1. ¿Jesús shuj milagrota rurajpica Pedroca imatataj nirca?

 PEDROCA tucui tuta trabajashca cashpapish shuj pescadollatapish mana japishcachu carca. Chashnapish Jesusca: “Barcota hondo yacuman apashpa, pescadocunata japingapaj chaipi mallata shitaichij” nircami (Lucas 5:4). Pedroca pescadocunata japinataca mana yuyarcachu. Pero Jesusta cazushcamantami achca pescadocunata japircacuna. Yallitaj pescadocuna jundajpimi mallaca lliquiri callarirca. Jesús shuj milagrota rurashcata cuentata cushpaca Pedropish, paihuan cajcunapish achcatami mancharircacuna. Chaimi Pedroca Jesustaca: “Amito, ñucamanta anchuri, ñucaca yallitaj juchayujmi cani” nirca (Lucas 5:​6-9). Pedroca juchayuj cashcamanta Jesuspaj ñaupajpi mana cai tucushcatami yuyashcanga. Chaimantami chaita nirca.

2. ¿Pedromantaca imamantataj yachana canchij?

² Pedroca juchayujmi carca. Chaimantami Bibliapi nishca shinaca huaquinpica paipaj rurashcacunahuan, rimashcacunahuan pandarij carca. Canpish Pedro shina ¿imapi pandarishcanguichu? Mana cashpaca ¿mana alli yuyaicunata, munaicunata mishangapaj esforzaricunguichu? Pedropaj ejemplomi cantaca animai tucun. Chaimi Jehová Diosca Pedromanta yachachun paipaj pandarishcacunamanta Bibliapi quillcachirca (2 Timoteo 3:​16, 17). Pedro ñucanchij shina pandarij cashcata Bibliapi liyishpaca Jehová Dios siempre imapi mana pandarichun mana shuyashcatami intindinchij. Paica ñucanchijcuna juchayujcuna cajpipish mana alli munaicunata, yuyaicunata mishangapaj esforzarishpa catichunmi munan.

3. ¿Pandarishpapish imamantataj esforzarishpa catina canchij?

³ ¿Mana alli munaicunata, yuyaicunata mishangapajca imamantataj esforzarishpa catina canchij? Caipi yuyashun. Imata alli ruranata yachangapajca achca esfuerzomi minishtirin ¿nachu? Por ejemplo, guitarrata tocanata yachangapajca achca  huatacunatami practicana canchij. Tocanata yachacushpaca achca cutincunami pandarishun. Pero esforzarishpa catishpaca allimi tocanata yachashun. Guitarrata alli tocajcuna cashpapish huaquinpica pandarishunmi. Pero pandarishpapish guitarrata tocashpami catishun. ¿Caimantaca imatataj yachanchij? Tal vez shuj mana alli munaita mishashcatami yuyanchij. Pero juchayujcuna cashcamantami cutin chaillapitaj urmai tucunchij. Chashnapish ñaupajman catingapajmi esforzarishpa catina canchij. Tucuicunami ñucanchij ruraicunahuan, rimaicunahuan maipica pandarinchij. Pero ñaupajmanmi catina canchij. Jehovami ñucanchij yuyaita cambiashpa catichun ayudanga (1 Pedro 5:10). Pedro ñaupajman catingapaj ima shina esforzarishcatami cunanca yachagrinchij. Pai pandarijpipish Jesusca llaquishpami perdonarca. Caita yachashpami ñucanchijpish pandarishpaca Jehová Diosta sirvishpa catingapaj animarishun.

4. a) ¿Pedroca ima laya runa cashcatataj yuyarca? b) ¿Jesusca Pedrota cꞌuyashcataca ima shinataj ricuchirca? (Lucas 5:​5-10).

⁴ Bibliapica imamanta Pedro yallitaj juchayujmi cani nishcataca mana ninchu (Lucas 5:​5-10-ta liyipai). Pero Pedroca jatun juchacunapi urmashcamantachari chashna nishcanga. Jesusca Pedro manchaihuan cashcatami cuentata curca. Tal vez paica imapaj mana valij cashcatami yuyashcanga. Pero pai chashna yuyajpipish Jesusca Jehová Diosta tucui shunguhuan sirvi tucushcatami yacharca. Chaimantami cꞌuyaihuan paitaca ama manchaichu nirca. Pedroca Jesús cꞌuyaihuan paita tratashcataca manataj cungarircachu. Chaimantami tiempohuanca paipish, paipaj huauqui Andrespish paicunapaj negociota saquishpa Jesusta catij tucurcacuna. Chaita rurashcamantami paicunaca achca bendicioncunata chasquircacuna (Marcos 1:​16-18).

