1. ¿Ima horastaj Diosta sirvinataca cungari tucunchij?

¿IMA HORATAJ Diosta sirvinaca sinchi can? ¿Problemacuna tiyajpi o alli causai tiyajpi? Problemacunata charishpaca chai ratomi Diospaj ayudata mashcanchij. Pero alli causaita charishpaca Diosta sirvina importante cashcatami cungari tucunchij. Jehová Diosca israelitacunataca ñucata sirvinata ñataj cungaringuichijman nishpami advirtirca (Deuteronomio 6:10-12).

2. ¿Rey Asamantaca imatataj yachai tucunchij?

² Ñucanchijpish rey Asapaj ejemplomantami yachai tucunchij. Asaca jovenmantami jarcaicuna tiyajpipish alli causai tiyajpipish Diosta sirvina decisionta agllarca (1 Reyes 15:14). Asamanta parlashpaca Bibliapica: “Paica rurashcalla dioscunata yuyarina altarcunatapish, lomacunapi tiyaj altarcunatapish tucuimi urmachirca. Shinallataj dioscunata rurashca rumicunatapish pꞌaquircami” ninmi (2 Crónicas 14:3, 5). Shinallataj paipaj abuela Maaca shutitapish shuj yanga diosta adorachun mandashcamantami paipaj mandanata quichurca (1 Reyes 15:11-13).

3. ¿Cai yachaipica imacunamantataj yachashun?

³ Rey Asaca yanga dioscunallataca mana tucuchircachu. Ashtahuanpish Judá llajtapi causajcunata cutin Jehová Diosta adorachunmi ayudarca. Chaimantami Jehová Diosca rey Asamanpish Judapi causajcunamanpish tranquilo sumaj causaita curca. * Rey Asa mandacujpica Judá llajtapica 10 huatacunatami  tranquilo causaita tiyarca (2 Crónicas 14:1, 4, 6). Cai yachaipica tranquilo causai tiyajpipish rey Asa imata rurashcatami ricushun. Shinallataj Jesusta punta catijcunapish tranquilo causai tiyajpi Diosta sirvingapaj imata rurashcatami yachashun. Ashtahuancarin ñucanchij causan ladopi Diosta sirvichun manaraj jarcajpica ¿ima shinataj chai tiempota alli aprovechana canchij? nishca tapuitapishmi yachashun.

4. 2 Crónicas 14:2, 6, 7-pi nishca shinaca ¿rey Asaca jarcaicuna mana tiyajpica imatataj rurarca?

⁴ (2 Crónicas 14:2, 6, 7-ta liyipai). Rey Asaca Judá llajtapi causajcunataca: ‘Jehová Diosca tucui ladocunapimi sumaj causaita cushca’ nircami. Pero sumaj causaita tiyajpipish cushicunallapica mana yuyarcachu. Chaipaj randica rey Asaca: ‘Cai llajtacuna muyundijta jatun pircacunata, torrecunata, pungucunata rurashunchij’ nircami. Shinallataj Judá llajtapi causajcunataca: ‘Cai llajtaca ñucanchij maquipimi can’ nircami. Chashna nishpaca rey Asaca Dios cushca llajtapi manaraj jarcaicuna tiyajpica caicunata tranquilo shayachi tucushcatami nisha nirca. Chaimantami Judá llajtapi causajcunataca chai tiempota alli aprovechachun animarca.

5. ¿Asaca imamantataj paipaj soldadocunataca alli prepararishca cachun ayudarca?

⁵ Chai tiempopica rey Asaca paipaj soldadocuna allichirishca cachunmi ayudarca (2 Crónicas 14:8). ¿Jehová Diospi mana confiashcamantachu chashna rurarca? Mana. Paica Jehová Diospimi confiarca. Pero rey cashcamantami shamuj punllacunapi ima llaquicunamanta tucui pueblota cuidana cashcata alli yacharca. Shinallataj Judá llajtapi tranquilo causai mana siempre tiyana cashcatami alli intindirca. Chaimantami paica soldadocuna alli prepararishca cachun ayudarca.

6. ¿Tranquilo causai tiyajpica Jesusta punta catijcunaca ima shinataj chai tiempota aprovecharcacuna?

⁶ Jesusta punta catijcunataca achca cutinmi contracunaca catirashpa llaquichircacuna. Pero maipica tranquilo causaitami charircacuna. Tranquilo causai tiyajpica tucuicunami Diosmanta huillanapi, Diosta sirvinapi ocuparircacuna. Hechos libropica, huillanata mana saquishcamanta Jehová Dios bendiciajpimi Jesusta catijcunaca ashtahuan mirarishcata parlan (Hechos 9:26-31).

7, 8. ¿Pablopish shujtaj discipulocunapish huillana oportunidadtaca ima shinataj alli aprovecharcacuna?

⁷ Jesusta punta catijcunaca huillangapajmi tucui oportunidadcunata aprovecharcacuna. Por ejemplo, apóstol Pabloca Éfeso llajtapi ashtahuan huillana oportunidadta charishcamantami chaipi predicashpa catingapaj saquirirca (1 Corintios 16:8, 9).

