1, 2. 1 Timoteo 6:20-pi nishca shinaca ¿Timoteoca imatataj rurana carca?

HUAQUINPICA ima valishca cosascunata charishpaca shuj rijsishcamanmi pai cuidachun minganchij. Por ejemplo, cullquitaca pi ama shuhuachun o ama chingarichunmi bancopi huaquichinchij.

² (1 Timoteo 6:20-ta liyipai). Apóstol Pabloca Timoteotaca paipish valishca cosascunata chasquishcatami yuyachirca. Por ejemplo, Jehová Diosca Timoteomanca paipaj munai gentecunapaj ima cashcatami yachachirca. Shinallataj predicachunmi mingarca (2 Timoteo 4:2, 5). Chaimi Pabloca Timoteomanca canman imalla mingashcataca allimi cuidana cangui nirca. Jehová Diosca ñucanchijmanpish valishca cosascunatami mingashca. ¿Chaicunaca maijancunataj can? ¿Imamantataj cai valishca cosascunataca alli cuidana canchij?

3, 4. ¿Biblia yachachishcacunaca imamantataj valishca can?

³ Jehová Diosca cꞌuyaimantami Bibliapi tiyaj yachachishcacunataca ñucanchijman yachachishca. Cai yachachishcacunami Diospaj amigos cachun, cushilla causachun ayudan. Bibliapi yachachishcacunata pajtachishpaca panda yachachishcacunatami huashaman saquishcanchij. Mapa causaitapishmi saquishcanchij (1 Corintios 6:9-11). Chaimantami Bibliapi yachachishcacunaca tucuimanta yalli valishca can.

⁴ Jehová Diosca humilde, alli shungu gentecunamanmi Bibliamantaca yachachin (Hechos 13:48). Cashna humilde gentecunaca alli cazuj alli yuyaiyuj huauquicuna Bibliamanta yachachishcacunatami cushicushpa chasquincuna (Mateo  11:25; 24:45, QC, 1989). Ñucanchijca Diospaj Shimitaca mana ñucanchijllataj intindi tucunchijchu. Pero Biblia yachachishcacunata intindinami shujtaj cosascunamanta yalli valishca can (Proverbios 3:13, 15).

5. ¿Jehová Diosca ñucanchijmanca imatataj mingashca?

⁵ Jehová Diosca paimanta, paipaj munaimanta shujtaj gentecunaman yachachichunmi mingashca (Mateo 24:14). Cai yachachishcacunami gentecunata Diospaj puebloman yaicuchun, shinallataj huiñai causaita charichun ayudan. Chaimantami Diosmanta yachachinaca valishca can (1 Timoteo 4:16). Cunan punllacunapish achcata huillashpapish, ashallata huillashpapish Dios mingashca obratami pajtachicunchij (1 Timoteo 2:3, 4). ¡Cashna Dioshuan trabajanaca maravillami can! (1 Corintios 3:9).

6. ¿Dios yachachishcacunata mana valorashcamantaca huaquincunaca imatataj saquircacuna?

⁶ Timoteopaj punllapica Dios mingashcacunataca huaquin discipulocunaca mana valorarcacunachu. Por ejemplo, Demasca cai pachapi tiyashcacunata cꞌuyashcamantami Pablohuan Diosta sirvinataca saquirca (2 Timoteo 4:10). Figelo, Hermogenespish Pablota shinallataj catirashpa llaquichinata manchashpami Diosmanta predicanata saquircacuna (2 Timoteo 1:15). Cutin Himeneo, Fileto, Alejandropish Dios yachachishcacunata saquishpami apostatacuna tucurca (1 Timoteo 1:19, 20; 2 Timoteo 2:16-18). Paicunaca callaripica sinchi feta charishpapish Diospaj yachachishcacunata mana valorashcamantami paita sirvinata saquircacuna.

7. ¿Dios mingashcacunata saquichunca Diabloca ima trampacunatataj churan?

⁷ ¿Dios mingashcacunata saquichunca Diabloca ima trampacunatataj churan? Paica Dios yachachishcacunata saquichunca Internetpi, televisionpi, peliculacunapimi panda yuyaicunata churan. Shinallataj gentecuna ñucanchijmanta mana allicunata nijpi o ñucanchijta catirashpa llaquichijpi manchaimanta predicanata saquichunmi munan. Apostatacunapaj panda yuyaicunatapish uyashpa Dios mingashcacunata saquichunmi munan (1 Timoteo 6:20, 21).

8. ¿Danielmantaca imatataj yachanchij?

