1. ¿Jehová Diosca ima esperanzatataj ñucanchijman cushca?

 JEHOVÁ DIOSCA para siempre causana esperanzatami ñucanchijman cushca. Huaquincunaca espiritucuna shina jahua pachapi causana esperanzatami charincuna (1 Corintios 15:50, 53). Cutin achcacunaca cai Allpapi nanaicuna illaj cushilla causana esperanzatami charincuna (Apocalipsis 21:3, 4). Cai Allpapi o jahua pachapi causana esperanzata charishpapish tucuicunami shungumanta Diosta pagui ninchij.

2. ¿Esperanzata charishpaca imamantataj seguros cashun?

² Esperanzata charishpaca allicunata, Jehová Dios cusha nishcacunata japinataca segurosmi cashun. Jehová Diosca paipaj nishcacunataca siempremi pajtachin. Shamuj punllacunapipish pai cusha nishcacunataca tucuitami pajtachinga (Números 23:19; Romanos 15:13). Y chaicunata pajtachingapajmi poderta charin. Chai nishcacunaca Jehová Diosmanta shamushcamantami de verastaj pajtarinataca seguros canchij. Caicunata ricushcamantami ñucanchij esperanzaca mana shuj muscuilla cashcata yachanchij.

3. ¿Cai yachaipica imacunallatataj ricushun?

³ Jehová Diosca ñucanchijtami cꞌuyan y paipi confiachunmi munan (Salmo 27:14-ta liyipai). Dios cusha nishcacunata japina yuyailla cashpaca, ima llaquicuna shamujpipish chaicunatami ahuantai tucushun. Chaicunata ahuantashcata ricushpaca cushillami sintirishun. Cai yachaipimi esperanzata charishpaca llaquicunata ima shina ahuantanata ricushun. Shinallataj esperanzata charinaca shuj barcota chariraj fierro shina, shuj casco shina cashcatami ricushun.

4. ¿Esperanzata charinaca imamantataj barcota chariraj fierro shina can?

⁴ Apóstol Pabloca Hebreos libropica esperanzata charinataca  shuj barcota chariraj fierrohuanmi chꞌimbapurarca (Hebreos 6:19-ta liyipai). Apóstol Pabloca achca cutincunami barcopi rij carca. Chaimantami barcota chariraj fierroca barco ama maiman cuyurichun ayudaj cashcata yacharca. Shuj cutinca apóstol Pabloca mama cuchapi manchanai huaira jatarijtami ricurca. Chaimi barcota manejajcunaca barco rumicunahuan ama chocachun barcota charicuj fierrota yacuman cacharcacuna (Hechos 27:29, 39-41). Esperanzata charinaca barcota charicuj fierro shinami can. Cutin problemacunaca chai jatun huaira shinami can. Jesucristoca ñucanchijta catirashpa llaquichinatami huillarca (Juan 15:20). Pero ñucanchijca esperanzata charishpaca pi ñucanchijta catirashpa llaquichijpipish, llaquicunata charishpapish tucuitami ahuantashun.

5. ¿Jesusca huañunata yachashpapish esperanzata charishcamantaca ima shinataj sintirirca?

⁵ Jesusca huañunata yachashpapish esperanzata charishcamantami tucuita ahuantarca. Jesusca Yayitu Diospi confiashcata, tranquilo cashcatami ricuchirca. Chaimantami apóstol Pedroca huata 33 Pentecostés punllapica Salmos libropi Jesusmanta ima nishcata huillarca. Chaipica: ‘Ñucaca Diospimi shunguta churashpa causasha. Ñucataca Pambana Jutcupica mana saquinguichu. Canta tucui shunguhuan sirvijpaj cuerpo ismuchunpish mana saquinguichu. Cambaj ñaupajpi cajpica yallitajmi cushichingui’ ninmi (Hechos 2:25-28; Salmo 16:8-11). Jesusca huañushpapish Yayitu Dios paita cutin tigra causachinata, jahua pachapi Yayitu Dioshuan cutin tigra canatami seguro carca (Hebreos 12:2, 3).

6. ¿Huauqui Leonardmantaca imatataj yachai tucunchij?

⁶ Esperanzata charishcamantami achca huauqui panicunapish ima llaquita charishpaca ahuantai tucushcacuna. Por ejemplo, Leonard Chinn shuti huauquica Inglaterra llajtapimi causarca. Paitaca Primera Guerra Mundialpimi shujtajcunahuan mana macanacungapaj risha nishcamanta carcelpi churarcacuna. Paitaca pihuan ama parlachunmi huichcashpa churarcacuna. Qꞌuipacarin sinchitapishmi trabajachircacuna. Chaimantami tiempo huashaca paica: “Cai llaquicunata charishpapish esperanzata charishcamantami tucuita ahuantai tucurcani. Ñucaca Yayitu Dios cusha nishcacunapi crishpa, Jesuspaj, apostolcunapaj, profetacunapaj ejemplota yuyarishpami tucuita ahuantai tucurcani” nircami. Leonardca esperanzata charishcamantami fierrohuan charirashca barco shina carca. Chaimantami tucuita ahuantarca. Ñucanchijpishmi pai shina cai tucunchij.

