1, 2. a) ¿Mandaj Acabhuan, mandaj Manaseshuanca imapitaj chꞌican carca? b) ¿Cai yachaipica imatataj yachashun?

ISRAEL llajtata mandajmanta, Judá llajtata mandajmantami yachagrinchij. Paicunaca Diosta sirvinata saquishpami Diospaj pueblotapish Diosmanta caruyachircacuna. Yanga dioscunata adorashpami gentecunatapish huañuchircacuna. Israelmanta mandajca huañuna horascama manataj arrepintirircachu. Pero Judá llajtata mandajca arrepintirircami. Yaya Diospish paitaca perdonarcami. ¿Picunamantataj parlacunchij?

² Israel llajtata mandajca Acabmi carca. Judá llajtata mandajca Manasesmi carca. Paicunapaj ejemplomanta yachashpami shungumanta arrepintirina ima cashcata yachashun (Hechos 17:30; Romanos 3:23). Juchayujcuna cashcamantami tucuicuna Jehová Dios perdonachun minishtinchij. Chaimantami shungumanta arrepintirina ima cashcata yachasha ninchij. Shinallataj de verdadtaj arrepintirina ima cashcata yachangapajca cai ishqui mandajcunapaj ejemplomantami yachashun. Qꞌuipaca arrepintirinamanta Jesús imata nishcatapishmi yachashun.

3. ¿Acabca ima shina mandajtaj carca?

³ Acabca Israel llajtata mandacushpami Jezabel huarmihuan cazararca. Cai huarmica mandaj Sidón charij runapaj ushushimi carca. Cai huarmihuan cazarashcamantami israelitacunataca imalla charishcacunahuan ayudai tucurcacuna. Pero Jehová Diosmantami Diospaj pueblotaca caruyachirca. Jezabel huarmica yanga dioscunatami adoraj carca. Acabpish chashnallatajmi yanga dioscunata adorai callarirca. Shinallataj templocunapipish achca millai cosascunatami rurarcacuna. Huahuacunatapishmi rupachircacuna. Jezabel mandacushcamantami  Diosta sirvij achca profetacunatapish huañuchirca (1 Reyes 18:13). Acab runaca Yayitu Diospaj ñaupajpica shujtaj mandajcuna mana rurashca dimastij millanayai cosascunatami rurarca (1 Reyes 16:30). Diosca Acabhuan, Jezabel imata rurashcataca allimi yacharca. Pero Diosca cꞌuyaimantami paipaj pueblota ayudangapaj profeta Eliasta cacharca. Pero Acab, Jezabelpish chai ayudataca mana chasquisha nircacunachu.

4. a) ¿Eliasca Acabmanca imatataj nirca? b) ¿Acabca ima shinataj sintirirca?

⁴ Asha tiempo qꞌuipaca Jehová Diosca Acabta, Jezabelta castigasha nishpami Eliasman huillachun cacharca. Eliasca Acabmanca Diosca cambaj tucui familiatami tucuchigrin nishpami huillarca. Chaimi Acabca llaquirirca (1 Reyes 21:19-29).

5, 6. ¿Ima shinataj yachanchij Acabca mana de verdadtaj arrepintirishcata?

⁵ Acabca llaquirishpapish paipaj rurashcacunahuanmi de verdadtaj mana arrepintirishcata ricuchirca. Paica Israel llajtapica Baal diosta adoranata mana anchuchircachu, israelitacunatapish Jehová Diosta cutin adorachun mana ayudarcachu. Ashtahuanpish shujtaj mana alli cosascunatami rurarca. Chashnami mana arrepintirishcata ricuchirca.

⁶ Acabca siriocunahuan macanacungapajca mandaj Josafattami ayudata mañarca. Chaimi Josafatca puntaca Jehová Diospaj profetacunata tapushun nirca. Chashna nijpica Acab runaca mana chaita chasquisha nircachu. Acabca: “Imlapaj churi Micaías profeta tiyanrajmi, paitapish Mandaj Dios imata nishcata tapuchinchijmanchari. Paica shuj cutinllapish ima allita manamari huillanchu, ashtahuanpish llaquillatamari huillan. Chaimantami paitaca pꞌiñani” nircami. Pero qꞌuipaca Acabca profeta Micaiastami tapurca. Chaimi Micaiasca: ‘Canca achca llaquicunatami charingui’ nircami. Acabca arrepintirinapaj randica Micaistami prezupi churarca (1 Reyes 22:7-9, 23, 27). Pero profeta Micaiasta carcelpi churajpipish Yayitu Diospaj profecía pajtarichunca pi mana jarcai tucurcachu. Acabca macanacuipimi huañurca (1 Reyes 22:34-38).

