1, 2. Eclesiastés 11:6-pi nishca shinaca ¿ima shinataj huillana canchij?

HUAQUIN llajtacunapica gentecunaca Diosmanta uyanatami munancuna. Cutin shujtaj llajtacunapica Diosmanta Bibliamantaca mana tanto uyanata munancunachu. Pero gentecuna uyasha nijpipish mana uyasha nijpipish Jehová Diosca predicashpa catichunmi munan. Chaimantami caicamalla huillaichij ningacama huillashpa catina canchij.

² Jehová Dios caicamalla huillaichij nishca “qꞌuipami cai shina causaica tucuringa” (Mateo 24:14, 36). Chai punlla chayangacamaca Eclesiastés 11:6-pi nishca shinami mana shaicushpa huillashpa catina canchij. ¿Huillashpa catingapajca imatataj rurana canchij? (Eclesiastés 11:6-ta liyipai).

3. ¿Cai yachaipica imatataj yachashun?

³ Pasaj yachaipica alli predicajcuna cangapajmi chuscu yuyaicunata yacharcanchij (Mateo 4:19). Cai yachaipica ima llaquicuna ricurijpipish mana shaicushpa huillashpa catingapajmi quimsa yuyaicunamanta yachashun. Puntapica predicana yuyailla canamanta, ishquipica pacienciata charinamanta, quimsapica sinchi feta charinamantami yachashun.

4. ¿Imamantataj predicana yuyailla causana canchij?

⁴ Jesusca Noepaj punllacunapi ima shinami gentecunaca micunallapi, ubyanallapi, cazaranallapi yuyarcacuna chashnallatajmi tucuri punllacunapica gentecunaca causanga nircami (Mateo 24:37-39; 2 Pedro 2:5). Jesuspaj discipulocunapish chaicunallapi yuyashpaca predicanatami saqui tucunman carca. Chaimantami Jesusca: “Chaparacuichij” nirca (Mateo  24:42). Ñucanchijpish Jehová Diospaj obrata pajtachina yuyaillami causana canchij.

5. Hechos 1:6 al 8-pi nishca shinaca ¿maicamataj huillana canchij?

⁵ Cunan punllacunapish Diospaj Gobiernomanta huillanapimi ocuparishpa causana canchij. Jesusca ñuca huañushca qꞌuipapish huillanaca mirarishpami catinga nircami (Juan 14:12). Pero Jesús huañushca huashaca paipaj discipulocunaca cutinmi pescanaman tigrarcacuna. Chaimi Jesús causarishca qꞌuipaca paipaj discipulocunataca achca pescadocunata japichun ayudarca. Chai huashaca tucui ruraicunamanta yalli predicana importante cashcatami intindichirca (Juan 21:15-17). Shinallataj Jesusca manaraj cieloman rishpaca paipaj discipulocunamanca: ‘Ñuca huillai callarishcataca tucui llajtacunapimi huillana canguichij’ nircami (Hechos 1:6-8-ta liyipai). Huaquin huatacuna qꞌuipaca Jesusca apóstol Juanmanca shuj muscuipimi paipaj punlla ima shina canata ricuchirca. * Apóstol Juanca angelcuna tucui laya gentecunaman huillachun pushacujtami ricurca (Apocalipsis 1:10; 14:6). Jehová Diosca alli huillaicunata muyundij Allpapi ultimocama predicachunmi munan.

6. ¿Predicana yuyailla causangapajca imatataj rurana canchij?

⁶ Predicana yuyailla causangapajca Jehová Dios ima shina ayudacushcatami yuyarina canchij. Por ejemplo, achca publicacioncunatami charinchij. Jw.org paginapica achca publicacioncunata, huaquin grabacioncunata, videocunata, JW Broadcasting programatami ricui tucunchij. Tucui caicunataca mil yalli shimicunapimi ricui tucunchij (Mateo 24:45-47). Cai mundopi causaj gentecunaca politicamanta, religionmanta, cullquimantami paicunapura chꞌicanyanacushpa causancuna.  Pero Diosta sirvijcunaca 8 millón yalli cashpapish shuj familia shina tandallami causanchij. Shinallataj viernes 19 de abril de 2019 huatapica testigo de Jehovacunaca muyundij Allpapimi cada punllapaj versota analizangapaj shuj videota ricurcanchij. Chai tutataca 20.919.041 gentecunami Jesús huañushcata yuyaringapaj tandanacurcanchij. ¿Achcacuna tandanacushcamantaca manachu cushilla sintirinchij? Caicunamanta yuyashpaca Diospaj Gobiernomantami huillashpa catisha ninchij.

