1. ¿Maijan gentecunaca ñucanchij crishcacunamantaca ima shinataj tapuncuna?

 ¿TRABAJOPI, escuelapi o colegiopi cambaj crishcacunamanta tapujpica ima shinataj sintiringui? ¿Manchaita charinguichu? Achcacunami chashna sintirinchij. Pero manchaita charishpapish gentecuna imamanta ñucanchij crishcacunamanta tapushcatami intindina canchij. Chashnami paicunamanca huillai tucushun. Shinapish huaquinpica maijancunaca pꞌiñarishca cashcamantami sinchi shimicunahuan tapuicunata rurangacuna. Pero mana mancharinachu canchij. Tal vez shujtajcuna nishcacunata crishcamantami chashna tapungacuna (Hechos 28:22). Ashtahuancarin tucuri punllacunapi causacushcamantami maijan gentecunaca ‘alli tucunata mana munajcuna, pꞌiña millaicuna’ can (2 Timoteo 3:​1, 3).

2. ¿Manso shungu canaca imamantataj valishca can?

² ¿Sinchi shimicunahuan ñucanchij crishcacunamanta tapujpi mana pꞌiñarishpa, alli shimicunahuan cutichingapajca imatataj rurana canchij? Chaipajca manso shungu canatami yachana canchij. Manso shungu cashpaca mana rato pꞌiñarishunchu. Ashtahuanpish pꞌiñachisha nijpipish, paicunaman ima shina cutichinata mana yachashpapish pacienciatami charishun (Proverbios 16:32). ‘Manso shungu canaca sinchimi can’ nishpachari yuyangui. Pero tucuicunami manso shungu cai tucunchij. ¿Manso shungu cangapajca imatataj rurana canchij? Shinallataj, ¿ñucanchij crishcacunamanta sinchi shimicunahuan tapujpica manso shunguhuan cutichingapajca imatataj rurai tucunchij? ¿Huahuacunata charishpaca paicunapish manso shunguhuan paicunapaj crishcacunamanta parlachunca ima shinataj ayudai tucunchij? Cunanmi chaita yachashun.

3. ¿Manso shungucunaca manchaisiquicunachu can? (2 Timoteo 2:​24, 25).

³ Manso shungu cajcunaca manchaisiquicunaca mana canchu. Ashtahuanpish paicunaca imata mana manchaj, sinchicunami can. Chaimantami paicunaca shujtajcuna pꞌiñachisha nijpipish jarcarinata yachancuna. Manso shungu canaca ‘Diospaj espíritu pꞌucuchishca granomi’ (Gálatas 5:​22, 23). Ñaupa griego rimaipi shuj urcu caballota mansoyachishcata ningapajca, ‘chai caballoca manso shungumi can’ nijcunami carca. Shinashpaca chai caballo sinchi cashpapish mansomi carca. ¿Ñucanchijpish sinchi cashpapish ima shinataj manso shungu cai tucunchij? Ñucanchijllaca chaitaca mana rurai tucushunchu. Ashtahuanpish Jehová Dios espíritu santota cushpa ayudachunmi minishtinchij. Esforzarishpaca tucuicunami manso shungu cai tucunchij. Por ejemplo, huaquin huauqui panicunaca Diosmanta huillacujpi gentecuna pꞌiñachisha nijpica manso shungu cashcatami ricuchishcacuna. Chashnami shujtaj gentecunaca testigo de Jehovacuna mana utca pꞌiñarij, manso shungu cashcata cuentata cushcacuna (2 Timoteo 2:​24, 25-ta liyipai). ¿Canpish manso shungu cangapajca imatataj rurana cangui?

4. ¿Isaacmantaca imatataj yachanchij?

⁴ Bibliapica manso shungu cana valishca cashcatami yachachin. Por ejemplo, Guerar pueblopi causacujpica filisteocunaca Isaactami envidiai callarircacuna. Chaimi paipaj yaya causacujpiraj allashca pugyucunataca allpahuan taparcacuna. Pero Isaacca paicunahuan pꞌiñanacunapaj randica shujtaj ladopimi causanaman rirca. Chaipica shujtaj pugyucunatami allarca (Génesis 26:​12-18). Shinapish filisteocunaca ‘chai pugyucunapi tiyaj yacucunapish ñucanchijpajmi can’ nircacunami. Paicuna chashna nijpipish Isaacca mana pꞌiñarircachu (Génesis 26:​19-25). ¿Filisteocuna pꞌiñachisha nijpipish imamantataj mana pꞌiñarirca? Paipaj yaya mamami manso shungu canata yachachishcangacuna. Abrahamca imatapish pacienciahuanmi ruraj carca. Cutin, Saraca ‘sumaj causaita mashcaj, manso shungumi’ carca (1 Pedro 3:​4-6; Génesis 21:​22-34).

