1. ¿Pedro manaraj huañujpica Jehová Diosca paimanca imatataj mingarca?

 APÓSTOL Pedroca huañungacamami Jehová Diosta sirvirca. Paica Jesushuanmi predicaj carca. Jesús huañushca qꞌuipaca Pedroca shujtaj llajtamanta cajcunamanmi predicai callarirca. Shinallataj paica cuerpo gobernantepipishmi sirvirca. Pedro ñalla huañugrijpipish Jehová Diosca shuj mingashcatami paiman curca. Chaimi huata 62-manta huata 64-camaca Jehová Dios espíritu santota cujpi Pedroca ishqui cartacunata quillcarca. Chai cartacunataca Primera y Segunda de Pedro nishpami rijsinchij. Pedroca pai huañushca qꞌuipa huauqui panicuna chai cartacunata liyishpa animarichunmi munarca (2 Pedro 1:​12-15).

2. ¿Pedro quillcashca cartacunaca huauqui panicunapajca imamantataj valishca carca?

² Huauqui panicuna ‘chꞌican chꞌican llaquicunata charishcamanta’ llaquilla cajpimi Pedroca paipaj ishqui cartacunata quillcarca (1 Pedro 1:6). Shinallataj millai runacunami mapa ruraicunapi urmachun, panda yuyaicunapi crichun huauqui panicunata pandachisha nicurca (2 Pedro 2:​1, 2, 14). Jerusalenpi caj huauqui panicunaca, “tucui imalla tiyashcacuna” ima shina tucurinatami ñalla ricugrircacuna. ¿Chaica imatataj nisha nirca? Romanocunami Jerusalenta, templotapish ñalla tucuchigrircacuna (1 Pedro 4:7). Shinaca chai tiempopi causaj huauqui panicunaca Pedro quillcashca cartacunata liyishpami chai rato apacushca llaquicunata, shamuj punllacunapi tiyagrishca llaquicunata ahuantangapaj allichirishca carcacuna. b

3. ¿Pedro quillcashca cartacunamantaca imamantataj yachana canchij?

³ Pedroca punta siglopi causaj huauqui panicunamanmi paipaj ishqui cartacunata quillcarca. Pero Jehová Diosca ñucanchijcunapish  beneficiarichunmi chai ishqui cartacunataca Bibliapi churarca (Romanos 15:4). Ñucanchijtapishmi millai gentecunaca mapa ruraicunapi urmachisha nin. Shinallataj ñucanchijpish jatun llaquicunata apana cashcamantami huaquinpica Diosta sirvinaca sinchi cai tucun. Ñallami jatun llaqui punllacunaca chayamunga. Chai punllacunaca Jerusalén tucurijpi tiyashca llaquicunatapish ashtahuan llaquimi canga. Chaimantami Pedro quillcashca cartacunamanta yachana canchij. Chaipica Jehová Diospaj punllata pacienciahuan shuyanata, Diosta mana sirvijcunata mana manchanata, huauqui panicunata tucui shunguhuan cꞌuyanatami yachashun. Shinallataj chai cartacunapica anciano huauquicunaca, huauqui panicunata ima shina ayudanatami yachangacuna.

4. ¿Ñucanchij feca imamantataj chiriyai tucun? (2 Pedro 3:​3, 4).

⁴ Testigo de Jehovacunaca achca huatacunatami Diospaj punlla ñalla chayamuna cashcata huillacushcanchij. Shinapish achca gentecunaca shamuj punllacunapi ima tucunamanta Bibliapi nishcacunataca mana crincunachu. Chaimantami paicunaca huaquinpica ñucanchijmanta burlarincuna. Maijancunacarin “Diospaj punllaca nunca mana shamungachu” nincunami (2 Pedro 3:​3, 4-ta liyipai). Predicacujpi, trabajopi o ñucanchij familia chaita nijpica ñucanchij femi chiriyai tucun. ¿Pero ñucanchij fe ama chiriyachunca imatataj rurana canchij? Pedro imata nishcata ricushun.