7. ¿Huillangapajca imamantataj Jesuspaj ejemplota catina canchij?

⁷ Huillashpa catingapajca Jesuspaj ejemplotami catina canchij. Jesusca tucui tiempopimi predicana yuyailla causarca (Juan 18:37). Diablo tucui cai pachapi tiyaj mandanacunata cusha nijpi, gentecunapish paita reyta rurasha nijpica Jesusca mana chasquircachu (Mateo 4:8, 9; Juan 6:15). Jesusca cai mundopi tiyaj cosascunataca mana munarcachu. Shinallataj jarcaicuna ricurijpipish huillashpami catirca (Lucas 9:58; Juan 8:59). Apóstol Pabloca Jesuspaj ejemplota catishpa cancunapish ama shaicunguichijchu nircami. Ñucanchijpish pruebacuna ricurijpi huillashpa catingapajmi apóstol Pablo nishcata catina canchij (Hebreos 12:3).

8. a) ¿Pacienciata charijcunaca ima shinataj can? b) ¿Cuna punllacunapica pacienciata charinaca imamantataj minishtirishca can?

⁸ Pacienciata charij gentecunaca mana alli cosascuna tucurichun, paicuna shuyashcacuna pajtarichunca tranquilosmi shuyancuna. Profeta Habacucca Judá llajtapi mana alli cosascuna tucurichunmi shuyarca (Habacuc 1:2). Jesuspaj discipulocunapish romanocunapaj maquimanta quishpichichunmi shuyacurcacuna. Chaimantami Taita Diosca cunantajmari ña mandai callarigrin nishpa yuyarcacuna (Lucas 19:11). Ñucanchijpish Diospaj Gobierno tucui mana allicunata tucuchishpa cai Allpata mushuj paraisota rurachunmi shuyacunchij (2 Pedro 3:13). Pai agllashca punllapi tucui llaquicunata tucuchingacamami pacienciahuan shuyana canchij. Jehová Diospaj ejemplota catishpa, ima shina pacienciata charinata ricushun.

9. ¿Jehová Diosca pacienciata charishcataca ima shinataj ricuchirca?

⁹ Jehová Diosca pacienciata charij Diosmi can. Paica pacienciata charishcamantami Noetaca achca tiempopi arcata rurachun paimantapish predicachun saquirca (2 Pedro 2:5, NWT; 1 Pedro 3:20). Sodoma Gomorra llajtacunata Jehová Dios tucuchisha nijpimi Abrahamca mana de acuerdo carca. Chaimi Jehová Diosca Abrahamtaca pacienciahuan uyarca (Génesis 18:20-33). Jehová Diosca achca huatacunatami israelcunamanpish pacienciata ricuchirca (Nehemías 9:30, 31). Cunan punllacunapipish gentecuna arrepintirishpa paipaj amigocuna tucuchunmi pacienciahuan shuyacun (Juan 6:44; 1 Timoteo 2:3, 4; 2 Pedro 3:9). Shinallataj ñucanchijpish gentecunaman predicashpa yachachishpa catingapajca Jehová Dios shinami pacienciata charina canchij. Ñucanchijpish pacienciata charichunca paipaj shimipimi shuj alli ejemplota churashca. Chai ejemplomanta yachashun.

10. Santiago 5:7, 8-pi ricushca shinaca ¿tarpuj runamantaca imatataj yachanchij?

¹⁰ (Santiago 5:7, 8-ta liyipai). Pacienciata charingapajca shuj tarpuj runapaj ejemplomanta yachashun. Huaquin granocunaca ratomi pꞌucun. Cutin shujtaj granocunaca mana utca pꞌucunchu. Por ejemplo, Israel llajtapica granocunaca 6 quillacunapimi pꞌucuj  carca. Granota tarpuj runaca tamya callarishca huashami casi octubre chaupi quillapi tarpuj carca. Cutin chai tarpuj runaca tamya ña tucurigrijpimi abril chaupi quillapi granocunataca cosechaj carca (Marcos 4:28). Tarpuj runaca granota tarpushca horasmanta grano pꞌucungacamami pacienciata charin. Ñucanchijpish chashnallatajmi pacienciata charina canchij. Pero maipica pacienciata charinaca ñucanchijpajca sinchichari ricuringa.

