1, 2. a) ¿Huaquin gobiernocunaca ima jarcaicunatataj churashcacuna? b) ¿Jarcaicunata churajpipish huauqui panicunaca imatataj rurashcacuna? c) ¿Ñucanchijta catirashpa llaquichijpipish imamantataj cushilla sintirinchij? (Página 1-pi tiyaj fotomanta parlapai).

 CUNAN punllacunapica 30 yalli llajtacunapimi autoridadcunaca huauqui panicuna libremente Diosta adorachunca mana saquincuna. Chai llajtacunamanta huaquin llajtacunapica huauqui panicunatami carcelpi churashcacuna. Paicunaca ima mana allitaca mana rurashcacunachu. Chai huauqui panicunataca Bibliata estudiashcamanta, shujtajcunaman predicashcamanta, tandanacuicunaman rishcamanta, politicapi mana chagrurishcallamantami carcelpi churashcacuna. Pero gobiernocuna paicunapaj contra jatarijpipish chai huauqui panicunaca Jehová Diosta tucuipi cazungapajmi esforzaricuncuna.

² Canpish chai huauqui panicunapaj fotocunapi paicuna cushilla cajtami ricushcangui. Jehová Dios paicunahuan cushilla cajta yachashcamantami chai huauqui panicunaca cushilla cancuna (Salmo 15:1, 2). Jesucristoca: ‘Cashcata ruracushcamanta catirashpa llaquichishca cajcunaca cushicuncunami. Achcata cushicuichij jahua pachapimi cancunaca jatun bendicioncunata chasquinguichij’ nircami (Mateo 5:10-12).

3. Hechos 4:19, 20-pi ricushca shinaca ¿autoridadcuna ama predicachun jarcajpipish apostolcunaca imatataj rurarcacuna?

³ Huaquin huauqui panicunaca apostolcuna causashca  tiempopi shinallatajmi causacuncuna. Apostolcunatapish huaquin autoridadcunaca Jesucristomanta “imata ama yachachichunmi mandarcacuna” (Hechos 4:18; 5:27, 28, 40). Pero apostolcunaca chai juezcunata cazunapaj randica Jehová Diosta cazuna ashtahuan importante cashcatami cuentata curcacuna (Hechos 4:19, 20-ta liyipai; Hechos 10:42). Pedro y Juanca chai juezcunataca ‘Jehová Diosmi cancunata yalli autoridadta charin’ nicushca shinami Jesucristomanta predicashpa catircacuna.

4. Hechos 5:27 al 29-pi ricushca shinaca ¿apostolcunaca ima ejemplotataj ñucanchijman saquircacuna? b) ¿Paicunapaj ejemplota catingapajca imatataj rurana canchij?

⁴ Apostolcunaca ñucanchijmanca alli ejemplotami curcacuna. Paicunaca: “Gentecunata cazunapaj randica tucuimanta yallica Diostami cazuna canchij” nircacunami (Hechos 5:27-29-ta liyipai). Qꞌuipaca autoridadcuna azotijpipish paicunaca Jesuspaj shutimanta llaquita apashpa pingai tucushca cashcamantami cushicushpa rircacuna. Huillanatapish mana saquircacunachu (Hechos 5:40-42).

5. ¿Cunanca ima tapuicunatataj yachashun?

⁵ Romanos 13:1-pica Pabloca autoridadcunata cazuchunmi mandarca. Pero ¿apostolcunaca imamantataj maipica autoridadcunata mana cazurcacuna? ¿Ñucanchijpish autoridadcunata cazuna cashpapish Jatun Mandaj Jehová Diosta tucuipi cazucushcataca ima shinataj ricuchina canchij? Cunanca cai tapuicunamanta yachashun (Tito 3:1).

6. a) Romanos 13:1-pi nishca shinaca ¿Jesusta catijcunaca imatataj rurana canchij? b) ¿Cai Allpapi tiyaj mandajcunamanca pitaj autoridadta cun?

