1. ¿Cushilla causangapajca imatataj rurana canchij?

 ÑUCANCHIJCUNACA tucui vidami cushilla causai tucunchij. Jesucristoca: “Diosmanta yachana munaita yuyaipi charijcunaca cushicuncunami” nircami (Mateo 5:3). Paica tucui gentecuna Jehová Diosta rijsichun, paita adorachun rurashca cashcatami alli yacharca. Chashna cushi Diosta adorashpaca ñucanchijpish cushillami causashun (1 Timoteo 1:11).

2, 3. a) ¿Picunallataj cushilla causai pudincuna? b) ¿Cai yachaipica imatataj yachashun? c) ¿Imamantataj caimanta yachana canchij?

² ¿Alli causaita charishpallachu cushilla causai tucunchij? Mana. Jesucristoca: ‘Juchacunamanta culpables sintirishpapish, achca llaquicunata charishpapish cushillami causai tucunguichij’ nircami. Shinallataj paica: ‘Ñucata caticushcamanta catirashpa llaquichishca cajcunaca cushicuncunami’ nircami (Mateo 5:4, 10, 11). Pero ¿chashna llaquicunata charishpaca ciertochu cushilla causai pudinchij?

³ Jesucristoca: ‘Llaquicunata charishpapish Jehová Diosta adorashpa, paihuan alli apanacushpaca cushillami causai pudinchij’ nishpami yachachirca (Santiago 4:8). Chaita pajtachingapajca cai yachaipimi imata rurana cashcata yachashun.

4. ¿Cushilla causangapajca puntapica imatataj rurana canchij?

⁴ PUNTAPICA: Cushilla causangapajca espiritualmentemi alimentarina canchij. Gentecunapish, animalcunapish causashpa catingapajca allimi alimentarina can. Chai shinallatajmi ñucanchijca espiritualmente alli alimentarina canchij. Jesucristoca: “Runaca mana tandallahuan causanchu. Ashtahuanpish Jehová Dios rimashca shimicunahuanmi causan” nircami (Mateo 4:4). Chaimantami alli alimentarij shina cada punlla Bibliataca alli estudiana canchij. Salmo libropi nishca  shinaca Dios mandashcacunata tuta y punlla liyij, pajtachijca cushillami causan (Salmo 1:1-3-ta liyipai).

5, 6. a) ¿Bibliaca imallatataj yachachin? b) ¿Imamantataj Bibliataca liyina canchij?

⁵ Jehová Diosca ñucanchijta cꞌuyashcamantami contento causangapaj imallata rurana cashcataca Bibliapi yachachin. Por ejemplo, ñucanchijcuna imapaj causashcata, paipaj amigos tucungapaj imallata rurana cashcata, ñucanchij juchacunata pai perdonachun imata rurana cashcatapishmi yachachin. Ashtahuancarin paica shamuj punllacunapi alaja causaita cunatami yachachin (Jeremías 29:11). Caicunamanta yachashpami de verastij cushilla sintirinchij.

⁶ Bibliaca cushilla causangapaj valishca consejocunatapishmi charin. Chai consejocunata pajtachishpaca contentosmi causai pudinchij. Llaquicunata charishpacarin ashtahuanmi Bibliata estudiana canchij, estudiashcapipishmi yuyana canchij. Jesusca: “¡Diospaj shimita uyashpa cazujcunami cushicuncuna!” nircami (Lucas 11:28).

7. ¿Bibliataca ima shinataj liyina canchij?

⁷ Bibliataca mana apuradochu liyina canchij. Cai ejemplopi yuyashun. Shuj amigoca can munashca micunatami caran. Pero canca tiempota mana charishcamanta, can charishca problemacunallapi yuyashcamantami chaitaca utca, mana mishquichishpalla micungui. Pero ña tucuchicushpaca “¿imamantataj mana gushtulla, mana mishquichishpalla micurcani?” nishpachari tapuringui. Chai shinallatajmi maipica Bibliataca apurado, mana gushtullata liyinchij. Pero chaita  ruranapaj randica imata liyicushcapi yuyangapajmi tiempota surcuna canchij. Chashna Bibliata liyishpaca cushillami sintirishun.

8. ¿“Alli cazuj, alli yuyaiyuj sirvijca” ima shinataj ñucanchijmanca espiritualmente caracun? (Notata ricui).

⁸ Jesusca espiritualmente micunata carachunca “alli cazuj, alli yuyaiyuj sirvij” huauquicunamanmi mingashca (Mateo 24:45). * Paicuna rurashca publicacioncunapish, videocunapish Bibliamantami japishca can (1 Tesalonicenses 2:13). Chaicunaca Jehová Dios imata munashcata yachachunmi ayudan. Chaimantami Huillaj y Rijchari revistacunata, jw.org paginapi tiyaj yachaicunatapish liyina canchij. Shinallataj tucui tandanacuicunapajmi alli prepararina canchij. JW Broadcasting^® programa ñucanchij shimipi tiyajpica chaita ricungapajpishmi esforzarina canchij. Chashna espiritualmente alli alimentarishpaca cushillami causashun. Cunanca imata ashtahuan rurana cashcata ricushun.

