1. Quiquinlla alli canata munaj gentecunapurapi causacushcamantaca ¿ñucanchijpish imatataj yuyai callarishun?

BIBLIAPI ima yachashcata pajtachinaca mana facilchu can. ¿Imamanta? Allita rurangapajca humilde canami minishtirin. Pero cai tucuri punllacunapi gentecunaca quiquinlla alli canata munajcuna, quiquinpajlla charinata munajcuna, jatun tucushcacuna, imapipish mana jarcarijcunami can. Chai gentecunapurapi causacushcamantami humilde canaca sinchi can (2 Timoteo 3:1-3). Ñucanchijca chai ruraicuna mana alli cashcataca yachanchijmi. Shinapish chashna causaj gentecunaca cushilla causaj layami ricuringa (Salmo 37:1; 73:3). Chaimantami, “¿ñucapajlla alli canata mashcanapaj randi, shujtajcunapaj allita mashcanaca allichu canga? ¿‘Tucuicunamanta yalli uchilla’ o humilde cajpica gentecunaca ñucata respetanata saquingachu?” nishpa yuyai callarishun (Lucas 9:48). Shujtaj gentecuna laya yuyai callarishpaca ñucanchij huauqui panicunahuanmi mana alli apanacushun. Diosta sirvijcuna cashcatapish mana ricuchishunchu. Chaimantami Diosta alli sirvijcunamanta yachashpa paicunapaj ejemplota catina canchij. Shinami alli causashun.

2. ¿Ñaupa punllacunapi Diosta sirvijcunamantaca imatataj yachai tucunchij?

 ² Ñaupa tiempopi Diosta alli sirvijcuna shina cangapajca paicuna imallata rurashcamantami yachana canchij. ¿Diospaj amigo cangapajca imatataj rurarcacuna? ¿Diospaj ñaupajpi alli ricuringapajca imatataj rurarcacuna? ¿Diospaj munaita pajtachichunca pitaj fuerzata curca? Paicuna imallata rurashcata yachashpa, cutin cutin chaipi yuyarishpami ñucanchij fe sinchiyachishun.

3, 4. a) ¿Ñucanchijman yachachingapajca Jehová Diosca imacunallatataj cushca? b) Sinchi fe charingapajca ¿imamantataj mana yachashpalla saquirina canchij?

³ Diosca paita sirvijcunaman alli consejocunata cungapaj, alli yachachingapajca Bibliata, publicacioncunata, jw.org paginata, JW Broadcasting programata, tandanacuicunata, jatun tandanacuicunatapishmi cushca. Pero sinchi fe charingapajca mana chaicunamanta yachashcallahuanchu saquirina canchij. Jesusca: “Ñuca micunaca ñucata cachaj Yayapaj munaita rurana, pai rurai nishcata pajtachinami” nircami (Juan 4:34).

⁴ Diospaj munaita ruranaca Jesuspajca shuj micuita micucushca shinami carca. Ima shinami sano micunata micushpaca alli sintirinchij. Chashnallatajmi Diospaj munaita rurashpaca alli sintirishun y ñucanchij crishcacunapish sinchiyanga. Por ejemplo, maipica shaicushcami predicacionman llujshinchij. Pero ¿chaimanta tigramushpaca nachu cushilla sintirishcanchij?

5. ¿Yachaisapa cashpaca ima allicunatataj chasquishun?

⁵ Dios yachachishcacunata causaipi pajtachishpaca yachaisapami tucushun (Santiago 3:13). Yachaisapa cajcunaca achca allicunatami chasquincuna. Bibliapica: “Chai yachashcahuanca, munanayaj sumaj charinacunapish mana chꞌimbapuraipajmi”. Shinallataj: “Chai yachanaca paipi charirijcunapajca, causaita cuj yurami. Paita ña chariracujcunaca cushicunmari” ninmi (Proverbios 3:13-18). Shuj punllaca Jesusca: “Cai nishcacunata alli intindishpa chaitataj rurashpaca cushichishcami canguichij” nircami (Juan 13:17). Jesusta catijcunaca paita cazunata mana saquishpallami cushilla causana carcacuna. Y chaitatajmi rurarcacuna. Paicunaca Jesús yachachishcacunata cazushpa, paipaj ejemplota catishpami causajcuna carca.

6. ¿Bibliapi yachachishcacunataca imamantataj pajtachishpa catina canchij?