5. ¿Yaya mamacunaca Maxpaj yaya mamamantaca imatataj yachai tucuncuna?

⁵ Yaya mamacunaca paicunapaj huahuacunamanmi manso shungu canata yachachina can. 17 huatacunata charij Max b jovenhuan ima tucushcata ricushun. ¿Escuelapi, predicacionpi gentecuna mana alli tratajpipish pacienciata charichunca paipaj yaya mamaca imatataj rurarcacuna? Paicunaca manso shungu canatami yachachircacuna. Maxpaj yaya mamaca cashnami nircacuna: “Ñucanchij churica pꞌiñachijpi o mana alli tratajpi jahualla pꞌiñarinapaj randi, paipish mana alli tratanapaj randica jarcarina cashcatami intindirca”. Cunanca Maxca manso shungu cashcamantaca cushillami causan.

6. ¿Manso shungu casha nishpaca imamantataj Jehová Diosta mañana canchij?

⁶ ¿Gentecuna Diosmanta, Bibliapi nishcacunamanta burlarijpica imatataj ruranguiman? Jehová Diostami alaja shimicunahuan cutichingapaj espíritu santota cuchun mañana cangui. Pero gentecuna pꞌiñachishcamanta sinchi shimicunahuan cutichishpaca ¿imatataj rurana canchij? Ama cutin chashna cutichingapajmi Jehová Dios ñucanchijta ayudachun mañana canchij. Chaita rurajpimi Jehová Diosca espíritu santota cushpa pacienciata charichun ayudanga.

7. ¿Shujtajcuna mana alli tratajpi o sinchi shimicunahuan rimajpica imamantataj Bibliapi nishcacunata yuyarina canchij? (Proverbios 15:​1, 18).

⁷ Shujtajcuna pꞌiñachisha nijpi o mana alli tratajpica Bibliapi nishcacunatami yuyarina canchij. Jehová Diosmi paipaj espíritu santota cushpa chai versocunapi ima nishcata yuyarichun ayudanga (Juan 14:26). Por ejemplo  Proverbios libropica manso shungu canata yachangapajca alaja consejocunami tiyan (Proverbios 15:​1, 18-ta liyipai). Shinallataj Proverbios libropica mana alli tratajpi imamanta mana pꞌiñarina cashcatami yachachin (Proverbios 10:19; 17:27; 21:23; 25:15).

8. ¿Gentecuna ñucanchij crishcacunamanta tapujpica manaraj cutichishpaca imatataj rurana canchij?

⁸ Alli yuyaiyuj canaca valishcami can (Proverbios 19:11). Alli yuyaiyujcuna cashpaca shujtajcuna sinchi shimicunahuan ñucanchij crishcacunamanta tapujpica mana pꞌiñarishunchu. Shinallataj huaquin gentecunaca shuj tapuita rurashpaca imamanta chai tapuita rurashcataca manachari tucuita huillangacuna. Chaimantami manaraj cutichishpaca paicunata alli intindingapaj esforzarina canchij (Proverbios 16:23).

9. ¿Gedeonca alli yuyaiyuj, manso shungu cashcataca ima shinataj ricuchirca?

⁹ Gedeonpi yuyashun. Efrainpaj runacunaca Gedeontaca: ‘Canca madianitacunahuan macanacunaman rishpaca ¿imamantataj mana ñucanchijman huillarcangui?’ nishpami sinchita rimarcacuna. Efrainpaj runacunaca ¿jatun tucushca cashcamantachu pꞌiñarircacuna? Ima laya cashca cajpipish Gedeonca sumaj shimicunahuan cutichishpami paicunata respetashcata ricuchirca. Gedeón chashna cutichishcamantami paicunaca ña mana pꞌiñarircacuna (Jueces 8:​1-3).

10. ¿Ñucanchij crishcacunamanta tapujpica respetohuan cutichingapajca imapitaj yuyana canchij? (1 Pedro 3:15).

 ¹⁰ ¿Trabajopi, escuelapi o colegiopi ñucanchij crishcacunamanta tapujpica imatataj rurana canchij? Tucuicunami ñucanchij crishcacunata difindinata munachij ¿nachu? Pero gentecuna yuyashcata respetangapajpishmi esforzarina canchij (1 Pedro 3:​15-ta liyipai). Shinallataj chai tapuita imamanta rurashcatami intindina canchij. Tal vez mana pꞌiñachingaraicullachu tapushcanga. Ashtahuanpish ñucanchij crishcacunamanta ashtahuan yachasha nishcamantami tapushcanga. Pero ima munaihuan tapushca cajpipish siempremi respetota ricuchina canchij. Sinchita rimajpipish o burlarijpipish chaitami rurana canchij (Romanos 12:17).