⁶ Romanos 13:1-ta liyipai. Cai versopi nishca shinaca Jesusta catijcunaca autoridadcunata, gobiernocunatami cazuna canchij. Autoridadcunaca orden tiyachunmi huaquin leycunata churashcacuna. Huaquinpicarin hasta Diosta sirvijcunatapishmi difindincuna (Apocalipsis 12:16). Chaimantami Bibliapica autoridadcunaman impuestota pagachun, paicunata respetachun, cazuchun  mandan (Romanos 13:7). Pero chai gobiernocunamanca Jehová Diosmi autoridadta cun. Chaimantami Jesucristoca mandaj Pilatotaca: “Dios canman autoridadta mana cushca cajpica ñuca contraca imata mana rurai tucunguimanchu” nirca (Juan 19:11). Cunan tiempopipish gobiernocuna, politicocunaca Jehová Dios saquijllapimi mandai tucuncuna.

7. a) ¿Autoridadcunataca imamantataj maipica mana cazuna canchij? b) Eclesiastés 5:8-pi nishca shinaca ¿autoridadcunaca imatataj yuyarina cancuna?

⁷ Jesusta catijcunaca autoridadcunatami cazuna canchij. Pero autoridadcuna Dios mana munashcata rurachun nijpi o Diosta ama cazuchun nijpica paicunataca mana cazunachu canchij. Por ejemplo, quizás autoridadcunaca jovencitocuna paicunapaj llajtata difindichun, armacunata japichunmi ningacuna. * Mana cashpaca Bibliata, publicacioncunatapish ama charichun, ama predicachun, ama tandanacuchunmi jarcangacuna. Autoridadcuna ñucanchijta chashna llaquichijpipish Jehová Diosca tucuitami ricucun. Paimi paicunata juzganga (Eclesiastés 5:8).

8. ¿Autoridadcunata yalli pitaj ashtahuan autoridadta charin?

⁸ Gobiernocunaca mandangapajmi autoridadta, poderta charincuna. Pero paicunaca Diostapish yalli podertaca mana charincunachu. Chaimantami Bibliapica chuscu cutincuna Jehová Diosmanta parlashpaca tucuimanta yalli jatun Mandaj nin (Daniel 7:18, 22, 25, 27, La Biblia. Traducción del Nuevo Mundo).

9. ¿Profeta Danielca muscuipi shinaca imatataj ricurca?

⁹ Jehová Diosca profeta Danielmanca muscuipi shinami autoridadcunata yalli poderta charishcata ricuchirca. Profeta Danielca chuscu jatun animalcunatami ricurca. Chai chuscu animalcunaca ñaupa tiempopi tiyaj achca poderta charij gobiernocunata, cunan tiempopi tiyaj achca poderta charij gobiernocunatapishmi ricuchin. Chaicunaca Babilonia, Medopersia, Grecia y Roma llajtacunamanta gobiernocunatami ricuchirca. Cunan punllacunapi tiyaj Reino Unido y Estados Unidos gobiernocunatapishmi ricuchin (Daniel 7:1-3, 17). Chai qꞌuipaca Danielca jahua pachapi shuj jatun tiyarinapi Jehová Dios tiyacushcatami ricurca (Daniel 7:9, 10). Shinallataj Daniel libropica cai Allpapi tiyaj gobiernocunapaj shuj advertenciami tiyan. Chaimanta parlashpa catishun.

10. Daniel 7:13, 14, 27-pi ricushca shinaca ¿Jehová Diosca cai Allpata mandachunca picunamantaj autoridadta curca? b) ¿Imamantataj Jehová Diosca paicunamanca autoridadta cun?

¹⁰ Daniel 7:13, 14, 27-ta liyipai. Danielca gobiernocunapaj autoridadta Jehová Dios quichushcatami ricurca. Chai qꞌuipaca Jesucristoman, 144.000 ungidocunamanpish autoridadta cushcatami ricurca (Daniel 7:18). Paicunaca Diosta alli sirvijcuna, gobiernocunata yalli achca poderta charijcunami can. Jehová Diosca tucuimanta yalli Jatun Mandaj cashcamantami piman autoridadta cungapaj derechota charin.

11. ¿Jehová Dios tucuimanta yalli jatun Mandaj cashcata ricuchingapajca profeta Danielca imatataj nirca?