7. ¿Acab huañushca qꞌuipaca Jehová Diosca imatataj Acabmanta nirca?

⁷ Mandaj Josafat huasiman tigrajpica Jehová Diosca profeta Jehuhuanmi imamanta Acabta ayudarcangui nishpa rimachun cacharca. Jehuca: “Diosta mana manchaj runatamari ayudanaman rishcangui. Mandaj Diosta pꞌiñajcunahuanmari apanacungui” nircami (2 Crónicas 19:1, 2). Caipi yuyashun. Acab de verdadtaj arrepintirishca cajpica Jehová Diosca Acab millai cashcata, paita pꞌiñashcataca mana huillachinmanchu carca. Chashnami yachanchij Acabca llaquirishpapish pai de verdadtaj shungumanta mana arrepintirishcata.

8. ¿Acab mana arrepintirishcamantaca imatataj yachanchij?

⁸ ¿Acabpaj ejemplomantaca imatataj yachanchij? Elías, Acabta cambaj familiacunami llaquicunata charinga nijpica paica puntaca llaquirircami. Pero paipaj mana alli ruraicunahuanmi shungumanta mana arrepintirishcata ricuchirca. Shungumanta arrepintirishcataca ruraicunahuanmi ricuchina can. Mana llaquirishpalla saquirinachu can. Caimanta ashtahuan yachangapajca shujtaj ejemplota ricushun.

9. ¿Mandaj Manasesca ima laya runataj carca?

⁹ 200 huatacuna qꞌuipaca Manasesmi Judá llajtata mandai callarirca. Paica Acabta yallimi achca millai cosascunata rurarca. Bibliapica: “Mandaj Diospaj ñaupajpi chashna jatun millaita rurashpami Diostaca yallitaj pꞌiñachirca” ninmi (2 Crónicas 33:1-9). Manasesca  yanga dioscunata Diospaj templopipish fierrota yacuyachishpa rurashca dioscunatami shayachirca. Chai dioscunaca huainayanata apoyajmi carca. Shinallataj adivinajcunata, brujiajcunatami charirca. Ima culpata achca gentecunatapishmi huañuchirca. Hasta paipaj propio huahuacunatami yanga dioscunaman cungapaj rupachirca (2 Reyes 21:6, 7, 10, 11, 16).

10. a) ¿Jehová Diosca Manasestaca ima shinataj corregirca? b) ¿Manasesca imatataj rurarca?

¹⁰ Manasespish Acab shinallatajmi Jehová Dios paipaj profetacunahuan advertijpica mana uyasha nirca. Chaimi Jehová Diosca: “Paicunata llaquichichunca, Asiria llajtata jatun mandajpaj soldadocunata mandajcunata apamurca. Paicunami Manasestaca, cadenacunahuan huatashpa Babilonia llajtaman prezu aparcacuna” Manasesca Babilonia prezupi cashpaca: ‘Paipaj ñaupa yayacunapaj Diospaj ñaupajpica tucui shunguhuanmi llaquirirca. Chashna llaquirishpami Mandaj Diostaca mañarca’. Chashnami Manasesca cambiashpa Jehová Diostapish cutin cutin mañarca (2 Crónicas 33:10-13).

11. ¿2 Crónicas 33:15, 16 versocunaca ima shinataj Manasés de verdadtaj arrepintirishca cashcata ricuchin?

¹¹ Manasesca Jehová Diosta shungumanta mañashpami paica arrepintirishca cashcata ricuchirca. Yaya Diosca pai mañashcatami chasquirca. Qꞌuipacarin cutin Judá llajtata mandachunmi saquirca. Manasesca paipaj ruraicunahuanmi de verdadtaj arrepintirishcata ricuchirca. Acabca caitaca mana nunca rurarcachu. Manasesca yanga dioscunata anchuchishpa, Diospaj pueblotapish cutin Jehová Diosta adorachunmi animarca (2 Crónicas 33:15, 16-ta liyipai). Paica achca huatacunatami paipaj familiapaj, Diospaj pueblopajca mana alli ejemplo carca. Pero paica tucui chaita allichingapajmi sinchi feta charinata minishtirca. Manasespaj ejemplota ricushpami paipaj nieto Josiasca alli mandaj cashcanga (2 Reyes 22:1, 2).

12. ¿Manasés shungumanta arrepintirishcamantaca imatataj yachanchij?