⁶ Cunan punllacunapipish imata yachashcata pajtachishpa catinaca importantemi can. Caipi yuyashun. Shuj runaca mecanicatami estudiashca. Shinallataj trabajangapajca materialcunata, herramientacunatapishmi charin. Pero chaicunata utilizashpa, estudiashcata practicapi churashpallami alli mecánico tucunga. Shinallataj achca trabajocunata rurashcamantami experienciatapish charinga. Pero alli mecánico cashpa catingapajca yachashcatami practicapi churashpa catina can. Chashnallatajmi Bibliata estudiai callarishpaca imalla yachashcataca ñucanchij causaipi pajtachircanchij. Chaimantami cushilla sintirircanchij. Pero cushilla cashpa catingapajca tucui punllacunami Dios yachachishcacunata cazuna canchij.

7. ¿Ñaupa tiempopi Diosta sirvijcunamanta yachashpaca imatataj rurana canchij?

⁷ Cai yachaipica ñucanchijcuna humilde cachun imacunalla jarcai tucushcatami ricushun. Shinallataj ñaupa tiempopi Diosta sirvijcuna humilde canata ama saquingapaj imata rurashcatami yachashun. Pero cai yachaitaca mana leyishpalla saquirinachu canchij. Ashtahuanpish ima yachashcapi alli yuyashpami ima shina pajtachinata ricuna canchij.

8, 9. Hechos 14:8-manta 15-cama leyishpaca ¿imamantataj Pabloca humildemi carca ninchij? (Página 3-pi tiyaj dibujota ricui).

⁸ Jehová Diosca “tucui runacuna quishpirichun, mana llullata yachaj chayachunpishmi” munan (1 Timoteo 2:4). ¿Diosta manaraj rijsij gentecunataca ima shinataj ricunchij? Apóstol Pabloca sinagogacunapi Diosmanta maillatapish yachaj gentecunata mashcanamanmi rij carca. Shinapish paica judío gentecunallamanca mana huillajchu carca. Ashtahuanpish yanga dioscunata adorajcunamanpishmi huillaj carca. Pabloca paicuna ima cutichishcata uyashpami humilde o mana humilde cashcata ricuchina carca.

⁹ Por ejemplo, Pablopaj punta viajepica, Licaonia ladocunapi causajcunaca Bernabeca Júpiter diosmi, Pabloca Mercurio diosmi can nishpami yuyarcacuna. ¿Paicunata chashna alabajta ricushpaca Pablopish Bernabepish cushillachu sintirishcangacuna? Caishuj llajtacunapi paicunata mana allita tratashca cajpipish ¿caipica allimi pasashun nishpachu yuyashcangacuna? ¿Gentecuna paicunata chashna tratajpica Jehová Diosmanta alli huillaicunataca ashtahuanmi huillashun nishpachu yuyashcangacuna? Mana. Gentecuna chashna tratajta ricushpaca chai ratomi paicunapaj churanacunata lliquirishpa: “Riquichij, ¿ima nishpataj chashnaca ruracunguichij? Ñucanchijpish cancuna shinallataj runacunallami canchij” nishpa caparircacuna (Hechos 14:8-15).

10. Pablopish Bernabepish ¿imamantataj Licaoniapi causajcunata yalli cashcata mana yuyarcacuna?

¹⁰ Pablopish Bernabepish chai runacuna shinallataj juchayujcuna cashcatami nirca. Pero chashna nishpapish paicuna shinallataj yanga dioscunata adorajcuna cashcataca mana nircacunachu. Paicunataca Jehová Diosmi misionerocunata shina cachashca carca (Hechos 13:2). Shinallataj Diospaj espíritu santohuanmi jahua pachapi causangapaj agllashca carcacuna. Pero mana chaimanta shujtajcunata yalli cashcata sintircacunachu. Ashtahuanpish alli huillaicunata chasquishpaca chai gentecunapish jahua pachapi causana esperanzata chari tucushcatami yacharcacuna.

11. ¿Predicacushpaca ima shinataj apóstol Pablopaj ejemplota cati tucunchij?

