1, 2. a) ¿Diosca imata rurachuntaj Salomonta agllarca? b) ¿Davidca imamantataj preocuparirca?

JEHOVÁ DIOSCA Jerusalenpimi paipaj huasita shayachisha nirca. Chai huasita alli rurachunmi Salomonta agllarca. Shinallataj Jehová Diospaj huasica tucuicuna rijsishca, jatun, sumaj huasimi cana carca (1 Crónicas 22:1, 5, 9-11).

² Salomonta Jehová Dios ayudanatami rey Davidca yacharca. Pero Salomonca huambrarajmi carca. Experienciatapish mana charircachu. Chaimantami Davidca preocuparirca. ¿Salomonca Diospaj huasita rurachun mingajpica mana manchashpachu pajtachirca? ¿Huambraraj cashpapish, mana achca experienciata charishpapish Dios mingashcata pajtachircachu? Salomonca tucui alli llujshichun munashpaca sinchi tucushpami trabajana carca.

3. ¿Davidca ima shinataj mana manchaj cashcata ricuchirca?

³ Salomonca paipaj yaya mana manchaj cashcata ricushpami paipish chashnallataj Diosta sirvinata yacharca. David joven cashpaca, paipaj yayapaj ovejacunata ama micuchunmi sacha animalcunahuan macanacurca (1 Samuel 17:34, 35). Shinallataj Jehová Dios ayudajpimi Davidca mana manchashpa jatun runa Goliathuanpish  macanacurca. Chai alli macanacuj soldadotaca shuj uchilla rumillahuanmi Davidca huañuchirca (1 Samuel 17:45, 49, 50).

4. ¿Salomonca imamantataj mana manchaj cashcata ricuchina carca?

⁴ Davidca mana manchaj runa cashcamantami paipaj churi Salomontaca: ‘Diospaj huasita ruranataca ama manchaichu’ nirca (1 Crónicas 28:20-ta leyipai). Salomón manchaita charishpaca Diospaj huasitaca manachari shayachi callarinman carca. Manchaimanta Diospaj huasita mana rurai callarishpaca Diospaj ñaupajpi mana alli ricurinmanchu carca.

5. ¿Imamantataj mana manchajcuna cana canchij?

⁵ Dios ayudajpimi Salomonca paiman mingashcata mana manchashpa pajtachirca. Ñucanchijpish Diospajta mana manchashpa pajtachingapajca paillataj ayudachunmi minishtinchij. Chaimantami cai temapica ñaupa punllacunapi Diosta sirvijcuna mana manchashpa Diospajta rurashcata yachashun. Caita yachacushpaca Diospajta mana manchashpa rurangapaj imata ruranata yuyai.

6. ¿Joseca ima shinataj mana manchaj cashcata ricuchirca?

⁶ Josemanta yachashun. Potifarpaj huarmica Josetaca: ‘Shamui, ñucahuan dormingui’ nircami. Chai huarmita mana cazushcamanta problemacunata charina cashpapish Joseca mana manchashpami ‘canhuanca manataj dormishachu’ nirca (Génesis 39:10, 12).

7. ¿Rahabca imatataj mana manchashpa rurarca? (Página 27-pi tiyaj dibujota ricui).

⁷ Cunanca Rahab huarmimanta yachashun. Paica Jericó llajtapimi causarca. Shuj punllaca ishqui israelitacunami Jericó llajtata ricunaman shamurcacuna. Chai ishqui runacuna Rahabpaj huasiman chayajpica paica manchaimanta manachari ayudasha ninman carca. Pero Diospi tucui shunguhuan crishcamantami mana manchashpa paicunataca paipaj huasipi pacarca. Qꞌuipacarin Jericó llajtamanta llujshichunmi ayudarca (Josué 2:4, 5, 9, 12-16). Rahabca Jehová Dios mana llullaj cashcatami yacharca. Shinallataj Jericó llajtata japichun israelitacunata Diosllataj ayudanatami crirca. Chaimantami Jericó llajtata mandajtapish shujtaj gentecunatapish mana mancharca. Mana manchashpa chai ishqui israelitacunata ayudashcamantami Rahabpish paipaj familiapish quishpirirca (Josué 6:22, 23).

8. ¿Jesús mana manchaj cashcata ricushpaca apostolcunapish imatataj rurarcacuna?

