1, 2. ¿Ñucanchijca imacunallahuantaj macanacuna canchij?

ABELPAJ punllacunamanta cunan punllacunacamaca Diosmanta ama caruyangapajca tucuicunami chꞌican chꞌican cosascunata chꞌimbapurana cashcanchij. Apóstol Pabloca hebreo shimita parlaj huauquicunata panicunataca Diospaj bendicionta chasquingapajca “jatun llaquicunataca alli macanacucuj shinamari aparcanguichij” nircami (Hebreos 10:32-34). Pabloca ñaupa punllacunapi Grecia llajtapi macanacujcunahuan chꞌimbapurashpami Diosta servijcunaca llaquicunata ahuantai pudishcata yachachirca (Hebreos 12:1, 4). Cunan punllacunapi Diosta servijcunaca huiñai causaitami japisha ninchij. Pero huaquin cosascunami enemigocuna shina chai bendicioncunata ama chasquichun, cushicuitapish ama charichun jarcasha nincuna.

² Chai bendicioncunata chasquingapajca Satanashuan, cai mundopaj  ruraicunahuanmi macanacuna canchij (Efesios 6:12). Cai mundopaj ruraicuna ñucanchijta pandachichunca amataj saquishunchijchu. Panda yachachishcacunamanta, panda yuyaicunamanta, mapa ruraicunamanta, huainayanamanta, tragota yalli ubyanamanta, tabacomanta, drogamantapishmi jarcarina canchij. Shinallataj llaquilla sintirina yuyaicunahuan, ñucanchij juchacunahuanpishmi macanacuna canchij (2 Corintios 10:3-6; Colosenses 3:5-9).

3. ¿Enemigocunahuan macanacungapajca ima shinataj Jehová Diosca ayudan?

³ ¿Enemigocunataca mishai tucunchijchu? Ari, mana jahualla cajpipish mishai tucunchijmi. Apóstol Pabloca macanacuj runa shinami: “Macanacushpapish, mana huairallapi huajtaj shina huajtanichu”nircami (1 Corintios 9:26). Ñucanchij enemigocunahuanca macanacucuj shinami chꞌimbapurana canchij. Macanacuita mishangapajca Jehová Diosmi yachachishpa ayudanga. ¿Imata rurashpataj macanacuita mishashun? Bibliata, publicacioncunata rezashpa, congregacionpi tandanacuicunaman rishpa, jatun tandanacuicunaman rishpami mishashun. Enemigohuan macanacungapajca pai cushca tucui ayudacunata chasquishpami yachana canchij. Jehová cushca ayudacunata mana yachashpaca huairapi huajtashpa yangamanta macanacucuj shinami canga.

4. ¿Millaita rurana yuyaita mishangapajca imatataj rurana canchij?

⁴ Enemigocunahuan macanacushpa catingapajca rijcharishcami cana canchij. ¿Imamanta? Enemigocunaca mana yuyashcapi o llaquilla cajpimi huajtai callarincuna. Chaimantami Bibliapica: “Canta ima millaita rurana yuyai mishachunca ama saquingui, ashtahuanpish allita rurashpa millaitaca mishangui” nishpa yachachin (Romanos 12:21, QIC, 1989). Cai shimicunaca macanacushpa catijpica millaita rurana yuyaita mishai tucushcatami yachachin. Pero mana rijcharishca cajpi, macanacunata saquijpica Satanaspish, cai mundopaj ruraicunapish, ñucanchij juchacunapish mishai tucunmi. Chaimanta Diablota mishangapajca macanacushpa catishunchij. Ñucanchij maquicuna irquiyashpa urmachunca amataj saquishunchij (1 Pedro 5:9).

5. a) ¿Imamantataj macanacushpa catina canchij? b) ¿Picunamantataj yachagrinchij?

