1, 2. a) ¿Jesusca paipaj causaipica imatataj puntapi churarca, imamanta? b) ¿Dioshuan alli trabajajcuna cangapajca imatataj rurana canchij?

JESUCRISTOCA carpintero, shinallataj alli huillaicunata yachachijmi carca (Marcos 6:3; Juan 13:13). Paica cai ishqui trabajotami alli rurarca. Carpintero cashpaca maderahuan minishtirishca cosascunata rurangapajmi herramientacunata alli utilizaj carca. Shinallataj Diospaj Shimimanta alli yachashpami gentecunaman alli intindichij carca (Mateo 7:28; Lucas 24:32, 45). Ña 30 huatacunata charishpaca carpintero canata saquishpami, Dios churashca Mandanamanta huillanapi ocuparij carca. Paipajca chai mingashcata pajtachinami ashtahuan importante carca. Paillatajmi, ñucaca chaipajmi cachashca cani nirca (Mateo 20:28; Lucas 3:23; 4:43). Jesusca Diosmanta huillanataca puntapimi paipaj causaipi churarca. Shinallataj shujtajcunapish chaillatataj rurachunmi munarca (Mateo 9:35-38).

² Achcacunaca mana carpintero canchijchu. Pero tucuicunami alli huillaicunata yachachijcuna canchij. Alli huillaicunata huillana ashtahuan importante cashcamantami Yaya Diospish chaipi participan. Bibliapipish: “Ñucanchijca, Diospajta paihuan rurajcuna o trabajajcunami canchij” ninmi (1 Corintios 3:9; 2 Corintios 6:4). Ñucanchijpish Salmota quillcaj runa shinallatajmi: “Quiquinpaj  tucui shimicunaca ima mana pandachu tucuimi alli” can ninchij (Salmo 119:159, 160). Chaimantami huillacushpaca, “mana llulla shimitapish ima shina cashcatataj alli” yachachicushcata ricuna canchij (2 Timoteo 2:15-ta liyipai). Jehová Diosmanta, Jesusmanta, Dios churashca Mandanamanta yachachingapajca Bibliatami utilizana canchij. Chaimanta Bibliahuan alli yachachingapaj esforzarishunchij. Alli yachachijcuna cangapajca Diospaj organizacionca huaquin ayudacunatami llujchishca. Cai ayudacunaca huillangapaj agllashca publicacioncunami can. Chaicunataca allimi rijsina canchij.

3. a) ¿Cai tucuri punllacunapi causacushcamantaca imapitaj ocuparina canchij? b) ¿Hechos 13:48 verso nishca shinaca picunatataj mashcana canchij?

³ Huillangapaj agllashca publicacioncunaca gentecunaman yachachingapajmi can. Yachachinaca imata huillacushcata gentecunaman alli intindichinami can. Shinami gentecunaca imata yachashcataca paicunapaj causaipi pajtachinata munangacuna. Cai tucuri punllacunapi causacushcamantami Bibliamanta yachacujcunata charingapaj, Diospaj Shimimanta yachachingapaj esforzarina canchij. Chaipajca huiñai causaipaj canacunatami mashcashpa catina canchij. Shinallataj Diosta sirvijcuna tucuchunmi ayudana canchij (Hechos 13:44-48-ta liyipai).

4. ¿Huiñai causaipaj canacunata taringapajca imatataj rurana canchij?

⁴ ¿Huiñai causaipaj canacunataca ima shinataj tari pudinchij? Ñucanchijpish ñaupa punllacunapi Jesusta catijcuna shinallatajmi huillanaman llujshina canchij. Jesusca paita catijcunataca: “Cancuna mai puebloman, mai llajtaman chayashpaca, maijanpish chasquipaj alli shungu cajta mashcashpa chaiman chayanguichij” nircami (Mateo 10:11). Jatun tucushca gentecuna, Diosmanta yachanata ni shuj interesta charij gentecuna alli huillaicunata chasquinataca mana shuyanchijchu. Chaimantami alli shungu gentecunata, Diosmanta yachanata munajcunata mashcanchij. Cai ejemplopi yuyashun. Jesús carpintero cashpaca pungucunata, yugocunata, shujtaj cosascunata rurangapajmi puntaca alli maderacunata mashcaj cashcanga. Alli maderacunata ña charishpaca chai laya cosascunata rurangapajmi tucui laya herramientacunata alli utilizaj cashcanga. Shinallataj ñucanchijpish puntapica alli shungu gentecunatami mashcana canchij. Chai huashaca yachachingapaj ayudacunata alli utilizashpami Jesusta catijcuna tucuchun ayudana canchij (Mateo 28:19, 20).