11-12. a) ¿Sinchi tapuicunata manaraj cutichishpaca imapitaj yuyana canchij? (Fotomantapish parlapai). b) ¿Sinchi tapuicunata rurajpi ñucanchij crishcacunamanta alli yachachingapajca imataraj rurana canchij? Shuj ejemplomanta parlai.

¹¹ ¿Cambaj trabajopi shuj compañero, “¿cancunaca imamantataj cumpleañoscunata mana ruranguichij?” nishpa tapujpica imatataj ruranguiman? Manaraj cutichishpaca imamanta chaita tapushcatami yuyana cangui. Tal vez cambaj compañeroca ñucanchijta pushajcuna divirtirichun mana saquij cashcatachari yuyan. O mana cashpaca paica ñucanchij culpamanta trabajopi tucuicunapura mana alli apanacugrishcatachari yuyan. Chaimantami imamanta cumpleañoscunata mana rurashcata manaraj cutichishpaca, tal vez “ñucapish trabajopi tucuicuna alli apanacuchunmi munani” nishpa cutichi tucunchij. Chashna cutichijpica tal vez cambaj compañeroca ashtahuan tranquilomi sintiringa. Ashtahuancarin cumpleañoscunamanta Bibliapi imata yachachishcatami tal vez yachanata munanga.

¹² Gentecuna shujtaj sinchi tapuicunata rurajpipish chashnallatajmi cutichina canchij. Por ejemplo, escuela o colegiopi shuj compañero “testigo de Jehovacunaca cꞌaripura huarmipura enamorarina, cazarana jatun jucha cashcataca mana yuyanachu can” nijpica ¿imatataj ruranguiman? Manaraj imata nishpaca imamanta chashna yuyashcatami intindina canchij. ¿Tal vez paicunapaj amigocuna, familiacunachu shina causan? ¿Mana cashpaca testigo de Jehovacuna chashna causajcunata millanayachishcatachu yuyan? ¿O testigo de Jehovacunapaj crishcacunatachu mana alli rijsin? Ñucanchij crishcacunamanta manaraj parlashpami tal vez “testigo de Jehovacunaca tucuicunamantami sustarinchij. Ashtahuanpish gentecuna imata decidishcatami respetanchij” ni tucunchij (1 Pedro 2:17). c Chaita uyashpaca cambaj compañeroca tal vez Bibliapi nishcacunata imamanta cazuna cashcatami explicachun saquinga.

13. ¿Dios tiyashcata mana crijcunataca ima shinataj ayudai tucunchij?

¹³ Maijancunaca ñucanchij crishcacunahuanca mana de acuerdochu cangacuna. Pero paicuna mana de acuerdo cajpipish imamanta chashna yuyashcata alli intindingapajmi esforzarina canchij (Tito 3:2). Por ejemplo, escuela o colegiopichari shuj compañeroca “imata mana yachajcunallami Diospi crincuna” ninga. Pai chashna nijpipish evolucionpi crishcata, chaimanta achcata yachashcataca mana yuyanachu cangui. Paica Dios tiyashcata o mana tiyashcata mana seguro cashcamantachari chashna yuyan. Chaimanta evolucionmanta parlai callarinapaj randica ¿imatataj rurai tucungui? Paillataj Dios tiyashcata investigachunmi ayudai tucungui. Por ejemplo, Dios imalla rurashcacunamanta yachachunmi jw.org-pi tiyaj shuj temata cachai tucungui. Chai temata liyishca qꞌuipaca paica tal vez ashtahuanmi yachanata munanga. Shinallataj paita respetohuan  tratangapajmi esforzarina cangui. Chashna tratajpimi tal vez paipaj yuyaita cambianga.

14. ¿Naveenca jw.org paginataca ima shinataj utilizarca?

¹⁴ Naveen shuti jovenca jw.org paginata utilizashpami testigo de Jehovacuna imapi crishcata alli intindichirca. Paica: “Colegiomanta shuj compañeroca, ‘Bibliaca yanga librollami can. Chaipi nishcacunapi crinapaj randica cienciapimi crina cangui’ nijmi carca” nircami. Naveenca paipaj compañeroman imapi crishcata intindichisha nijpipish paica mana saquijchu carca. Chaimi Naveenca jw.org paginapi “La Biblia y la ciencia” nishca partepi tiyaj temacunata ricuchun nirca. Chaita rurashcamantami qꞌuipaca cai Allpapi imalla tiyashcacuna ima shina tiyai callarishcata parlangapajca Naveenpajca ashtahuan jahualla carca. Ñucanchijpish chaita rurangapajmi esforzarina canchij.

