1, 2. a) ¿Huahuacuna Diosta cꞌuyachun ayudanaca imamantataj sinchi can? b) ¿Huahuacunaman yachachingapajca pitaj ayudai tucun? c) ¿Ima chuscu yuyaicunatataj yachashun?

FRANCIA llajtamanta shuj matrimonioca cashnami nirca: “Ñucanchijca Jehová Diospimi crinchij. Pero huahuacunaca mana ñucanchijta catishpallachu Diosta servisha ningacuna. Jehová Diospi crinataca mana shuj herenciata chasquij shinachu chasquingacuna. Ashtahuanpish huahuacunallatajmi allimanta Diospi crina can” nircacunami. Cutin Australia llajtamanta shuj huauquica: “Huahuacuna Jehová Diosta cꞌuyachun ayudanaca sinchimi can” nircami. Shinallataj: “Huahuacunapaj tapuicunata cutichijpica paicuna entendishcatachari yuyanchij. Pero qꞌuipaca chaillatatajmi cutin tapuncuna. Cunan cutichishca tapuicunamantaca qꞌuipamanca ashtahuanchari yachasha ningacuna. Huaquinpica shuj yuyaimanta achca cutin parlanatachari minishtinchij” nircami. Huahuacuna ashtahuan huiñashpa catijpica yaya mamacunaca chai tapuicunallamantatajmi ashtahuan entendichina can. Shinallataj Jehová Diosta cꞌuyachunca achcata rurana cashcatami ricushcacuna.

² Huahuacunata charishpaca ¿Jehová Diosta cꞌuyachun, paita servichun ayudai tucushachu? nishpachari yuyangui. Huahuacunaman yachachingapajca Dios ayudachunmi minishtinchij (Jeremías 10:23). Yaya mamacunaca Jehová Dios paicunata ayudanataca tucui  shunguhuanmi crina can. Paica huahuacunata yachachichunca achca consejocunatami cushca. ¿Ima shinataj cancunapaj huahuacunata ayudai tucunguichij? Caipica chuscu yuyaicunatami yachashun. 1) Cambaj huahuacunata alli rijsi. 2) Diosmanta cancuna yachashcata parlaichij. 3) Alli chꞌimbapuraicunahuan yachachichij. 4) Paipaj espíritu santota cuchun, ama utca pꞌiñaringapajpish Jehová Diosta mañaichij.

3. ¿Yaya mamacunaca ima shinataj Jesuspaj ejemplota cati tucunguichij?

³ Jesusca paita catijcuna imata yuyashcata parlachunmi tapuicunata ruraj carca (Mateo 16:13-15). Cancunapish Jesuspaj ejemplota catishpami huahuacunata ayudai tucunguichij. ¿Ima shina? Huahuacunahuan imata ruracushpapish paicuna imata yuyashcata tapuichij. Huaquinpica paicuna Bibliapi yachashcataca manachari tucuita alli entendincuna. Australia llajtamanta 15 huatacunata charij jovenca: “Ñuca yayaca ñuca crishcacunamanta achcata parlashpami alli entendichun ayudan. Paica ¿Bibliaca imatataj nin?, ¿canca chaita cringuichu?, ¿imamantataj cringui? nishpami ñucata ayudan. Shinallataj pai o ñuca mama ima nishcallata cutichinapaj randica ñuca imata entendishcata parlachunmi mañan. Ñuca huiñashpa catijpica ñuca tapuicunata cutichingapajmi ñuca yayaca ashtahuan prepararina carca” ninmi.

4. ¿Ama pꞌiñarishpa huahuacunaman yachachingapajca huaquin yaya mamacunaca imatataj rurashca?