⁵ Diospaj ñaupajpi alli ricuringapaj, paipaj bendicionta chasquingapajpish macanacushpami catina canchij. Hebreos 11:6-pica: “Diospajman maijanpish cꞌuchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can” ninmi. Jehová Dios ñucanchijta bendiciachunca sinchita macanacushpami catina canchij (Hechos 15:17). Bibliapica Diospaj bendicionta chasquingapajca achca cꞌaricuna huarmicunami sinchita macanacushpa misharcacuna ninmi. Por ejemplo Jacobpish, Raquelpish, Josepish, Pablopishmi sinchi llaquicunata charircacuna. Paicunaca sinchita macanacushpami Jehová Diospaj bendicioncunata chasquircacuna. Ñaupa punllacunapi Diosta servijcuna shina sinchita macanacujpica Jehová Diosca ñucanchijta bendiciangami. ¿Paicunamantaca imatataj yachai tucunchij?

6. a) ¿Jacobca imamantataj macanacunata mana saquirca? b) ¿Jacobca imatataj chasquirca? (Página 12-pi tiyaj dibujota ricui).

⁶ Jacobca Diosta cꞌuyashcamanta, paipaj amigo cashcamantami macanacunata mana saquirca. Diosca: “Cambaj huahuacunatapish yallitaj achcatami mirachisha” nircami. Cai shimicunata Jehová Dios pajtachinataca tucui shunguhuanmi crirca (Génesis 28:3, 4). Jacobca casi 100 huatacunata charishpami shuj angelhuan macanacurca (Génesis 32:24-28-ta leyipai).  Jacobca mana sinchi runa cashcamantachu chai angelhuan macanacurca. Ashtahuanpish Diospaj bendicionta chasquisha nishcamantami sinchita macanacurca. Chashnami Diospaj bendicionta chasquirca. Israel shutitapish chasquirca. Israel shutica ‘Taita Dioshuan macanacushpa mishaj’ nisha ninmi. Shinallataj Jacobca Jehová Diospaj ñaupajpimi alli ricurirca. Ñucanchijpish Jacob shinami Diospaj ñaupajpi alli ricurishpa paipaj bendicionta chasquisha ninchij.

7. a) ¿Raquelca ima llaquicunatataj chꞌimbapurarca? b) ¿Raquelca imatataj rurarca? c) ¿Ima bendiciontataj chasquirca?

⁷ Raquelca Jacobpaj cꞌuyashca huarmimi carca. Jehová Diosca Jacobtaca cambaj huahuacunata mirachishami nircami. Chai shimicuna pajtarijtami Raquelca ricusha nirca. Pero Raquelca huahuacunata mana chari tucurcachu. Chai punllacunapi huahuacunata mana charinaca jatun llaquimi carca. ¿Raquelca imatataj rurarca? Paica tucui shunguhuanmi Jehová Diospi crirca. Llaquicunata ahuantashpa catingapajmi Diosta mañanataca mana saquirca. Jehová Diosca paipaj mañaicunata uyarcami. Qꞌuipamanca huahuacunata cushpami bendiciarca. Chaimantami Raquelca: ‘Diosmi mishachirca’ ni tucurca (Génesis 30:8, 20-24).

8. a) ¿Joseca ima llaquicunatataj chꞌimbapurarca? b) ¿Josepaj ejemploca imatataj yachachin?

⁸ Jacobpaj Raquelpaj ejemplota catishpami Joseca llaquicunata chꞌimbapurai pudirca. José 17 huatacunata charijpica paipaj huauquicuna pꞌiñashpami paita cꞌaturcacuna. Qꞌuipaca José mana culpata charishpapish Egipto llajtapimi achca huatacunata prezu carca (Génesis 37:23-28; 39:7-9, 20, 21). Chashna llaquicunata  charishpapish mana yallitaj llaquirishpa causarcachu. Paipaj huauquicunatapish pꞌiñashpa mana llaquichircachu. ¿Imamantataj mana chashna rurarca? Joseca Jehovapaj amigo cashcamantami mana chashna rurarca (Levítico 19:18; Romanos 12:17-21). Josepaj ejemploca ñucanchij uchillamantapacha achca llaquicunata charishca cashpapish o sinchi llaquicunata chꞌimbapuracushpapish ahuantashpa catijpica mishai tucushcatami yachachin. Chaita rurajpica Jehová Diosca bendiciangami (Génesis 39:21-23-ta leyipai).

