1. ¿Imamantataj Bibliaca ñucanchij causaita cambiai tucun? (Jahuapi tiyaj dibujota ricui).

ÑUCANCHIJCA Diospaj Shimica causaj, tucuita rurai tucuj cashcatami tucui shunguhuan crinchij (Hebreos 4:12). Bibliapi tiyashca consejocunata cazushpami ñucanchij causaita cambiashcanchij. Shujtajcunapish paicunapaj causaita cambiashcacunami. Huaquincunaca manaraj testigo tucushpaca shuhuajcuna, drogarijcuna, huainayajcunami carca. Achcacunaca famoso, cullquiyujcunapishmi carca. Pero mana cushilla causajcunachu carca (Eclesiastés 2:3-11). Jehová Dios paipaj Shimita yachachijpimi cunanca alli causancuna, shamuj punllacunapi ima tucunatapish mana manchancunachu. Huillaj revistapica “Bibliata yachashpami cambiashcacuna” nishca temacunami llujshin. Chaipica huaquincuna Bibliapi consejocunata cazushpa paicunapaj causaita cambiashcatami parlan. Chaicunata leyinataca achcatachari munanchij. Ña testigo de Jehovacuna cashpapish Diospajman ashtahuan cꞌuchuyangapajmi Bibliata yachashpa catina canchij.

2. ¿Ñaupa punllapi Jesusta catijcunaca imatataj cambiana carca?

² Achcacunaca Bibliata estudiashpami mana alli ruraicunata  saquishcacuna. Ñaupa punllacunapi Jesusta catijcunaca ungidocuna cashpapish huaquin cambiocunatami rurarcacuna (1 Corintios 6:9-11-ta leyipai). Apóstol Pabloca: ‘Millaita rurajcunaca, Dios mandanapica imata mana japingachu’ nircami. Chai qꞌuipaca Jesusta catijcunataca: “Cancunapish maijancunaca chashnallatajmi carcanguichij” nircami. Pero Diospaj Shimimanta yachashpa, espíritu santo ayudajpimi cambiai tucurcacuna. Huaquincunaca Jesusta catijcuna cashpapish jatun juchacunata rurashpami Diosmanta caruyarcacuna. Por ejemplo, Bibliaca shuj ungido huauquimantami parlan. Paica jatun juchata rurashcamantami congregacionmanta llujshichircacuna. Qꞌuipaca mana alli causaita saquishpami congregacionman tigrarca (1 Corintios 5:1-5; 2 Corintios 2:5-8). Achcacunaca Jehová Diospaj consejocunata cazushpami cambiashcacuna. Caita ricushpami cushilla sintirinchij.

3. ¿Cai temapica imatataj yachashun?

³ Bibliata Jehová Dios cushcamantaca allimi utilizana canchij (2 Timoteo 2:15). Chaimantami cai temapica, alli causangapaj, Diosmanta huillangapaj, congregacionpi yachachingapajpish Bibliata alli utilizana cashcata yachagrinchij. Diosca ñucanchij allipajmi yachachin (Isaías 48:17). Bibliata alli utilizashpaca Jehová Diosta cꞌuyashcatami ricuchishun.

4. a) ¿Imamantataj Bibliata leyinata mana saquina canchij? b) ¿Quiquinca ima horastaj Bibliata leyingui?

⁴ Alli causasha nishpaca Bibliata leyinataca manataj saquinachu canchij. Cada punlla leyingapajmi shuj esfuerzota rurana canchij (Josué 1:8). Ñucanchij causaipica achca ruranacunatami charinchij. Pero chai ruraicuna Bibliata leyingapaj tiempota quichuchunca mana saquinachu canchij (Efesios 5:15, 16 *-ta leyipai). Diospaj Shimitaca tutamantapi, chaupi punllapi, ña dorminaman ricushpa o ima horaspishmi leyi tucunchij. Ñucanchijpish Salmo 119:97-ta quillcaj runa layami sintirina canchij. Paica Diostaca: ‘Quiquin mandashcataca ñucaca mashnatamari cꞌuyani. Chai mandashcataca punllanta cutin cutin yuyaricunillami’ nircami.

5, 6. a) ¿Imamantataj Bibliapi leyishcataca cutin cutin yuyarina canchij? b) ¿Bibliata leyicushpaca imatataj tapurina canchij? c) ¿Bibliapi leyishcata cutin cutin yuyarishpaca ima shinataj beneficiarishcangui?