9. ¿De veras cushilla causangapajca imatataj ashtahuan rurana canchij?

⁹ ISHQUIPICA: Cushilla causangapajca Dios mandashcacunatami ñucanchij causaipi pajtachina canchij. Shuj salmota quillcaj runaca: “Tucui maijanpish Mandaj Diosta manchajca cushichishcami. Pai yachachishca shina causajca cushichishcami” nircami (Salmo 128:1). Ñucanchijpish Jehová Diosta manchashpa, shungumanta respetashpaca paitaca mana llaquichisha nishunchu (Proverbios 16:6). Bibliapica imacuna alli cashcata, imacuna mana alli cashcatami yachachin. Chaicunata pajtachingapajmi esforzarina canchij (2 Corintios 7:1). Jehová Dios munashcacunata rurashpa, pai pꞌiñashcacunata mana rurashpaca contentosmi causashun (Salmo 37:27; 97:10; Romanos 12:9).

10. Romanos 12:2-pi nishca shinaca ¿imatataj pajtachina canchij?

¹⁰ (Romanos 12:2-ta liyipai). Maijanca tal vez Jehová Dios ima alli cashcata, ima mana alli cashcata decidingapaj derechota charishcataca allimi yachan. Pero mana yachanallachu can, ashtahuanpish shungumantami cazuna can. Cai ejemplopi yuyashun. Shuj runaca autoridadcuna carreteracunapi gushtullata manejachun huaquin leycunata churashcataca allimi yachan, autoridadcuna chai leycunata churana derechota charishcatapish allimi yachan. Pero paica mana cazushpallami yallitaj utca manejan. Ñucanchijca cai runa shina Dios mandashcacunata yachashpallaca mana saquirisha ninchijchu, ashtahuanpish ñucanchijca shungumantami Jehová Diosta cazuna canchij. Pai mandashcacuna ñucanchij allipaj cashcatami tucui shunguhuan crina canchij (Proverbios 12:28). Rey Davidca Jehová Diostaca: “Ñucamanca causaiman apaj ñantami ricuchingui. Cambaj alli ladopica huiñaita sumajmari. Cambaj ñaupajpica cushicucunallami canga” nircami (Salmo 16:11).

11, 12. a) ¿Preocupados o desanimados cashpaca imamantataj cuidarina canchij? b) ¿Filipenses 4:8-pi nishca shinaca ¿ima laya diversioncunatataj agllana canchij?

¹¹ Preocupados o desanimados cashpaca chaicunata cungaringapajmi divirtirisha ninchij. Chaica allimi can, pero Jehová Dios mana munashcacunata ama rurangapajmi cuidarina canchij (Efesios 5:10-12, 15-17).

¹² Apóstol Pabloca Filipos llajtapi causaj huauqui panicunataca cashcata ruranacunapi, chuya cashcacunapi, cꞌuyaita ricuchina cashcacunapi, alli nishca cashcacunapi yuyachunmi animarca (Filipenses 4:8-ta liyipai).  Cai consejoca ñucanchijtapish alli diversioncunata agllachunmi ayudai tucun. Por ejemplo, apóstol Pablo nishca shinaca cashcata rurachun animaj librocunata, cꞌuyaita ricuchichun animaj video juegocunata, allita rurachun animaj peliculacunata, musicacunatapishmi agllana canchij. Chashnami Dios munashca shina causashun (Salmo 119:1-3). Ashtahuancarin cushilla, tranquilosmi sintirishun. Cunanca cushilla causangapaj imata ashtahuan rurana cashcata ricushun (Hechos 23:1).

13. ¿Cushilla causangapajca imatataj ashtahuan rurana canchij?

¹³ QUIMSAPICA: Cushilla causangapajca Jehová Diosta sirvinatami punta lugarpi churana canchij. Jehová Dios ñucanchijta rurashcamantami paitaca adorana canchij (Apocalipsis 4:11; 14:6, 7). Pero Jehová Dios munashca shina adorangapajmi esforzarina canchij (Juan 4:23, 24-ta liyipai). Chaipajca Diospaj espíritu santo ñucanchijta ayudachun saquishpa Dios yachachishcacunatami cazuna canchij. Contracuna ñucanchijta catirashpa llaquichisha nijpipish Jehová Diosta sirvinataca punta lugarpimi churana canchij. Por ejemplo, cai ratoca 100 yalli huauqui panicunami Jehová Diosta sirvishcamanta carcelpi cancuna. * Carcelpi cashpapish paicunaca Jehová Diosta shungumanta mañangapaj, Bibliata estudiangapaj, shujtajcunaman Diospaj Gobiernomanta predicangapajpishmi esforzaricuncuna. Chaita rurashpaca cushillami sintirincuna. Ñucanchijtapish catirashpa llaquichijpi o rimajpica Jehová Dios ñucanchijta ayudanata, bendicianata yachashpaca cushillami sintirinchij (Santiago 1:12; 1 Pedro 4:14).

