1. ¿Huaquincunaca Diospaj yachaita uyashpaca imatataj rurashcacuna?

 ACHCA llajtacunapica huauqui panicunaca ñancunapimi Diospaj Gobiernomanta predicangapaj publicacioncunata saquicuncuna. Tal vez canpish chashnallatajmi predicashcangui. Chashna predicashpaca Proverbios libropi ima nishcatami pajtachicungui. Chaipica: “Alli yachaica ñancunapi purijcunata caparicunmi” ninmi (Proverbios 1:20, 21-ta liyipai). Dios cushca yachaica Bibliapi, ñucanchij publicacioncunapimi tiyan. Gentecunaca huiñai causaita chasquingapajmi Dios cushca yachaita minishtincuna. Chaimantami pi ñucanchij publicacioncunata apajpica cushilla sintirinchij. Pero huaquincunaca Dios cushca yachaimantaca Bibliapica mana yachasha nincunachu. Shujtajcunaca Biblia ñaupa libro cashcata crishpami ñucanchijmanta burlarincuna. Maijancunacarin: “Bibliapi tiyaj mandashcacunaca na allichu. Chaicunata pajtachijcunapish exageradosmi can” nishpami yuyancuna. Chashna cajpipish Jehová Diosca tucuicunamanmi alli yachaita cusha nin.

2. a) ¿Alli yachaita chasquichunca Jehová Diosca imallatataj cushca? b) ¿Pero la mayoría gentecunaca imatataj decidishcacuna?

² Jehová Diosca tucuicuna yachaita chasquichunca paipaj Shimitami cushca. Bibliataca casi tucuicunami chari tucuncuna. Shinallataj Bibliamanta japishca ñucanchij publicacioncunatapishmi cushca. Chaicunaca 1.000 yalli shimicunapimi tiyan. Gentecunaca Bibliata, cai publicacioncunata liyishpa, chaicunapi imata yachashcata pajtachishpaca achcatami beneficiarincuna. Pero la mayoría gentecunaca Dios cushca alli yachaitaca mana uyasha nincunachu. Paicunaca imata decidingapajca paicunapaj yuyaicunallata, shujtajcunapaj yuyaicunallatami catincuna. Maipicarin Bibliapi confiajcunatapishmi  pꞌiñancuna. Cai yachaipimi gentecuna imamanta chashna comportarishcata ricushun. Pero puntaca Dios cushca alli yachaita chasquingapaj imallata ruranatami yachashun.

3. ¿Alli yachajcuna cangapajca imatataj rurana canchij?

³ Alli yachaj runaca imata yachashcata pajtachishpami alli decisioncunata agllan. Shinapish Dios cushca yachaita chasquingapajca Proverbios 9:10-pi ima nishcatami pajtachina canchij. Chaipica: “Alli yachaipaj callarica, Mandaj Diosta manchanami. Ima jucha illaj Diosta rijsinaca, alli yuyaimi” ninmi. Chaimantami importante decisioncunata agllangapajca Jehová Dios imata yuyashcata alli rijsina canchij. Chaipajca Bibliata, publicacioncunatapishmi estudiana canchij. Chaipi imata yachashcatapishmi pajtachina canchij. Chashnami alli yachajcuna cashcata ricuchishun (Proverbios 2:5-7).

4. ¿Imamantataj Jehová Dioslla ñucanchijmanca yachaita cui tucun?

⁴ Jehová Diosllami ñucanchijmanca alli yachaita cui tucun (Romanos 16:27). ¿Imamantataj chashna ninchij? Puntapica Jehová Diosca tucuita ruraj cashcamantami tucuita alli rijsin (Salmo 104:24). Ishquipica Dios tucui rurashcacunami pai yachaj cashcata ricuchin (Romanos 11:33). Quimsapica Dios cushca consejocunaca ñucanchij allipajllatajmi can (Proverbios 2:10-12). Chaimantami Jehová Dioslla ñucanchijman yachaita cui tucushcata crina canchij. Pai ñucanchijta pushachunpishmi saquina canchij.

5. ¿Diospaj yachaita mana chasquisha nijcunaca ima shinataj causancuna?

