1, 2. a) ¿Mana jarcarij gentecunaca ima llaquicunapitaj urmashca? b) ¿Imamantataj millai ruraicunamanta jarcarina cashcata yachana canchij?

JEHOVÁ DIOS ayudajpimi mana alli ruraicunamanta jarcari tucunchij (Gálatas 5:22, 23). Jehová Diosllami tucui mana alli ruraicunamanta jarcarij can. Cutin ñucanchijca juchayujcunami canchij. Chaimantami maipica mana alli ruraicunamantaca mana jarcari tucunchij. Achca gentecunaca paicuna munashcata rurashcamantami achca problemacunata charishcacuna. Por ejemplo, maijancunaca ima trabajota rurana cashpapish paicuna munashcatarajmi rurancuna. Chaimantami mana alli trabajancuna, escuelapipish mana alli notacunata llujchincuna. Shujtajcunaca colerashpami maipish cachun rimancuna. Cutin shujtajcunaca yallitaj ubyadorcuna, macadorcunami can. Mana cashpaca yangamantami divorciarincuna, achcata deudarincuna, viciocunapi urmancuna, carcelmanpish rishcacuna. Huaquincunacarin pihuanpish siririnacushcamantami millai ungüicunata japishcacuna o huahuayuj tucushcacuna (Salmo 34:11-14).

 ² Mana jarcarij gentecunaca paicunallatajmi llaquipi urmancuna, shujtajcunatapish llaquichincuna, paicuna munashcata rurana yuyaillami causancuna. Bibliapica ‘cai punllacuna tucurinapajca gentecunaca mana jarcarijcunami canga’ nircami (2 Timoteo 3:1-3).

3. ¿Imamantataj mana alli ruraicunamantaca jarcarina canchij?

³ ¿Imamantataj mana alli ruraicunamantaca jarcarina canchij? Mana alli ruraicunamanta jarcarishpaca mana achca llaquicunata charishunchu. Ashtahuanpish mana rato pꞌiñarishunchu, shujtajcunahuanpish allimi apanacushun, mana tanto preocuparishpami causashun. Shinallataj tentacioncunapi ama urmangapaj esforzarishpaca Diospaj ñaupajpi allimi ricurishun. Adán Evaca paicuna munashcatami rurarcacuna. Chaimantami llaqui tucurcacuna (Génesis 3:6). Achca gentecunaca Adán Eva shinallataj mana jarcarishcamantami achca llaquicunata charincuna.

4. ¿Mana alli ruraicunamanta jarcarina sinchi cajpica imatataj yuyarina canchij?

⁴ Gentecunaca juchayuj cashcamanta mana tucuipi jarcari tucunchijchu. Chaitaca Jehová Diosca allimi yachan. Chaimantami shuj cꞌuyaj amigo shina ñucanchijta ayudasha nin (1 Reyes 8:46-50). Caita yuyarishpaca contentomi sintirinchij. Cai yachaipica Jehová Dioslla tucui mana alli ruraicunamanta jarcarij cashcatami yachashun. Shinallataj ñaupa punllapi Diosta sirvijcunamantami yachashun. Qꞌuipaca ñucanchijpish mana alli ruraicunamanta jarcaringapaj imata ruranatami ricushun.

5, 6. ¿Jehová Diosca ima shinataj jarcarij cashcata ricuchishca?

⁵ Jehová Diosca tucuita alli rurajmi can. Chaimantami tucui mana alli ruraicunamanta jarcari tucun (Deuteronomio 32:4). Pero ñucanchijca imapipish pandarinchijllami. Chaimantami ñucanchij munaicunataraj ama rurangapaj Jehová Diosmanta yachana canchij. ¿Jehová Diosca ima shinataj jarcarij cashcata ricuchishca?

⁶ Diablo mana cazujpica Jehová Diospish alli angelcunapish pꞌiñarircacunami. Ñucanchijpish Diablo llaquichishcata ricushpaca pꞌiñarinchijmi. Diablo juchachijpipish Diosca yallitaj pꞌiñarinapaj randica alli yuyashpami Diablo llullacushcata ricuchingapaj imata ruranata ricurca (Éxodo 34:6; Job 2:2-6). Diosca tucuicuna arrepintirishpa quishpirichunmi munan. Chaimantami Diablo llulla cashcata ricuchingapaj achca tiempota pasachun saquishca (2 Pedro 3:9, NM).