9. ¿Imatataj Jacob, Raquel, José shina rurana canchij?

⁹ Ñucanchijpish sinchi llaquicunatachari chꞌimbapuracunchij. Shujtajcuna ñucanchijmanta burlarincunachari, mana culpata charijpipish llaquichincunachari, yangamanta cꞌamincuna o envidiamanta llaquichincunachari. Shinapish ama yallitaj llaquirishunchijchu. Yuyarishun, Jacobpish Raquelpish Josepish sinchi llaquicunatami chꞌimbapurarcacuna. Paicunaca Jehová Diospaj amigocuna cashcamantami cushicushpa Diosta servishpa catircacuna. Paicunaman fuerzata cushpa, bendiciashpami Diosca ayudarca. Diosta mañashpapish paicuna mañashca shina rurashpami ahuantashpa catircacuna. Tucuri punllacunapi causacushcamantami, shamuj punllacunapi Jehová Dios cusha nishca bendicioncunapi yuyana canchij. Chaimanta Jehová Diospaj bendicionta chasquingapaj ahuantashpa catishunchij.

10, 11. a) ¿Diospaj bendicionta chasquingapajca imacunallahuantaj macanacuna canchij? b) ¿Imata ruragrishpapish alli agllangapajca imatataj rurana cangui?

¹⁰ ¿Diospaj bendicionta charingapajca imamantataj macanacushpa catina canchij? Juchayujcuna cashcamantami huaquincunaca millai munaicunahuan macanacucunchij. Shujtajcunaca cushicushpa huillangapajmi esforzaricuncuna. Cutin shujtajcunaca ungüicunamanta o paicunalla sintirishcamantami llaquilla causancuna. Huaquincunapajca shujtajcuna paicunata llaquichijpimi perdonanaca sinchi can. Mashna huatacunata Diosta servicushpapish tucuicunami Diosmanta ama caruyangapaj imahuanpish macanacuna canchij. Shinapish ama cungarishunchij Jehová Diosca paita cazujcunataca bendiciangami.

¹¹ Mapa munaicunahuan macanacucushpaca Diosta servinapish, imata rurangapaj alli yuyashpa agllanapish sinchimi can (Jeremías 17:9). Chashna llaquicunata charishpaca paipaj espíritu santota cuchun Jehová Diosta mañai. Diosta mañashpa, paipaj espíritu santota charishpami mapa munaicunata mishangui. Chashnami Diospaj bendicionta chasquingui. Diosta mañashpaca can mañashca shinami imatapish rurana cangui. Tucui punllacuna Bibliata rezai, Bibliata canllataj estudiangapaj tiempota surcui, familiahuanpish Diosta adorai (Salmo 119:32-ta leyipai).

12, 13. ¿Mapa munaicuna ama mishachunca shuj huauquipish shuj panipish imatataj rurarcacuna?

¹² Diospaj Shimimanta yachashpa, Diospaj espiritupaj ayudahuan, publicacioncunahuanmi achca huauquicuna panicunaca paicunapaj mapa munaicunata mishashcacuna. Shuj jovenca ¡Despertad! del 8 de diciembre de 2003-pica “¿Cómo puede usted resistirse a los malos deseos?” nishca temata leyishca qꞌuipaca cashnami nirca: “Mapa yuyaicunata mishangapajmi macanacucuni. Pero ‘mapa munaicunahuan macanacunaca achcacunapaj sinchi cashcata’ leyishpaca mana ñucalla cashcatami sintircani. Ashtahuanpish mundo enteropi huauquicunata panicunata charishcatami ricurcani. ¡Despertad! del 8 de octubre de 2003-pica: “¿Aprueba Dios los estilos de vida alternativos?” nishca tematapishmi leyircani. Chai revistapica huaquin huauquicunapaj panicunapajca mapa  munaicunahuan macanacunaca sinchi cashcatami ricurcani. Cashahuan ‘tujsicuj shina jatun nanaicunahuan’ paicunapish causacushcatami leyircani (2 Corintios 12:7, NM). Pero chai jovencunaca Diospaj ñaupajpi alli ricurinata, shamuj punllacunapi bendicioncunata chasquinatami cushilla shuyacuncuna. Ñucapish Jehová Diosmantaca mana caruyasha ninichu. Cada punlla mapa munaicunahuan macanacushpa catingapaj, paipaj organizacionhuan ayudashcamantami Jehová Diosta pagui nini” nircami.