⁵ Achca gentecunaca Dios rurashcacuna sumaj, alli cashcata ricushpapish Jehová Dios chaicunata mana rurashcatami crincuna. Ashtahuanpish tucui cosascuna evolucionmanta ricurishcatami crincuna. Shujtajcunaca Diospi crishpapish pai cushca mandashcacuna mana alli cashcatami yuyancuna. Chaimantami paicuna munashca shina causancuna. ¿Gentecunaca paicunapaj yuyaicunallata catishcamanta ashtahuan cushilla, ima esperanzahuanchu causancuna? Mana. Ashtahuanpish paicunaca achca llaquicunatami charishcacuna. Proverbios 21:30-pica: ‘Ima alli yachaipish, alli yuyaipish, alli cunashcapish Mandaj Diospaj yachaitaca mana shujtajyachi tucunchu’ ninmi. Chaimantami Jehová Diostaca yachaita cuchun mañana canchij. Cunanca achca gentecuna Diospaj yachaita imamanta mana chasquisha nishcatami yachashun.

6. Proverbios 1:22 al 25-pi ricushca shinaca ¿picunallataj Diospaj yachaitaca mana uyasha nincuna?

⁶ Alli yachai ñancunapi caparicuj shina cajpipish achcacunaca mana uyasha nincunachu. Bibliapica paicunataca yachai illajcuna, chanzata rurajcuna, chꞌahuanyashcacuna ninmi (Proverbios 1:22-25-ta liyipai). Cunanca cai gentecuna imamanta Diospaj yachaita mana chasquisha nishcatami ricushun. Paicuna shina ama cangapaj imata rurana cashcatapishmi yachashun.

7. ¿Huaquin gentecunaca imamantataj yachai illaj canata decidishcacuna?

⁷ Achca gentecunataca religionta pushajcuna, politicocunami umashcacuna. Chai gentecunaca paicunata umashcata yachaj chayashpaca achcatami llaquirincuna. Pero Proverbios 1:22-pica cai laya gentecunamantaca mana parlanchu. Chai versopica yachai illajcuna nishpaca, paicunata jahualla  umachun saquijcunamantami parlan (Proverbios 14:15). Paicunaca paicunallataj yachai illaj canatami decidishcacuna (Jeremías 5:31). Chai gentecunaca paicuna munashca shina causasha nishcamantami Biblia ima nishcata, Bibliapi tiyaj mandashcacunataca mana yachasha nincuna. Achcacunaca Quebec, Canadá llajtamanta shuj huarmi shinami yuyancuna. Chai huarmica shuj Testigotaca: “Sacerdote ñucanchijta umajpica mana ñucanchij culpachu can. Ashtahuanpish paipaj culpami can” nircami. Ñucanchijca cai yachai illajcuna shinaca mana casha ninchijchu (Proverbios 1:32; 27:12).

8. ¿Alli yachaita charingapajca imatataj rurana canchij?

⁸ Bibliapica huahuacuna shina ama cachun, ashtahuanpish jatun runacuna shina alli yachajcuna cachunmi animan (1 Corintios 14:20). Chaipajca Biblia yachachishcacunatami pajtachina canchij. Chashnami alli desicioncunata agllashun. Llaquicunapipish mana urmashunchu. Can imapi mejorana cashcapi yuyai. Por ejemplo, can ña achca tiempota Bibliata estudiashpapish, tandanacuicunaman rishpapish, ¿imamantataj manaraj Jehová Diosman mingarishcangui, manaraj bautizarishcangui? ¿O ña bautizado cashpaca ashtahuan alli predicangapaj, ashtahuan alli yachachingapajchu esforzarishcangui? ¿Imata decidingapajca Bibliapi tiyaj yachachishcacunata pajtachicunguichu? ¿Jesús shinallataj shujtajcunata alli tratangapajchu esforzaricungui? Imapi mejorana cashcata cuentata cushpaca Jehová Dios nishcacunata pajtachingapajmi esforzarina canchij. Chashnami alli yachajcuna tucushun (Salmo 19:7).

9. ¿Chanzata rurajcunaca Diospaj yachaita mana chasquisha nishcataca ima shinataj ricuchincuna?

⁹ Chanzata rurajcunapish Diospaj yachaitaca mana uyasha nincunachu. Predicacushpaca paicunahuanmi tupanacunchij. Chai gentecunaca shujtajcunamanta burlarinatami munancuna (Salmo 123:4). Bibliapica tucuri punllacunapica achca burlarijcunami tiyanga ninmi (2 Pedro 3:3, 4). Chai gentecunaca Lotpaj yernocuna shinami Dios cushca advertenciacunataca mana uyasha nincuna (Génesis 19:14). Paicunaca Biblia yachachishcacunata pajtachijcunamantami burlarincuna, millaita rurashpami causancuna (Judas 7, 17, 18). Apostatacunapish chashnallatajmi cancuna.