5. ¿Pedroca Jesusta catij tucushcamantaca ima bendicioncunallatataj chasquirca?

⁵ Pedroca Jesusta catij tucushcamantaca achca bendicioncunatami chasquirca. Por ejemplo, Jesús ungushcacunata jambijta, demoniocunata llujshichijta, huañushcacunata causachijtami ricurca (Mateo 8:​14-17; Marcos 5:​37, 41, 42). b Shinallataj Pedroca muscuipi shinami Jesús jahua pachapi ima shina mandanata ricurca. Chaitaca manataj cungarishcangachu (Marcos 9:​1-8; 2 Pedro 1:​16-18). Shinaca Pedroca mana yuyashca bendicioncunatami chasquirca. Pero Pedroca imapaj mana valishcata ama yuyangapajmi esforzarishpa catirca.  Chaita mana rurashca cashpaca bendicioncunataca mana chasquinmanchu carca.

6. ¿Pedroca ratochu paipaj mana alli munaicunata, yuyaicunata mishai tucurca?

⁶ Pedroca bendicioncunata chasquishpapish pandarishpami catirca. Por ejemplo, Jesús ‘profeciacuna pajtarichun achcata sufrishpami huañuna cani’ nijpica Pedroca Jesustaca sinchitami rimarca (Marcos 8:​31-33). Shinallataj Pedroca caishuj apostolcunahuanmi paicunapuramanta maijan ashtahuan jatun cashcata rimanacujcuna carca (Marcos 9:​33, 34). Jesús ñalla huañugrijpipish Pedroca shuj runapaj rinrintami pꞌitirca (Juan 18:10). Chai tutallatajmi manchaita charishcamanta quimsa cutin ‘Jesustaca mana rijsinichu’ nirca (Marcos 14:​66-72). Jesusta negashcamantami Pedroca yallitaj llaquirishpa huacaillata huacarca (Mateo 26:75).

7. ¿Jesusca causarishca qꞌuipaca Pedromanca ima oportunidadtataj curca?

⁷ Pedroca pandarishcamantami dimastij llaquilla carca. Pero pai pandarijpipish Jesusca paipimi confiashpa catirca. Chaimantami Pedromanca paita mashnata cꞌuyashcata nichun oportunidadta curca. ‘Ñuca ovejitacunata michingui’ nishpapishmi animarca (Juan 21:​15-17). Chaita uyashpaca Pedroca cushillami sintirirca. Chaimantami Pentecostés punllapica Jerusalenman rirca. Chaipimi espíritu santota chasquishpa jahua pachaman ringapaj agllashca carca.

8. ¿Pedroca Antioquiapi cashpaca ima shinataj pandarirca?

⁸ Pedroca ungido cashpapish pandarishpami catirca. Huata 36-pica Pedroca mana judío caj Cornelio runa espíritu santota chasquishcatami ricurca. Chaita ricushpami Pedroca Jehová Dios tucui gentecunata chasquishcata, mana judiocunapish congregacionpi cai tucushcata intindirca (Hechos 10:​34, 44, 45). Pedroca mana judiocunahuanca mana micujchu carca. Pero Jehová Dios Cornelioman espíritu santota cujta ricushpaca mana judiocunahuanmi micui callarirca (Gálatas 2:12). Shinapish maijancunaca ‘judiocunaca mana judiocunahuanca mana micunachu can’ nishpami yuyajcuna carca. Paicuna Antioquiaman rijpica paicunata ama pꞌiñachingapajmi Pedroca mana judío huauqui panicunahuanca mana micusha nirca. Chaita ricushpaca Pabloca Pedrotaca tucuicunapaj ñaupajpimi cunarca (Gálatas 2:​13, 14). ¿Pedroca pandarishpapish ñaupajman catingapajca imatataj rurarca?

9. Juan 6:​68, 69-pi nishca shinaca ¿Pedroca Jesusta cꞌuyashcataca ima shinataj ricuchirca?

⁹ Pedroca Jehová Diostami tucui shunguhuan cꞌuyarca. Chaimantami pandarishpapish Diosmantaca manataj caruyarca. Por ejemplo, Jesús yachachishcacunata discipulocuna mana intindijpi Pedro imata rurashcata ricushun (Juan 6:​68, 69-ta liyipai). Achcacuna Jesús yachachishcacunata mana intindishpaca chaicuna imata nisha nishcata tapunapaj randica Jesusmantami caruyarcacuna. Pero Pedroca chaitaca mana rurarcachu. Paica tucuicunapaj ñaupajpimi Jesustaca “canllami huiñai causaita cuj shimicunataca yachachingui” nirca.

