1. ¿Testigo de Jehovacunaca imamantataj cushilla gentecuna canchij? (Jahuapi tiyaj fotota ricui).

TESTIGO DE JEHOVACUNACA cushilla gentecunami canchij. Diosta adorangapaj tandanacushca cashpa o huauqui panicunahuan shuj rato pasangapaj tandanacushca cashpapish siempremi cushilla pasanchij. Pero ¿imamantataj cushilla canchij? Ñucanchijca “cushi Diosta” rijsishcamanta, paita sirvishcamanta y pai shina cangapaj esforzarishcamantami cushilla canchij (1 Timoteo 1:11, NM; Salmo 16:11). Diosmantami cushicuica shamun. Chaimantami paica ñucanchijcuna cushilla causachun nishpa achca allicunata cun (Deuteronomio 12:7; Eclesiastés 3:12, 13).

2, 3. a) ¿Cushilla canaca imatataj nisha nin? b) ¿Imamantataj maipica mana cushilla cai pudinchij?

² ¿Canca cushillachu cangui? ¿Cushilla cangapajca imatataj rurana canchij? Cushilla canaca ñucanchijllataj alli sintirina, causaipi imata charishcahuan cushilla cana, o achca contento sintirina nisha ninmi. Bibliapica de verdad cushilla cangapajca Diospaj amigomi cana canchij ninmi. Pero cai mundopi cushilla causaita charinaca mana facilchu can. ¿Imamanta?

 ³ Huaquin cosascunamantami ña mana tanto cushilla cai tucunchij. Por ejemplo, trabajo illaj saquirishpa, cusa huarmimanta divorciarishpa, shuj familia o amigo congregacionmanta llujshichishca cajpi o huañujpica mana cushilla cai pudinchijchu. Shinallataj familia ucupi problemacuna tiyajpi, trabajopi o escuelapi compañerocuna burlarijpi, Diosta sirvicushcamanta catirashpa llaquichijpi o carcelpi churajpica mana contento canchijchu. Chashnallataj ñucanchij salud huajllirijpi, depresión ungüita charishpa o ancha ungüita charishpapish llaquillami canchij. Pero Jesusca “cushi caj, pailla tucuicunapaj jahuapi caj” o mandajmi can. Paica gentecuna cushilla cachun ayudanatami munan (1 Timoteo 6:15, NM; Mateo 11:28-30). Cai millai mundopica llaquicunahuanmi causanchij. Shinapish Sermón del Montepica Jesusca cushilla causangapaj imata rurana cashcatami huillarca.

4, 5. Ima llaquicunahuan cashpapish ¿cushilla causangapajca imatataj rurana canchij?

⁴ Jesús yachachicushpaca shuj importante yuyaitami nirca. Paica: “Espiritupi huajcha cajcunaca cushichishcami. Jahua pachamanta mandanaca ñami paicunapi mandacun” nircami (Mateo 5:3). Espiritupi huajcha cashpaca Yaya Diosta alli rijsinata minishtishcata, pai ñucanchijta ayudachun, pushachun minishtishcatami ricuchishun. ¿Chaitaca ima shinataj rurashun? Bibliata estudiashpa, Diospaj mandashcacunata cazushpa, paita sirvinata punta lugarpi churashpa. Chaita rurashpaca cushillami sintirishun. Jehová Dios cusha nishcacuna ñalla pajtarinatapish tucui shunguhuanmi crishun. Bibliapica ‘cushijlla shuyana’ esperanzamantami parlan. Chai esperanzamantami problemacunata chꞌimbapurangapaj fuerzata charishun (Tito 2:13).

⁵ Ima llaquicuna ricurijpipish cushilla cashpa catingapajca Dioshuanmi alli amigo cana canchij. Bibliapica: “Cashcata ruraj runaca, Mandaj Dioshuanmari cushicunga” ninmi (Salmo 64:10). Jehová Dioshuan alli amigo cangapajca Dios cushca yachaitami charina canchij. Diospaj Shimica: “Maijanpish cai alli yachaita yachashpa, alli yuyaita charijca cushicunmi” ninmi. Shinallataj: “Chai yachanaca paipi charirijcunapajca, causaita cuj yurami. Paita ña chariracujcunaca cushicunmari” ninmi (Proverbios 3:13, 18).

6. ¿Cushilla cashpa catingapajca imatataj rurana canchij?