7. ¿Jehová shina jarcarij cashcataca ima shinataj ricuchinchij?

⁷ Jehová Dios shinallatajmi imata rurangapaj, imata ningapajpish alli yuyarinaraj canchij. Shinallataj alli decidingapaj, alli parlangapajpish Jehová Diostami “alli yuyaita cuhuai” nishpa mañana canchij (Salmo 141:3). Pꞌiñarishcahuan imatapish rurashpaca ima mana allitachari rurashun. Huaquinpica mana alli yuyashpami imatapish nishcanchij o rurashcanchij, pero qꞌuipataca arrepintirishcanchijmi ¿nachu? (Proverbios 14:29; 15:28; 19:2).

8. a) ¿Juchapi ama urmangapaj jarcarijcunamantaca maipitaj yachai tucunchij? b) ¿Joseca imamantataj juchapi mana urmarca? (Página 3-pi tiyaj dibujota ricui).

⁸ Bibliapica Diosta alli sirvijcuna juchapi ama urmangapaj jarcarishcatami parlan. Por ejemplo, Josemanta parlashun. Paica Jacobpaj churimi carca. Shinallataj Potifarpaj huasipimi trabajaj carca. Potifarpaj huarmica, José sumaj ñahui, munananqui huambra cajta ricushpami cutin cutin, ‘shamui ñucahuan dormingui’ nishpa paita inquitasha nirca. Pero Joseca: “Ñucaca maitataj jatun millaita rurashpa, Taita Diosta pꞌiñachishpa juchallishari” nircami. Joseca juchapi urmashpa llaqui tucunatami yuyashca canga. Chaimantami Potifarpaj huarmi ‘cunantajca ñucahuanmi siriringui’ nishpa ropapi japijpica chai rato callpashpa rirca (Génesis 39:6, 9; Proverbios 1:10-ta leyipai).

9. ¿Juchapi ama urmangapajca imatataj rurana canchij?

⁹ ¿Josepaj ejemplomantaca imatataj yachanchij? Diosta ama llaquichingapajca tentacioncuna ricurijpica chai ratomi chaimanta anchurina canchij. Maijancunaca manaraj Diosta rijsishpaca yalli micushpa, ubyashpa, mana cashpaca fumashpalla, drogarishpalla, huainayashpallami causajcuna carca. Chaimantachari huaquincunaca ña bautizarishca cashpapish chai mapa ruraicunapi cutin urmai tucun. Mana alli ruraicunapi ama urmangapajca: “Juchata rurashpaca Diospaj ñaupajpica mana alli ricurishachu” nishpami yuyanaraj canchij. Chaimantami manaraj tentacioncuna ricurijpi imata ruranata alli ricuna canchij (Salmo 26:4, 5; Proverbios 22:3). Ima tentación ricurijpica chai juchata ama rurangapajmi Jehová Diosta mañana canchij.

10, 11. a) ¿Jovencunaca colegiopica ima tentacioncunatataj charincuna? b) ¿Diosta sirvij jovencunaca millai ruraicunapi ama urmangapajca imatataj rurana can?

¹⁰ Diosta sirvij mosocunapish, solteracunapish José shinallatajmi huaquin tentacioncunata charincuna. Kim shuti solteramanta parlashun. Colegiopi compañerocunaca sábado y domingopi pihuan siririshcatami parlajcuna carca. Pero Kimca paicuna laya mana rurashcamantami mana chashna parlai tucurca. Kimca: “Huaquinpica ñucallami sintirij carcani. Ñuca compañerocunaca, ‘¿manarajchu enamoradota charingui? ¿muspachu cangui, imamí?’ nijcunami carca” ninmi. Kimca jovenpi huainayana juchapi urmana jahualla cashcataca allimi yacharca (2 Timoteo 2:22). Paipaj compañerocunaca “¿manarajchu pihuan siririshcangui?” nishpami tapujcuna carca. Chashna tapujpica imamanta mana chaita rurashcataca Kimca Bibliahuanmi yachachij carca. Huainayana juchapi ama urmangapaj jovencuna esforzaricushcamantami  cushicunchij. Jehová Diospish cushillami sintirin.