⁴ Biblia yachachishcata cambaj huahuacuna mana tucuita crijpica mana pꞌiñarinachu cangui. Paicuna mana entendishcata alli entendichishpa ayudai. Shuj yayaca: “Cambaj huahuacuna imatapish tapujpica ama pingai tucushpa alli uyai” nircami. Cambaj huahuacuna tapuicunata rurajpica paicuna yachasha nishcatami ricuchin. Jesuspish uchilla cashpaca tapuicunatami ruraj carca (Lucas 2:46-ta leyipai). Dinamarca llajtamanta shuj jovenca: “Alli religionpi cashcata o mana alli religionpi cashcataca mana alli yachanichu nijpica, ñuca yaya mamaca sustarishpapish mana pꞌiñarishpami ayudarcacuna. Chashnami tucui ñuca tapuicunata Bibliahuan cutichircacuna” nircami.

5. ¿Cambaj huahuacuna Diosta cꞌuyashcata ricuchijpipish imatataj rurana cangui?

⁵ Cambaj huahuacunata alli rijsi. Cambaj huahuacuna huillanaman llujshijpi, tandanacuicunaman rijpipish paicuna Jehová Diosta ña cꞌuyashcataca ama yuyaichu. “¿Ñuca huahuacunaca Jehová Diosmanta, Bibliamantaca imatataj yuyancuna? ¿Jehová Diosta cazunaca imamantataj ñuca huahuacunapajca sinchi can?” nishpa tapuri. Tucui punllacuna cambaj huahuacunahuan imata ruracushpapish Diosmanta parlai. Paicunahuan cashpa, canlla cashpapish paicunamanta Diosta mañai.

6. ¿Imamantataj yaya mamacunaca Jehová Diosmanta, Bibliamantapish ashtahuan yachashpa catina can?

⁶ Jesusca Jehová Diosta, gentecunatapish cꞌuyashcatami ricuchirca. Diospaj Shimitapish alli yachaj cashcatami gentecunaca ricurcacuna. Chaimantami gentecunaca paita uyasha nircacuna (Lucas 24:32; Juan 7:46). Cancuna Jehová Diosta cꞌuyashcata ricushpaca huahuacunapishmi Diosta cꞌuyasha ningacuna (Deuteronomio 6:5-8; Lucas 6:45- ta leyipai). Bibliata estudiashpa, publicacioncunatapish leyishpa catichij. Jehová Dios imalla rurashcacunamantapish ashtahuan yachashpa catichij (Mateo 6:26, 28). Jehová Diosmanta ashtahuan yachashpaca cancunapaj huahuacunamanpish ashtahuanmi yachachi tucunguichij (Lucas 6:40, QIC, 1989).

7, 8. a) ¿Yaya mamacunaca Jehová Diosmanta imata yachashpaca imatataj rurana can? b) ¿Huaquin yaya mamacunaca imatataj rurashcacuna?

⁷ Cancuna Diosmanta imata yachashpaca huahuacunaman parlaichij. Tandanacuicunapaj prepararicushpa, familiahuan Bibliata estudiacushpa, maipi cashpapish Diosmanta paicunahuan parlaichij. Estados Unidos llajtamanta yaya mamaca: “Jehová Dios rurashcacunata ricushpa  o mishquijlla micunata micucushpami Jehová Diosmanta huahuacunahuan parlanchij. Shinallataj Jehová Diosca ñucanchijta achcata cꞌuyashpami tucui imalla tiyashcataca cushca nishpami huahuacunaman yachachinchij” ninmi. Sudáfrica llajtamanta yaya mamaca: “Huertata allichicushpaca Jehová Dios imalla rurashcacunatami huahuacunahuan parlanata munanchij. Por ejemplo, shuj muyullamanta ima shina shuj yura tucujtami parlanchij. Shinallataj tucui imalla rurashcacuna sumaj cashcata, causaitapish respetana cashcatami yachachinchij” ninmi.