⁶ Cushilla causashpa catingapajca Bibliapi yachashcacunatami cazushpa catina canchij. Jesusca chaita rurana importante cashcata ricuchingapajmi: “Cai nishcacunata alli intindishpa chaitataj rurashpaca cushichishcami canguichij” nirca (Juan 13:17; Santiago 1:25-ta leyipai). Shinami Dios ñucanchijta pushachun saquishun y cushi causaitapish charishun. Pero maipica tucui laya llaquicuna ricurijpimi mana cushilla cai tucunchij. Shinashpaca  ¿cushilla cangapajca imatataj rurana canchij? Sermón del Montepi Jesús ima nishcata ashtahuan yachashpa catishun.

7. ¿Huacajcunaca imamantataj cushilla cancuna?

⁷ “Huacajcunaca cushichishcami. Paicunami cushicuita chasquingacuna” (Mateo 5:4). Huaquin gentecunaca: “¿Huacacushpaca ima shinataj cushilla cai pudirin?” nishpami tapungacuna. Pero Jesusca imamantapish huacajcunamantaca mana parlacurcachu. Cai llaqui punllacunapi causacushcamantaca millai gentecunapishmi maipica huacancuna (2 Timoteo 3:1). Pero paicuna huacashcaca paicunallapi yuyacushcatami ricuchin. Jehová Diosmanca mana cꞌuchuyachinchu. Chaimantami mana cushilla cancuna. Pero Jesusca Diospaj ayudata minishticuj gentecunamantami parlacurca. Cai gentecunaca shujtajcuna Diosmanta caruyashcata ricushpami llaquilla sintirincuna. Shinallataj juchayujcuna cashcata, juchamanta achca llaquicuna tiyashcatapishmi cuentata cuncuna. Jehová Diosca chai gentecunapi yuyashpami Bibliahuan cushichin. Shinallataj huiñaita causana esperanzatapishmi cun (Ezequiel 5:11; 9:4-ta leyipai).

8. ¿Manso shungu canaca ima shinataj cushilla cachun ayudan?

⁸ “Manso shungucunaca, cushichishcami. Japina cashca allpataca paicunami chasquingacuna” (Mateo 5:5). ¿Manso shungu canaca ima shinataj cushilla cachun ayudan? Huaquin gentecunaca ñaupaca sinchi shungumi carcacuna. Shinallataj pihuanpish litunacujllacuna, pitapish llaquichijcunami carca. Pero Diospaj Shimimanta alli yachashpami paicunapaj causaita cambiashpa “mushuj runata” rurashca shina tucushcacuna. Cunanca paicunaca shungumanta cꞌuyajcuna, llaquijcuna, humildecuna, manso shungucuna, mana utca pꞌiñarijcunami can (Colosenses 3:9-12). Chaimantami shujtajcunahuan alli apanacuncuna, cushilla causancuna. Bibliapica chashna manso shungu gentecunami Dios cusha nishca allpataca chasquingacuna ninmi (Salmo 37:8-10, 29).

9. a) ¿Manso shungucunaca ima layataj Allpataca chasquingacuna? b) Cashcata ruranata yaricaihuan, yacunaihuan shina mashcajcunaca ¿imamantataj cushilla cai tucuncuna?

⁹ ¿Manso shungucunaca ima layataj Allpataca chasquingacuna? Ungidocunaca jahua pachapi sacerdotecuna, mandajcuna shina cashpami chasquingacuna (Apocalipsis 20:6). Cutin jahua pachaman rina esperanzata mana charijcunaca cai Allpapi huiñaita causashpami chasquingacuna. Paicunaca jucha illaj cashpami cushilla, sumajta causangacuna. Cai ishqui grupocunamantami Jesusca: “Cashcata ruraj canata yaricaihuan, yacunaihuan shina mashcajcunaca cushichishcami” nirca (Mateo 5:6). Paicunapaj munaicunaca cai Allpa shuj paraíso tucujpimi tucui pajtaringa (2 Pedro 3:13). Jehová Dios tucui mana allicunata tucuchijpica cashcata rurajcunaca cushillami causangacuna. Ima mana allicunamanta, llaquicunamantapish ña mana huacangacunachu (Salmo 37:17).

10. ¿Llaquij canaca imatataj nisha nin?

¹⁰ “Llaquijcunaca, cushichishcami. Paicunataca Taita Diosmi llaquinga” (Mateo 5:7). Llaquij canaca cꞌuyaj cana, llaquita apacujcunamanta llaquirina ninmi. Shinapish llaquijcuna canaca mana shujtajcunamanta  llaquirishpa saquirinallachu can. Bibliapica llaquijcunaca shujtajcunata ayudangapajmi imallatapish rurancuna ninmi.

11. ¿Alli samaritano parlomantaca imatataj yachacunchij?