5. ¿Huillangapaj agllashca publicacioncunamantaca imatataj yachana canchij? Shuj ejemplohuan parlai. (Página 9-pi tiyaj fotocunata ricui).

⁵ Cada herramientami shuj trabajota rurangapaj can. Por ejemplo, ima herramientacunallahuan Jesús trabajaj cashcapi yuyashun * (urapi tiyaj notata ricui). Huaquincunaca caspicunata señalangapaj o midingapajmi cashcanga. Shujtaj herramientacunaca cuchungapaj o hualajchingapajmi cashcanga. Shujtajcunaca nivelangapaj, shinallataj piezacunata tandachingapajmi cashcanga. Huillangapaj agllashca publicacioncunapish cada unomi shuj trabajota pajtachingapaj can. Tucui publicacioncunami importante can. Chaimanta ima shina utilizanata ricushunchij.

6, 7. a) ¿Jw.org paginata ricuchij tarjetahuanca ima shinataj huillashcangui? b) ¿Tandanacuicunapaj invitaciontaca imapajllataj utilizanchij?

⁶ Jw.org paginata ricuchij tarjeta. Cai tarjetaca uchilla cashpapish achca valishcami  can. Gentecunaman ñucanchijcuna pi cashcata ricuchingapaj, shinallataj Internetpi ñucanchij paginaman yaicuchun invitangapajmi valin. Chaipimi ñucanchijmanta ashtahuan yachangacuna, Bibliamanta estudiotapish mañai tucungacuna. Cunancamaca 400 mil yalli gentecunami jw.org paginaman yaicushpa estudiota cuchun mañashcacuna. Y cada punllami achca gentecuna estudiota cuchun mañashpa catincuna. Chaimantami chai tarjetacunataca siempre apashpa purina canchij. Shinami maipi imata ruracushpapish chaicunahuan huillai tucushun.

⁷ Invitacioncuna. Tandanacuicunapaj invitacionpica, “Testigo de Jehovacunahuan Bibliamanta yachachunmi invitanchij” ninmi. Chaipajca ñucanchij tandanacuicunaman shamushpa yachachun o paillaman estudiota cuchun mañai tucushcatami ricuchin. Cai invitacionca mana ñucanchijcuna pi cashcata ricuchingapajllachu can. Ashtahuanpish “espiritupi huajcha” cajcunata Bibliamanta ñucanchijhuan yachachun invitangapajmi can (Mateo 5:3). Gentecuna manaraj ñucanchijhuan Bibliamanta yachacujpipish tandanacuicunaman shamujpica allimi chasquinchij. Tandanacuicunaman shamushpaca Bibliamanta sumajta yachai pudishcatami ricungacuna.

8. ¿Gentecunata ñucanchij tandanacuiman shuj cutinllapish invitanaca imamantataj importante can? Shuj experienciata parlai.