5. ¿Diospaj punllata pacienciahuan shuyangapajca imatataj rurana canchij? (2 Pedro 3:​8, 9).

⁵ Maijancunaca Diospaj punllaca uniyacunmi nincunami. Pero paicuna shina ama yuyangapajca Pedro nishcacunapimi yuyana canchij. Paica Jehová Diosca tiempotaca ñucanchij shina mana ricuj cashcatami nirca (2 Pedro 3:​8, 9-ta liyipai). Jehová Diospajca shuj punllaca mil huatacuna shinami can. Paica shujllapish ama chingarichunmi pacienciata charin. Pero paipaj punllaca chayamungatajmi. Millai gentecunaca tucuchishcami canga. Chaimantami tiempo tiyajpiraj tucui gentecunaman huillangapaj esforzarina canchij.

6. ¿Diospaj punlla shamuna yuyailla cangapajca imatataj rurana canchij? (2 Pedro 3:​11, 12).

⁶ Pedroca, Diospaj punlla “shamunata shuyashpa chai yuyailla catichij” nircami (2 Pedro 3:​11, 12-ta liyipai). Chaipajca paraisopi ima shina causanatami yuyana canchij. Por ejemplo, ¿cai Allpa limpio cajpi, mishqui, sano micunacunata micucushcata yuyashcanguichu? ¿Cambaj cꞌuyashca familiacuna, amigocuna causarijpi cushicushpa chasquicushcata yuyashcanguichu? ¿Shinallataj ñaupa tiempo gentecunaman profeciacuna ima shina pajtarishcata yachachicushcata yuyashcanguichu? Chaicunapi yuyashpaca Diospaj punlla ñalla shamuna cashcatami seguros cashun. Ashtahuancarin shamuj punllacunapi, ima tucunata yachashcamantami panda yachachishcacunataca mana crishun (2 Pedro 3:17).

7. ¿Gentecunata manchashpaca imata ruranataj sinchi canga?

⁷ Diospaj punlla ñalla shamuna cashcata yachashcamantami tucui gentecunaman alli huillaicunata huillangapaj esforzaricunchij. Pero huaquinpica shujtajcunaman huillanaca sinchimi can. ¿Imamanta? Paicunata manchashcamanta. Pedropish manchaitami charirca. Chaimantami Jesusta juzgacujpica paipaj discípulo cashcata negarca (Mateo 26:​69-75). Pero Pedroca gentecunata ama manchangapajmi esforzarirca. Chaimantami “gentecuna manchashcataca ama manchaichijchu” nirca (1 Pedro 3:14). Ñucanchijpish gentecunata ama manchangapajmi esforzarina canchij.

8. ¿Ama manchashpa huillangapajca imatataj rurana canchij? (1 Pedro 3:15).

⁸ ¿Gentecunata ama manchangapaj imatataj  rurana canchij? Pedroca “Cristotaca Amito cashcamanta cancunapaj shungupi jatunyachichij” nircami (1 Pedro 3:​15-ta liyipai). Shinashpaca shujtajcunaman huillanata manchashpaca Jesús jahua pachapi ima shina mandacushcatami yuyarina canchij. Paica jahua pachapica huaranga huaranga angelcunapaj chaupipimi mandacun. Shinallataj Jehová Dios jahua pachata, cai pachata mandachun Jesusman poderta cushcatami yuyarina canchij. Ashtahuantajca Jesús “cai pachapaj ruraicuna tucuringacamami tucui punllacuna cancunahuan casha” nishcatapishmi yuyaipi charina canchij (Mateo 28:​18-20). Pedroca ñucanchij crishcacunata difindingapaj allichirina cashcatami nirca. ¿Shinaca trabajopi, escuelapi o maipi cashpapish huillasha ninguimanchu? Chaipajca ima hora huillai tucushcata, imata ninatapishmi yuyana cangui. Shinallataj Jehová Diostami “mana manchashpa huillangapaj ayudahuai” nishpa mañana cangui. Mañashca qꞌuipaca Jehová Dios mana manchashpa huillachun ayudanatami seguros cana canchij (Hechos 4:29).