11. ¿Huillacushpaca imamantataj pacienciata charina canchij?

¹¹ Juchayujcuna cashcamantami Bibliamanta yachacujcuna Diosta rato sirvichun munanchij. Cutin tarpuj runapi yuyashun. Paica granota tarpungapajca puntaca allpatami alajata rahuan chai huashaca granotami tarpun. Tarpushca huasha planta huiñajpica mana alli qꞌuihuacunatami anchuchin. Yacutapishmi churan. Chashna pacienciahuan cuidajpimi granocunaca alajata pꞌucunga. Gentecuna Jesuspaj discipulocuna tucuchunca ñucanchijpish pacienciatami ricuchina canchij. Gentecunaca Diosmanta yachangapajca tiempota, pacienciatami minishtincuna. Chaimanta gentecuna mana uyasha nijpica mana desanimarinachu canchij. Huaquincunaca Bibliataca allimi estudiancuna. Pero paicuna sinchi feta charichunca mana obliganachu canchij. Jesuspaj discipulocunapish Jesús yachachishcata alli intindingapajca tiempotami minishtirca (Juan 14:9). Ñucanchijca gentecunaman yachachishpapish paicunapaj fetaca mana sinchiyachi tucunchijchu. Ashtahuanpish Jehová Dioslla paicunapaj feta sinchiyachi tucushcataca mana cungarinachu canchij (1 Corintios 3:6).

12. ¿Ñucanchij familiacunaman huillacushpaca pacienciata charishcataca ima shinataj ricuchinchij?

¹² Mana testigo familiacunaman predicanami huaquinpica pacienciata charinaca  sinchi can. Chaimi Eclesiastés 3:1, 7-pi ima nishcata yuyarina canchij. Chaipica: ‘Upalla cangapajpish, rimangapajpish punllami chayan’ ninmi. Ñucanchij alli comportarijta ricushpaca ñucanchij familiacunaca Bibliamantachari yachasha ningacuna. Chaimi Jehová Diosmanta yachachingapajca listos cana canchij (1 Pedro 3:1, 2). Cushillami predicana, yachachina canchij. Pero ñucanchij familiaman shujtajcunamanpish pacienciahuan yachachingapajmi esforzarina canchij.

13, 14. ¿Pacienciata charingapajca picunapaj ejemplotataj catina canchij?

¹³ Ñucanchijpish ñaupa tiempopi Diosta sirvijcunapaj pacienciamanta, cunan punllacunapi Diosta sirvijcunapaj pacienciamantami yachai tucunchij. Habacucca tucui mana allicuna tucurichunmi munarca. Pero shuyana cashcatami yacharca. Paica: “Chapachun ñucata churashcapimi shayacusha” nircami (Habacuc 2:1). Apóstol Pabloca alli huillaita huillanatami tucuchisha nirca. Paica tucuchinata munashpapish pacienciahuanmi huillashpa catirca (Hechos 20:24).

¹⁴ Shuj cusa huarmica Galaad Escuelamanta graduarishpami shujtaj llajtapi sirvinaman rircacuna. Paicuna sirvinaman rishca llajtapica la mayoría gentecunaca Jesuspica mana crijcunachu carca. Chaimi huaquincunalla Bibliamantaca yachanata munarcacuna. Pero gentecuna mana uyasha nijpipish paicunaca pacienciahuanmi huillashpa catircacuna. Cutin paicunahuan graduarishca huauqui panicunaca paicuna huillacun llajtapi achca gentecunata bautizarichun ayudashcatami huillajcuna carca. Shinapish chai cusa huarmi 8 huatacunata Bibliamanta huillashca qꞌuipami paicunahuan Bibliamanta yachacujca bautizarirca. Ñaupa tiempopi Diosta sirvijcuna shinami cai cusa huarmipish mana shaicushpa huillashpa catircacuna. Chaimantami Jehová Diosca paicunata bendiciarca. Ñucanchijpish Dios cusha nishcata japijcunapaj ejemplota catishunchij (Hebreos 6:10-12).

15. ¿Biblia yachachishcacunapi crishpaca imamantataj ashtahuan predicanata munanchij?

