Ashtahuan huauqui panicuna mirarishcamantami predicangapaj ashtahuan publicacioncunata minishtircacuna. Chai tiempopica Brooklynpi tiyaj Betelpimi revistacunallata imprimijcuna carca. Pero librocunataca shujtaj empresacunapaj ayudahuanmi rurajcuna carca. Shuj cutinca achca quillacunatami shuj empresaca huauqui panicuna minishtishca tucui librocunataca mana imprimi tucurca. Chaimi huauqui Rutherfordca huauqui Robert Martintaca “¿nachu ñucanchijllataj librocunata imprimi tucunchij?“ nishpa tapurca. Chai tiempopica huauqui Martinca Betelpi publicacioncunata imprimichunmi organizaj carca.

Huauqui Martinca: “Huauqui Rutherford ima nishcatami rurai callarircanchij. Chaipica librocunata imprimingapajmi tucui minishtishca maquinacunata randircanchij” nircami. Librocunata imprimingapajca huauquicunaca Brooklyn, Nueva York llajtapi, Concord nishca callepimi shuj edificiota arrendarcacuna.

Pero huauquicuna caita rurachunca mana tucuicunachu de acuerdo carca. Librocunata imprimishpa ayudaj shuj empresapaj presidenteca huauquicuna arrendashca edificiotami visitaman rirca. Paica: “Caipica imprimingapaj alli maquinacunatami charinguichij. Pero seis quillacunallapimi cai maquinacunata mana alli manejai pudishcamanta tucuita dañanguichij” nircami.

Huauqui Martinca: “Cai runa ima nishcaca cierto layami ricurirca. Pero paica Jehová Diospica feta mana charircachu. Jehová Diosllatajmi ñucanchijta ayudarca” nircami. Chaimantami asha tiempo qꞌuipalla huauquicunaca cada punlla 2.000 librocunata imprimijcuna carca.

Qꞌuipaca huauqui panicunaca Diospaj Gobiernomanta alli huillaicunataca radiopipishmi huillai callarircacuna. 26 de febrero de 1922 domingo  tardetaca huauqui Rutherfordca por primera vezmi radiopi parlarca. Paica “Achcacunami mana nunca huañunga” nishca conferenciataca KOG nishca radiopimi yachachirca. Chai radioca Los Angeles, California llajtapimi carca.

Conferenciata radiopi pasachishcamantami 25.000 gentecuna uyarcacuna. Huaquin uyajcunaca agradicingapajmi cartacunata cacharcacuna. Santa Ana, California llajtapi causaj Willard Ashford nishca runaca huauqui Rutherfordtaca shuj cartapimi felicitarca. Chai runaca: “Can cushca conferenciaca alajami carca. Ñucanchij huasipica quimsacuna ungushca cashcamantami huasimanta mana llujshi pudinchij, pero can cushca conferenciatami radiopi uyai tucurcanchij” nircami.

Qꞌuipa semanacunapica ashtahuan conferenciacunatami radiopi pasachircacuna. The Watch Tower nishca revistaca: “1922 huatapica 300.000 gentecunami Diospaj Gobiernomanta radiopi uyashca canga” nircami.

Achca gentecuna radiopi uyashcamantami Bibliamanta Yachacuj huauqui panicunaca paicunapaj propia estación de radiota rurarcacuna. Chaitaca Staten Island, Nueva York llajtapimi rurarcacuna. Chai estación de radiotaca WBBR nishpami shutichircacuna. Chaipica achca gentecunamanmi Diospaj Gobiernomanta predicai tucurcacuna.

15 de junio de 1922-pi llujshishca The Watch Tower nishca revistapica: “Cedar Point, Ohio llajtapimi shuj jatun asamblea tiyanga. Cai asambleaca 5 al 13 de septiembre de 1922-tami canga” nishpami huillarca. Chai asambleaman ricushpaca huauqui panicunaca cushillami sintirircacuna.

Callari conferenciapica huauqui Rutherfordca: “Jehová Diosmi cai asambleataca bendicianga. Paimi muyundij Allpapi predicashpa catichun animanga” nircami. Conferenciacunata cuj shujtaj huauquicunapish tucuicunaman predicachunmi animarcacuna.

Chai asambleapaj invitacionpica “ADV” nishca letracunami tiyarca. Chaimantami 8 de septiembre viernes punllapica 8.000 gentecunaca chai letracuna ima nisha nishcata intindichichun huauqui Rutherfordta shuyacurcacuna. Huaquincuna  ña tiyaricushpaca plataforma jahuapi shuj pillushca letrero tiyacushcatami ricurcacuna. Huauqui Arthur Clausca Tulsa, Oklahoma llajtamantami shamushca carca. Paica conferenciata alli uyangapajmi ñaupajpi tiyarirca. Chai tiempopica microfonocuna, parlantecuna manaraj tiyashcamantami huashapi cajcunaca mana alli uyai tucurcacuna.