9. ¿Pedroca cꞌuyaita mana charishcataca ima shinataj ricuchirca? (Fotomantapish parlapai).

⁹ Pedroca cꞌuyaita ima shina ricuchina cashcatami yacharca. Jesús, “ñucaca shuj mushuj mandashcatami cancunamanca cuni. Caishuj chaishuj cꞌuyanacuichij. Ima shinami cancunata ñuca cꞌuyashcani, cancunapish chashnallataj caishuj chaishuj cꞌuyanacuichij” nijpica Pedroca chaipimi carca (Juan 13:34). Chashnapish Pedroca  shujtajcunata manchashcamantami mana judío caj huauqui panicunahuanca mana micusha nirca. Chaita ricushpami Pabloca Pedrotaca ‘canca mishqui shimi jayaj shungu cashcatami ricuchicungui’ nishpa cunarca (Gálatas 2:​11-14). Pablo chashna cunajpimi Pedroca paipaj yuyaita cambiarca. Chaimantami paipaj ishqui cartacunapica huauqui panicunata cꞌuyanimi nishpalla mana saquirina cashcata, ashtahuanpish cꞌuyaita ruraicunahuan ricuchina cashcata nirca.

10. ¿“Mana nijtucushpalla” huauqui panicunata cꞌuyashcataca ima shinataj ricuchinchij? (1 Pedro 1:22).

¹⁰ Pedroca huauqui panicunata ‘mana nij tucushpalla familia ucupi shina cꞌuyaita ricuchina cashcatami‘ nirca (1 Pedro 1:​22-ta liyipai). Bibliapica Jehová Diospaj ñaupajpi ‘tucuicuna chashnallataj cashcatami’ intindichin (Hechos 10:​34, 35). Chaimantami ñucanchijpish tucui huauqui panicunata cꞌuyangapaj esforzarina canchij. Mana tucui huauqui panicunata cꞌuyashcata ricuchishpaca Jesuspaj yachachishcacunata mana pajtachicushcatami ricuchishun. Tal vez maijan huauqui panicunahuanca ashtahuanmi apanacushun. Jesuspish maijan discipulocunahuanca ashtahuanmi apanacuj carca (Juan 13:23; 20:2). Pero apóstol Pedro nishca shinaca familia ucupi shina tucui huauqui panicunata cꞌuyashcata ricuchingapajmi esforzarina canchij (1 Pedro 2:17).

11. ¿Shujtajcunata shungumanta ashtahuan cꞌuyashcataca ima shinataj ricuchinchij?

¹¹ Pedroca “caishuj chaishuj shungumanta ashtahuan cꞌuyanacuichij” nircami. Shinashpaca huaquin huauqui panicunata cꞌuyashcata ricuchina mana jahualla cajpipish paicunata ashtahuan cꞌuyangapajmi esforzarina canchij. Por ejemplo, maijan huauqui o pani ñucanchijta llaquichijpica ¿imatataj ruranchijman? Tal vez paicunata cꞌuyashcata ricuchinapaj randica ñucanchijpishmi paicunata llaquichinata munashun. Pero chaita rurajpica Jehová Diosca mana cushicungachu. Jesusca chaitami Pedromanca yachachirca (Juan 18:​10, 11). Chaimi Pedroca, “mana allita rurajpipish ama mana allita rurashpa tigrachichijchu. Rimajpipish ama chashnallataj tigrachichijchu. Ashtahuanpish allicunata rurashpa tigrachichij” nishpa quillcarca (1 Pedro 3:9). Shinaca huauqui panicunata ashtahuan cꞌuyangapajmi esforzarina canchij. Chashnami ñucanchijta llaquichijpipish paicunata cꞌuyashpa catishun.

