Eclesiastés 5:8-pica: “Maijan llajtapica huajchacunata llaquichicujta, cashcata ruranapaj randica, llaquita ruracujta ricushpaca ama mancharinguichu. Shuj mandajtaca paita yalli caj mandajmi ricucun. Chai mandajcunatapish ashtahuan jatun mandajmi ricucun” ninmi.

Cai versota liyishpaca cai allpapi tiyaj gobiernocunallamantami parlan nishpami yuyai tucunchij. Pero cai versopica Jehová Diosmantapishmi parlan. Caita yachashpami animarishpa tranquilo sintirinchij.

Eclesiastés 5:8-pica pobrecunata llaquichij mandajmantami parlan. Chai mandajca paita yalli autoridadta charij mandaj ricucujtami yuyarina can. Chai mandajcunatapish ashtahuan jatun mandajcunami ricucuncuna. Chashna cashpapish maipica cai tucui mandajcunaca gentecunatami llaquichincuna. Paicunapaj culpamantami gentecunaca sufrincuna.

Pero gobiernocuna ñucanchijta llaquichijpipish cai mandajcunata Jehová Dios ricucujtami yachanchij. Chaimantami ñucanchij llaquicunataca Yayitu Diosta mañashpa paiman mingai tucunchij (Salmo 55:22; Filipenses 4:6, 7). Jehová Diosca “tucui shunguhuan paita cazujcunapaj allita rurashpa, tucuita rurai tucuj cashcata ricuchingapajmi, tucui cai pachata ricuracun”. Caita yachashpami cushilla, tranquilo sintirinchij (2 Crónicas 16:9).

Eclesiastés 5:8-pica huaquin mandajcuna autoridadta charijpipish siempre paicunata yalli autoridadta charij mandajcuna tiyajtami yachanchij. Ashtahuancarin cai versopica Jehová Dios tucui cai pachapi mandajcunata yalli autoridadta charijtami intindinchij. Cunan punllacunapica Jehová Diosca paipaj Gobiernopi mandachunmi paipaj Churita churashca. Tucui poderta charij Jehová Diosca tucuitami ricucun. Jehová Diospish, paipaj Churi Jesuspish cashcata rurajcunami can.