14. ¿Tayikistán llajtamanta shuj huauquica ima llaquicunatataj charirca?

¹⁴ Achca huauqui panicunaca sinchi llaquicunata charishpapish ña yachashca quimsa yuyaicunata pajtachishpaca cushillami causashcacuna. 19 huatacunata charij huauqui Jovidon Bobojonovmanta parlashun. Paica Tayikistán llajtamantami can. Chai huauqui servicio militarta mana rurasha nishcamantami 4 de octubre de 2019-pica paitaca huaquin quillacunata carcelpi churarcacuna. Chaipica mana alli runata shinami tratarcacuna. Huaquin llajtacunapica chai huauquita yangamanta carcelpi churashcatami noticiacunapica huillarcacuna. Shuj cutinca paitaca militarcunapaj juramentota rurachun, militarpaj uniformetapish churarichunmi achcata macashpa obligasha nircacuna. Qꞌuipaca paitaca carcelpimi saquircacuna. Pero chai llajtapaj presidenteca cai huauquita carcelmanta llujchichunmi mandarca. Chashna sinchi llaquicunata charishpapish huauqui Jovidonca Jehová Diosta cazushpami cushilla sintirirca.

15. ¿Jovidonca carcelpi cashpaca ima shinataj espiritualmente alimentarirca?

¹⁵ Carcelpi cashpaca huauqui Jovidonca espiritualmente allimi alimentarirca. Chaipica Bibliatapish, publicacioncunatapish mana charircachu. Pero huauqui panicunaca micunacunata apashpami fundacunapi cada punllapaj agllashca versota quillcajcuna carca. Chashnami Jovidonca cada punlla Bibliata liyi pudirca, liyishcapipish yuyai tucurca. Paica carcelmanta llujshishpaca cashna nishpami consejarca: “Manaraj llaquicunata charishpallatajmi Diospajman  cꞌuchuyangapaj esforzarina canguichij. Chaipajca Bibliatapish, publicacioncunatapishmi liyina canguichij” nircami.

16. ¿Huauqui Jovidonca imapitaj yuyaj carca?

¹⁶ Huauqui Jovidonca Dios mandashcacunatapishmi cazurca. Paica mana alli yuyaicunata charinapaj randica Dios munashca cosascunapimi yuyarca, chaimantami cada punlla Dios imata rurashcapi yuyangapaj tiempota llujchij carca. Por ejemplo, cada tutamanta pajarocuna ima shina cantashcatami uyaj carca. Cutin tutayajpica Lunatapish, estrellacunatapishmi ricuj carca. Paica: “Caita rurashcamantami cada punlla cushilla, tranquilo sintirircani” nircami. Ñucanchijpish Dios imata rurashcapi yuyashpa, pai yachachishcacunata valorashpaca cushillami sintirishun. Chashnami llaquicunatapish ahuantai tucushun.

17. ¿Llaquicunata charishpaca 1 Pedro 1:6, 7-mantaca imatataj yachai tucunchij?

¹⁷ Huauqui Jovidonca Diosta sirvinataca punta lugarpimi churarca. Jesucristoca: “Jehová Diosta adorangui, paillata sirvingui” nircami (Lucas 4:8). Chaimantami huauqui Jovidonpish Jehová Diosllata sirvingapaj esforzarirca. Soldadocunaca huauqui Jovidon Diosta sirvinata saquichunmi munarcacuna.  Pero paica Diosta sirvishpa catingapaj, ahuantangapajmi cutin cutin Yayitu Diosta ayudachun mañaj carca. Paita catirashpa llaquichijpipish huauqui Jovidonca Diosta sirvinataca mana saquircachu. Paica chashna llaquicunata ahuantashcamantami cunanca sinchi feta charin (1 Pedro 1:6, 7-ta liyipai).

18. ¿Cushilla causangapajca imatataj rurana canchij?

¹⁸ Ñucanchijcuna de verastaj contentos causangapajca imata rurana cashcatami Jehová Diosca alli yachan. Llaquicunata charishpapish ña yachashca quimsa yuyaicunatami pajtachina canchij. Chashnami Jehová Diosta sirvicushcamanta de verastaj cushilla causashun (Salmo 144:15).