15. ¿Yaya mamacunaca huahuacuna respetohuan cutichichunca ima shinataj yachachi tucuncuna?

¹⁵ Yaya mamacunaca huahuacuna mana pꞌiñarishpa paicunapaj crishcacunata explicachunmi yachachina can (Santiago 3:13). Huaquin yaya mamacunaca familiahuan Bibliata estudiacushpami tapuicunata ima shina cutichinata repasancuna. Shinallataj huaquin yaya mamacunaca paicunallataj profesorcuna, compañerocuna shina tucushpami huaquin tapuicunata ima shina cutichinata repasancuna. Huahuacunamanca alaja shimicunahuan, respetohuan parlana cashcatapishmi intindichincuna (“ Ima shina cutichinata repasaichij” nishca recuadrotapish ricui).

16-17. ¿Jovencunaca tapuicunata ima shina cutichinataca imamantataj repasana can?

¹⁶ Huahuacunaca tapuicunata ima shina cutichinata repasashpaca alaja shimicunahuanmi sinchi tapuicunataca cutichingacuna. Ashtahuanpish paicunallatajmi paicunapaj crishcacuna ciertotaj cashcata seguros cangacuna.  JW.ORG paginapi “Los jóvenes preguntan” nishca partepica “Pónlo por escrito” nishca partemi tiyan. Chai partepica jovencunaca paicunapaj crishcacunata paicunapaj propio shimicunahuan ima shina cutichinatami yachai tucuncuna. Chaita rurashpaca paicunapaj crishcacunatami sinchiyachingacuna. Ashtahuanpish tucui familiami tapuicunata respetohuan ima shina cutichinata yachangacuna.

¹⁷ Matthewca paipaj familiahuanmi tapuicunata ima shina cutichinata repasan. Familiahuan Bibliata estudiacushpami paipaj yaya mamahuan chꞌican chꞌican temacunata investigan. Paicunaca colegiopi compañerocuna, profesorcuna ima tapuicunallata rurai tucushcatami yuyancuna. Chai qꞌuipaca chai tapuicunata ima shina cutichinatami repasancuna. Matthewca paipaj crishcacunata alli intindishcamantami respetohuan, mana manchashpa explicai tucun.

18. ¿Colosenses 4:​6-pi nishca shinaca imatataj rurana canchij?

¹⁸ Ñucanchij crishcacunata alli intindichijpipish maijancunaca mana crisha ningacunachu. Chashnapish alli yuyashpa, respetohuan parlangapajmi esforzarina canchij (Colosenses 4:​6-ta liyipai). Ñucanchij crishcacunamanta parlanaca pelotahuan pugllacushca shinami can. Pelotataca sinchita o allillatami shitai tucunchij. Pelotata allillata shitajpica paicunaca jahuallami japingacuna. ¿Caimantaca imatataj yachanchij? Ñucanchijpish respetohuan, alaja shimicunahuan parlajpica gentecunaca mana pꞌiñarishpami uyanata munangacuna. Pero paicuna sinchita rimajpi o burlari callarijpica mana parlashpa catinatami decidi tucunchij (Proverbios 26:4). Huaquin gentecunallami ñucanchijtaca mana alli tratancuna. Ashtahuanpish la mayoriami ñucanchijta uyanata munangacuna.

19. ¿Ñucanchij crishcacunamanta mana pꞌiñarishpa parlangapajca imatataj rurana canchij?

¹⁹ Caipi yachashca shinaca manso shungu canaca valishcami can. Chaimantami shujtajcuna mana alli tratajpi, sinchi tapuicunata rurajpica manso shungu cangapaj Jehová Dios ñucanchijta ayudachun mañana canchij. Manso shungu cashpallami shujtajcuna pꞌiñachisha nijpipish mana pꞌiñarishun. Ashtahuanpish respetohuan cutichijpica paicunaca paicunapaj yuyaitami cambiangacuna. Bibliapi nishcacuna ciertotaj cashcatapishmi intindingacuna. Shinaca ‘manso shunguhuan, respetohuan cutichingapajmi allichirishca cana canchij’ (1 Pedro 3:15). Chaimanta manso shungu, imata mana manchaj, sinchi cashunchij.