⁸ Australia llajtamanta shuj yayaca, 10 huatacunata charij paipaj churitami ñaupa tiempopi tiyashca animalcunata ricuchun shuj museoman pusharca. Chai animalcunata ricuchishpami yayaca paipaj churita Diospi ashtahuan crichun ayudarca. Shinallataj ñaupa tiempopi tiyashca animalcunaca cunan tiempopi laya Jehová Dios tucuita alli rurashcatami ricurcacuna. Chai animalcuna sumaj cajta ricushpaca, yayaca cashnami nirca: “Evolucionpica animalcunaca asha ashami cambiashpa catirca nincunami. Pero ¿imamantataj ñaupa tiempopica chai animalcunaca ña sumaj carca? nishpami yuyarcani. Qꞌuipaca chaitami ñuca churihuan parlanacurcani” ninmi.

9. a) ¿Huahuacunamanca imamantataj alli chꞌimbapuraicunahuan yachachina canguichij? b) ¿Shuj mamaca ima chꞌimbapuraihuantaj huahuacunaman yachachirca?

⁹ Jesusca achca cutinmi yuyachij parlocunahuan, chꞌimbapuraicunahuan yachachirca (Mateo 13:34, 35). Cancunapaj huahuacunahuan Jesús yachachishca shina rurashpaca paicuna alli yuyachunmi ayudanguichij. Chashna yachachishpaca huahuacuna yuyachun, alli entendichun, paicuna yachashcatapish ama cungarichunmi ayudanguichij. Huahuacunapish ashtahuan yachanatami munangacuna. Por ejemplo, Japón llajtamanta shuj mamaca paipaj huahuacunamanca, Jehová Dios ñucanchijta cꞌuyashcamanta Allpata rurashcatami yachachisha nirca. Paipaj shuj churi 8 huatacunata charijpi, caishujca 10 huatacunata charijpimi paicuna entendichun shuj alli chꞌimbapuraihuan yachachirca. Paipaj churicunamanca lecheta, azucarta, cafetami curca. Chaita cushca qꞌuipaca cada uno cafeta rurashpa cuchunmi mañarca. Qꞌuipaca mamaca cashnami nirca: “Cada unomi mishquijllata rurashpa curca. ¿Imamantataj cancunaca mishquijllata rurarcanguichij? nijpica, paicunaca can munashca shinami rurasha nircanchij nircacunami. Paicuna chashna nijpimi, ñucaca Diosca ñucanchij alli causachun nishpami Allpataca tucui minishtirishcacunahuan sumajta rurarca nircanimi. Huahuacunaman chashna yachachijpica cushicushpami yachancuna. Yachashcatapish mana nunca cungarincunachu” ninmi.

10, 11. a) ¿Ima chꞌimbapuraicunahuantaj huahuacunamanca Dios tucuita rurashcata yachachi tucunguichij? (Página 27-pi tiyaj dibujota ricui). b) ¿Ima chꞌimbapuraicunahuantaj huahuacunaman yachachishcanguichij?

¹⁰ Cambaj huahuacunaman Jehová Dios tucuita rurashcata yachachingapajca caita rurai: Shuj caldotami ishquindij yanuichij. Yanucushpaca, caldota rurangapaj imallata churana cashcata tucuita huillai. Qꞌuipaca shuj manzanata chaupishpa muyuta ricuchi. Manzana tucuchunca muyupimi tucuita huillacun nishpa yachachi. Shinallataj  manzanata ruranaca caldota ruranatapish yalli sinchimi can nishpa yachachi. Qꞌuipaca ¿manzana tucuchunca tucui imalla minishtirishcataca pitaj muyupica churarca? nishpa tapui. Cambaj huahuacuna ashtahuan entendi tucujpica manzana muyu huiñashpa yura tucuchunca muyupimi celulacunata charin nishpa yachachi. Shinallataj El origen de la vida nishca folletopi páginas 10 a 20-pi tiyaj huaquin dibujocunata, chꞌimbapuraicunatapish ricuchishpa yachachi.