¹¹ (Lucas 10:30-37-ta leyipai). Alli samaritano runamanta parlashca yuyaimi ima shina llaquij cana cashcata yachachin. Samaritano runa shuj chugririshca runata ricushpaca shungupi llaquirishpami paita ayudarca. Jesusca chai parlota nishca qꞌuipaca cancunapish chashnallatajmi rurana canguichij nircami. Chaimanta: “¿Ñucapish chai samaritano runa shinallatajchu rurani? ¿Shujtajcuna llaquita apacujpi paicunata ayudangapajca imatataj rurai pudini?” nishpami tapurina canchij. Por ejemplo: “¿Yuyajlla huauqui panicunata, viudacunata imata rurashpa ayudacunichu? ¿Paicunalla Diosta sirvij jovencunata ayudacunichu? ¿Shujtajcuna llaquilla cajpica animai tucunichu?” nishpa tapurishunchij (1 Tesalonicenses 5:14; Santiago 1:27).

12. ¿Llaquijcuna cashcata ricuchishpaca imamantataj cushilla cashun?

¹² ¿Llaquijcuna cashpaca imamantataj cushilla cashun? Shujtajcunata llaquij cashpaca paicunamantami imallatapish rurashun. Chaita rurashpaca Jehová Diospaj shungutami cushichishun. Jesuspish: “Imatapish cujmi, cushcata japijta yalli cushicun” nircami (Hebreos 13:16-ta leyipai; Hechos 20:35). Rey Davidpish llaquijcunamantaca: “Paitaca Mandaj Diosmi huaquichinga. Paimi causaita cunga. Cai allpapipish cushichishcami canga” nircami (Salmo 41:1, 2). Shujtajcunata llaquij cajpica, Jehová Diospish ñucanchijtaca llaquingami. Chaimi huiñaita cushilla cashun (Santiago 2:13).

13, 14. ¿Chuya shungu canaca imamantataj minishtirishca can?

¹³ Jesusca: “Chuya shungucunaca, cushichishcami. Paicunami Taita Diostaca ricungacuna” nircami (Mateo 5:8). Ñucanchij shungu chuya cachunca ñucanchij yuyaicuna, ñucanchij munaicunapishmi chuya o limpio cana can. Chaita ruranaca minishtirishcami can. Chaimi Jehová Diosca ñucanchij adoracionta chasquinga (2 Corintios 4:2-ta leyipai; 1 Timoteo 1:5).

 ¹⁴ Chuya shungu gentecunaca Diospaj ñaupajpi alli cashpami cushilla cancuna. Jehová Diosca: “Churanacunata tajshajcunaca, cushicuichij” nircami (Apocalipsis 22:14, QC, 1989). ¿Churanacunata tajshanaca imatataj nisha nin? Jahua pachapi causagrijcunapajca Jehová Dios paicunata chuya o limpio gentecunata shina chasquishcatami nisha nin. Chaimantami paicunataca jahua pachapi cushi canahuan, huiñai causaihuan bendicianga. Cutin cai Allpapi causagrijcunapajca Diospaj ñaupajpi cashcata rurajcuna cashcamanta paipaj amigocunata shina chasquishcatami nisha nin. Bibliapica: “Paicunaca churanacunata Ovejapaj yahuarpi tajshashpa yurajllata rurajcunami” can ninmi (Apocalipsis 7:9, 13, 14).

15, 16. ¿Chuya o limpio shunguta charijcunaca ima shinataj Diosta ricui pudincuna?

¹⁵ Jehová Diosca: “Ñuca ñahuita ricushpaca, pi mana causai tucungachu” nircami (Éxodo 33:20). Shinashpaca, ¿imamantataj Jesusca chuya shungucunami Diostaca ricungacuna nirca? Griego shimimanta “ricuna” nishca shimica “ricushca shina yuyana, intindina, rijsina” nisha ninmi. Shinashpaca Jehová Diosta ricunaca pai ima shina cashcata intindina, pai cꞌuyaj, llaquij, mana utca pꞌiñarij cashcata valorana nisha ninmi (Efesios 1:18). Jesusca tucuipimi paipaj Yaya shina cashcata ricuchirca. Chaimantami: “Pipish ñucata rijsijca, ñuca Yayatapish ñami rijsin” nirca (Juan 14:7-9).

¹⁶ Jehová Diostaca pai ima shina ñucanchij causaipi ayudacushcata yuyarishpapishmi ricui pudinchij (Job 42:5). Shinallataj shamuj punllacunapi sumaj bendicioncunata cusha nishcapi yuyarishpapishmi paita ricui pudinchij. Chai bendicioncunataca limpio causaita charijcunaman, paimanta manataj caruyajcunamanmi cusha nin. Pero ungidocunaca jahua pachapi causarishpami Diostaca ñahui ñahui ricungacuna (1 Juan 3:2).