10. Salmo 1:1-pi nishca shinaca ¿chanzata rurajcuna shina ama cangapajca imatataj rurana canchij?

¹⁰ ¿Chanzata rurajcuna shina ama cangapajca imatataj rurana canchij? Quejarijcunallahuanca mana tandanacunachu canchij (Salmo 1:1-ta liyipai). Chaimantami apostatacunapaj nishcacunataca mana liyina canchij, mana uyana canchij. Chaicunamanta mana caruyashpaca Diospaj pueblota pushaj huauquicunamantami quejari callarishun. Jehová Dios paipaj pueblota pushacushcatapish ña mana crishunchu. Imapi mejorana cashcata yachangapajca cai catij tapuicunapimi yuyana canchij: “¿Diospaj organización mushuj instruccioncunata cujpica ratochu quejarini? ¿Pushaj huauquicunapaj pandarishcacunallatachu ricuni?”. Caicunata saquingapaj esforzarijpica Jehová Diosca cushillami sintiringa (Proverbios 3:34, 35).

11. ¿Chꞌahuanyashcacunaca Diospaj mandashcacunamantaca imatataj yuyancuna?

¹¹ Chꞌahuanyashcacuna, muspacunapish Diospaj yachaita, Dios yachachishcacunataca mana chasquisha nincunachu (Salmo 53:1). Paicunaca Diosta uyanapaj randica paicunapaj munashcacunallatami catincuna (Proverbios 12:15). Predicacushpaca chai gentecunahuanmi tupanacunchij. Paicunaca ñucanchijcuna Diospaj mandashcacunata cazushcamantami  mana alli tratancuna. Chashnapish alli causaitaca mana charincunachu. Bibliapica: “Chꞌahuanyashca runapajca alli yachaicunaca mana pajtai tucuipaj jahuamanmi tiyacun. Pueblo pungu tandanacuipica, shimillatapish mana pascanchu” ninmi (Proverbios 24:7). Caipi nishca shinaca muspacunaca ima alli yachaitaca mana ni tucuncunachu. Chaimantami Jehová Diosca ‘paicunamanta caruyaichij’ nin (Proverbios 14:7).

12. ¿Chꞌahuanyashcacuna shina ama cangapajca imatataj rurana canchij?

¹² Diospaj mandashcacunata pꞌiñajcuna shinaca mana casha ninchijchu. Ashtahuanpish ñucanchijca Diospaj mandashcacuna ñucanchij allipaj cashcatami seguros canchij. Chaita crishpa catingapajca Diosta mana cazujcunahuan ima tucushcapimi yuyana canchij. Dios cushca consejocunata mana cazuj gentecunaca achca llaquicunapimi urmancuna. Cutin ñucanchijca Jehová Diosta tucuipi cazushcamantami alaja, cushilla causaita charinchij (Salmo 32:8, 10).

13. ¿Jehová Diosca alli yachaita chasquichunca pita obliganchu?

¹³ Jehová Diosca tucuicunamanmi alli yachaita cusha nin. Pero chaita chasquichunca pita mana obliganchu. Shinapish alli yachaita mana chasquijcunahuan ima tucunatami huillan (Proverbios 1:29-32). Diosta mana cazusha nijcunaca achca llaquicunata, achca problemacunatami charingacuna. Qꞌuipacarin huiñaipajmi tucuchishca cangacuna. Cutin Dios cushca alli yachaita chasquijcuna, chaita pajtachijcunaca achca bendicioncunatami chasquingacuna. Jehová Diosca: “Ñuca yachachishcata cazushpaca, imata mana manchashpami causanga. Ima llaqui japinata mana manchashpa, sumajtami causancuna” ninmi (Proverbios 1:33).

14, 15. ¿Proverbios 4:23-mantaca imatataj yachai tucunchij?

¹⁴ Diospaj yachaita chasquishpa, chaita pajtachishpaca cushillami causanchij. Jehová Diosca tucuicunamanmi yachachisha nin. Por ejemplo, Proverbios libropica cushilla causachunmi valishca consejocunata ñucanchijman cun. Cunanca Proverbios libromanta chuscu valishca consejocunamantami yachashun.