⁸ Huata 49-pica circuncisionta ruranamantami congregacioncunapi huaquin problemacuna tiyashca carca. Pero Jerusalenpi tiyaj apostolcunapish ancianocunapish chaita allichishca huashaca ashtahuan huillana oportunidadmi charircacuna (Hechos 15:23-29). Apostolcuna ima decidishcata congregacioncunaman huillajpica discipulocunaca Diospaj Shimimanta alli huillaitapish huillashpami catircacuna (Hechos 15:30-35). ¿Huillashpa catishcamantaca imataj tucurca? Bibliapica: “Tandanacushca crijcunaca ashtahuan sinchi crijcuna tucurca. Crijcunapish punllantami ashtahuan mirarircacuna” ninmi (Hechos 16:4, 5).

9. ¿Huillangapaj jarcaicuna mana tiyajpica imatataj tapurina canchij?

⁹ Cunan punllacunapica huaquin llajtacunapica huillangapaj ima jarcaicunaca mana tiyanchu. Ñucanchij causan llajtapipish mana jarcaicuna tiyajpica ¿cai tiempotaca huillangapajca allichu aprovechacunchij? Cai tucuri punllacunapica Diosta sirvijcunaca muyundij Allpapimi tucui laya gentecunaman yachachicunchij (Marcos 13:10). Gentecunaman predicangapaj achca trabajota charishcamantami cushilla sintirinchij.

10. 2 Timoteo 4:2-pi nishca shinaca ¿imatataj rurana canchij?

¹⁰ Tranquilo causai tiyajpica huillanatami alli aprovechana canchij (2 Timoteo 4:2-ta liyipai). Chaimantami can ashtahuan huillasha nishpaca huaquin cosascunata saqui tucungui. Mana cashpaca cambaj familiamanta shuj familia ashtahuan huillachun o precursor tucuchunmi ayudai tucungui. Cai tiempopica cullquiyuj canata o ashtahuan cosascunata charinataca mana mashcanachu canchij. Cai cosascunaca jatun llaqui punllacunapica chingaringallami (Proverbios 11:4; Mateo 6:31-33; 1 Juan 2:15-17).

11. ¿Huaquin publicadorcunaca ashtahuan huillangapajca imatataj rurashcacuna?

¹¹ Achca publicadorcunami gentecunaman yachachingapajca mushuj shimita yachashcacuna. Tucuicunaman huillangapajca Diospaj organizacionca chꞌican chꞌican shimicunapimi achca publicacioncunata llujchishca. Por ejemplo, 2010 huatapica casi 500 shimicunapimi publicacioncuna tiyarca. Pero cunanca 1.000 yalli shimicunapimi tiyan.

12. ¿Gentecunaca paicunapaj propio shimipi Diosmanta predicajpica ima shinataj sintirincuna? Shuj panipaj ejemplomanta parlai.

¹² ¿Gentecunaca paicunapaj propio shimipi Diosmanta yachachijpica ima shinataj sintirincuna? Cai catij experienciapi yuyashun. Shuj panica Estados Unidospi tiyaj shuj jatun tandanacuimanmi rirca. Chai tandanacuica pai parlashca kiniaruanda shimipimi carca.  Cai shimitaca Ruanda, la República Democrática del Congo y Uganda llajtacunapimi parlancuna. Cai panica jatun tandanacui tucurishca qꞌuipaca caitami nirca: “Ñucaca 17 huatacunatami Estados Unidos llajtapi causani. Cunanmi punta cutin cai tandanacuipi imata yachachishcataca alli intindircani”. Paipaj propio shimipi yachachishcacunaca paipaj shungumanmi chayarca. Ñucanchijpish shujtaj shimita parlajcunaman yachachingapajca paicuna parlashca shimitami yachai tucunchij. Huaquincunaca ñucanchij causan ladopica paicuna parlashca shimipi Diosmanta predicajpica cushillami sintirincuna. Chaimi ñucanchijpish mushuj shimita yachashpaca contentos sintirishun.

13. ¿Rusiamanta huauqui panicunaca jarcaicunata mana charishpaca imatataj rurarcacuna?

¹³ Huaquin llajtacunapica gobiernocuna jarcashcamantami huauqui panicunaca Diosmanta mana libremente huillai tucuncuna. Rusia llajtapi causaj huauqui panicunapi yuyashun. Gobiernoca ñucanchij huauqui panicunataca achca huatacunatami catirashpa llaquichircacuna. Pero marzo de 1991 huatapimi tranquilo Diosta sirvichun saquircacuna. Chai tiempopica Rusia llajtapica casi 16.000 publicadorcunami tiyarca. Cutin 20 huatacuna qꞌuipaca 160.000 yalli publicadorcunami tiyarca. Paicunaca tranquilo causai tiyajpica huillanatami alli aprovecharcacuna. Cunan punllacunapipish chai llajtapi cutin jarcaicuna tiyajpipish Jehovata sirvingapajmi tucui pudishcata ruracuncuna.