⁸ Gentecunataca ñucanchij tandanacuicunaman shuj cutinllapish shamuchunmi invitashpa catina canchij. ¿Imamanta? Chaipimi paicunaca testigo de Jehovacuna mana panda religioncuna shina cashcata ricungacuna. Ashtahuanpish Bibliamanta alli yachachijcuna cashcata, Diosta rijsichun ayudajcuna cashcatami ricungacuna (Isaías 65:13). Por ejemplo, Estados Unidospi causaj Ray y Linda shuti cusa huarmimi huaquin huatacuna huashaman chai experienciata pasarcacuna. Paicunaca Diospi crishcamantami paimanta ashtahuan yachashun nishpa shuj iglesiaman rinata decidircacuna. Chaimantami paicunapaj llajtapi tiyaj tucui iglesiacunata visitashun nircacuna. Chai llajtapica achca iglesiacuna, achca religioncunami tiyarca. Pero callarimantami, shuj iglesiapi saquiringapajca ishqui cosascunatami ricuna canchij nircacuna. Shujca Diosmanta imallatapish yachana cashcata. Caishujca chaipi cajcuna Diosta sirvijcuna shina ropata churarishcatami ricuna carcacuna. Ña achca huatacuna qꞌuipaca chai llajtapi tiyaj tucui iglesiacunatami visitashca carcacuna. Shinapish Diosmanta imata mana yachashcamanta, chai iglesiacunapi caj gentecunapish maipish cachun churarijcuna cashcata ricushcamantami llaquirido carcacuna. Último iglesiata visitashca qꞌuipaca Lindaca trabajanaman, cutin paipaj cusaca huasimanmi tigrarcacuna. Cusaca huasiman tigracushpami testigo de Jehovacunapaj shuj Tandanacuna Huasita ricurca. Chaimi: “¿Caipica imatashi rurancuna?, ¿ima nishpataj mana yaicushpa ricuni?” nishpa yuyarca. Tandanacuna Huasiman yaicujpica tucuicunami paitaca alli tratarca. Ropatapish alli churarishcami carcacuna. Qꞌuipaca Rayca punta filapi tiyarishpami Yaya Diosmanta sumajta yacharca. Chaimantami paica cushilla sintirirca. Apóstol Pablo nishca shinami punta cutin tandanacuiman shamujcunaca, “Diosca cancunapurapitajmari cashca” nincuna (1 Corintios 14:23-25). Chai runaca tucui domingocunami tandanacuiman puri callarirca. Qꞌuipaca ña tucui tandanacuicunamanmi rij carca. Paipaj huarmi Lindapish paihuanmi tandanacuicunaman ña ri callarirca. 70 huatacuna yallita charishpapish ishquindijmi Bibliamanta yachai callarishpa qꞌuipamanca bautizarircacuna.

9, 10. a) ¿Tratadocunaca imamantataj huillangapaj jahualla can? b) “¿Diospaj Mandanaca imataj can?” nishca tratadohuanca ¿ima shinataj huillai tucunchij?

⁹ Tratadocuna. Ocho tratadocunatami charinchij. Chaicunahuanca jahuallami gentecunahuan parlai callari pudinchij. 2013 huatapi llujshishcamantaca ñami casi 5 mil millón tratadocunata imprimishcanchij. Cai 8 tratadocunaca tucuicunami igual formatota charin. Chaimantami ña shujta utilizanata yachashpaca caishujcunatapish jahualla utilizai pudinchij. ¿Gentecunahuan parlanacui callaringapajca ima shinataj utilizai tucunchij?

¹⁰ “¿Diospaj Mandanaca imataj can?” nishca tratadohuan huillagrishcata yuyashun. Gentecunamanca punta paginata ricuchishpami: “¿Diospaj Mandanaca imataj can? ¿Cai quimsa respuestacunamantaca maijantaj alli can?” nishpa tapui tucunchij. Cutichijpica allimi cutichircangui o mana allichu cutichircangui ninapaj randica, “Bibliaca ninmi” nishca parteta ricuchishpa Daniel 2:44, shinallataj Isaías 9:6 copiashca versocunata liyishunchij. Parlanacuita tucuchicushpaca último paginapi tiyaj “Cashna tapuri”: “¿Diospaj Mandana mandacujpica ima shinashi causashun?” nishca tapuita saquishunchij. Chashnami cutin visitashpaca imamanta parlanacunata yachashun. Visitanaman tigrashpaca Dios cushca alli huillaicuna nishca folletomantami lección 7-ta ricuchi tucunchij. Cai folletomi Bibliamanta yachachi callaringapaj alli ayuda can.

11. a) ¿Ñucanchij revistacunaca imapajtaj rurashca can? b) ¿Cai revistacunamantaca imatataj yachana canchij?

¹¹ Revistacuna. Huillaj revistata, Rijchari revistataca achca shimicunapimi traducishcanchij. Mundo enteropica shujtaj revistacunamantaca cai revistacunatami gentecunaca ashtahuan charincuna. Cai revistacunata achca llajtacunapi liyijcuna cashcamantami gentecuna munashca temacuna llujshin. Cunan punllacunapi ima importante cashcata gentecuna yuyailla causachunmi cai revistacunata utilizanchij. Pero manaraj piman saquishpami cada revista picunapaj rurashca cashcata yachana canchij.

