CADA huatami achca huauqui panicunaca congregacionman tigrashcacuna. Paicuna tigrajpimi jahua pachapica achca cushicui tiyan (Lucas 15:7, 10). Canchari cutin Jehová Diospaj puebloman tigrarcangui. Can tigrashcata yachashpami Jesuspish, angelcunapish, Jehová Diospish achcata cushicuncuna. Maipica Jehová Diospaj amigo cangapajca huaquin jarcaicunahuanchari chꞌimbapurangui. ¿Cai jarcaicunataca ima shinataj mishai tucungui?

Maijan huauqui panicunaca congregacionman tigrashca qꞌuipaca desanimarishcami sintirishcacuna. Tal vez canpishchari chashna sintiringui. Chashna sintirishpaca rey Davidpaj causaipimi yuyana cangui. Davidca paita Jehová Dios perdonajpipish paica: “Millaita ñuca rurashcacunallatajmi ñucapica yallitaj jundashca” nircami (Salmo 40:12; 65:3). Maijan huauqui panicunaca Jehová Diospajman tigrashpapish achca huatacunatami pingaihuan sintiri tucuncuna. Por ejemplo, pani Isabelleca * 20 yalli huatacunatami congregacionmanta llujchishca carca. Paica: “Ñucataca Jehová Diosca mana perdonangachu nishpami yuyaj carcani” ninmi. Chashna sintirishpaca canpish Jehová Diosmantami caruyangui (Proverbios 24:10). Chaimanta ama desanimaringapaj esforzari.

Maijan huauqui panicunaca Jehová Diospaj amigos cutin cangapaj huaquin cosascunata ruranata yachashpami maipica desanimarishca sintirincuna. Huauqui Antoineca cutinmi congregacionman tigrarca. Paica: “Yayitu Diosta ñaupa ima laya sirvishcataca casi tucuimi cungarishcarcani” ninmi. Maijancunaca chashna sintirishcamantami congregacionpipish mana tucuipi participai tucuncuna. Shinallataj Jehová Diosta ashtahuan sirvingapaj esforzarinapish sinchi can.

Cai ejemplopi yuyashun. Shuj jatun acapana tiyashcamantachari shuj huasitaca dañan. Dueñoca huasita allichingapajca tiempo, esfuerzomi minishtirin nishpachari maipica desanimari tucun. Chashnallatajmi maijan huauqui panicunaca Diospajman tigrashpaca paicuna jatun juchata rurashcamanta cutin Jehovapaj amigos cangapajca tiempo, esfuerzomi  minishtirin nishpa maipica desanimari tucuncuna. Pero chashna sintirishpapish ama desanimarichu.

Jehová Diosca canmanca cai invitaciontami ruran. Paica: ‘Cancunata allichingapaj ñucapajman shamuichij’ ninmi (Isaías 1:18, QC, 1989). Canca cutin Diospaj amigo cangapajmi esforzaricungui. Chaimantami paica cantaca achcata cꞌuyan. Caipi yuyai. Cutin Jehovapaj amigo cangapaj esforzarishpaca Diablo llullaj cashcatami ricuchingui (Proverbios 27:11).

Can Jehová Diospajman tigrashpaca paipajman cꞌuchuyashcatami ricuchingui. Diospish cambajmanmi cꞌuchuyanga (Santiago 4:8). Huauqui panicunapish congregacionman tigrajta ricushpaca cushillami sintirincuna. Pero canca, Jehová Diospaj amigo cangapajca cambaj fetami ashtahuan sinchiyachishpa catina cangui. ¿Chaipajca imallatataj rurana cangui?

Tal vez canca Jehová Diosmanta, pai cusha nishcacunamantaca manachari cungarishcangui. Pero cambaj feta sinchiyachingapajca predicanaman llujshinata, tandanacuicunaman rinata esforzarina cangui. Shinallataj huauqui panicunahuan tiempota pasangapajmi esforzarina cangui. ¿Ima metacunallatataj churana cangui?