¹¹ Profeta Danielca ‘Jehová Diosca Jatun Mandajcunatapish paimi churan. Paimi anchuchin. Mandaj cachunca Taita Diosca pita pai churasha nishcatami churan’ nircami (Daniel 2:19-21; 4:17). ¿Jehová Diosca ciertochu mandajcunata anchuchishpa paicunapaj randi shujtajcunata churashca? Ari. Caicunamanta yachashpa catishun.

12. ¿Yayitu Diosca picunatataj paicunapaj mandanamantaca anchuchirca? (Fotomanta parlapai).

 ¹² Jehová Diosca gobiernocunata yalli autoridadta charishcatami ricuchishca. Quimsa ejemplocunata ricushun. Egipto llajtata mandajca Diospaj pueblotami sinchita trabajachishpa charirca. Chaimantami paicunataca mana richun saquirca. Pero Jehová Diosca paipaj pueblota quishpichingapajmi chai mandajtaca puca mama cuchapi ahuachirca (Éxodo 14:26-28; Salmo 136:15). Babilonia llajtamanta rey Belsasarpish Jehová Diosta yanganchishpa platamanta, oromanta rurashca dioscunatami alabarca (Daniel 5:22, 23). Pero chai jatun tucushca reytaca Jehová Diosmi chai tutallataj huañuchichun saquirca. Paipaj mandanatapish medocuna, persacuna japichunmi saquirca (Daniel 5:28, 30, 31). Palestina llajtata mandaj Herodes Agripa primeroca apóstol Santiagotami huañuchirca. Qꞌuipaca apóstol Pedrota huañuchisha nishpami carcelpi churarca. Pero Diosca Pedrota huañuchichunca mana saquircachu. Diospaj angelca Herodesmanca shuj ungüitami cacharca. Chaimi Herodesca huañurca (Hechos 12:1-5, 21-23).

13. ¿Gobiernocuna tandanacujpipish Jehová Diosca ima shinataj paicunata misharca?

¹³ Achca gobiernocuna tandanacushpa Diospaj pueblota llaquichisha nijpica, Jehová Diosca paicunata yalli poderta charishcatami ricuchishca. Shuj cutinca Jehová Diosca israelitacuna Canaán llajtamanta 31 reycunata mishachun, pai cusha nishca allpatapish quichuchunmi ayudarca (Josué 11:4-6, 20; 12:1, 7, 24). Shinallataj Siria llajtamanta rey Ben-hadad, shujtaj 32 reycunapish Diospaj pueblota llaquichinaman rijpica Jehová Diosca paicunata mishachunmi israelitacunata ayudarca (1 Reyes 20:1, 26-29).

14, 15. a) ¿Jehová Dios tucuimanta yalli cashcamantaca rey Nabucodonosorpish, rey Dariopish imatataj nircacuna? b) ¿Salmota quillcaj shuj runaca Jehová Diosmanta, paipaj pueblomantaca imatataj nirca?

¹⁴ Jehová Diosca gobiernocunata yalli achca poderta charishcatami cutin cutin ricuchishca. Babilonia llajtamanta rey Nabucodonosorca jatun tucushpa pai achca poderta charishcatami yuyarca. Jehová Diostapish mana alabarcachu. Chaimi Jehová Diosca pai loco tucuchun saquirca. Qꞌuipaca rey Nabucodonosorca juilluta japishpami Jehová  Dioslla tucuicunamanta yalli jatun cashcata, huiñaipaj Mandaj cashcata, tucuita rurai tucuj cashcata intindirca. Chaimantami paita alabarca (Daniel 4:30, 33-35). Huaquin huatacuna qꞌuipaca Danieltaca Jehová Diosta tucuipi cazushcamantami leoncunapaj jutcupi shitarcacuna. Pero Jehová Diosca paitami quishpichirca. Chaimantami rey Darioca: ‘Ñuca mandacun tucui llajtacunapica tucuicuna Danielpaj Taita Diosta alli nishpa manchachuncuna. Paica causaj Taita Diosmi, huiñai huiñaita causajmi. Pai mandanaca manataj chingachishca cangachu. Pai mandanaca huiñaitami canga’ nirca (Daniel 6:7-10, 19-22, 26, 27).