¹¹ Achca yaya mamacunami paicunapaj huahuacunamanca ¡Despertad! revistapi “¿Casualidad o diseño?” nishca temacunata yachachincuna. Huahuacuna uchillaraj cajpica paicuna entedi tucushcallata yachachi. Por ejemplo, Dinamarca llajtamanta shuj matrimonioca: “Avioncunaca pajarocuna shinami can. Pero ¿avioncunaca pajarocuna shinachu lulunta churancuna? ¿Avioncuna shina uriyangapajca pajarocunaca jatun pambacunatachu minishtincuna? ¿Imatataj ashtahuan munangui pajarocuna cantashcata o avioncuna huacashcata? Shinashpaca ¿pitaj ashtahuan yachaisapa can, pajarocunata ruraj Jehová Dios o avioncunata ruraj gentecuna?”. Cancunapaj huahuacunata chashna tapujpica paicuna alli yuyachunmi ayudanguichij. Ashtahuanpish Jehová Diospimi ashtahuan cringacuna (Proverbios 2:10-12).

12. ¿Bibliapi yachachishcacuna mana llulla cashcataca ima shinataj huahuacunaman yachachi tucungui?

¹² ¿Bibliapi yachachishcacuna mana llulla cashcataca ima shinataj huahuacunaman yachachi tucungui? Por ejemplo, Job 26:7-ta leyipai. Cai shimicunataca Jehová Diosmi Jobman nirca nishpallaca ama saquirichu. Chaipaj randica paicuna yuyachun ayudai. Job causashca tiempopica Allpaca huairapi huarcushca shina cashcataca gentecunaca mana yacharcacunachu. Pelotacunapish rumicunapish ima jahuapi tiyacushcata ricushpami Allpaca imapi tiyacushcata crijcuna carca. Chai tiempopica lucerocunata ricungapaj, Allpamanta llujshingapaj maquinacunapish manaraj tiyarcachu. Allpa ima shina cashcatapish mana yacharcacunachu nishpa yachachi. Chashna yachachijpimi huahuacunaca achca huatacuna huashaman Bibliata quillcashca cajpipish Bibliapi nishcacunaca mana pandarishcata entendingacuna (Nehemías 9:6).

13, 14. ¿Bibliapi mandashcacunata huahuacuna cazuchunca ima shinataj ayudai tucunguichij?

¹³ Huahuacuna cushilla causachunca Bibliapi mandashcacunata cazuna cashcata yachachi (Salmo 1:1-3-ta leyipai). Por ejemplo caita yuyachi: “Shuj llajtapichari causanaman rina cangui, canlla ama causangapajca huaquin gentecunatami agllana cangui. Pero, ¿tucuicuna alli apanacushpa ama pꞌiñanacushpa cushilla causangapajca ima laya gentecunatataj agllanguiman?” nishpa tapui. Qꞌuipaca paraíso Allpapi ima laya gentecuna Jehová Dios causachun munashcata ricuchingapajca Gálatas 5:19-23-ta leyi.

¹⁴ Chashna yachachijpimi cancunapaj huahuacunaca: Cunan punllacunapica Jehová Dios gentecunahuan ama pꞌiñanacushpa, cushilla causachun yachachicushcata entendingacuna. Shinallataj paraíso Allpapipish ñucanchij ima shina causana cashcata Dios yachachicushcatami entendingacuna (Isaías 54:13; Juan 17:3, QIC, 1989). Shinallataj shujtaj huauquicunata panicunata Biblia ima shina ayudashcatami yachachi tucunguichij. ¿Ima shina? Publicacioncunapimi huauquicuna panicuna Diosta ima shina servishcata leyi tucunguichij. La Atalaya revistapipish “La Biblia les cambió la vida” nishca tematami mashcai tucunguichij. Mana cashpaca congregacionmanta shuj huauquita o panita Biblia ima shina paicunata ayudashcata, Jehová Diosta servingapajpish ima cambiocunata rurashcata parlachun mañaichij (Hebreos 4:12).

15. ¿Huahuacunaman yachachingapajca imatataj rurana canguichij?