¹¹ Shinallataj Bibliapica huaquin runacuna juchapi urmashcamanta llaquicunata charishcatami parlan. Kim soltera laya tentacioncunata charishpaca Proverbios capítulo 7-pi parlashca jovenmantami yuyarina cangui. Shinallataj Amnón shuti runa juchata rurashcamanta ima llaquicunata charishcatami yuyarina cangui (2 Samuel 13:1, 2, 10-15, 28-32). Familiahuan Diosta adoracushpami yaya mamacunaca Bibliapi cashna laya runacunamanta yachachi tucun. Chashnami huahuacunaca mana alli ruraicunamanta jarcarinata yachangacuna.

12. a) ¿Joseca paipaj huauquicunahuan cashpaca ima shinataj jarcarij cashcata ricuchirca? b) ¿Imallapitaj jarcarijcuna cashcata ricuchina canchij?

¹² ¿Josemantaca imatataj ashtahuan yachai tucunchij? Shuj punllaca paipaj huauquicunaca micunata randingapajmi Egiptoman chayarca. Joseca paipaj huauquicuna imata yuyashcatarajmi yachasha nirca. Chaimantami paipaj huauquicunamanca pi cashcata mana huillarca. Chai qꞌuipaca shungupi llaquirishpami huacanai atijpi pailla huacanaman rirca (Génesis 43:30, 31; 45:1). Shuj huauqui o pani ñucanchijta llaquichijpica imatapish ningapaj o rurangapajca alli yuyanarajmi canchij. Chashnami José rurashca laya rurashun (Proverbios 16:32; 17:27). Shinallataj shuj familiatachari congregacionmanta llujshichirca. Chashna cajpica imamantapish paihuan ama tandanacungapajmi cuidadota charina canchij. Caita ruranaca sinchichari canga. Pero Jehová mandashca shina ruracushcatami yuyarina canchij. Chashnami paicunataca Jehová Dios ricushca shina ricushun.

13. ¿Rey Davidmantaca imallatataj yachai tucunchij?

¹³ Bibliapica rey Davidmantapishmi parlan. Saulpish, Simeipish paita llaquichisha nijpipish Davidca mana pꞌiñarircachu. Mandaj cashpapish paicunataca mana llaquichircachu (1 Samuel 26:9-11; 2 Samuel 16:5-10). Davidca jarcarij cashpapish Betsabé (Bat-seba) huarmihuanmi juchapi urmarca. Shinallataj Nabal runa mana ayudasha nijpimi paitaca huañuchisha nirca (1 Samuel 25:10-13; 2 Samuel 11:2-4). ¿Davidmantaca imatataj yachanchij? Ancianocunaca autoridadta charishpapish ‘huauqui panicunaca tucuipimi ñucata cazunataj can’ nishpa ama yuyangapajmi cuidadota charina can. Shinallataj ‘ñucaca juchapica mana urmashachu’ nishpaca mana yuyanachu canchij (1 Corintios 10:12).

14. a) ¿Huauqui Luigica imataj tucurca? b) ¿Huauqui Luigimantaca imatataj yachanchij?

¹⁴ ¿Jarcarij cangapajca imatataj ashtahuan rurai tucunchij? Huauqui Luigi ima tucushcata parlashun. Shuj runaca paipaj carrotami chocarca. Luigica mana culpata charircachu. Pero culpata charij runaca pꞌiñarishpami macanacusha nirca.  Luigica ama pꞌiñaringapaj Diosta mañashpami chai runa calmarichun alli shimicunahuan parlarca. Pero chai runaca cꞌamishpami catirca. Chashna rimajpipish Luigica tranquilomi carca. Shuj semana qꞌuipaca Luigica shuj huarmitami Bibliamanta yachachinaman rirca. Chayashpaca chai huarmipaj cusa paipaj carrota chocaj cashcatami Luigica cuentata curca. Chai runaca disculparishpami ‘cambaj carrota utca allichichunmi ayudasha’ nirca. Shinallataj Bibliamanta parlajpica alli uyashpami ‘sumajmi cashca’ nirca. Paipaj carrota chocashca punlla ima tucushcata yuyarishpami Luigica mana pꞌiñarina alli cashcata ricurca (2 Corintios 6:3, 4-ta leyipai).