¹⁵ Salmota quillcaj shuj runaca: “Diosta mana rijsij llajtacuna yuyarinacushcataca Mandaj Diosca chingachinmi. Llajtacunapi causajcuna millaita ruranata yuyarinacucujtaca muspachinmi. Mandaj Diosmi ñucanchij Diosca nij llajtaca cushichishcami. Mandaj Dios chꞌicanyachishcacunaca cushichishcami” nircami (Salmo 33:10, 12). Chaimantami ñucanchijca Yayitu Diosta tucuipi causangapaj esforzarina canchij. Chashnami cushilla causashun.

16. ¿Shamuj punllacunapi Jehová Dios ñucanchijta quishpichinataca imamantataj seguros canchij? (Fotomanta parlapai).

¹⁶ Ñaupa tiempopi Jehová Dios paipaj pueblota ima shina quishpichishcatami ricushcanchij. Ñallami jatun llaqui punllacuna callaringa (Mateo 24:21; Daniel 12:1). Chaipica Magog llajtata mandaj Gog nishca achca gobiernocunami ñucanchijta llaquichisha ningacuna. Pero chai tiempopica Jehová Dios ñucanchijtapish quishpichinatami tucui shunguhuan crinchij. Naciones Unidas nishca organizacionpi tiyaj 193 gobiernocuna shuj shinalla macanacungapaj tandanacushca cajpipish, Jehová Diosca paipaj angelcunahuanmi paicunata tucuchinga. Jehová Diosca: ‘Shujtaj llajtacunapi causajcunapaj ñahuipica ima juchachina illajllami casha, jatunyachishcapishmi  casha. Chashna rurajta ricushpami ñucataca Jehová Diostaj cashcataca yachangacuna’ ninmi (Ezequiel 38:14-16, 23; Salmo 46:10).

17. ¿Cai Allpapi tiyaj gobiernocunahuan, Diosta cazujcunahuanca imataj tucunga?

¹⁷ Gobiernocuna Diospaj pueblota llaquichisha nijpica Armagedón macanacuimi callaringa. Chaipica Jehová Diosca cai Allpapi tiyaj tucui gobiernocunatami tucuchinga (Apocalipsis 16:14, 16; 19:19-21). Pero allita rurajcunallami cai Allpapica huiñaipaj causai tucungacuna (Proverbios 2:21).

18. ¿Jesusta catijcunaca imamantataj Diosta cazunata decidishcacuna?

¹⁸ Ñaupa tiempopica quimsa jovencunaca huañunata mana manchashpami Diosta cazunata decidircacuna. Chaimantami Jehová Diosca paicunataca shuj hornopi ama rupachun quishpichirca. Cunan punllacunapipish Jesusta catijcunaca Jehová Diosta cꞌuyashcamantami huañunata mana manchashpa, carcelman rinata mana manchashpa Diosta tucuipi cazunata decidishcacuna (Daniel 3:28-ta liyipai).

19. ¿Imamantataj Jehová Diosta tucuipi cazuna canchij?

¹⁹ Davidpajca Jehová Diosta tucuipi cazunami valishca carca. Chaimantami paica: ‘Llajtacunapi causajcuna imalla rurashcataca Mandaj Diosmi ricuchinga. Mandaj Dioslla, ima pandata ñuca mana rurashcatapish chai shinallataj ricuchihuayari. Quiquinpish shunguta churashcamantaca ñuca cashcata ruraj cashca imapi mana pandaj cashca ñucataca huaquichichun’ nirca (Salmo 7:8; 25:21). Ñucanchijpish ima llaquicuna, ima jarcaicuna shamujpipish Jehová Diosta tucuipi cazushpa catingapajmi esforzarina canchij. Chashnami alli, cushilla causashun. Salmo 119:1-pica: “Alli ñanllapi purijcunaca cushichishcacunami Mandaj Diospaj mandashcallapi purijcunaca cushichishcacunami” ninmi.