¹⁵ Ñucanchij shunguta alli cuidashunchij. Bibliapica: “Tucuimanta yallica cambaj shunguta huaquichingui. Shungupi yuyashcami causaipica ricurin” ninmi (Proverbios 4:23). Ñucanchij cuerpopi tiyaj shunguta cuidangapajca sano micuicunatami micuna canchij, ejerciciotapishmi rurana canchij. Ñucanchij shunguta llaquichij cosascunamantapishmi caruyana canchij. Chai shinallatajmi sano micuicunata micucuj shina cada punlla Diospaj Shimimanta estudiana canchij. Ejerciciotapish ruracuj shinami tandanacuicunapaj  prepararingapaj, chaipi participangapaj, huillanaman llujshingapajpish esforzarina canchij. Ñucanchij shunguta llaquichij cosascunamanta caruyacuj shinami mana allita ruraj gentecunamanta, mapa ricunacunamanta, mana alli pugllanacunamanta caruyana canchij.

16. ¿Proverbios 23:4, 5-pi ima nishcata pajtachinaca imamantataj importante can?

¹⁶ Charishca cosascunallahuan contentos cashunchij. Bibliapica: “Ama charij tucuna yuyailla caichu. Chaita saquishpa alli yuyaita japiyari. ¿Maitataj yangalla caj charinacunapica, cambaj yuyaita churanguiyari? Chaicunaca alas jundajpi águila jatarishpa, jahuata rij shina ñapish chingaringallamari” ninmi (Proverbios 23:4, 5). Charishca cosascunaca ratomi chingari tucunlla. Shinapish cai tiempopica achca cullquita charijcunapish, ashalla cullquita charijcunapish ashtahuan charinatami munancuna. Charij tucuna yuyailla cashcamantami yallitaj preocuparincuna. Shujtajcunahuanpish mana alli apanacuncuna. Maipicarin hasta ungurincunapish (Proverbios 28:20; 1 Timoteo 6:9, 10). Pero Bibliapica charinacunallapi ama yuyachunmi yachachin. Chaita pajtachishpaca ñucanchij charishca cosascunallahuan contentos causanatami yachashun (Eclesiastés 7:12).

17. ¿Proverbios 12:18-pi nishcacunataca ima shinataj pajtachina canchij?

¹⁷ Alli yuyashpa parlashunchij. Mana cuidadota charishpaca ñucanchij shimicunahuanmi shujtajcunata llaquichi tucunchij. Bibliapica: “Maijancunaca imata rimashpapish espadahuan chugrichishca shinami saquincuna. Ashtahuanpish yachaisapacunaca sumaj shimicunahuan jambincunami” ninmi (Proverbios 12:18). Chaimantami shujtajcunamanta huashallaca mana parlana canchij. Chashnami tucuicunahuan alli apanacushun (Proverbios 20:19). Cushichij shimicunahuan parlanata yachangapajca punllantami Diospaj Shimita estudiana canchij. Chaipi tiyaj consejocunapish ñucanchij shunguman chayachunmi saquina canchij (Lucas 6:45). Imata yachashcapi cutin cutin yuyashpaca ñucanchij  shimicunahuanmi shujtajcunata sinchiyachishun (Proverbios 18:4).

18. Proverbios 24:6-pi nishca shinaca ¿alli yachachijcuna cangapajca imatataj rurana canchij?

¹⁸ Diospaj organización cushca instruccioncunata pajtachishunchij. Bibliapica: “Jatun macanacuitapish alli yachashcahuanmi pushana. Achca alli yachajcuna yuyaita cushcami, macanacuitaca mishachin” ninmi (Proverbios 24:6). Cai versopi nishca shinaca imata rurangapajca alli yachajcuna yuyaita cuchunmi minishtinchij. Por ejemplo, ñucanchij munashca shina predicanapaj randica chasquishca instruccioncunatami pajtachina canchij. Tandanacuicunapi, conferenciacunapi o huauqui panicuna rurashca demostracioncunapimi ima shina predicanata, ima shina yachachinata yachai tucunchij. Diospaj organizacionca gentecunaman yachachingapajca achca publicacioncunata, videocunatapishmi cushca. Chaicunahuan yachachinata yachangapajmi esforzarina canchij.

19. ¿Dios cushca consejocunamantaca ima shinataj beneficiarishcangui?

¹⁹ Proverbios 3:13-18-ta liyipai. Bibliapi valishca consejocuna tiyashcamantami Jehová Diostaca achcata agradicinchij. Chai consejocunata mana charishpaca llaquillami causanchijman. Cai yachaipica Proverbios libropi tiyaj valishca consejocunamantami yachashcanchij. Pero tucui Bibliapimi ashtahuan valishca consejocuna tiyan. Huaquin gentecunaca Dios cushca yachaitaca mana chasquisha nincunachu. Pero ñucanchijca Diospaj yachaita chasquishpa cushilla causanatami yachanchij. Chaimanta Diospaj yachaita chasquingapaj, chaita pajtachingapaj esforzarishunchij.