricurijpipish sinchi feta charishcamantami animari tucuncuna. Shinallataj ashtahuan alli personami tucushcacuna.

22. ¿Tucui ima pudishcata rurashpaca imatataj seguros cai pudinchij?

²² Ñucanchij mana pensashcapimi cambiocunaca japi tucun. Shuj mushuj asignacionta chasquishpa, ungüi japijpi, familia ucupi cambiocuna tiyajpica Jehová Dios minishtirishca horaspi ayudanatami seguros cai tucunchij (Hebreos 4:16; 1 Pedro 5:6, 7). Pero chaicamaca tucui ima pudishcatami rurana canchij. Yaya Diosta mañashpa ashtahuan paipajman cꞌuchuyashunchij, pai ñucanchijta cuidachun saquishunchij. Shina rurashpami cambiocuna tiyajpipish shungu ucupi tranquilo sintirishun.