17. ¿Pꞌiñanacushcata alli tucunacuchijcunaca imamantataj cushilla cancuna?

¹⁷ Jesusca: “Pꞌiñanacushcata alli tucunacuchijcunaca cushichishcami” nircapishmi (Mateo 5:9). Ñucanchijraj shujtajcunahuan alli canata mashcashpaca cushillami sintirishun. Jesusta catij Santiagoca: “Maijanpish tarpuj shina imatapish cashcata rurashpa sumajta causajca, tarpushcamanta allita tandaj shinami sumaj causaita japinga” nircami (Santiago 3:18, QC, 1989). Congregacionpi maijan huauqui panihuan o ñucanchij familiahuan llaquirinacui tiyajpica chaita allichingapajmi Yaya Diostaca ayudahuai nishpa mañana canchij. Paimi paipaj espíritu santota cushpa ayudanga. Shinallataj allita ruraj cachun, cushi causaita charichunpishmi ayudanga. Jesuspish shujtajcunahuan alli canata ñucanchijraj mashcana imamanta importante cashcatami nirca. Paica: “Taita Diosman cungapaj ofrendata altarman apamucushpa, cambaj huauqui canhuan imamanta pꞌiñarishcata yuyarishpaca, Taita Diosman cuna ofrendata altar ñaupajpi saquishpa, cambaj huauquihuanraj alli tucugringui. Chashna rurashpaca, Taita Diosman cunaman tigranguilla” nircami (Mateo 5:23, 24).

18, 19. ¿Diosta sirvijcunaca catirashpa llaquichijpipish imamantataj cushilla canchij?

¹⁸ “Ñucata caticushcamanta tucui laya millai shimicunata rimashpa, llullashpa, cꞌamishpa, llaquichina yuyailla llaquichijpi llaquita apajcunaca  cushichishcami”. ¿Imamantataj Jesusca cai shimicunata nishcanga? Paillatajmi: “Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna” nirca (Mateo 5:11, 12). Apostolcunata macashpa alli huillaicunata ña ama huillachun nishpa mandajpica cushillami “mandajcunapuralla tandanacushcacunapaj” ñaupajmanta rircacuna. Paicunaca mana macashcamanta cushilla rircacunachu. Ashtahuanpish “Jesucristomanta llaquita apajcunatajmi cashcanchij nishpami cushicushpa llujshircacuna” (Hechos 5:41).

¹⁹ Cunan punllacunapish Jesusta catijcuna cashcamanta catirashpa llaquichijpi o sinchi problemacunata chꞌimbapuracushpaca cushillami ahuantanchij (Santiago 1:2-4-ta leyipai). Llaquicunata charinataca mana munanchijchu. Pero Jehová Diosmanta mana caruyajpica ima llaquicunatapish mana manchashpa chꞌimbapurachunmi paillataj ayudanga. Shuj experienciata ricushun. Huata 1944, agosto quillapimi autoridadcunaca huauqui Henryk Dorniktaca paipaj huauquindij shuj campo de concentración nishcaman cacharcacuna. Enemigocunaca: “Paicunataca imalaya tucushpapish ñucanchij munashcataca mana rurachi tucunchijchu. Llaquichishca cashcamantami cushilla cajcuna yuyachin” nircacunami. Pero huauqui Dornikca: “Ñucata llaquinaita padicichichunca mana munarcanichu. Pero Jehová Diosta cazushcamantami mana manchashpa chai llaquicunata apacushpaca cushilla sintirircani”. Shinallataj: “Diosta mañanataca manataj saquircanichu, chaimi ashtahuan Diospaj cꞌuchullapi cashcata sintircani. Paimi tucuipi ñucataca ayudahuarca” nircami.

20. ¿“Cushi Diosta” sirvinaca imamantataj cushicuita cun?

²⁰ “Cushi Diospaj” ñaupajpi alli cashpami paita sirvishcamanta llaquichijpipish familiacuna jarcasha nijpipish ungushca cashpapish o ña mayorlla cashpapish cushilla canchij (1 Timoteo 1:11, NM). Shinallataj “mana llullaj” Dios pai nishcacunata pajtachinata tucui shunguhuan crishcamantami cushilla sintirinchij (Tito 1:2). Jehová pai nishcacunata pajtachijpica cunan charishca llaquicunataca ña mana yuyarishunllapishchu. Paraíso Allpapi pai ima shina bendicianataca mana yuyai pudinchijllapishchu. Chaipica sumaj causaitami charishun. Juillu vidatami cushilla causashun (Salmo 37:11).