12. a) ¿Rijchari revistaca picunapajtaj rurashca can? b) ¿Cai revistaca imapajtaj rurashca can? c) ¿Cai revistahuan huillashpaca ima sumaj experienciacunatataj charishcangui?

¹² Rijchari revistaca Bibliamanta ashallata yachajcunapaj o imata mana yachajcunapajmi can. ¿Imamanta? Gentecunaca Diospaj Shimipi yachachishcacunata manachari rijsincuna o religioncunapi manachari confiancuna. Shinallataj Bibliapi tiyaj consejocuna paicunapaj causaipi ayudanata manachari yachancuna. Cai revistaca Dios tiyashcata gentecuna crichunmi rurashca can (Romanos 1:20; Hebreos 11:6). Shinallataj Biblia Diospaj Shimi cashcata crichunmi rurashca can (1 Tesalonicenses 2:13). 2018 huatapaj quimsa revistacunaca: “Cushi causaita mashcai”, “Ñucanchij familiahuan sumajta causashunchij”, “¿Huañui tiyajpica imatashi rurashun?” nishca temacunatami charin.

13. a) ¿Huillaj revistaca picunapajtaj rurashca can? b) ¿Cai revistahuan huillashpaca ima sumaj experienciacunatataj charishcangui?

¹³ ¿Gentecunaman saquingapaj Huillaj revistaca imapajtaj can? Diostapish Bibliatapish respetaj gentecunaman Diospaj Shimipi yachachishcacunata intindichingapajmi can. Chai gentecunaca Bibliamanta ashata yachashpapish mana tucuita alli intindincunachu (Romanos 10:2; 1 Timoteo 2:3, 4). 2018 huatapaj quimsa revistacunaca: “¿Cunan punllapi Bibliata liyinaca allichu canga?”, “¿Ima laya causanata yachai tucunchijchu?”, “¿Diosca  canmanta sustarinchu?” nishca temacunatami charin.

14. a) ¿Huillangapaj agllashca publicacioncunapi tiyaj chuscu videocunaca imapajtaj can? b) ¿Gentecunaman videocunata ricuchishpaca ima sumaj experienciacunatataj charishcangui?

¹⁴ Videocuna. Jesús causashca punllacunapica carpinterocunaca maquihuan trabajana herramientacunatami charirca. Pero cunan punllacunapica herramientas electricascunatami charincuna. Por ejemplo, sierra mecánica, taladro, lijadora, clavadora nishca herramientacunatami charincuna. Chai shinallatajmi imprimishca publicacioncunallataca mana charinchij, sumaj videocunatapishmi charinchij. Huillangapaj agllashca publicacioncunapica chuscu videocunami tiyan. Chaicunaca: “¿Imamantataj Bibliamanta yachana canchij?, ¿Ima shinataj Bibliamanta yachachinchij?, ¿Ñucanchij tandanacuicunapica imatataj ruranchij?, ¿Testigo de Jehovacunaca picunataj canchij?” nishcacunami can. Uchilla videocunataca casi ishqui minutocunallapimi ricui tucunchij. Punta parlanacuipimi chaicunata utilizai tucunchij. Achca minutocunata charij videocunataca revisitacunaman o tiempota charijcunamanmi ricuchi tucunchij. Cai alaja videocunata ricushpami gentecunaca Bibliamanta yachanata, tandanacuicunaman rinata munangacuna.

15. ¿Gentecuna paicunapaj propio shimipi videota ricushpaca imata ruranatataj munangacuna? Shuj ejemplomanta parlai.

¹⁵ Videocuna ima shina gentecunapaj shunguman chayaj cashcata ricushun. Micronesia llajtamanta shujtaj llajtapi causanaman shamuj huarmimanmi shuj panica ¿Imamantataj Bibliamanta yachana canchij? nishca videota yapés shimipi ricuchirca. Videota ricui callarishpaca chai huarmica: “¡Caica ñuca propio shimipimari! Cai videopi rimaj runapish ñuca causan islapi shinamari rimarin. ¡Ñuca parlan shimitamari riman!” nirca. Qꞌuipaca yapés shimipi tiyaj tucui publicacioncunata, videocunatami jw.org paginapi ricusha nirca (Hechos 2:8, 11-ta ricui). Estados Unidospi causaj shuj panipish, shujtaj llajtapi causaj paipaj sobrinomanmi chai videollatataj ricuchun link nishcata paipaj propio shimipi cacharca. Chai videota ricushca qꞌuipaca shuj correotami paipaj tiaman cacharca. Chaipica: “Ñucapajca achca poderta charij, millai Diablo cai pachata mandacushcata yachanami interesante carca. Bibliamanta yachachichunpishmi mañarcani” nishpami quillcashca carca. Cai panipaj sobrinoca ñucanchijcuna ama Diosmanta huillachun jarcashca llajtapimi causan.