15, 16. ¿Ñucanchijpish, ñucanchij familiapish millai ruraicunamanta jarcaringapajca imamantataj Bibliata estudiana canchij?

¹⁵ Millai ruraicunamanta jarcaringapajca Bibliatami cada punlla estudiana canchij. Jehová Dios Josueman imata nishcata yuyarishunchij. Paica: “Cai libropi quillcashca tiyacuj ñuca mandashcataca tutapish punllapish rezanataca amataj saquingui. Chashna cashpa yuyaipi charishpami, imalla mandashcataca chaitataj pajtachingui. Chashna rurajpica, tucui can rurashcacunami  alli llujshinga” nircami (Josué 1:8). ¿Millai ruraicunamanta jarcaringapajca imamantataj Bibliata estudiana canchij?

¹⁶ Bibliapi yachachishca shinaca maijancunaca millai ruraicunamanta jarcarishcamantami bendicioncunata chasquircacuna. Cutin shujtajcunaca paicuna munashcata rurashcamantami llaqui tucurcacuna. Jehová Diosca paicunamanta yachachunmi Bibliapi escribichirca (Romanos 15:4). Chaimantami Bibliata estudiana canchij. Paicunapaj ejemplocunata yuyarishpaca ñucanchijpish imata ruranata, ñucanchij familiatapish ima shina ayudanatami yachashun. Shinallataj Bibliapi yachashcacunata pajtachingapaj Jehová Dios ayudachunmi mañana canchij. Mana alli ruraicunamanta jarcarina sinchi ricurijpica mana maqui cruzashca saquirinachu canchij. Chaipaj randica Diosta mañashpami imapi cambiana cashcata ricuna canchij (Santiago 1:5). Shinallataj imata ruranata yachangapajmi publicacioncunapi mashcana canchij.

17. ¿Mana alli ruraicunamanta huahuacuna jarcarichunca yaya mamacunaca imatataj rurana can?

¹⁷ Yaya mamacuna, ¿mana alli ruraicunamanta jarcarichunca ima shinataj huahuacunata ayudai tucunguichij? Huahuacunaca mana alli ruraicunamanta jarcarinatami yachana can. Chaimantami yaya mamacunaca alli ejemplohuan yachachina canguichij (Efesios 6:4, NM). Huahuacuna paicuna munashcata rurasha nicujta ricushpaca “¿ima ejemplotataj paicunaman cucuni?” nishpami tapurina canguichij. Alli ejemplota cungapajca Diosmanta huillanaman rina, tandanacuicunaman rina, familiahuanpish Diosta adorana importante cashcatami ricuchina canguichij. Paicuna munashcataraj rurasha nijpica “mana” ninataca ama manchaichijchu. Jehová Diosca Adán Evamanpish leycunatami curca. Chai leycunata cazushpaca Adán Evaca Diosta respetashcatami ricuchinman carca. Chashnallatajmi huahuacunata disciplinajpi, alli ejemplohuan yachachijpica millai ruraicunamanta jarcarinata yachangacuna. Yaya mamacuna, Dios mandashcacunata cazuna ashtahuan importante cashcatami huahuacunaman yachachina canguichij (Proverbios 1:5, 7, 8-ta leyipai).

18. ¿Imamantataj alli amigocunata agllana canchij?

¹⁸ Tucuicunami alli amigocunata agllana canchij. Diosta cꞌuyaj amigocunaca Diosta ashtahuan sirvichun, problemacunata ama charichunmi ayudanga (Proverbios 13:20). Shinallataj mana allicunamanta jarcarishpami paicuna shinallataj causanata munashun. Chashnallataj allita rurajpica paicunapish chashnallatajmi rurasha ningacuna. Mana alli ruraicunamanta cada punlla jarcarishpaca Diospaj ñaupajpi allimi ricurishun. Shujtajcunahuanpish allimi apanacushun. Chashnami cushilla causashun.