Jehová Diosta siempre mañai. Maipica jatun juchata ñaupa rurashcamantachari Jehová Diosta mañanaca sinchi laya ricurin. Pero Yayitu Diosca can ima shina sintirijtaca allimi intindin (Romanos 8:26). Shinapish can ima shina sintirishcata paiman huillanataca amataj saquingui (Romanos 12:12). Huauqui Andrejca: “Jatun juchata rurashcamantami maipica Diosta mañangapajca mana alli sintirij carcani. Pero Jehová Diosta mañanata manataj saquishpaca qꞌuipaca tranquilomi sintirircani” ninmi. Tal vez cambajpish Jehová Diosta mañanaca sinchichari ricurin. Pero Yayitu Diosta mañangapajca David arrepintirishpa mañashcamantami yachai tucungui. Chaipajca Salmos 51 y 65-tami ricui tucungui.

Bibliata cada punlla estudiai. Chaita rurashpaca cambaj fetami sinchiyachingui. Jehová Diospajmanpish ashtahuanmi cꞌuchuyangui (Salmo 19:7-11). Huauqui Felipeca: “Ñucaca ñaupaca Bibliata mana alli estudiashcamantami Jehová Diosmantaca caruyarcani. Pero cunanca ama chashnallataj Jehovamanta caruyangapajmi Bibliataca cada punlla estudiani” ninmi. Canpish Bibliamanta chashnallataj estudiangapajmi esforzarina cangui. Bibliamanta yachangapaj ima temata mana agllai tucushpaca sinchi feta charij huauqui o panita ayudachun mañai.

Huauqui panicunapaj amigos cutin tucui. Maijan huauqui panicunaca congregacionman cutin tigrashpaca shujtaj huauqui panicunaca paihuan pꞌiñarishca, llaquirishcami canga nishpami preocuparincuna. Pani Larissaca: “Ñucaca cutin congregacionman tigrashpaca achca pingaihuanmi sintirircani. Congregacionpipish huaquin turi ñañacunatami llaquichishcani nishpami dimastij llaquilla sintirircani” ninmi. Sinchi feta charij huauquicuna, ancianocunaca cancuna Jehová Diospaj cutin alli amigo tucuchunmi ayudasha nincuna. Cancuna congregacionman tigrajpica tucuicunami cushilla sintirinchij. Canpish cushilla sintirichunmi munanchij (Proverbios 17:17). (“ ¿Ancianocunaca imatataj rurai tucuncuna?” nishca recuadrota ricui).

¿Congregacionmanta amataj caruyangapajca imatataj rurana cangui? Tandanacuicunaman rinata, huauqui panicunahuan huillanaman llujshinataca manataj saquinachu cangui. ¿Caita rurashpaca canca ima shinataj beneficiaringui? Huauqui Felixca: “Huauqui panicunaca ñuca tigrajtami shuyacushcacuna carca. Paicunaca ñucamanca achca cꞌuyaitami ricuchircacuna. Chashna cꞌuyaita ricuchijpimi ñucaca congregacionpipish Yayitu Diosta sirvi tucushcata, paipish ñucata perdonashcata cuentata curcani” ninmi (“ ¿Canca imatataj rurana cangui?” nishca recuadrota ricui).

Diabloca Diosta sirvinata saquichunmi munan. Chaimantami can Jehová Dioshuan alli amigo tucucujta ricushpaca Diabloca trampacunata churasha ninga (Lucas 4:13). Pero cambaj fe amataj chiriyachunca Diospaj amigo cangapajmi esforzarina cangui.

Jehová Diosca paipaj ovejacunamanta parlashpaca cashnami nin. Paica: “Chingarishpa caita chaita puricujtapish mashcashpa japishpaca, corralmanmi tigrachimusha, chaqui pꞌaquitapish cꞌacushpa huatashami, irquitapish ayudashami” ninmi (Ezequiel 34:16). Jehová Diosca achca huauqui panicunatami paipaj amigo tucuchunca ayudashca. Shinallataj cantapish paihuan alli amigo tucuchunmi ayudashpa catinga.