⁸ Apostolcunapish mana manchaj cashcatami ricuchircacuna. Jesús mana manchaj cashcata ricushpami paicunapish mana manchajcuna carca (Mateo 8:28-32; Juan 2:13-17; 18:3-5). Por ejemplo, saduceocunaca, ‘Jesusmanta ama yachachinguichij’ nishpami mandarca. Pero apostolcunaca mana manchashpami Jesusmanta yachachishpa catirca (Hechos 5:17, 18, 27-29).

9. ¿2 Timoteo 1:7-pi nishca shinaca mana manchaj cangapajca pitaj ayudai tucun?

⁹ Josepish, Rahabpish, Jesuspish, apostolcunapish  mana manchashpami allita rurarcacuna. Paicunalla imatapish rurai tucushcataca mana yuyarcacunachu. Ashtahuanpish Diospi tucui shunguhuan crishpami sinchi tucurcacuna. Ima jarcaicuna, llaquicuna ricurijpica ama ñucanchijllapi yuyashunchij. Ashtahuanpish Jehová Diospi tucui shunguta churashpa mana manchaj cashcata ricuchishunchij (2 Timoteo 1:7-ta leyipai). ¿Familia ucupipish, congregacionpipish imamantataj mana manchaj cana canchij?

10. ¿Jovencunaca imamantataj mana manchajcuna cana can?

¹⁰ Salomonca Diospaj huasita shayachishpa tucuchingapajca mana manchashpami alli decisioncunata japirca. Jovencunapish Diosta sirvishpa catingapajca imata ruranata mana manchashpami decidina can. Yaya mamacunaca huahuacuna alli decisioncunata japichunmi ayudana can. Pero huaquin decisioncunataca paicunallatajmi agllana can (Proverbios 27:11). Por ejemplo, amigocunata, imata pugllanata, juchapi ama urmangapaj imata ruranata o ima hora bautizarinataca jovencunaca paicunallatajmi agllana can. Diabloca Jehová Diosmantapish, pai churashca leycunamantapishmi burlarin. Chaimantami Diablo munashcata mana rurashpa, allita decidingapaj paicunaca mana manchana can.

11, 12. a) ¿Moisesca ima shinataj mana manchaj cashcata ricuchirca? b) ¿Jovencunaca imatataj Moisesmantaca yachai tucun?

¹¹ Jovencunaca paicunapaj causaipi imata ruranatami alli ricuna can. Huaquin llajtacunapica “alli trabajota charingapajca universidadpi estudianatajmi cangui” nincunami. Shujtaj llajtacunapica cullquita japinaca sinchimi can. Chaimantami huaquin jovencunaca, “ñuca familiata ayudangapaj achcatami trabajana cani” nishpa yuyancuna. Joven, canpish chashnallataj yuyacushpaca Moisesta yuyari. Paitaca faraonpaj ushushimi huiñachirca. Moisesca achcata charij, tucuicuna rijsishcami cai tucunman carca. Paita huiñachij familiapish, yachachijcunapish, cunajcunapish Moisestaca: ‘Canca charij, tucuicuna rijsishcami cai tucungui’ nijcunachari carca. Pero Moisesca mana chaita agllarcachu. Ashtahuanpish paica mana manchashpami Diosta sirvinata agllarca. Tucuita huashaman saquishpa Egiptomanta rishca qꞌuipaca Moisesca Jehová Diospimi tucui shunguta churashpa causarca (Hebreos 11:24-26). Jehová Diosca Moisesta bendiciarcami, shamuj punllacunapipish ashtahuanmi paita bendicianga.

¹² Jovencunaca Moisés laya Diostaraj sirvishpaca achca bendicioncunatami chasquingacuna. Jehová Diosllatajmi familiapajpish ima minishtishcata cushpa ayudanga. Timoteopish huahuamantapachami Diosta sirvirca. Canpish pai shinallatajmi Diosta sirvishpa causai tucungui * (urapi tiyaj notata ricui) (Filipenses 2:19-22-ta leyipai).

13. ¿Estados Unidospi causaj shuj panica Diosta ashtahuan sirvingapajca imatataj rurarca?

¹³ Estados Unidospi causaj shuj panica Diosta ashtahuan sirvingapajmi mana manchaj cana carca. Paica: “Tandanacuicunapi shujtajcunahuan mana parlanacui tucujchu carcani. Huasin huasin Diosmanta huillacushpacarin dimastijmi manchaj carcani” ninmi. Paipaj yaya mama ayudajpi, huauqui panicunapish ayudajpimi qꞌuipaca precursora  regular tucurca. Cai panica cashnapishmi nin: “Gentecunaca ‘universidadpi yachashpa, cullquita charishpa, famoso cashpa, achca cosascunata charishpami cushilla causashun’ ninmi. Pero casi ni pi mana chaicunata chari tucunchu. Ashtahuanpish casi tucuicunami achca llaquicunata charishcacuna. Pero ñucaca Diosta sirvishpami cushilla causani” ninmi.