14, 15. ¿Jehová Diosca ima shinataj mandaj Asataca ayudarca?

¹⁴ Cutin rey Asa causashca punllacunapi yuyashun. Etiopía llajtamanta millón soldadocuna judiocunahuan macanacunaman rijpimi chai llajtapi tranquilo causanaca tucurirca.  Soldadocunata mandaj Zera shuti runaca Judá llajtata tucuchinatami yuyarca. Pero Asaca Jehová Diospimi confiarca. Chaimantami Diostaca: “Ñucanchijta Mandaj, can Taita Diosllapimi shungutaca churanchij. Ñucanchijta ayudahuaiyari. Cambaj shutipimari, cai soldadocunahuan macanacunaman shamunchij” nishpa mañarca (2 Crónicas 14:11).

¹⁵ Etiopiamanta shamuj soldadocunaca Judá llajtamanta soldadocunata yallimi carcacuna. Chashna cajpipish Asaca Jehová Dios paicunata ayudanatami confiarca. Dios paipaj pueblota ayudajpimi chai soldadocunataca tucuchirca (2 Crónicas 14:8-13).

16. ¿Jarcaicuna, llaquicuna tiyanataca ima shinataj yachanchij?

¹⁶ Shamuj punllacunapi cada unohuan ima tucunataca mana yachanchijchu. Pero jarcaicuna tiyanataca allimi yachanchij. Jesús ima nishcata yuyarishun. Paica tucuri punllacunapica tucui llajtacunami ñucata caticushcamantaca pꞌiñangacuna nircami (Mateo 24:9). Apóstol Pablopish: “Cristo Jesushuan shujlla tucushpa pai yuyailla causasha nijcunaca tucuicunallatajmi catirashpa llaquichishca canga” nircami (2 Timoteo 3:12). Ashtahuancarin Diabloca dimastij pꞌiñarishcami can. Chaimantami llaquicuna tiyanataca alli intindinchij (Apocalipsis 12:12).

17. ¿Ima pruebacunahuantaj ñalla chꞌimbapurashun?

¹⁷ Ñallami jatun llaqui punllacuna tiyanga. Chai punllacunamanta parlashpaca Bibliapica: “Cai pacha callarimanta cunancama chashna llaquica mana tiyashcachu” ninmi (Mateo 24:21). Chai punllacunapica ñucanchij familiacunallatajmi tal vez ñucanchijpaj contra tucunga. Huillachunpishmi gobiernocunaca jarcangacuna (Mateo 10:35, 36). ¿Ñucanchijpish Asa shinachu Jehová Dios ñucanchijta cuidanapi, ayudanapi confiashun?

18. Hebreos 10:38, 39-pi nishca shinaca ¿allichirishca cangapajca imatataj rurana canchij?

¹⁸ Chai punlla chayamungacamaca Jehová Diosca allichirishca cachun, ñucanchij feta sinchiyachishpa catichunmi munan. Cunanca paica minishtishca horaspi yachachichunca “alli cazuj alli yuyaiyuj” huauquicunatami utilizacun (Mateo 24:45, QC, 1989). Pero ñucanchijpish Diospi sinchi feta charingapaj esforzarishunchij (Hebreos 10:38, 39-ta liyipai).

19, 20. 1 Crónicas 28:9-pi ima nishcata yuyaipi charishpaca ¿imatataj tapurina canchij?

 ¹⁹ Ñucanchijpish rey Asa shinallatajmi Jehová Diosta mashcana canchij (2 Crónicas 14:4; 15:1, 2). Diosta rijsishpa bautizarishpami paitaca mashcai callarircanchij. Pero Diosta cꞌuyashpa catingapajmi esforzarinami canchij. Chaimanta cashna nishpa tapurishunchij: “¿Tucui tandanacuicunaman ringapajchu esforzarinchij?” Tandanacuicunapimi Diosta sirvingapaj animota chasquinchij. Huauqui panicunahuan cashcamantapishmi cushilla sintirinchij (Mateo 11:28). Cashna nishpapish tapurishunchij: “¿Ñucallatajchu Bibliata estudiangapajca tiempota surcuni? ¿Ñuca familiahuan causashpaca cada semanachu Bibliamanta tandalla yachanchij? ¿Gentecunaman predicangapaj, yachachingapajpish tucui pudishcatachu ruranchij?”.

²⁰ ¿Imamantataj cashna nishpa tapurina canchij? Bibliapica Jehová Diosca ñucanchij yuyaipi, shungupi imata yuyacushcataca allimi yachan ninmi. Shinallataj ñucanchij yuyaipi, shungupi imata yuyacushcataca allimi yachana canchij (1 Crónicas 28:9-ta liyipai). Ñucanchij causaipi ima cambiocunata rurasha nishpaca Jehovatami ayudahuai nishpa mañana canchij. Cunanmi shamuj punllacunapi tiyana pruebacunata ahuantangapajca allichirina canchij. Chaimanta jarcaicunata mana charishpaca chai tiempota alli aprovechashunchij.