⁸ Mana cuidadota charishpaca Diospaj yachachishcacunatami asha asha saquishun. Daniel * videojuegocunata pugllanapi dedicarishcamanta ima tucushcata ricushun. Paica: “Ñucaca 10 huatacunata charishpami videojuegocunataca pugllai callarircani. Callaripica alli videojuegocunahuanmi pugllaj carcani. Pero asha ashami macanacunahuan, demoniocunahuan chagrushca videojuegocunataca  pugllai callarircani” ninmi. Paica cada punllapica 15 horascunatami videojuegocunata pugllaj carca. Danielca: “Mana alli videojuegocunata pugllanapi ocuparishcamantami Diosmanta caruyacushcata alli yacharcani. Pero Biblia yachachishcacunaca mana ñucahuan ricunata charinchu nishpami yuyaj carcani” ninmi. ¿Danielmantaca imatataj yachanchij? Mana alli pugllaicunata o mana alli cushicunacunata agllashpaca asha ashami Dios yachachishcacunata, pai mingashcacunatapish saquishun.

9. 1 Timoteo 1:18, 19-pica ¿Pabloca Timoteomanca imatataj nirca?

⁹ (1 Timoteo 1:18, 19-ta liyipai). Apóstol Pabloca Timoteotaca, “alli macanacuj soldado shina mishashpa” crishcata alli cuidangui nircami. ¿Pablo Timoteoman chashna nishcamantaca imatataj yachanchij? ¿Diosta sirvijcunapish imapitaj macanacuj soldadocuna shina canchij? ¿Jesusta catijcunaca ima cualidadcunatataj charina canchij? Cunanca Dios yachachishcacunata ama saquingapaj 5 yuyaicunata ricushun.

10. ¿Imamantataj Diostaca ashtahuan cꞌuyana canchij?

¹⁰ Cꞌuyaimanta Diospajta alli rurana yuyailla causashunchij. Pabloca Timoteotaca Diospajta alli rurana yuyaillapi catirangui nircami. Cai consejota catingapajca Timoteoca Diostami ashtahuan cꞌuyana carca. Chashna cꞌuyashcamantami Diosta sirvinataca mana saquina carca (1 Timoteo 4:7). Shuj alli soldadopi yuyashun. Paica pita cꞌuyashcamanta, imata valorashcamantaca tucui fuerzahuanmi macanacun. Ñucanchijpish Diosta cꞌuyashpaca pai yachachishcacunataca mana saquishunchu (1 Timoteo 4:8-10; 6:6).

11. ¿Dios mingashcata pajtachingapajca imatataj rurana canchij?

¹¹ Allita rurangapaj esforzarishunchij. Shuj soldadoca paiman mingashcacunata pajtachingapajca sinchitami esforzarina can. Timoteoca paiman mingashcacunata pajtachingapaj, Diablopaj trampacunapi ama urmangapajmi Pablo nishca consejota catirca. Paica mapa munaicunata huashaman saquingapaj, alli cualidadcunata charingapaj, huauqui panicunahuan alli parlanacungapajmi esforzarirca (2 Timoteo 2:22). Ñucanchijpish mana alli munaicunata huashaman saquingapajmi esforzarina canchij (Romanos 7:21-25). Shinallataj ñaupa causaita huashaman saquishpa, mushuj causaita charingapajmi esforzarina canchij (Efesios 4:22, 24). Ima ruraicunamanta shaicushca cashpapish tandanacuicunaman ringapajmi esforzarina canchij (Hebreos 10:24, 25).

12. ¿Alli yachachijcuna cangapajca imatataj rurana canchij?

¹² Shuj soldadoca paipaj armacunata alli utilizangapajca siempremi alli entrenashpa pasana can. Chashnallatajmi Diosta sirvijcunapish Bibliata alli utilizanata yachana canchij (2 Timoteo 2:15). Tandanacuicunapimi Bibliata ima shina alli utilizanata yachai tucunchij. Pero Biblia yachachishcacunata gentecuna valorachun ayudasha nishpaca ñucanchijrajmi Bibliataca alli estudiana canchij. Shinallataj ñucanchij fetami sinchiyachina canchij. Chaipajca Bibliataca mana liyinallachu canchij. Ashtahuanpish imata yachachishcacunapimi cutin cutin yuyana canchij. Huaquin versocunata mana alli intindishpa chai versocunata alli intindichingapajca ñucanchij publicacioncunapimi investigana canchij (1 Timoteo 4:13-15). Chashnami gentecunamanca Bibliahuan alli yachachi tucushun. Pero shuj versota liyicushpaca chai verso imata  yachachisha nishcatami alli intindichina canchij. Chai verso paicunapaj causaipi ima shina yuyai tucushcatapishmi intindichina canchij. Bibliaca alli estudiajcuna cashpaca alli yachachijcunami tucushun (2 Timoteo 3:16, 17).

13. Hebreos 5:14-pi nishca shinaca ¿imamantataj ima alli cashcata, ima mana alli cashcata alli intindina canchij?

¹³ Ima alli cashcata, ima mana alli cashcata alli intindishunchij. Shuj soldadoca ima peligro ricurijpica chai peligro paita ama dañota rurachunmi utca anchurinata yachan. Ñucanchijpish ima llaquicuna ricurijpica chai llaquicuna ñucanchijta dañota rurai tucushcata yachashpami utca anchurina canchij (Proverbios 22:3; Hebreos 5:14-ta liyipai). Por ejemplo, televisionpi, peliculacunapica huainayanahuan chagrushca ricunacunami ricurin. Jehová Diosca huainayanataca mana ricunayachinchu. Huainayashpa causaj gentecunaca paicunallatajmi dañota rurancuna, shujtajcunatapishmi llaquichincuna (Efesios 5:5, 6). Chaimantami Diosta sirvijcunaca ima ricunacunata, ima pugllanacunataca alli ricushpa agllana canchij. Chashnami Yayitu Diosmantaca mana caruyashun.