14. ¿Diosta sirvij yaya mamacunaca imata rurangapajtaj mana manchana can?

¹⁴ Yaya mamacunapish mana manchajcunami cana canguichij. Por ejemplo, familiahuan Diosta adorana punlla, tandanacuiman rina punlla o huillanaman rina punllapichari cancunapaj jefe ashtahuan horascunata trabajachun ninga. Pero jefehuan parlashpa “mana pudinichu” ningapajmi mana manchana canguichij. Cancunapaj causaipi Diostaraj puntapi churajpica huahuacunapish chashnallatajmi ruranga. Shinallataj maijan yaya mamacunaca paicunapaj huahuacuna huaquin cosascunata rurachunca mana consintincunachu. Pero shujtaj yaya mamacunaca paicunapaj huahuacuna rurachun saquinllami. Paicuna “¿ima nishpataj cancunapaj huahuacuna caita o chaita rurachun mana consintinguichij?” nijpica ¿imatataj rurana can? Alli shimicunahuanmi huahuacunata imamanta mana chaita rurachun consintishcata mana manchashpa parlana can.

15. ¿Salmo 37:25 y Hebreos 13:5-pi nishca shimicunaca ima shinataj yaya mamacunata ayudan?

¹⁵ Shinallataj yaya mamacunaca huahuacuna Diosta ashtahuan sirvichun ayudanataca mana manchanachu can. Huaquin yaya mamacunaca huahuacuna precursor tucuchun,  minishtirishca ladopi sirvichun, Betelpi sirvichun, Tandanacuna Huasicunata shayachishpa sirvichun manachari animasha nincuna. Paicunaca: “Huahuacuna Diosta chashna sirvijpica ñucanchij yuyajyajpica pitaj cuidanga” nishpachari preocuparincuna. Pero Jehová Dios cuidanata tucui shunguhuan crishpaca yachaj cashcatami ricuchincuna (Salmo 37:25; Hebreos 13:5-ta leyipai). Yaya mamacuna Diospi tucui shunguhuan crijpi, mana manchajcuna cajpica huahuacunapish mana manchajmi cangacuna (1 Samuel 1:27, 28; 2 Timoteo 3:14, 15).

16. a) ¿Huahuacuna Diosta ashtahuan sirvichunca huaquin yaya mamacunaca ima shinataj ayudashca? b) ¿Yaya mamacuna ayudashcamantaca huahuacunaca imatataj rurashca?

¹⁶ Estados Unidospi causaj shuj cusa huarmimanta parlashun. Paicunaca huahuacuna Diosta ashtahuan sirvichunmi ayudarcacuna. Yayaca: “Huahuacuna manaraj rimai callarijpi, manaraj puri callarijpimi precursor cashpa cushilla causanata, congregacionpipish achcata ayudai tucushcatami parlaj carcanchij. Cunanca Diosta ashtahuan sirvingapajmi esforzaricuncuna. Chashna esforzarishpami Diablopaj tentacioncunapi mana urmashcacuna. Paicunapajca Diosta sirvinami ashtahuan importante can” ninmi. Shujtaj huauquimanta parlashun. Paica ishqui huahuacunatami charin. Cai huauquica: “Achca yaya mamacunaca huahuacuna estudiachun, musicata yachachun, dibujanata yachachunmi achca cullquita gastancuna, chaicunallapi ocuparincuna. Pero chaita ruranapaj randica huahuacuna Diospajman cꞌuchuyachunmi ayudana canchij. Ñucanchij huahuacuna Diosta ashtahuan sirvingapaj esforzaricushcata ricushpami cushicunchij” ninmi. Diosta ashtahuan sirvichun huahuacunata ayudajpica yaya mamacunataca Diosca achcatami bendicianga.

17. ¿Diospaj pueblopica imallapitaj mana manchashpa ayudai tucunchij?