7. ¿Yayitu Dios cusha nishcacunata japinataj cashcataca imamantataj seguros canchij?

⁷ Yayitu Diosta rijsi horasmantami achca llaquicunata charishcanchij. Pero cai llaquicunata ahuantashpaca Yayitu Diospaj ñaupajpimi alli ricurishcanchij (Romanos 5:3-5; Santiago 1:12-ta liyipai). Yayitu Diosllatajmi chaicunata ahuantachunca ñucanchijta ayudashca. Caicunata ricushpami Yayitu Dios cusha nishcacunataca japinataj cashcata crinchij. Diabloca ñucanchijtami chꞌican chꞌican llaquicunahuan manchachisha nin. Pero Yayitu Diospaj ayudahuanca cai tucui llaquicunatami chꞌimbapurashun.

8. ¿Shuj cascota churarij shina imamantataj Dios cusha nishcacunata japina yuyailla purina canchij?

⁸ Bibliapica esperanzataca shuj cascohuanmi chꞌimbapuran (1 Tesalonicenses 5:8-ta liyipai). Shuj soldadoca contracuna paipaj umata ama llaquichichunmi cascota churarin. Chai shinallatajmi Diablo ñucanchijta ama llaquichichun, ama pandachichunca shuj cascota  churarij shina Dios cusha nishcacunata japina esperanzahuan causana canchij. Diabloca tentacioncunapi urmachun, mana alli yuyaicunatapish charichunmi munan. Pero Dios cusha nishcacunata japina yuyailla cashpaca tentacioncunapi mana urmashunchu, mana alli yuyaicunatapish mana charishunchu.

9. ¿Dios cusha nishcacunapi mana crishcamantaca gentecunaca imatataj ruranata munancuna?

⁹ Huiñai huiñaita causana yuyailla cashpaca alli decisioncunatami japishun. Pero ñucanchij munashcacunallapi yuyashpaca Dios cusha nishcacunapi crinatami saquishun. Corinto llajtapi causaj huauqui panicunahuan ima tucushcata ricushun. Paicunaca Dios causachinapi crinatami saquircacuna (1 Corintios 15:12). Apóstol Pabloca ‘Dios causachinapi mana crishcamantami paicunaca paicunapaj munashcacunallata pajtachingapaj causancuna’ nircami (1 Corintios 15:32). Cunan punllacunapipish achca gentecunaca Dios cusha nishcacunapica mana crincunachu. Chaimantami cushicunallapi, paicunapaj munashcacunallapi ocuparincuna. Cutin ñucanchijca Dios cusha nishcacunata japina yuyaillami causanchij. Chashnami shuj cascota churarij shina mana alli yuyaicunamanta, mana alli munaicunamantapish jarcarishun (1 Corintios 15:33, 34).

10. ¿Desanimachij yuyaicunata ama charingapajca imapitaj crina canchij?

¹⁰ Maijancunaca: “Ñucaca mana alli canichu. Dios munashca shinapish tucuitaca mana alli rurai tucunichu. Chaimantami huiñai causaitaca mana chasquisha” nishpachari yuyancuna. Jobpaj mana alli amigo Elifazpish chashnallatajmi nirca. Paica: ‘¿Runaca mapa illaj cangapajca imatagari? Riqui, Diosca paipaj angelcunapipish manamari shunguta churanchu. Jahua pachapish paipaj ricuipica, manamari mapa illajchu’ nircami (Job 15:14, 15). Pero cai shimicunaca mana ciertochu can. Diabloca chashna yuyachunmi munan. Pero Dios ñucanchijta mana cꞌuyashcata crishpa, huiñai causaita mana chasquinata crishpaca esperanza illajmi causashun. Diosta sirvingapaj esforzarinatapishmi saquishun. Chaimantami Dios ñucanchijta bendiciasha nishcata, Paraíso Allpapi causachun paillataj ayudasha nishcatapish crina canchij (1 Timoteo 2:3, 4).

11. ¿Dios cusha nishcacuna pajtaringacamaca imamantataj shuyashpa catina canchij?

¹¹ Dios cusha nishcacuna pajtaringacama pacienciahuan shuyanaca maipica mana facilchu can. Jehová Diosca siempremi causashca. Ñucanchijpaj achca tiempota pasajpipish, Jehová Diospajca ashalla tiempota pasashca layami can (2 Pedro 3:8, 9). Chaimantachari Jehová Diosca pai cusha nishcacunata ñucanchij munashca horaspica mana pajtachin. Pero ¿Dios cusha nishcacuna pajtaringacama pacienciahuan shuyashpa catingapajca imatataj rurana canchij? (Santiago 5:7, 8).