¹² ¿Manasespaj ejemplomantaca imatataj yachanchij? Manasesca llaquirishpallaca mana saquirircachu. Ashtahuanpish paica Jehová Diostami shungumanta cambiangapaj mañarca. Shinallataj tucui mana allicunata huashaman saquishpa Jehová Diosllata adorangapajmi esforzarirca. Shujtajcunatapish Yayitu Diosta adorachunmi ayudarca. Manasespaj ejemploca jatun juchata rurajcunapish paicuna shungumanta arrepintirijpica Jehová Dios paicunata perdonaj cashcatami ricuchin (Salmo 86:5). Maijanpish shungumanta arrepintirijpica Jehová Diosca listomi can paicunata perdonangapaj.

13. ¿Shungumanta arrepintirishcataca ima shinataj ricuchina can? Shuj ejemplohuan parlai.

¹³ Manasesca paipaj juchacunamantami shungumanta arrepintirirca. Cai ejemplomantami yachanchij shungumanta arrepintirina  importante cashcata. Caita alli intindingapajca cai chꞌimbapuraipi yuyashun. Canchari shuj aradota randinaman ringui. Pero aradota cꞌatujca shuj piezallatachari cꞌatusha nin. Paica tal vez ‘caica valinmi randilla’ ningachari. Shinapish yapungapajca shuj piezallaca mana minishtirinchu. Ashtahuanpish arado completomi minishtirin. Chashnallatajmi jatun juchata rurajcunaca arrepintirishcata ricuchingapajca mana llaquirishpalla saquirina can. Ashtahuanpish ruraicunahuanmi shungumanta arrepintirishcata ricuchina can. Caimanta ashtahuan intindingapajca chingarishca runamanta Jesús parlashca chꞌimbapuraita yachashun.

14. ¿Jesús parlashca jovenca ima shinataj cambiai callarirca?

¹⁴ Jesusca Lucas 15:11-32-pimi shuj chingarishca jovenpaj causaimanta parlarca. Cai jovenca yayata mana cazushpami shujtaj llajtapi causanaman rirca. Chai llajtaman chayashpaca pai munashca shinami causarca. Pero problemacunata charishpaca pai mana allita rurashcatami cuentata curca. Jesusca cai jovenca alli yuyarishpami huasiman tigranata decidirca. Shinallataj yayatapish perdonachunmi mañarca nircami. Cai jovenca paillataj mana alli decisioncunata agllashcata cuentata cushpami cambianata decidirca.

15. ¿Jesús parlashca jovenca ima shinataj shungumanta arrepintirishcata ricuchirca?

¹⁵ ¿Chingarishca jovenca ima shinataj shungumanta arrepintirishcata ricuchirca? Paica cutin huasiman tigrangapajca carutami viajarca. Huasiman chayashpa, paipaj yayahuan tupashpaca yayataca: “Yayitu, jahua pachapi caj Taita Diostapish, cantapish pꞌiñachishpami juchallishcani. Cunanca ña mana cambaj churitaj shinachu cani” nircami (Lucas 15:21). Cai shimicunata nishpami cai jovenca de verdadtaj shungumanta arrepintirishcata ricuchirca. Shinallataj paica Jehová Dioshuanpish cutin alli amigo canatami mashcarca. Paipaj mana alli rurashcacunahuan paipaj yayata llaquichishcamantapishmi yayataca perdonahuai nirca. Paica paipaj yayataca: ‘Ñucataca shuj trabajadorta shina chasquipai’ nircami (Lucas 15:19). Pushaj ancianocunaca juchata ruraj huauquita panita juzgangapajca Jesús parlashca jovenpaj ejemplomantami yachai tucuncuna. Chashnami juchata rurajcuna de verdadtaj arrepintirishcataca cuentata cungacuna.

16. ¿Ancianocunapajca imamantataj shuj huauqui o pani de verdadtaj arrepintirishcata yachanaca sinchi can?

¹⁶ Congregacionpi jatun juchata rurajcuna paicuna de verdadtaj arrepintirishcata yachanaca ancianocunapajca sinchimi can. ¿Imamanta? Ancianocunaca gentecunapaj shungupi ima tiyashcataca mana yachai tucuncunachu. Chaimantami jatun juchata rurajcuna cambiacushcata yachangapajca  pruebacunata mashcana can. Huaquinpica maijan huauqui panicunaca cutin cutinmi jatun juchata rurashcacuna. Ancianocunaca paicunata juzgangapaj tandanacushpaca cai huauqui panicuna mana arrepintirishcatami cuentata cuncuna.

17. a) ¿Ima shinataj yachanchij shuj huauqui mana shungumanta arrepintirishca cashcata? b) 2 Corintios 7:11-pi nishca shinaca ¿shungumanta arrepintirishcacunaca imatataj rurana can?