¹⁷ Ancianocunaca shuj huauqui o shuj pani juchapi urmajpi, mana cashpaca llaqui japishcamanta hospitalpi cajpica mana manchashpami ayudana can. Cutin shujtaj ancianocunaca carcelcunapi Bibliamanta yachachingapaj, tandanacuicunata rurangapajmi rincuna. Paicunapish mana manchashpami cai ruraicunata pajtachina can. Soltera panicunapish Diosta ashtahuan sirvi tucuncunami. Paicunaca precursorasmi cai tucuncuna. Mana cashpaca shujtaj ladocunapimi Diosmanta huillanaman ri tucuncuna o Departamento Local de Diseño y Construcción nishcapipishmi ayudai tucuncuna. Shinallataj Escuela para Evangelizadores del Reino nishcaman ringapajmi solicitudta jundachi tucuncuna. Maijancunacarin Escuela de Galaad nishcamanmi ri tucuncuna.

18. ¿Yuyajlla panicunaca imallapitaj mana manchashpa ayudai tucun?

¹⁸ Yuyajlla panicunaca congregacionpica valishcami can. Mayorlla cashcamanta ña mana tanto rurai tucushpapish congregacionpica mana manchashpami ayudai tucuncunaraj (Tito 2:3-5-ta leyipai). Por ejemplo, ancianocunaca shuj jovenlla pani maipish cachun ropata churarishpa puricujtachari ricun. Chaimantami yuyajlla panitaca joven panita ayudachun mañan. Chai joven panitaca mana manchashpami cunana can. Sinchita rimanapaj randica, “chashna churarishpaca shujtajcunatami ñitcachingui” nishpami cꞌuyaihuan cunana can (1 Timoteo 2: 9, 10). Yuyajlla panicuna cꞌuyaita ricuchijpica tucuicunami congregacionpica Diosta alli sirvishun.

19. a) ¿Bautizarishca cꞌaricunaca congregacionpi mana manchashpa ayudangapajca imatataj rurana can? b) ¿Isaías 12:2; Filipenses 2:13 versocunamantaca huauquicunaca imatataj yachai tucun?

¹⁹ Bautizarishca cꞌaricunaca mana manchashpami Diosta sirvina can. Huauquicuna congregacionpi ashtahuan ayudajpica tucuicunami beneficiarinchij (1 Timoteo 3:1). Pero huaquin huauquicunaca manachari Diosta sirvingapaj ashtahuan rurasha nincuna. Maijancunaca ñaupa punllacunapica pandarircacunami. Chaimantachari, “siervo ministerial o anciano canataca mana mericinichu” nincuna. Mana cashpaca, “imata rurachun mingajpica mana pajtachi tucushachu” nincunami. Can chashna yuyacushpaca ama manchaichu. Jehová Diosmi cantaca ayudanga (Isaías 12:2; Filipenses 2:13-ta leyipai). Moisestapish yuyari. Paipish ‘Dios mingashcataca mana rurai pudishachu’ nircami (Éxodo 3:11). Moisestaca Jehová Diosmi ama manchashpa pai mingashcata pajtachichun ayudarca. Can manchaita charishpaca Diostami “ayudahuai” nishpa mañana cangui. Shinallataj tucui punllacunami Bibliata leyina cangui. Ñaupa punllacunapi Diosta sirvijcunapish mana manchashpami Jehovata sirvircacuna. Paicunatami yuyarina cangui. Ashtahuanpish mana jatun tucushpami ancianocuna ayudachun, “¿imapitaj ashtahuan alli rurana cani?” nishpa tapuna cangui. Ña bautizado cashpaca mana manchashpa congregacionpi ayudai.

20, 21. a) ¿Davidca paipaj churi Salomonmanca imatataj nirca? b) ¿Diosta mana manchashpa sirvijpica imatataj paica ruranga?

²⁰ Rey Davidca Salomontaca: ‘Jehová Diosmi templota shayachingapajca canta ayudanga’ nircami (1 Crónicas 28:20). Salomonca paipaj yaya David nishcatami yuyarishca canga. Chaimantami huambraraj cashpapish, mana achca experienciata charishpapish mana manchashpa Diospaj huasita casi 8 huatacunapi tucuchirca.

²¹ Jehová Diosca Salomonta ayudashca shinallatajmi ñucanchijtapish ama manchangapaj ayudanga. Chashnami familia ucupipish Diospaj pueblopipish mana manchashpa ayudashun (Isaías 41:10, 13). Jehová Diosta chashna sirvijpica cunanpish shamuj punllacunapipish ñucanchijta bendiciangami. David nishca shimicunata yuyarishunchij. Paica: ‘Mana rurai tucushachu nishpaca ama yuyangui. Tucui fuerzahuan rurailla’ nircami.