12. Hebreos 11:1, 6-pi nishca shinaca ¿esperanzata charingapajca imatataj crina canchij?

¹² Bibliapica ‘esperanzata charingapajca Jehová Dios tiyashcata, pai ñucanchijta bendiciaj cashcata, pai cusha nishcacunatapish pajtachij cashcatami crina canchij’ ninmi. Chaimantami Dios cusha nishcacunata japina yuyailla cangapajca Jehová Dioshuan alli apanacuna canchij, paipimi confiana canchij (Hebreos 11:1, 6-ta liyipai). Cunanca Jehová Dioshuan alli apanacungapaj, pai cusha nishcacuna yuyailla cangapaj imallata rurana cashcata ricushun.

13. ¿Diospaj amigocuna cangapajca imatataj rurana canchij?

¹³ Jehová Diosta mañashunchij, Bibliatapish liyishunchij. Jehová Diosta mana ricui tucushpapish  paipaj alli amigocunami cai tucunchij. Jehová Diosta mañajpica paica siempremi ñucanchijta uyan (Jeremías 29:11, 12). Bibliatapish liyishpa, imata liyishcapipish yuyashpaca Jehová Diostami uyanchij. Diospaj Shimipica Jehová Diosllataj paita sirvijcunata ima shina cuidashcata yachashpaca, pai cusha nishcacunata pajtachij cashcatami tucui shunguhuan crinchij. Diospaj Shimipi nishca shimicuna cushichishcamanta, ahuantachun ayudashcamantami Dios cusha nishcacunata shuyacunchij (Romanos 15:4).

14. ¿Jehová Dios shujtajcunata ima shina cuidashcataca imamantataj yuyarina canchij?

¹⁴ Jehová Dios pai cusha nishcacunata pajtachij cashcata yuyarishunchij. Abrahampaj y Sarapaj ejemplopi yuyashun. Paicunaca mayorllacuna cashcamantami huahuacunataca ña mana chari tucurcacuna. Pero Jehová Diosca paicunataca shuj huahuata charigrishcatami huillarca (Génesis 18:10). Abrahamca feta charishcamantami achca llajtacunapaj yaya canata shuyacurca (Romanos 4:18). Runacunapajca Jehová Dios ima nishcaca mana pajtaipaj layami carca. Pero Abrahamca Jehová Dios ima nishcata pajtachinataca tucui shunguhuanmi crirca. Chaimantami Jehová Diosca Abrahamtapish, Saratapish shuj huahuata charichun ayudarca (Romanos 4:19-21). Cashna laya ejemplocunamanta yachashpaca Jehová Diospimi ashtahuan confiashun. Jehová Diosca mana pajtaipaj laya cajpipish pai nishcatami siempre pajtachin.

15. ¿Jehová Dios ñucanchijta ima shina ayudashcapica imamantataj yuyana canchij?

¹⁵ Jehová Dios ñucanchijta ima shina ayudashcapi yuyashunchij. Por ejemplo, Jesusca Jehová Dios ñucanchijman imalla minishtishcacunata cunatami huillarca (Mateo 6:32, 33). Shinallataj paica Jehová Dios paipaj espíritu santota cushpa ñucanchijta ayudanatapishmi  huillarca (Lucas 11:13). Jehová Diosca cai nishcacunatami pajtachishca. Ashtahuancarin Jehová Dios ñucanchijta ima shina perdonashcata, ima shina cushichishcata, ima shina yachachishcatami yuyarinchij (Mateo 6:14; 24:45; 2 Corintios 1:3). Jehová Dios cai tucuita ima shina pajtachishcata yuyarishpaca, shamuj punllacunapi pai cusha nishcacunata pajtachinatapishmi seguros cashun.

16. ¿Esperanzata charinaca imamantataj Dios cushca valishca regalo can?

¹⁶ Jehová Diosca ñucanchijmanca huiñai causaitami cusha nin. Chai esperanzata charinaca Dios cushca regalomi can. Ñucanchijca Jehová Dios pai cusha nishcacunata pajtachinatami crinchij. Shuj barcoca chariraj fierrota charishcamantami jatun acapana shamujpipish maiman mana cuyurin. Ñucanchijpish esperanzata charishpaca llaquicuna shamujpipish, contracuna llaquichisha nijpipish chaicunatami ahuantai tucushun. Shinallataj esperanzata charishpaca shuj cascota churarij shinami mana alli yuyaicunamanta, mana alli munaicunamantapish jarcarishun. Dios cushca esperanzamanta yachashpaca Jehová Diospajmanmi ashtahuan cꞌuchuyashun, pai ñucanchijta cꞌuyashcatapishmi yachashun. Dios cusha nishcacuna yuyailla cashpaca allimi causashun.

17. ¿Esperanzata charishcamantaca imamantataj cushilla sintirinchij?

¹⁷ Romapi causaj huauqui panicunataca apóstol Pabloca: “Shamuj punllacunapi japina cashcamanta cushicuichij” nishpami quillcarca (Romanos 12:12). Apóstol Pabloca Diosta cazushpaca jahua pachapi huiñai causaita chasquinatami seguro carca. Chaimantami cushilla sintirirca. Ñucanchijpish Jehová Dios mana llullaj, tucuita pajtachij cashcamantami paipi confianchij. Jehová Dios pai cusha nishcacunata pajtachinata yachashpaca dimastij cushillami sintirinchij (Salmo 146:5, 6).