¹⁵ Bibliapi yachachishcacuna verdadtaj cashcatami tucui shunguhuan crinchij. Chaimantami cai yachachishcacunata gentecunapish yachachun munanchij. Shinallataj Dios cusha nishcacunapimi tucui shunguhuan confianchij (Salmo 119:42; Isaías 40:8). Cunan punllacunapipish huaquin profeciacuna pajtarishcatami ricushcanchij. Shinallataj gentecunapish Bibliamanta yachashpa paicunapaj causaipi huaquin cambiocunata rurashcatami ricushcanchij. Tucui caicunata ricushpami muyundij Allpapi gentecuna Diospaj Gobiernomanta yachanata minishtishcata intindinchij.

16. a) Salmo 46:1 al 3-pi nishca shinaca ¿Jehová Diospi confiashpaca imamantataj ashtahuan predicanata munanchij? b) ¿Jesuspi feta churashpaca imamantataj predicasha ninchij?

¹⁶ Jehová Diospi confiashcamantapishmi huillashpa catinchij. Jesustapish paipaj Gobiernopi mandachun Dios churashcata intindishpami huillashpa catinchij (Juan 14:1). Llaquicuna ricurijpipish Jehovami ñucanchij paca tucuna can. Paimi fuerzatapish cun (Salmo 46:1-3-ta liyipai). Jehová Dios paipaj Churiman poderta cushcamanta Jesús ñucanchijta huillachun pushacushcatami tucui shunguhuan crinchij (Mateo 28:18-20).

17. ¿Imamantataj huillashpa catina canchij? Shuj ejemplomanta parlai.

¹⁷ Feta charishcamantami ñucanchij esfuerzocunata Jehová Dios bendicianataca tucui shunguhuan crinchij. Maipica mana yuyashcapimi bendicianga (Eclesiastés 11:6). Por  ejemplo, ñucanchij carritocunahuan huillacujpica achca gentecunami ricushpa pasancuna. ¿Cashna huillanaca allichu can? Cashna huillanaca allimi can. Nuestro Ministerio del Reino de noviembre de 2014-pimi universidadta estudiaj shuj huarmimanta parlarca. Paica testigo de Jehovacunamantami escribisha nirca. Testigocunapaj informacionta mashcacushpapish tandanacuna huasitaca mana tarircachu. Pero universidad cꞌuchullapi shuj mezapi publicacioncunahuan huillacujcunahuanmi tuparca. Chashnami testigo de Jehovacunapaj informacionta japirca. Asha tiempo qꞌuipami bautizarirca. Cunancarin precursora regularmi can. Caicunata ricushpami gentecuna Diosmanta yachasha nishcata intindinchij. Chaimantami huillashpa catisha ninchij.

18. ¿Predicana Dios agllashca horaspi tucurinataca imamantataj seguros canchij?

¹⁸ Dios agllashca punllapimi Diospaj Reinomanta huillanataca saquishun. Noepaj punllacunapi ima tucushcata yuyashun. Jehová Diosca 120 huatacuna faltajpimi juillu tamyahuan mana alli gentecunata tucuchinata ña decidirca. Achca huatacuna qꞌuipaca Jehová Diosca Noetaca shuj arcata rurachun gentecunata advertichunmi mandarca. Casi 40 o 50 huatacunatami mana shaicushpa trabajarca. Shinallataj Noeca gentecuna mana uyasha nijpipish huillashpami catirca. Jehová Dios animalcunata arcapi yaicuchichun mandangacamami predicarca. Chaimi Jehová Diosca pai agllashca horaspi punguta huichcarca. Noepaj punllapi shinallatajmi paipaj munaitaca pai agllashca horaspi pajtachinga (Génesis 6:3; 7:1, 2, 16).

19. ¿Mana shaicushpa huillajpica Jehová Diosca ima shinataj bendicianga?

¹⁹ Ñallami Jehová Diosca caicamalla huillaichij ninga. Shinallataj Diablota paipaj ruraicunata tucuchishpami Yayitu Jehová Diosca cai Allpamanca mushuj causaita apamunga. Cai Allpapica Yaya Diosta cazuj gentecunallami causanga. Chai punlla chayamungacamaca Noepaj, Habacucpaj, caishujcunapaj ejemplota catishpa huillanapi ocuparishunchij. Paciente cangapajpish esforzarishunchij. Dios cusha nishcapipish shunguta churashunchij.