1, 2. a) ¿Autoridadta charij gentecunamantaca Jehová Diosca imapitaj chꞌican can? b) ¿Cai yachaipica imatataj ricushun?

AUTORIDADTA charij gentecunaca paicuna munashca shinami shujtajcunata mandancuna o llaquichishpa causancuna (Mateo 20:25; Eclesiastés 8:9). Pero Yaya Diosca mana paicuna shinachu can. Paica tucui poderta charij Dios cashpapish juchayuj gentecunamanta preocuparishcata, respetashcatami ricuchin. Shinallataj paica ñucanchij ima shina sintirishcatami intindin, imata minishtishcatapishmi yachan. Shinallataj “ñutu allpamanta ñucanchij cashcatapish” yuyarishpami imata mana rurai pudina cashcataca mana mañan (Salmo 103:13, 14).

² Bibliapica Diosca paita sirvijcunamanta achcata preocuparij cashcatami parlan. Quimsa ejemplocunata ricushun. Puntapica, Jehová Dios sumo sacerdote Elita, paipaj familiatapish llaquichigrishcata huillanaman richun ima shina joven Samuelta ayudashcatami ricushun. Qꞌuipaca, Moisés Israel llajtata mana pushasha nishpa tucuita nirijpi Jehová Dios pacienciahuan tratashcatami ricushun. Shinallataj israelitacunata Egiptomanta llujshichishpa  ima shina paicunamanta preocuparishcatami yachashun. Caicunamanta yachacushpaca Yaya Diosmanta imata yachai tucushcata, pai shina cangapaj imata ruranatapishmi yachashun.

3. a) ¿Shuj tutaca imataj Samuelhuanca tucurca? (Página 21-pi tiyaj dibujota ricui). b) ¿Imatataj tapurinchijman?

³ Samuelca huahuaraj cashpami Diospaj huasipi sirvi callarirca (1 Samuel 3:1). Shuj tutaca Samuel dorminaman rijpica ¿imashi tucurca? * (urapi tiyaj notata ricui) (1 Samuel 3:2-10-ta leyipai). Paitaca “Samuel” nishpa cayacushcatami uyarca. Chaimi sumo sacerdotemi canga yuyashpa jatarishcahuan rirca. Samuelca cazuj cashcamantami chaita rurarca. Chayashpaca: “Caipimi cani, ¿imapajchari cayarcangui?” nircami. Elica na ñucachu imata nicuni nircami. Qꞌuipa vezpish chashnallatajmi tucurca. Ña quimsa cutinpica Elica Jehová Dios huahuata cayacushcatami cuentata curca. Chaimi ima ninata Samuelman yachachirca. Samuelca Elí yachachishca shinami rurarca. ¿Jehová Diosca ima nishpataj punta cutinmanta Samuelman pai cayacushcata mana huillarca? Bibliapica mana huillanchu. Pero Samuel ima shina sintirinapi yuyashpami chashna rurashca canga.

4, 5. a) Jehová Dios Eliman imata ruragrishcata huillagri nijpica ¿Samuelca ima shinataj sintirirca? b)  Samuelhuan Elihuan ima tucushcata ricushpaca ¿imatataj Diosmanta yachacunchij?

⁴ (1 Samuel 3:11-18-ta leyipai). Moisesman cushca leypica Diosca huahuacunaca mayorllacunataca respetanami can nishpami mandarca. Ashtahuantajca “llajtata mandajta” o pushajcunatami respetana can nircami (Éxodo 22:28; Levítico 19:32). Chaimanta, cayandij tutamanta Elita, Elipaj familiatapish Dios llaquichigrishcata huillanaca ¿Samuelpajca jahuallachu cashcanga? Mana jahuallachu cashcanga. Ashtahuanpish Bibliapica, “Samuelca muscuipi shina ricushcata, uyashcataca Eliman parlanataca mancharcami” ninmi. Pero Jehová Diosca pai Samuelta cayacushcatami Elimanca intindichirca. Chaimantami Elica Samueltaca Jehová ima nishcataca ama pacashpa tucuita huillangui nirca. Samuelca chaita cazushpami “imata mana pacashpa tucuita” huillarca.