¹¹ ¿Ima shinataj apóstol Pablo laya humildes cai tucunchij? Diospaj ayudahuan imata alli rurashpa, chaimanta shujtajcuna “allimari rurashcangui” nichunca mana munanachu canchij. Shinallataj, “¿gentecunaman huillacushpaca ima shinataj paicunataca ricuni? ¿Ñuca causan llajta gentecuna layallatajchu huaquincunataca yangata shina ricuni?” nishpami tapurina canchij. Testigo de Jehovacunaca Diosmanta alli huillaicunata uyanata munaj gentecunatami mashcashpa catinchij. Yangata shina ricushca gentecunata ayudangapajca huaquin huauqui panicunaca paicunapaj shimita, paicunapaj costumbrecunatami yachana cashcacuna. Cai huauqui panicunaca mana chai gentecunata yalli cashcata sintincunachu. Ashtahuanpish alli huillaicunata chasquichun ayudangapajmi cada persona ima shina cashcata alli intindinrajcuna.

12. ¿Epafras runa shujtajcunamanta preocuparishcataca ima shinataj ricuchirca?

¹² Jehová Diosta cazushpa humildes cashcata ricuchingapajca ñucanchij huauqui panicunamantami Diosta mañana canchij (2 Pedro 1:1). Jesusta catij Epafras runapish chaitami ruraj carca. Epafrasmantaca quimsa cutinllami Bibliapica parlan. Apóstol Pabloca Roma llajtapimi prezu carca. Chaipi cashpami Colosas llajtapi causaj huauqui panicunamanca, Epafrasca siempremi cancunamanta Diosta mañan nishpa quillcarca (Colosenses 4:12). Epafrasca  chai huauqui panicunataca allimi rijsirca, paicunamantapish achcatami preocuparij carca. Epafrasca apóstol Pablohuanmi prezupi cashca carca. Chashna jahuapish shujtajcuna imata minishticujpica ayudajllami carca (Filemón 23). Chaimantami huauqui panicunamanta Diosta mañaj carca. Ñucanchijpish pai shinami cai pudinchij. Huauqui panicunapaj shuticunata nombrashpa Yaya Diosta mañashpaca achcatami paicunata ayudashun (2 Corintios 1:11; Santiago 5:16).

13. ¿Diosta mañacushpaca ima shinataj Epafraspaj ejemplota cati tucunchij?

¹³ ¿Picunamantataj Diosman mañai tucunchij? ¿Pipaj shutita yuyaringuichu? Congregacionpi maijan amigocuna o familiacuna llaquita apacujcunapi yuyai. Tal vez paicunaca importante decisioncunatami agllana can o tentacioncunatami chꞌimbapuracuncuna. Paicunapaj crishcacunamanta prezupi caj huauqui panicunapaj shuticunatapishmi nombrashpa mañai tucunchij. Paicunapaj shuticunaca jw.org paginapi o JW Broadcasting programacunapimi llujshin. Shinallataj familia huañujpi llaquilla cajcunamanta, terremoto o acapana tiyajpi llaquita apacujcunamanta, guerrapi quishpirijcunamanta, cullqui illaj, micuna illaj saquirijcunamanta Diosta mañanatapish ama cungarishunchij. Achca huauqui panicunami paicunamanta mañachun minishtincuna. Chaita rurashpami mana ñucanchijllapi yuyashcata, ashtahuanpish shujtajcunamanta preocuparishcata ricuchishun (Filipenses 2:4). Chaimi Jehová Diosca ñucanchij mañashcacunata uyanga.

14. ¿Jehová Dios tucuimanta yalli alli uyaj cashcataca ima shinataj yachanchij?

¹⁴ ¿Humildes cashcata ricuchingapajca imatataj ashtahuan rurana canchij? Shujtajcuna ima nishcata alli uyanata yachashpa. Santiago 1:19-pica: “Imatapish uyanataca alli uyaichij” ninmi. Jehová Diosmi tucuimanta yalli alli uyanata yachan (Génesis 18:32; Josué 10:14). Por ejemplo, Éxodo 32:11-14-ta leyipai. ¿Cai versocunamantaca imatataj yachanchij? Moisés imata yuyashcataca Jehová Diosca mana uyanata minishtircachu. Pero pai imata nisha nishcata parlachunmi saquirca. ¿Ñucanchijca,  ñaupacunaman pandarij runa parlajpica mana pꞌiñarishpachu uyanchijman? ¿Paipaj nishcacunatapish ruranchijmanchu? Jehová Diosca paipi tucui shunguhuan crishpa mañajcunataca mana pꞌiñarishpami uyan.