12. a) ¿Huauqui panicunata shungumanta cꞌuyashpaca imatataj rurashun? b) ¿Tandalla cashunchij nishca videopica imatataj yachanchij?

¹² Pedroca paipaj punta cartapipish huauqui panicunata shungumanta cꞌuyana cashcatami nirca. Chashna cꞌuyaita charishpaca asha juchacunata perdonangapaj randica, ‘achca juchacunata perdonangapajmi listos cashun’ (1 Pedro 4:8). 1 Pedro 4:​8-pi nishcata quillcacushpaca Jesús paiman imata yachachishcatami yuyarishcanga. Paica, Jesustaca ¿shujtajcunataca canchis cutincamachu perdonana canchij? nishpami tapushcarca. Pedroca shungumanta perdonaj cashcatami yuyashcanga. Pero Jesusca “77 cutincamami perdonana cangui” nishpami cutichirca. Chashna nishpaca huauqui panicuna mashna cutin pandarijpipish perdonanalla cashcatami yachachisha nirca. Ñucanchijpish chaita rurangapajmi esforzarina canchij (Mateo 18:​21, 22). Jesús yachachishcata pajtachinaca sinchi cajpipish esforzarishpami catina cangui. Juchayujcuna cashcamantami shujtajcunata perdonanaca huaquinpica sinchi can. Pero sinchi cajpipish huauqui panicunata perdonangapaj, paicunahuan alli tucungapajmi esforzarina canchij. c

13. ¿Huauqui panicunata animanaca ancianocunapajca imamantataj sinchi cai tucun?

¹³ Jesusca Pedrotaca, “ñuca ovejitacunata michingui” nishpami mandarca (Juan 21:16).  Pedroca Jesús nishcacunataca manataj cungarircachu. Canpish anciano cashpaca cai mandashcata pajtachingapajmi esforzarina cangui. Pero huauqui panicunata animangapaj tiempota llujchinaca huaquinpica sinchimi can. ¿Imamanta? Anciano huauquicunaca paicunapaj familiacuna imalla minishtishcacunata charichun, espiritualmente sinchi cachun, Jehová Diosta cushilla sirvichunmi esforzarincuna. Shinallataj predicangapaj, tandanacuicunapi, asambleacunapi alli yachachingapajmi esforzarincuna. Huaquin ancianocunacarin Comité de Enlace con los Hospitales, Departamento Local de Diseño y Construccionpimi ayudancuna. Shinaca anciano huauquicunaca achca ruraicunatami pajtachina can.

14. ¿Ancianocunaca alli michijcuna cangapajca imatataj rurana can? (1 Pedro 5:​1-4).

¹⁴ Pedroca ancianocunamanca “cancunaman mingashca Diospaj ovejacunata michichij” nircami (1 Pedro 5:​1-4-ta liyipai). Anciano huauquicunaca huauqui panicunataca achcatami cꞌuyancuna. Chaimantami paicunataca animasha nincuna. Shinapish ocupado cashcamanta o shaicushca cashcamantami huaquinpica chaita ruranaca sinchi can. ¿Ancianocunaca chashna sintirishpaca imatataj rurana can? Jehová Diosmanmi ima shina sintirishcata huillana can. Pedroca “shujtajcunata sirvijpish Dios cushca fuerzahuan sirvicuj shina sirvichun” nircami (1 Pedro 4:11). Maijan huauqui panicunaca sinchi llaquicunahuanmi chꞌimbapuracuncuna. Huaquin llaquicunaca paraíso chayajllapimi tucuringacuna. ¿Chashnapish ancianocunaca imatataj yuyarina can? “Jatun michij” Jesusmi ancianocunata yalli cai huauqui panicunataca cunan punllacunapi, shamuj punllacunapipish ayudai tucun. Pero Jehová Diosca anciano huauquicuna huauqui panicunata cꞌuyachun, paicunata animachun, alli ejemplota cuchunmi munan.