⁵ Dios llaquichigrishcata Samuel huillashcaca Elipajca mana mushujchu cashcanga. ¿Imamanta? Ñaupamanmi “Diospaj shuj runa” casi chai shinallataj huillaita paiman nishcarca (1 Samuel 2:27-36). Samuelhuan Elihuan ima tucushcata ricushpami Jehová Dios yachaisapa, shujtajcunamanta preocuparij cashcata yachanchij.

6. ¿Samuelta Dios ima shina ayudashcata ricushpaca imatataj yachacunchij?

⁶ Canpish Samuel shina shuj jovenchari cangui. Shina cashpaca Samuelmanta yachashpami can ima problemacunata charishcata, can ima shina sintirishcata Jehová Dios intindij cashcata yachangui. Manchaita charishcamanta ¿canta ashtahuan edadta charijcunaman predicanaca sinchichu cashca? ¿Cambaj compañerocuna shina ama cangapaj esforzarinaca sinchichu cashca? Chashna cajpica Jehová canta ayudasha nishcata yuyaipi chari. Can ima shina sintirishcata  shungumanta paiman parlai (Salmo 62:8). Bibliapi Samuelmanta parlashca shina jovencunapi yuyai. Shinallataj can shina joven huauqui panicunahuan o canta yalli edadta charij huauqui panicunahuan parlai. Paicunaca chai shina jarcaicunatami ña chꞌimbapurashcangacuna. Chai ratocunapi ima shina Jehová ayudashcatapishmi parlangacuna.

7, 8. Moisesmanta preocuparishcataca ¿ima shinataj Jehová Diosca ricuchirca?

⁷ Moisés ña 80 huatacunata charijpimi Yaya Diosca shuj sinchi trabajota mingarca. Paica Egipto llajtamantami israelitacunata llujchina carca (Éxodo 3:10). Moisesca 40 huatacunatami Madián llajtapi ovejacunata michij cashca carca. Chaimantami chai trabajota Jehová Dios mingajpica mancharishca canga. Chaimi: “Faraonpajman rishpa, israelcunata Egiptomanta llujshichimungapajca ñucaca ¿pitaj caniyari?” nishpa Diosman cutichirca. Jehová Diosca: “Ñucamari canhuan casha” nircami (Éxodo 3:11, 12). Shinallataj Israelpi caj ancianocunapish can ima nishcataca uyangacunami nircami. Shina nijpipish Moisesca: “Ñuca chashna nijpipish paicunaca mana cringacunachu, ñuca nishcataca mana uyangacunachu” nircami (Éxodo 3:18; 4:1). Chashna nishpaca Moisesca Yaya Dios pandaricushcatami nicurca. Chashna jahuapish Diosca paihuan pacienciata charishcatami ricuchirca. Shinallataj milagrocunata rurachunpishmi poderta curca. Milagrocunata rurangapaj poderta charijca Moisés punta runa cashcatami Bibliapica ricuchin (Éxodo 4:2-9, 21).

⁸ Chashna jahuapish Moisesca caita chaita nirishpami catirca. Paica Diosmanca alli rimanata mana valinichu nircami. Chaimi Jehová Diosca: “Ñucami cantaca rimachisha. Imallata rimanatapish ñucami yachachisha” nirca. Chashna nijpica ¿Moisesca ñachu crishca canga? Manaraj crishcachu yuyachin. ¿Imamanta? Paica shujtajta paipaj randi cachachunmi Diosta rogarca. Chaimantami Yaya Diosca pꞌiñarirca. Shinapish Moisés ima shina sintirishcapi yuyashpa caticushcatami ricuchirca. Chaimantami Aaronta paipaj randi rimachun cacharca (Éxodo 4:10-16).

9. ¿Jehová Dios cꞌuyaj, mana utca pꞌiñarij cashcata ricushpaca Moisesca imatataj rurarca?

 ⁹ ¿Moisesta Jehová ima shina tratashcamantaca imatataj yachai tucunchij? Jehová Diosca tucui podertami charin. Chaimantami paita cazuchun Moisestaca paipaj poderhuan manchachi tucurca. Chaipaj randica paita cꞌuyashcata, pacienciata charishcatami ricuchirca. Shinallataj paita sirvij humilde runataca canhuanmi casha nishpami animarca. ¿Jehová Dios Moisesta chashna tratashpaca allitachu rurarca? Ari. Qꞌuipataca Moisesca alli pushajmi tucurca. Shujtajcunatapish Dios paita tratashca shina pacienciahuan, llaquishpa tratangapajmi esforzarirca (Números 12:3).