10. ¿Jesusca Pedropi confiashcataca ima shinataj ricuchirca? (Fotomantapish parlapai).

¹⁰ Jesusca Pedromantaca manataj caruyarcachu. Paita prezu japi horas Pedropish, caishuj discipulocunapish paita saquinatami yacharca. Pero Pedro paita cꞌuyashpa catinatami seguro carca (Lucas 22:​31, 32). Jesusca runacuna allita ruranata munashpapish ‘aichaca shaicurijlla’ cashcatami yacharca (Marcos 14:38). Caita yachashcamantami Jesusca Pedro paita negajpipish paipi confiashpa catirca. Chaimantami causarishca qꞌuipaca shuj cutinca Pedrollaman ricurishca yuyachin (Marcos 16:7; Lucas 24:34; 1 Corintios 15:5). Chaita rurashpami Jesusca Pedrotaca achcata animarca.

11. ¿Jesusca Jehová Dios Pedrota cuidanata ricuchingapajca imatataj rurarca?

 ¹¹ Jesusca Pedrotaca, ‘Jehová Diosca cantaca cuidashpami catinga’ nishpami animarca. Shinallataj ña causarishca qꞌuipaca Jesusca shuj milagrota rurashpami Pedrota caishuj apostolcunatapish achca pescadocunata japichun ayudarca (Juan 21:​4-6). Chai milagrota ricushpami Pedroca Jehová Dios paiman tucui imalla minishtishcacunata cunata seguro carca. Shinallataj chai milagrota ricushpami Pedroca Mateo 6:​33-pi Jesús imata nishcata yuyarishcanga. Chaipica Jesusca Diospaj Gobiernota punta lugarpi churashpa catichunmi discipulocunata animarca. Chaita yuyaipi charishpami Pedroca pescadocunata japinallapi ocuparinapaj randica Diospajta ruranapi ashtahuan ocuparirca. Huata 33 Pentecostés fiestapica achca gentecunamanmi tucui shunguhuan huillarca. Chashnami achca gentecunata alli huillaicunata chasquichun ayudarca (Hechos 2:​14, 37-41). Chai qꞌuipaca samaritanocunata, mana judiocunatapish Jesusta catij tucuchunmi ayudarca (Hechos 8:​14-17; 10:​44-48). Caipi ricushca shinaca Pedroca Jehová Diospaj ayudahuanmi tucui laya gentecunata Diospajman cꞌuchuyachun ayudarca.

12. ¿Mana alli munaicunata mishangapaj achca huatacunata esforzaricushca cashpaca imamantataj Pedropaj ejemplota yuyarina canchij?

¹² Jehová Diosca ñucanchijtapishmi mana alli munaicunata, yuyaicunata mishashpa catichun ayudai tucun. Mana alli munaicunata mishangapaj achca huatacunata esforzarishca cashpaca chaita rurashpa catinaca sinchimi cai tucun. Huaquinpicarin Pedrota yalli mana alli munaicunata charishcatami yuyai tucunchij. Pero Jehová Diosmi ñaupajman catichun fuerzasta cushpa ayudanga (Salmo 94:​17-19). Por ejemplo, shuj huauquica Jehová Diosta manaraj rijsishpaca achca huatacunatami shujtaj cꞌaricunahuan huainayashpa causarca. Paica chai mapa ruraicunata ña saquishca cashpapish huaquinpica mana alli yuyaicunatami charij carca. ¿Pero ñaupajman catingapajca imatataj rurashca? Cai huauquica: “Jehovami ñucamanca fuerzasta cushpa ayudan. Pai espíritu santota cujpimi pai munashca shina causai tucushcani. Ñuca juchayuj cajpipish fuerzasta cunataca manataj saquishcachu” nircami.

13. ¿Pedropaj ejemplotaca ima shinataj cati tucunchij? (Hechos 4:​13, 29, 31; fotomantapish parlapai).

