Segunda Guerra Mundialpica nazi soldadocunata shuj mandajca huaquin Testigocunataca: “Franciahuan, Inglaterrahuan cancuna mana macanacushpaca tucuicunami huañunguichij” nircami. Chai huauquicunapaj cꞌuchullapi achca nazi soldadocuna tiyajpipish paicunaca mana manchashpami guerrapi mana participarcacuna. Cunan punllacunapipish Testigo de Jehovacunaca huañuchishun nijpipish guerracunapi, politicapica mana participanchijchu.

1. DIOSTA SIRVIJCUNACA TUCUICUNAMI ISRAEL LLAJTAMANTA CARCACUNA

Ñaupa tiempopica Jehová Diosca Israel llajtatami paipaj pueblo cachunca agllarca (Éxodo 19:5). Paicunamanca chaipi causachunmi shuj allpatapish curca. Israelitacunaca shujlla llajta cashcamantami shujtaj llajtacunahuan macanacushpapish paicunapuraca mana macanacujcuna carca. *

Cunan punllacunapica Diosta sirvijcunaca chꞌican chꞌican llajtacunapimi causancuna (Apocalipsis 7:9). Paicunaca guerracunaman rishpaca tal vez shujtaj llajtacunapi causaj Diosta sirvijcunatami huañuchinmancuna.

2. JEHOVÁ DIOSLLATAJMI ISRAELITACUMANCA GUERRACUNAPI MACANACHUN MANDARCA

Ñaupa tiempopica Jehová Diosllami israelitacuna maipi macanacugrishcata, ima hora macanacugrishcata agllaj carca. Por ejemplo, Jehová Diosca  Canaán llajtapi causajcunata tucuchichunmi mandarca. Chai gentecunaca demoniocunata adorajcuna, tucui laya huainayashpa causajcunami carca. Huahuacunatapish rupachishpami yanga dioscunaman cujcuna carca. Paicunaca mancharinacunatami rurajcuna carca. Jehová Diosca israelitacuna chai millai gentecuna shina ama cachunmi paicunata tucuchichun mandarca (Levítico 18:24, 25). Qꞌuipaca millai contracuna Israel llajtata llaquichisha nijpica israelitacunata difindirichunmi mandarca (2 Samuel 5:17-25). Pero Jehová Diosca israelitacunallataj ima hora macanacugrishcata agllachunca mana saquircachu. Jehová Dios mana mandashca horaspi israelitacuna macanacunaman rishpaca llaquipimi urmarcacuna (Números 14:41-45; 2 Crónicas 35:20-24).

Cunan punllacunapica Jehová Diosca gentecunata macanacuchunca mana mandanchu. Gobiernocunaca Diospaj munaita pajtachinapaj randica paicuna munashcacunata japingapajmi macanacuncuna. Paicunaca tal vez shujtaj llajtapaj allpata japisha nishcamanta, cullquita ganasha nishcamanta, o politicamantami macanacuncuna. Cutin shujtajcunaca: “Diospaj crishcacunatami difindishun. Diospaj contracunatapishmi tucuchishun” nishpami macanacuncuna. Pero ¿Jehová Diosca chashna macanacuchunchu mandanga? Mana. Jehová Diosca paita sirvijcunapaj contracunataca Armagedón nishca macanacuipimi tucuchinga (Apocalipsis 16:14, 16). Chai macanacuipica Diospaj pueblota difindingapajmi angelcunalla macanacungacuna. Cai Allpapi caj Diosta sirvijcunaca mana macanacungacunachu (Apocalipsis 19:11-15).

3. JEHOVAPI FETA CHURAJCUNATACA MANA HUAÑUCHIJCUNACHU CARCA

Ñaupa tiempopica israelitacunaca Diospi feta ricuchijcunataca mana huañuchijcunachu carca. Jehová Dios mandashcacunallatami huañuchijcunaca carca. Por ejemplo, Jehová Diosca Jericó llajtata tucuchichunmi mandashca carca. Pero Rahab, Diospi feta churashcamantami paitapish, paipaj familiatapish israelitacunaca mana huañuchircacuna (Josué 2:9-16; 6:16, 17). Qꞌuipaca Gabaón llajtamanta causajcuna Diosta respetashcata  ricuchishcamantami israelitacunaca paicunatapish mana huañuchircacuna (Josué 9:3-9, 17-19).