10. Jehová shina shujtajcunamanta sustarij cashpaca ¿ima shinataj beneficiarishun?

¹⁰ Moisesta Jehová ima shina tratashcamantaca alhaja yuyaicunatami yachai tucunchij. Tal vez cusa huarmi, yaya mama o congregacionpi anciano cashpaca shujtajcunata mandangapaj asha autoridadtami charishun. Shina cajpica Jehová Dios shinami shujtajcunamanta sustarishpa, cꞌuyaita ricuchishpa, pacienciahuan tratana canchij (Colosenses 3:19-21; 1 Pedro 5:1-3). Yaya Jehová shina, Jesús shina cangapaj esforzarishunchij. Chaimi shujtajcunaca ñucanchijhuan parlanata munangacuna. Ñucanchijpish paicunata animanatami pudishun (Mateo 11:28, 29). Chashnami shujtajcunaca ñucanchij ejemplota catinata munangacuna (Hebreo 13:7).

11, 12. Egiptomanta israelitacunata llujshichishpa paicunata cuidacushcata ricuchingapajca ¿Jehová Diosca imatataj rurarca?

¹¹ Jesús manaraj huacharijpi huata 1513-pimi israelitacunaca Egipto llajtamanta llujshircacuna. Tucuica 3 millones yalli runacunami cashcanga. Paicunapurapica huahuacuna, yuyajcunami carca. Shinallataj ungushcacuna, mancocuna, ciegocuna, paraliticocunapishmi cashcanga. Chai tucuicunata pushangapajca paicuna ima shina sintirishcata intindij, llaquij canami minishtirirca. Jehová Diosca Moisesta pushaj cachun churashpami pai chashna cashcata ricuchirca. Chaimantami mana rijsishca lugarcunaman llujshigrishpaca israelitacunaca tranquilo sintirishcangacuna (Salmo 78:52, 53).

¹² ¿Israelitacunata cuidacushcata ricuchingapajca Jehová Diosca imatataj rurarca? Paica Egiptomantaca soldadocunata shinami mirga mirgapi llujshichirca (Éxodo 13:18). Chashna grupopi organizados llujchijpimi Yaya Dios imata ruranata yachashcata seguros carcacuna. Shinallataj Jehová Diosca “punllaca pꞌuyuhuan”, “tutaca ninahuan” pushashpami paicunahuan cashcata ricuchirca (Salmo 78:14). Chaita rurashpaca: “Cancunata cuidangapaj,  pushangapajca caipimi cani. Ama manchaichijchu” nicushca layami carca. Chai shimicunataca israelitacunaca tucui shunguhuanmi crina carca. ¿Imamanta? Ima tucushcata ricushun.

13, 14. a) Israelitacunata quishpichingapajca ¿imatataj Jehová Diosca Puca Cuchapi rurarca? b) Faraonpaj soldadocunapaj ñaupajpica ¿Diosca ima shinataj paipaj poderta ricuchirca?

¹³ (Éxodo 14:19-22-ta leyipai). Ñucanchijcuna israelitacunapurapi cashcata yuyashun. Huasha ladomanca faraonpaj soldacunami can, cutin ñaupaj ladomanca Puca Cuchami saquirin. Ñucanchijca chai chaupipimi canchij. Chaipimi Diosca ñapish ñucanchijcunapaj huashapi shuj pꞌuyuta churan. Chaimi faraonpish paipaj soldadocunapish amsapi saquirincuna. Pero ñucanchijca achijllapimi canchij. Qꞌuipaca Moisesca yacu cucha jahuatami paipaj maquita chutan. Chaimi inti llujshin ladomanta sinchi huaira yacutaca cada ladoman ishquipi chaupin. Yacuta chaupijpica shuj ancho ñanmi tucun. Chaimi ñucanchijpish ñucanchij familiapish animalcunapish shujtaj gentecunandij ordenpi chai ñanta puri callarinchij. Puri callarijpica ñanca mana llushcaricuj o lodonicujchu can. Ashtahuanpish chaquishca, alli ñanmi can. Mana utca puri tucujcunapishmi alli caishuj ladomanca chayai pudincuna.