15. ¿Ima shinataj Jehová Diospaj ejemplota cati tucunchij?

¹⁵ Yuyashun, Jehová Diosca mana jatun tucushpami tucuicunata uyanata yachan. Por ejemplo, Abraham, Raquel, Moisés, Josué, Manoa, Elías y Ezequías imata nishcataca paica allimi uyarca. Chaimanta: “¿Manachu ñucapish shujtajcunata alli uyanata yachana cani? ¿Huauqui panicunata valorashcata ricuchingapajca paicunata uyanichu? ¿Paicuna ima nishcata pudishpaca cazunichu? ¿Congregacionpi o familiapi pi paicunata uyachun minishtinchu? ¿Paicunata ayudangapajca imatataj rurai tucuni?” nishpami tapurina canchij (Génesis 30:6; Jueces 13:9; 1 Reyes 17:22; 2 Crónicas 30:20).

16. ¿Simei runa ajajpica Davidca imatataj rurarca?

¹⁶ Humildes cashpaca shujtajcuna ñucanchijta pꞌiñachijpipish mana chashnallataj tigrachishunchu (Efesios 4:2). Shuj alli ejemplota ricushun. 2 Samuel 16:5-13-ta leyipai. Saulpaj familiapuramanta Simei runami Davidtapish paita sirvijcunatapish pꞌiñarishpa ajarca. Davidca cai runa ama ajashpa catichunmi jarcanata pudirca. Pero mana pꞌiñarishpami tucuita ahuantarca. Chashna jarcaringapajca ¿maimantataj fuerzasta charirca? Salmo capítulo 3-ta yachashpami respuestata taringui.

17. a) ¿Davidca imamantataj mana pꞌiñarirca? b) ¿Ima shinataj Davidpaj ejemplota cati tucunchij?

¹⁷ Davidca paipaj churi Absalón paita huañuchisha nijpimi Salmo 3-taca quillcarca. Chai punllacunallapitajmi Simei runapish Davidtaca maipish cachun ajarca. Shinapish Davidca mana pꞌiñaringapajmi fuerzasta charirca. Chaipajca ¿imatataj rurarca? Salmo 3:4-pica David Yaya Dios ayudanapi confiashcatami ricuchin. Chaipica: “Mandaj Diostaca ñuca shimihuan caparishpami mañarcani, paica paipajlla caj urcumantami cutichihuarca” nircami. Shujtajcuna ñucanchijta mana alli tratajpica David shinami Diosta mañana canchij. Shinami Dios paipaj espíritu santota cujpi shujtajcunata ahuantai pudishun. Tapurishunchij, “¿shujtajcuna ñucanchijta mana alli tratajpi ama chashnallataj tigrachingapajca jarcarinchijchu? ¿Paicunata perdonanata yachanchijchu? ¿Ñucanchij ima llaquita apacushcata Jehová Dios ricushpa ayudanata crinchijchu?” nishpa.

18. ¿Jehová Dios mandashcacunata pajtachishpaca ima shinataj causashun?

¹⁸ Ima alli cashcata yachashpa chaitataj rurashpaca achca bendicioncunatami charishun. Chaimantami Proverbios 4:7-pica: “Alli yachaitaraj mashcangui” nin. Yachaisapa cangapajca mana imatapish yachashpallachu saquirina canchij. Ashtahuanpish alli decisioncunata agllashpami yachaisapa cashcataca ricuchinchij. Bibliapica añangucunapishmi “yachaisapa” cancuna ninmi. Paicunaca “usya punllacunapimi micunataca sumajta tandancuna” (Proverbios 30:24, 25). Cristoca “Diospaj yachaipishmi” can. Paica siempremi Diospaj munaita ruran (1 Corintios 1:24; Juan 8:29). Humildes cangapaj esforzarijcunata, allita ruranata agllashpa yachaisapa cashcata ricuchijcunatami Jehová Diosca bendician (Mateo 7:21-23-ta leyipai). Chaimanta, humildes cangapaj esforzarishunchij. Shinami huauqui panicuna congregacionpi Diosta humildadhuan sirvichun ayudashun. Ima alli cashcata yachashpa rurangapajca tiempo y pacienciami minishtirin. Pero chaita rurashpallami humildes cashcata ricuchishun. Cunan punllacunapipish shamuj punllacunapipish cushillami causashun.