15. ¿Huauqui Williamca huauqui panicunataca ima shinataj animan? (Fotomantapish parlapai).

¹⁵ Williamca achca huatacunatami anciano shina sirvishca. Paica huauqui panicunata animana importante cashcatami yuyan. COVID-19 pandemia callarijpica, ¿paipish paipaj congregacionpi sirvij caishuj ancianocunapish imatataj rurarcacuna? Paicunaca cada semana cada grupopi caj huauqui panicunata animangapajmi esforzarircacuna. ¿Imamantataj chaitaca rurarcacuna? Williamca: “Achca huauqui panicunaca solollami paicunapaj huasicunapi pasarcacuna. Sololla cashcamantami rato desanimarinman  carcacuna” nircami. Huauqui panicuna problemacunata charijpica Williamca atencionhuanmi paicunataca uyan. Chashnami imamanta sustarishca cashcata, imata minishtishcata yachai tucun. Chai qꞌuipaca paicunata ima shina ayudanatami yuyan. Huaquinpica jw.org-pi llujshishca videocunatami paicunamanca ricuchin. Shinallataj Williamca: “Cai tucuri punllacunapi huauqui panicunata animanaca achca valishcami can. Testigo de Jehovacunaca tucui gentecuna Jehová Diosta rijsichunmi esforzarinchij. Pero ashtahuantajca Diospaj ovejitacunatami paimanta ama caruyachun ayudana canchij” nircami.

16. ¿Pedro quillcashca cartacunapi nishcacunataca ima shinataj pajtachi tucunchij?

¹⁶ Cai yachaipica Pedro quillcashca ishqui cartacunamantaca ashallatami yachashcanchij. ¿Caicunata yachacushpaca imapi mejoranata yuyashcanguichu? Por ejemplo, ¿paraisopi causana ima laya canata yuyangapaj tiempota surcusha ninguichu? Mana cashpaca ¿trabajopi, escuelapi, maipi cashpapish huillangapaj esforzarisha ninguichu? O tal vez, ¿huauqui panicunata shungumanta cꞌuyashcata ricuchingapaj imata ruranata yuyashcanguichu? ¿Anciano cashpaca huauqui panicunata cushicushpa animangapaj esforzarisha ninguichu? Ashata mejorana cashpaca mana desanimarinachu cangui. ‘Amito Jesús’ cꞌuyaj cashcamanta mejorashpa catichun ayudasha nishcatami yuyarina cangui (1 Pedro 2:3). Shinallataj Pedroca, Diosca “cancunataca tucuipi alli cajta ruranga. Paimi cancunataca sinchiyachinga. Paimi cancunataca ayudanga. Sinchi cimiento jahuapimi cancunataca churanga” nircami (1 Pedro 5:10).

17. ¿Diospaj yachachishcacunata pajtachingapaj esforzarishpaca ima bendicioncunatataj chasquishun?

¹⁷ Pedroca shuj cutinca Jesusta sirvij canataca mana mericinichu nircami (Lucas 5:8). Pero Jehová Diospish Jesuspish ama chashna yuyachunmi paitaca ayudarcacuna. Chaimantami Pedroca Jesustaca tucui shunguhuan sirvirca. Chaita rurashcamantami paica ‘Jesucristopaj mana tucurij Gobiernopi yaicuna jatun bendicionta chasquirca’ (2 Pedro 1:11). Chai premioca achca valishcami can. Canpish Pedro shina Jehová Diosta sirvishpa catingapajmi esforzarina cangui. Shinallataj Jehová Dios canman yachachishpa catichunmi saquina cangui. Chaita rurashpaca huiñai huiñaita causana premiotami chasquingui. Shinallataj cambaj “feta ricuchishcamantami cushicushpa quishpiringui” (1 Pedro 1:9).