¹⁴ (Éxodo 14:23, 26-30-ta leyipai). Ña caishuj ladoman chayagricujpimi faraonca paipaj soldadocunandij ñucanchijta catishpa yacu chaupita shamuncuna. Chaipimi Moisesca cutin yacu jahuata paipaj maquita chutan. Chaimi patalaya shayacuj yacucunaca tucui fuerzahuan tigrashpa ñaupaman cashca shinallataj tucun. Chaipimi faraonpish paipaj soldadocunapish tucui libri huañuncuna (Éxodo 15:8-10).

15. Israelitacunahuan faraonpaj soldadocunahuan ima tucushcata yuyarishpaca ¿imatataj Jehová Diosmanta yachanchij?

 ¹⁵ Israelitacunahuan faraonpaj soldadocunahuan ima pasashcata yachashpami Jehová Diosca tucuita ordenpi charij cashcata yachacunchij. Chaita yachashpami paipi confiai tucushcata intindinchij. Chaimantami seguros sintirinchij (1 Corintios 14:33, Nuevo Testamento en quichua Chimborazo, 1973). Shinallataj Yaya Diosca shuj cꞌuyaj michij shinami ñucanchijtaca ugllashpa enemigocunamanta cuidan. Caita yachashpami Diospaj jatun punlla chayamucujpica tranquilo sintirinchij (Proverbios 1:33).

16. ¿Israelitacunata Jehová ima shina quishpichishcata yuyarishpaca imatataj seguros cai tucunchij?

¹⁶ Jehová Diosca cunan punllacunapish paipaj pueblotaca allimi cuidan. Paihuan alli amigo cachunmi ayudan, shinallataj enemigocunamantami ñucanchijta cuidan. Jatun llaqui punlla chayamujpipish paica cuidashpami catinga (Apocalipsis 7:9, 10). Chaimantami joven cashpa o mayorlla cashpa, alli saludta charishpa, ima ungüita charishpa o discapacitado cashpapish jatun llaqui punlla chayamujpica mana ni shujta manchashun * (urapi tiyaj notata ricui). Ashtahuanpish Jesucristo ima nishcatami yuyarishun. Paica: “Chaipica cancunata quishpichina pajtamucushcata yuyashpa, cushicushpa chaparanguichijlla” nircami (Lucas 21:28). Magog llajtamanta Gog llaquichicujpipish mana manchashunchu. Gog nishcaca huaquin llajtacunamanta tandanacushca mandajcunami can. Mandaj faraontapish maihuan yallimi poderta charincuna. Chaipipish Diospi confianataca manataj saquishunchu (Ezequiel 38:2, 14-16). Ñucanchijca Jehová Dios mana nunca cambiaj cashcata yachashpami imata mana manchashpa tranquilo sintirishun. Paica ñucanchijmanta preocuparishcata, cꞌuyashcata ricuchishpami quishpichinga (Isaías 26:3, 20).

17. a) ¿Jehová paipaj pueblota cuidashcata yachashpa beneficiaringapajca imatataj rurana canchij? b) ¿Jehovamanta ashtahuan yachangapaj esforzarishpaca ima beneficiocunatataj charishun? c) ¿Catij yachaipica imatataj ricushun?

¹⁷ Cai yachaipica Jehová ima shina paita sirvijcunamanta preocuparij, cuidaj, pushaj, quishpichij cashcatapishmi quimsa ejemplocunahuan yachashcanchij. Chaicunata cutin cutin yuyarishunchij. Yuyaricushpaca Jehovamanta ima manaraj yachashcacunata yachangapaj esforzarishunchij. Chaita rurashpaca Jehová Dios cꞌuyaj, llaquij cashcatami ashtahuan intindishun. Shinami paitaca ashtahuan cꞌuyashun, ñucanchij crishcacunapish ashtahuanmi sinchiyanga. Catij yachaipica familiapi, congregacionpi, huillanapipish Jehová Dios shina shujtajcunamanta preocuparij cashcata ricuchingapaj imata rurana cashcatami yachashun.