¹⁵ Cancuna alli yuyashpa yachachijpica huahuacunaca cushicushpami yachashpa catisha ningacuna. Jehová Diosmanta cushicushpa yachachun,  paipaj alli amigocuna tucuchunca chꞌican chꞌican ruraicunahuan yachachichij. Paicuna huiñashpa catijpipish chashna yachachishpa catichij. Shuj yayaca: “Huahuacuna ña yachashca temacunata mushuj ruraicunahuan cutin cutin yachachinataca ama shaicuichijchu” nircami.

16. a) ¿Huahuacunamanca imamantataj mana utca pꞌiñarishpa yachachina cangui? b) ¿Huaquin yaya mamacunaca ima shinataj paicunapaj huahuacunaman yachachishcacuna?

¹⁶ Huahuacuna Diosta tucui shunguhuan cꞌuyachunca Jehová Diosllatajmi paipaj espíritu santohuan ayudanga (Gálatas 5:22, 23). Huahuacunaca paicunapaj crishcacunata sinchiyachingapajca tiempotami minishtincuna. Chaimanta paicunahuan ama utca pꞌinarishpa yachachishpa catichij. Japón llajtapi shuj churita, shuj ushushita charij yayaca: “Ñuca huarmipish ñucapish huahuacunaman yachachingapajca achca tiempotami surcunchij. Paicuna uchilla cajpica tucui punllacunami 15 minutocunata yachachij carcanchij. Tandanacui tiyashca punllallapimi mana yachachij carcanchij. 15 minutocunata yachanaca paicunapajpish ñucanchijpajpish allimi carca” ninmi. Cutin shuj superintendente de circuitoca: “Huambraraj cashpaca achca tapuicunatami charircani. Chai tapuicunataca tandanacuicunapi yachacushpa, ñucallataj Bibliata estudiacushpa, familiahuan Bibliamanta yachacushpami entendircani. Chaimanta yaya mamacuna cancunapaj huahuacunata yachachinataca ama saquichijchu” nishpami quillcarca.

17. a) ¿Yaya mamacuna imamantataj cancunapaj crishcacunata sinchiyachina canguichij? b) ¿Shuj matrimonioca ima shinataj paicunapaj huahuacunata ayudancuna?

¹⁷ Cancuna Jehová Diosta tucui shunguhuan cꞌuyashcata ricushpami huahuacunapish Jehová Diosta cꞌuyasha ningacuna. Huahuacunaca cancuna imata rurashcatami catincuna. Chaimanta cancunapaj crishcacunata sinchiyachishpa catichij. Jehová Diospi tucui shunguan crishcatapish huahuacunaman ricuchichij. Islas Bermudas nishca llajtamanta shuj matrimoniopi yuyashun. Paicunaca imamanta preocuparishca cashpapish huahuacunahuan tandanacushpami Jehová Diospaj ayudata mañancuna. Shinallataj paicunapaj huahuacunatapish Diosta mañachunmi animancuna. Paicunapaj punta ushushitaca: “Canca tucui shunguhuanmi Jehová Diospi crina cangui, ima problemacunamantapish ama yalli preocuparishpa Diosta servishpa catilla” nincunami. Paicunaca: “Ima problemacuna tucurijpica ñucanchij punta ushushica Jehová Dios ayudashcata ricushpami paipaj crishcacunata sinchiyachishca” nincunami.

18. ¿Yaya mamacunaca imatataj mana cungarina canguichij?

¹⁸ ¿Yaya mamacunaca imatataj mana cungarina canguichij? Cancunapaj huahuacuna Jehová Diosta cꞌuyachunca mana obligai tucunguichijchu. Cancunaca tarpushpa yacuta jichaj shina ayudajcunallami canguichij. Huiñachijca Jehová Diosmi can (1 Corintios 3:6). Chaimanta paipaj espíritu santota cuchun Diosta mañaichij. Cancunapaj cꞌuyashca huahuacunata Jehová Diosmanta yachachishpa catichij. Chashna rurajpica Jehová Diosca achcatami bendicianga (Efesios 6:4, NM).