¹⁷ Cai ejemplopi yuyashun. Shuj huauquichari achca huatacunata huainayashpa causan. Paica ayudata mashcanapaj randica pacallachari upalla saquirin. Paipaj huarmimanpish, amigocunamanpish, ancianocunamanpish pai huainayashcataca manachari huillan. Pero ancianocunami shuj punllaca cai huauqui juchata ruracushcataca yachaj chayan. Ancianocuna canca jatun juchatami rurashcangui nijpica tal vez cai huauquica llaquirinimi, chaitaca mana ruranachu carcani nishpallachari saquirin. ¿Pero chaita rurashpaca paica arrepentido cashcatachu ricuchin? Mana. Chaimantami ancianocunaca cai juchata ruraj huauqui imallata rurashcataca yachaj chayana can. Cai huauquica mana shuj cutinllachu jatun juchata ruran. Achca huatacunatachari shuj jatun juchata rurashpa causarca. Paillatajpish manachari ancianocunaman huillarca. Ashtahuanpish shujtajcunachari ancianocunamanca huillarcacuna. Chaimi ancianocunaca juchata ruraj huauqui de verdadtaj paipaj yuyaipi cambiacushcata alli ricuna can (2 Corintios 7:11-ta liyipai). * Tal vez cai juchata rurajcuna cambiacushcata yachangapajca achca tiempomi minishtirin. Chaimantami paicunaca congregacionmanta llujchishca cana can (1 Corintios 5:11-13; 6:9, 10).

18. ¿Congregacionmanta llujchishcacunaca ima shinataj de verdadtaj arrepintirishcata ricuchina can?

¹⁸ ¿Congregacionmanta llujchishcacunaca de verdadtaj arrepintirishca cashcataca ima shinataj ricuchina can? Paicunaca tandanacuicunaman rinataca manataj saquinachu can. Shinallataj ancianocuna cushca consejocunatapishmi pajtachina can. Yayitu Diosta mañanatapish Bibliata estudianatapish manataj saquinachu can. Cutin jatun juchapi ama urmangapajmi esforzarina can. Chaita rurashpaca Jehová Dioshuanmi alli apanacunga. Ashtahuancarin Diosmi paicunataca perdonanga. Ancianocunapish paicunataca congregacionman tigrachunmi ayudanga. Paicunaca huauqui panicuna arrepintirishcata yachangapajca  mana tucuicunata por igual juzganchu. Ashtahuanpish cada unotami paicuna ima rurashcata juzgancuna.

19. Ezequiel 33:14 al 16-pi nishca shinaca ¿ima shinataj shuj juchata rurajca shungumanta arrepintirishcata ricuchina can?

¹⁹ Shuj juchayujca arrepintirishpaca mana llaquirishpalla saquirinachu can. Ashtahuanpish paipaj yuyaipi, causaipimi ruraicunahuan cambiashcata ricuchina can. Shinallataj tucui mana allicunatapish huashaman saquishpami Yayitu Diospaj mandashcacunataca shungumanta cazuna can (Ezequiel 33:14-16-ta liyipai). Jehová Diospaj amigo cangapaj cutin importante cashcatapish yuyaipimi charina can.

20, 21. ¿Jatun juchata rurajcunataca ima shinataj ayudana canchij?

²⁰ Jesusca: “Ñucaca cashcata rurajcunataca mana cayaj shamurcanichu. Ashtahuanpish juchayujcuna Diosman cutirichunmi cayaj shamurcani” nircami (Lucas 5:32). Ñucanchijpish Jesús shinallatajmi juchayujcunata ayudangapaj esforzarina canchij. Chaimanta shuj huauqui o pani jatun juchata rurashcata yachaj chayashpaca ¿imatataj rurana canchij?

²¹ Shuj amigo jatun juchata rurajpica mana upalla saquirinachu canchij. Chashna saquirishpaca paitami llaquichishun. Jehová Diosca tucuitami alli yachan (Proverbios 5:21, 22; 28:13). Juchayuj amigocunata ayudangapajca ‘cancunataca ancianocunami ayudasha nin paicunaman huillai’ nishpami ayudana canchij. Paicuna mana huillasha nijpica ñucanchijmi ancianocunahuanca parlana canchij. Chashnami paicunataca de verdadtaj ayudasha nishcata ricuchishun. Paicuna cutin Jehová Diospaj amigo tucuchunpishmi ayudashun.

22. ¿Catij yachaipica imatataj yachashun?

²² ¿Maijan huauqui panicuna jatun juchata rurashpa caticujpi ancianocuna congregacionmanta llujchijpica imatataj rurana canchij? ¿Ancianocunaca cꞌuyaita mana charishcamantachu cai huauqui panicunataca congregacionmanta llujchincuna? Catij yachaipimi Jehová Diosca juchayujcunata ima shina corregishcata, ñucanchijpish paipaj ejemplota ima shina catinata yachashun.