¹³ Pedroca shujtajcunata manchashcamantami huaquinpica pandarirca. Pero pandarishca  cashpapish Jehová Diospaj ayudahuanmi imata mana manchashpa paita sirvishpa catirca (Hechos 4:​13, 29, 31-ta liyipai). Ñucanchijpish Jehová Diospaj ayudahuanmi imata mana manchajcuna cashun. Alemaniapi causaj Horst shuti huauquimanta parlashun. Pai huahuaraj cajpica gentecunaca “Hitler runami ñucanchijta quishpichij” nishpami saludanacujcuna carca. Chaimi Horstca paipaj profesorcunata, compañerocunata manchashcamanta huaquinpica chaita nishpa saludaj carca. Pero paipaj yaya mamaca paita sinchita rimanapaj randica paihuanmi Jehová Diostaca ‘manchaita ama charingapaj ayudahuai’ nishpa mañarcacuna. Jehová Diospaj y paipaj yaya mamapaj ayudahuanmi Horstca Jehová Diosllata cazungapaj fuerzasta charirca. Paica: “Jehová Diosca ñucataca manataj saquircachu” nircami. c

14. ¿Ancianocunaca llaquilla cajcunataca ima shinataj ayudai tucun?

¹⁴ Ñucanchijcuna pandarijpipish Jehová Diospish, Jesuspish ñucanchijpimi confiashpa catingacuna. Pedropi yuyashun. Quimsa cutin Jesusta negashca qꞌuipaca Pedroca Jehová Diosmanta caruyanata, o Jesusta catishpa catinatami decidina carca. Jesusca manaraj huañushpaca Pedrotaca: ‘Cambaj crishca ama chiriyachunmi ñucaca Diosta rogarishpa mañashcani. Cambaj huauquicunata sinchiyachingui’ nishcami carca (Lucas 22:​31, 32). Pedroca Jesuspaj shimicunata yuyarishpami achcata animarishcanga. Ñucanchijpish huaquinpica sinchi decisioncunatami japina canchij. Pero chai ratoca Jehová Diosca ancianocunata utilizashpami paimanta ama caruyachun ayudanga (Efesios 4:​8, 11). Por ejemplo, Paulca achca huauqui panicuna Jehová Diospaj ayudahuan llaquicunata charishpapish ñaupajman catishcatami ricushca. Paulca achca huatacunatami  congregacionpica anciano shina sirvishca. Paica huauqui panicunata animangapajmi esforzarin. Chaimi huauqui panicuna Jehová Diosta ña mana sirvi tucushcata yuyajpica, paica Jehová Dios paicunata cꞌuyashcamanta paipaj puebloman pushamushcata yuyachin. Shinallataj paicuna pandarishca cajpipish Jehová Dios paicunapi confiashpa catishcata yuyachunmi animan.

15. Mateo 6:​33-pi nishca shimicunaca Pedropipish huauqui Horstpipish ¿ima shinataj pajtarirca?

¹⁵ Jehová Diosca Pedroman, caishuj apostolcunamanpishmi imalla minishtishcacunata cushpa ayudarca. Jehová Diospaj Gobiernota punta lugarpi churajpica paica ñucanchijmanpishmi imalla minishtishcacunata cunga (Mateo 6:33). Horst shuti huauquimanta parlashpa catishun. Segunda Guerra Mundial tucurishca qꞌuipaca paica precursor tucunatami yuyacurca. Pero paica: “Pobrellami cani. Precursor shinaca mana sirvi tucushachu” nishpami preocuparirca. Chashna yuyacushpapish cai huauquica huauqui superintendente paipaj congregacionta visitanaman shamujpica tucui semanami huillanaman llujshirca. Semana tucurijpica huauqui superintendenteca paimanca shuj sobrepimi cullquita curca. Pero pi chai cullquita paiman cushcataca mana huillarcachu. Horstca chai cullquihuanca huaquin quillacunata precursor shina sirvingapajmi suficienteta charirca. Horstca Jehová Dios paita ayudacushcatami cuentata curca. Chaimantami paica tucui vida Jehová Diosta punta lugarpi churanata decidirca (Malaquías 3:10).

16. ¿Pedropaj ejemplomanta, pai quillcashca cartacunamantaca imamantataj yachana canchij?

¹⁶ Ñucamanta anchuri Pedro nijpipish Jesusca paimantaca mana anchurircachu. Chaimantami Pedroca cushilla carca. Jesusca alli apóstol cachun, huauqui panicunata ayudachunmi Pedromanca yachachishpa catirca. Pedroman Jesús imalla yachachishcacunamantaca achcatami yachai tucunchij. Pedroca ishqui cartacunapimi Jesuspaj yachachishcacunamanta, shujtaj yuyaicunamantapish parlarca. Catij yachaipimi Pedro quillcashca cartacunamanta imata yachai tucushcata yachashun.