16. Cai folletocuna imapaj cashcata huillai: a) Huiñaita causangapajca Diosta uyai. b) Dios Cushca Alli Huillaicuna. c)  ¿Picunataj Jehová Diospaj munaita ruracuncuna?

¹⁶ Folletocuna. Shuj persona mana alli liyinata yachajpi o paipaj shimipi publicacioncuna mana tiyajpica ¿ima shinataj Diospaj Shimimanta yachachishun? Paicunata ayudangapajca Huiñaita causangapajca Diosta uyai nishca folletotami charinchij * (urapi tiyaj notata ricui). Estudiocunahuan callaringapajca Dios Cushca Alli Huillaicuna nishca folletotami charinchij. Gentecunamanca cai folletopaj último paginapi tiyaj 14 temacunatami ricuchi tucunchij. Qꞌuipaca pai agllashca temahuanmi yachashpa callari tucunchij. ¿Cambaj revisitacunahuan chaita rurashcanguichu? Huillangapaj agllashca publicacioncunapi tiyaj  shujtaj folletoca ¿Picunataj Jehová Diospaj munaita ruracuncuna? nishcami can. Cai folletoca Bibliamanta yachacujcunata Diospaj organizacionta rijsichun ayudangapajmi rurashca can. Cai folletota ima shina utilizanata yachangapajca marzo de 2017-pi llujshishca, Jesús shina causashunchij huillashunchij Tandanacuipi imalla ruranata ricuchij pꞌangata ricui.

17. a) Estudiota cungapaj cada libroca ¿imapajtaj rurashca can? b) ¿Tucui bautizarijcunaca imatataj rurana can, imamanta?

¹⁷ Librocuna. Shuj folletohuan estudiota callarishca qꞌuipaca ¿Bibliaca imatataj yachachin? nishca librohuan yachachishpa catingapajmi maijan ratopish cambiai tucunchij. Cai librohuanmi estudianteca Diospaj Shimimanta minishtirishca yuyaicunata yachanga. Cai librota tucuchijpi yachacuj espiritualmente ñaupajman caticujpica Yaya Diosta cꞌuyashpa cati nishca librohuanmi yachachishpa catina canchij. Chai libropica ima shina Diospaj consejocunata paipaj causaipi pajtachinatami yachanga. Cai ishqui librocunata yachanata manaraj tucuchishpa bautizarishca cashpapish tucuchinami can. Shinami paipaj fe ashtahuan sinchiyajpi Yaya Diosmantaca manataj caruyanga (Colosenses 2:6, 7-ta liyipai).

18. a) ¿1 Timoteo 4:16 nishca shinaca imatataj rurana canchij? b) Chai verso nishca shina rurashpaca ¿ima resultadocunatataj charishun? c) ¿Huillangapaj agllashca publicacioncunataca imapajtaj utilizana canchij?

¹⁸ Testigo de Jehovacunaca Diospaj Shimimantami gentecunaman huillana canchij. Chaimi paicunaca huiñai causaita chari tucungacuna (Colosenses 1:5, 6; 1 Timoteo 4:16-ta liyipai). Gentecunaman yachachingapajca, huillangapaj agllashca publicacioncunapimi tucui minishtirishcata charinchij (“ Huillangapaj agllashca publicacioncuna” nishca cuadrota ricui). Cai ayudacunataca alli utilizashunchij. Cada unomi ima publicacionta utilizanata, ima hora utilizanata decidina canchij. Pero publicacioncunata saquishpallaca mana purinachu canchij. Diosmanta yachanata mana munajcunamanpish mana saquinachu canchij. Ashtahuanpish “huiñai causaipaj” canacunatami Jesusta catijcuna tucuchun ayudana canchij. Paicunaca humildes, alli shungu, Diosmanta yachanata achcata munajcunami can (Hechos 13:48; Mateo 28:19, 20).