¹³ Estados Unidosmanta shuj panipish cashna nishpami quillcarca: “Ñucanchij minishtishca horaspi ñucanchijta yachachishcamantami pagui nini. Achca cutinmi publicacioncunata rezashpaca caitaca ñucapi yuyashpamari rurashcacuna nini. Achca huatacunatami mapa munaicunahuan macanacushpa causani. Huaquinpica shaicushcami sintirini, ña mana macanacushpa catisha ninichu. Jehová Diosca cꞌuyaj, llaquij cashcataca yachanimi. Pero ñuca shungupica chai millai munaicunataca mana millanayachinichu. Chaimantami Diospaj ayudata mana chasquina cashcata yuyani. Cai millai munaicunahuan causanaca sinchimi cashca. Pero La Atalaya del 15 de marzo de 2013-pica: “¿Está su corazón dispuesto a conocer a Jehová?” nishca temata rezashca qꞌuipaca Jehová Dios ñucata ayudasha nishcatami entendircani” nircami.

14. a) ¿Apóstol Pabloca imatataj alli yacharca? b) ¿Millai munaicunataca ima shinataj mishai tucunchij?

¹⁴ (Romanos 7:21-25-ta leyipai). Apóstol Pablopish juchayuj cashcamanta millai munaicunahuan macanacunaca sinchi cashcatami alli yacharca. Pero paipaj millai munaicunata mishangapajca Jehová Diosta mañana cashcata, paipi shunguta churana cashcatami yacharca. Shinallataj paita quishpichingapaj Jesús huañushcata tucui shunguhuanmi crirca. ¿Ñucanchijpish millai munaicunata mishai tucunchijchu? Ari, mishai tucunchijmi. Apóstol Pablopaj ejemplota catishun. Ñucanchijlla mishai tucushcata yuyanapaj randica Jesús ñucanchijmanta huañushcata crishpa, Jehová Dios ñucanchijta ayudanatami tucui shunguhuan crina canchij.

15. ¿Llaquicunata ahuantangapajca ima shinataj Diosca ayudan?

¹⁵ Jehová Diosca ñucanchij llaquicunamanta ima shina sintirishcata parlachunmi munan. Por ejemplo, ¿Shuj familia ungüihuan cajpi o shujtajcuna llaquichijpica imatataj rurashun? ¿Ñucanchijllataj chai llaquicunahuan cashpaca imatataj rurana canchij? Tucui shunguhuan Jehová Diospi crishpaca, llaquicunata chꞌimbapurangapajmi fuerzata cuchun mañana canchij. Shinallataj paimanta ama caruyangapaj, cushicushpa paita servingapaj, paipaj amigocuna cashpa catingapajmi ayudachun mañana canchij (Filipenses 4:13, NM). Ñaupa punllacunapipish cunan punllacunapipish Diosta servijcunaca llaquicunata chꞌimbapurangapajca fuerzata cuchun, ama manchashpa llaquicunata ahuantangapajmi Diosta mañashcacuna.

16, 17. ¿Imatataj rurashpa catina canchij?

¹⁶ Satanasca ñucanchij llaquilla sintirichun, ama macanacushpa catichunmi munan. Chaimanta ‘alli cashcallata’ rurashpa causashunchij (1 Tesalonicenses 5:21). Satanashuan, cai mundopaj ruraicunahuan, millai munaicunahuanpish macanacunata mana saquishpaca mishai tucushunmi. Jehová Dios ñucanchijta sinchiyachishpa ayudanata tucui shunguhuan crishpaca mishashunmi (2 Corintios 4:7-9; Gálatas 6:9).

¹⁷ Chaimanta ama shaicushpa, macanacushpa catishunchij. Chashna rurajpica Jehová Diosca mana huaquichi tucungacamami ñucanchijta bendicianga (Malaquías 3:10).