⁵ Bibliataca mana jahua jahualla leyinachu canchij. Ashtahuanpish imata leyishcatami cutin cutin yuyarina canchij (Salmo 1:1-3). Chashna rurashpallami Diospaj Shimipi yachashcataca ñucanchij causaipi pajtachishun. Bibliata celularpi, tabletpi o ima laya leyishpapish ñucanchij shunguman chayachunmi leyina canchij.

⁶ Bibliata leyicushpaca mana apurado leyinachu canchij. Ashtahuanpish: “¿Cai versopica Jehovamantaca imatataj yachachin? ¿Caipi nishcataca pajtachicunichu? ¿Ñuca causaipica imatataj cambiai tucuni?” nishpami yuyana canchij. Diosta mañashpa, paipaj Shimipi nishcacunata cutin cutin yuyashpaca tucui yachashcatami pajtachinata munashun. Chashnami Diospaj consejocuna ñucanchij causaipi ayudachun saquishun (2 Corintios 10:4, 5).

7. ¿Diosmanta huillacushpaca ima shinataj Bibliata utilizana canchij?

⁷ Huillacushpapish, Bibliamanta estudiota cucushpapish Bibliataca allimi utilizana canchij. Shuj huauquica: “Huasin huasin Jehová Dioshuan huillacushpaca ¿canllachu parlanguiman o Jehová Dios gentecunahuan parlachun saquinguiman?” nircami. ¿Cai huauquica imatataj nisha nicurca? Huillacushpa Bibliata leyishpaca Jehová Dios gentecunahuan parlachun saquicushca layami can. Ñucanchij yuyaimanta imatapish ninapaj randica Bibliapi shuj versota leyinami ashtahuan alli can (1 Tesalonicenses 2:13). Chaimanta: “¿Gentecunaman huillacushpaca Bibliapi huaquin versocunata leyingapaj esforzaricunichu?” nishpa tapurishunchij.

8. ¿Imamantataj mana versocunata leyishpalla yachachina canchij?

⁸ Apostolcuna causashca tiempopi shinami cunanpish achca gentecunaca Bibliapi nishcataca mana intindincuna (Romanos 10:2). Chaimantami Diosmanta huillacushpaca mana versocunata leyishpalla saquirina canchij. Chashna rurajpica gentecunaca manachari intindingacuna. Ashtahuanpish chai versopi huaquin yuyaicunata tigra yuyachishpami alhajata yachachina canchij. Chashna rurajpica Diospaj yachachishcacunaca paicunapaj shungumanmi chayanga (Lucas 24:32-ta leyipai).

9. ¿Shuj versota leyigrishpaca imatataj ni tucunchij?

⁹ Gentecuna Bibliata respetachunmi munanchij. Chaimantami shuj versota manaraj leyishpaca, “Dios imata yuyashcata Bibliapi ricushun” ni tucunchij. Cutin huaquincunaca ima religionta mana catinchu o shujtajcunaca ñaupa yaya mamacuna parlashcatami crishpa causancuna. Paicunamanca, “¿cai ñaupa nishcacunata uyashcanguichu?” ni tucunchijmi. Tucuicunami chꞌican chꞌican yuyaicunata charinchij. Chaimantami cada unoman ima shina huillanata alli yuyana canchij (1 Corintios 9:22, 23).

10. a) ¿Shuj huauqui huillacushpaca imatataj rurarca? b) ¿Huillacushpaca ima shinataj Diospaj Shimihuan shujtajcunata ayudashcangui?

¹⁰ Achca huauqui panicunaca Bibliata alli utilizashpami gentecunata ayudashcacuna. Por ejemplo, shuj yuyajlla runaca Huillaj, ¡Despertad! revistacunata leyingapajmi chasquij carca. Shuj cutinca, shuj huauquica cunanlla llujshishca Huillaj revistatami saquinaman rirca. Revistallata saquinapaj randica 2 Corintios 1:3, 4-tami leyirca. Chaipica: ‘Diosca llaquij Yayami, tucuipi cushichij Diosmi’ ninmi. Chai shimicunaca paipaj shungumanmi chayarca. Chaimantami chai runaca ‘cutinllataj leyipai’ nirca. Qꞌuipaca, ‘ñucapish, ñuca huarmipish llaquillami canchij. Bibliamanta yachachishpa ayudachunmi minishtinchij’ nircami. Cai ejemplopi  ricushca shinaca Diospaj Shimica gentecunapaj causaita cambiai tucunmi. Chaimantami huillacushpaca Bibliata alli utilizana canchij (Hechos 19:20).