Asambleapaj presidenteca ‘huauqui Rutherford discursota cucujpi ama bulla tiyachunca ña pi mana yaicui tucungachu’ nishpami huillarca. 9:30 de la mañanami huauqui Rutherfordca Mateo 4:17-pi ima nishcata parlashpa discursota callarirca. Chaipica: “Jahua pacha Gobiernoca ñamari chayamucun” ninmi. Huauqui Rutherfordca: “Jesús tigramuna punllacunapica alli shungu gentecunata shuj cosechapi tandachij shinami tandachicun” nircami.

Huauqui Clausca chai discursotaca allimi uyasha nirca. Pero ñapishmi mana alli sintirirca. Chaimantami tandanacuimanta llujshina carca. Paita cutin yaicuchun mana saquinata yachashpaca llujshinataca mana munarcachu.

Pero asha minutocunallapimi alli sintirirca. Pai cutin chai tandanacuiman tigracushpaca tucuicuna cushicuihuan aplaudicujtami uyarca. Chaimantami paica tucui chai discursota uyangapajca jahua techoman llujshinata yuyarca. Paica chai tiempopajca 23 huatacunatami charirca. Chaimi paica edificiopaj techoman chayashpa tucui chai discursota alli uyarca.

Pero jahua techopica mana Arthurllachu carca, paipaj amigocunapishmi carca. Chaipica Frank Johnsonca paitaca, “¿manachu shuj alli cuchillota charingui?” nishpami tapurca.

Arthurca: “Charinimi” nircami.

Chaimi huauqui Frankca: “Pi ñucanchijta ayudachunmi Yayitu Diosta mañacurcanchij. Arthur, ricui, caipica shuj jatun letrerotami charinchij. Gentecuna chai letrerota ricuchunmi cai huascacunata  cꞌuchuna canchij. Juez Rutherford, * ‘huillaichij, huillaichij’ nicujpi cai chuscu huascacunata cꞌuchushpa ayudahuai” nircami.

Arthurca huauqui Rutherford chai shimicunata nishcahuan huascacunata cꞌuchungapajmi listo carca. Ñapishmi huauqui Rutherfordca cushicuihuan caparishpa: “Jesusta tucui shunguhuan sirvishpa catichij. Cai panda religioncuna tucuringacama tucui llajtacunapi paimanta huillashpa catichij. Tucuicunami Yaya Diospish Jehová Cashcata, Jesuspish Jatun Mandaj cashcata, amocunapaj Amo cashcata yachana cancuna. Cai punllaca dimastij sumajmi can. Jesusca ñami mandacun, cancunami paimanta huillana canguichij. Chaimanta huillaichij, huillaichij Jesús rey cashcata, paipaj Gobiernomantapish huillaichij” nirca.

Huauqui Arthurca shujtaj huauquicunahuanmi letreropaj huascacunata pꞌitirca. Chaimi pillushca letreroca asha asha pascarirca. Chai letreropica: “Jesús rey cashcata, paipaj Gobiernomantapish huillaichij” nircami. Chai shimicunaca “ADV” letracunahuanmi carca. Cai letracunaca inglés shimipica “huillaichij” nisha ninmi.

Cedar Point llajtapi tiyaj jatun tandanacuica huauqui panicuna Yayitu Diospaj Gobiernomanta ashtahuan huillachunmi animarca. Paicunaca cushicuihuanmi huillanata munarcacuna. Chai tiempopica precursorcunataca colportor nishpami rijsijcuna carca. Oklahoma llajtamanta shuj colportorca: “Carboncunata rurashpa trabajajcunamanmi predicaj carcanchij. Paicunaca dimastij pobre gentecunami carca. Shinapish paicunaca The Golden Age nishca revistata uyashpaca huacajcunami carca. Ñucanchijcuna paicunata animota cushpaca dimastij cushillami sintirircanchij” nishpami escribirca.

Cai huauqui panicunaca Jesús ima nishcata utca pajtachina cashcatami cuentata curcacuna. Jesusca Lucas 10:2-pica: “Granota tandanaca achcami, ashtahuanpish tandajcunaca ashallami” nircami. Chaimantami cai huauqui panicunaca 1922 huata tucuricujpica Yayitu Diospaj Gobiernomanta huillangapaj decididos carcacuna.