14. ¿Danielca ima alli cashcata intindishpaca imatataj rurarca?

¹⁴ Párrafo 8-pi parlashca Danielca, macanacunahuan, demoniocunahuan chagrushca videojuegocunata pugllanaca mana alli cashcatami intindirca. Chai viciota saquingapajmi paica Watchtower Library programapi informacioncunata estudiarca. Chashnami chai mana alli videojuegocunata pugllanata saquirca. Shinallataj Internetpi pugllanata, shujtaj pugllajcunahuan tandanacunatapishmi saquirca. Danielca: “Videojuegocunata pugllashpa pasanapaj randica shujtaj ruraicunapi ocuparishpa huauqui panicunahuanpish pasangapajmi tiempota surcurcani” ninmi. Cunanca Danielca precursor, congregaciontapish pushajmi can.

15. ¿Apostatacunapaj llullacunataca imamantataj mana crina canchij?

¹⁵ Timoteoca apostatacunapaj yachachishcacunamanta caruyana cashcatami intindirca. Ñucanchijpish chashnallatajmi rurana canchij (1 Timoteo 4:1, 7; 2 Timoteo 2:16). Por ejemplo, apostatacunaca ñucanchij huauqui panicunamanta, Diospaj organizacionmantaca llullacunatami nincuna. Cai llullacunami ñucanchij fetaca chiriyachi tucuncuna.  Apostatacunaca ñucanchij pꞌiñanacuchun, huauqui panicunapi ama confiachunmi munan. Chaimantami paicuna ñucanchijta pandachichun, umachunca mana saquina canchij (1 Timoteo 6:4, 5).

16. ¿Predicangapajca imacuna jarcachuntaj mana saquina canchij?

¹⁶ Predicana yuyailla causashunchij. Timoteoca “Jesucristopaj alli soldado” cashcamantami predicana yuyailla causarca. Shinallataj charishca cosascunapish, shujtaj ruraicunapish jarcachunca mana saquircachu (2 Timoteo 2:3, 4). Ñucanchijpish ashtahuan charina munaicuna predicanata jarcachunca mana saquinachu canchij. Charina yuyailla causashpaca Diosta cꞌuyanata, Dios yachachishcacunata valoranatami saquishun. Gentecunaman predicanatapishmi saquishun (Mateo 13:22). Diospaj Gobiernota punta lugarpi churangapajca minishtirishca cosascunallahuanmi causana canchij. Ñucanchij tiempota, fuerzatapishmi alli utilizana canchij (Mateo 6:22-25, 33).

17, 18. ¿Diosmanta ama caruyangapajca imatataj rurana canchij?

¹⁷ Mana allicunamanta rato anchuringapaj allichirishunchij. Shuj soldadoca llaquicuna manaraj ricurijpi imata ruranataca allimi yachan. Ñucanchijpish Dios yachachishcacunata, pai mingashcacunata ama saquingapajca mana allicunamanta anchuringapajmi listos cana canchij. ¿Chaipajca imatataj rurana canchij? Ima mana allicuna manaraj ricurijpica imata ruranatami alli yachana canchij.

¹⁸ Por ejemplo, huaquin gentecunaca shuj buspi viajacushpaca shuj accidente tiyajpi busmanta utca uriyangapajca imata ruranatami yuyancuna. Paicunaca, “punguta o ventanacunatachu llujshishun, mana cashpaca martillo de emergenciahuanmi ventanacunata pꞌaquina tucunga” nishpachari yuyancuna. Shinallatajmi ñucanchijpish mana allicunamanta utca anchuringapajca imata ruranapi alli yuyana canchij. Tal vez televisionpi, Internetpica huainayanahuan, macanacunahuan chagrushca ricunacunami ricuringa. Mana cashpaca apostatacunapaj panda yachachishcacunapishmi ricuringa. Chaimanta anchuringapajmi alli allichirishca cana canchij. Chaita rurashpaca Jehová Diosmantaca manataj caruyashunchu (Salmo 101:3; 1 Timoteo 4:12).

19. ¿Jehová Dios mingashcacunata valorashpaca ima bendicioncunatataj chasquishun?

¹⁹ Diosta sirvijcunaca pai yachachishcacunatami valorana canchij. Shinallataj shujtajcunaman huillachun mingashcatapish pajtachinami canchij. Chaita rurashpaca ñucanchij concienciapipish allimi sintirishun. Alli causaitapishmi charishun. Shujtaj gentecunatapish Jehová Diosta rijsichun ayudashcamantami contentos sintirishun. Diospaj ayudahuanmi cai mingashcataca valorashpa catishun (1 Timoteo 6:12, 19).