11. ¿Tandanacuicunapi yachachij huauquicunaca ima shinataj yachachina can?

¹¹ Tucuicunami tandanacuicunaman, jatun tandanacuicunamanpish rinata munanchij. Chaipica Jehová Diostami adoranchij, paimanta ashtahuanmi yachanchij. Chai tandanacuicunapi yachachichunca Diosca huaquin huauquicunamanmi mingashca. Chaimantami chai huauquicunaca alli yachachina can (Santiago 3:1). Paicunaca Diospaj Shimipi ima nishcatami yachachina can. ¿Quiquinca tandanacuicunapi, jatun tandanacuicunapipish yachachinguichu? ¿Diospaj nishcacuna huauqui panicunapaj shunguman chayachunca ima shinataj yachachina cangui?

12. ¿Conferenciata uyachingapajca ima shinataj prepararina cangui?

¹² Shuj conferenciata uyachicushpaca Bibliapi nishcacuna ashtahuan importante cashcatami ricuchina cangui (Juan 7:16). Experienciacunata, ejemplocunata parlashpapish Bibliamantami ashtahuan parlana cangui. Shinallataj versocunata leyinallapaj randica chai versocuna ima nisha nishcatami alli yachachina cangui.  Achca versocunallata leyijpica qꞌuipaca manachari yuyaringacuna. Chaimantami versocunata alli agllashpa, alli leyishpa, ejemplocunahuan alli intindichina cangui. Paicunapaj causaipi ima shina pajtachinatapishmi yachachina cangui (Nehemías 8:8). Shuj conferenciata uyachingapajca huauquicunaca imalla ninata yachangapajmi shuj pꞌangata chasquincuna. Quiquin prepararicushpaca chai pꞌangapi tiyashca yuyaicunata, versocunatapish allimi estudiana cangui. Chai yuyaicunata alli intindingapajca versocunahuanmi chꞌimbapurana cangui. Chashnami maijan versocunata leyinata alli yachangui (Benefíciese de la Escuela del Ministerio Teocrático libropimi, lección 21, 22 y 23-pi ashtahuan yachai tucungui). Ashtahuantajca Diostami ‘cambaj nishcacunata alli yachachingapaj ayudahuai’ nishpa mañana cangui (Esdras 7:10; Proverbios 3:13, 14-ta leyipai).

13. a) ¿Tandanacuipi shuj versota leyijta uyashpaca shuj panica ima shinataj sintirirca? b) ¿Tandanacuipi uyashca versocunaca ima shinataj canta ayudashca?

¹³ Australia llajtapi causaj shuj panimanta parlashun. Paica huahuaraj cashpaca achca llaquicunatami charirca. Qꞌuipaca Bibliatami estudiai callarirca. Chai huashaca bautizarircami. Bautizarishca cashpapish Jehová Dios paita mana cꞌuyashcatami yuyarca. Shuj cutinca, tandanacuipica shuj versota leyijtami uyarca.  Chai shimicunaca paipaj shungumanmi chayarca. Tandanacui tucurishca qꞌuipaca chai versopimi yuyashpa catirca, shujtaj versocunatapishmi mashcarca. Chashnami Jehová Dios paita llaquishcata intindirca * (urapi tiyaj notata ricui). Tandanacuicunapi shuj versota leyijta uyashpaca ¿manachu animarishcanchij, cushilla sintirishcanchij o cambianata yuyashcanchij? (Nehemías 8:12).

14. ¿Diospaj Shimi valishca cashcataca ima shinataj ricuchinchij?

¹⁴ Ñucanchij Yayito Dios Bibliata cushcamanta, chingarichun mana saquishcamantapishmi diosolopagui ninchij (1 Pedro 1:24, 25). Chaimanta Bibliata leyinata ama saquishunchij, chaipi yachashcata pajtachishunchij, shujtajcuna Diosta rijsichunpish ayudashunchij. Chashna rurashpami Diospaj Shimi ñucanchij causaipi valishca cashcata, Diostapish cꞌuyashcata ricuchishun.