Cunan punllacunapica guerracunaman rijcunaca Diospi feta churajcunataca mana perdonancunachu. Huaquinpicarin ima culpata mana charijcunatapishmi huañuchincuna.

4. ISRAELITACUNACA DIOS MUNASHCA SHINAMI MACANACUJCUNA CARCA

Ñaupaj tiempopica israelitacunaca Dios cushca instruccioncunatami macanacungapaj catijcuna carca. Por ejemplo, maipica Jehová Diosca israelitacunataca paicunapaj contra llajtacunahuan alli tucunacuchunmi mandarca (Deuteronomio 20:10). Shinallataj Jehová Diosca tucui soldado israelitacunataca mana alli ruraicunamanta caruyachun, paicunapaj huasicunatapish, cuerpotapish limpiota charichunpishmi mandarca (Deuteronomio 23:9-14). Ashtahuancarin Jehová Diosca ima llajtata japishpa shujtaj llajtacuna shina huarmicunata ama violachunmi mandarca. Shuj soldado israelitaca macanacui qꞌuipa shuj apashca huarmihuan cazarasha nishpaca shuj quillatami shuyana carca (Deuteronomio 21:10-13).

Cunan punllacunapica achca gobiernocunaca soldadocuna macanacucushpa gentecunata ama llaquichichunmi huaquin leycunata churashcacuna. Chashnapish guerracunapica soldadocunatapish, shujtaj gentecunatapishmi llaquichincuna.

5. JEHOVÁ DIOSCA PAIPAJ PUEBLOTAMI DIFINDIJ CARCA

Ñaupa tiempopica Jehová Diosca israelitacunamantami macanacurca. Maipicarin milagrocunata rurashpami paicunata difindirca. Por ejemplo, Jehová Diosca israelitacunataca Jericó llajtata mishachunmi ayudarca. Israelitacunaca Jehová Dios ima nishcata cazushpami sinchita caparircacuna. Sinchita caparishcacuna uyarijpica chai pueblo muyundij pircacunaca urmarcallami. Chaimi israelitacunaca chai pueblota mishai tucurca (Josué 6:20). Qꞌuipaca amorreocunatapish mishachunmi Jehová Diosca ayudarca. Chaipica Jehová Diosca jahua pachamanta jatun rumicunatami paicunapaj jahuapi shitarca. Chai rumicunaca israelitacuna espadahuan huañuchishcatapish yallitami huañuchirca (Josué 10:6-11).

JESUSTA CATIJCUNACA TUCUICUNAHUAN ALLI APANACUNGAPAJMI ESFORZARINCHIJ

Ñucanchijca israelitacuna shinaca guerracunapica mana participanchijchu. Ashtahuanpish Dios mandashcacunatami cazunchij. Por ejemplo, Jehová Diosca: ‘Cai tucuri punllacunapica Diosta sirvijcunaca mana macanacungacunachu’ nircami (Isaías 2:2-4). Shinallataj Jesuspish: ‘Ñucata catijcunaca cai mundopaj ruraicunapi mana chagruringacunachu’ nircami (Juan 15:19). Chaimantami ñucanchijca guerracunapica mana macanacunchij, cai mundopaj ruraicunapipish mana chagrurinchij.

Ashtahuancarin Jesucristoca paita catijcunamanca shujtajcunata ama pꞌiñachun, ama colera purichun, ama macanacuchunmi yachachirca (Mateo 5:21, 22). Shinallataj shujtajcunahuan alli apanacungapaj esforzarichun, paicunapaj contracunatapish cꞌuyachunmi yachachirca (Mateo 5:9, 44).

¿Cai yachachishcacunataca ima shinataj pajtachina canchij? Ñucanchijca guerracunamanca mana rinchijchu. Shinapish congregacionpica ñucanchij huauqui panicunataca contracunata shinaca mana ricunachu canchij. Paicunataca mana pꞌiñanachu canchij. Ashtahuanpish tucuicunahuanmi alli apanacuna canchij (Santiago 4:1, 11).

Ñucanchijca guerracunapi participanapaj randica ñucanchijpura alli apanacushpa, cꞌuyanacushpami causana canchij (Juan 13:34, 35). Jehová Dios tucui guerracunata tucuchingacamaca shujtajcunahuan mana macanacushpa Jehová Diospi confiashpami catina canchij (Salmo 46:9).