1. a) ¿Chuscu runacunamanca Jesusca ima invitaciontataj rurarca? b) ¿Paicunaca imatataj rurarcacuna?

JESUSTA catij Pedro, Andrés, Santiago, Juanca pescadocunata japishpami trabajajcuna carca. Jesusca paicunataca: ‘Ñucata catichij, pescadocunata japijta shinallataj gentecunata pushajcunatami rurasha’ nircami. * Caita uyashpaca paipaj discipulocunaca mancharishcangami. Pero Bibliapica: “Paicunaca, linchicunata saquishcahuanmi Jesusta catircacuna” ninmi (Mateo 4:18-22). Jesusta cati callarishcamantami gentecunaman yachachina invitacionta chasquircacuna (Lucas 5:10). Cunan punllacunapish Jesusca alli shunguta charij gentecunataca chai invitacionta chasquichunmi invitacun (Mateo 28:19, 20). ¿Chai invitaciontaca canpish chasquishcanguichu?

2. ¿Shujtajcunaman huillana decisiontaca imamantataj alli yuyashpa agllana canchij?

² Canca achca tiempotachari Bibliamanta estudiashpa huaquin cambiocunata rurashcangui. Chaimantachari Diosmanta huillanata yuyacungui. Shinapish huillana decisión valishca cashcatami intindishcangui. Pero Diosmanta huillanata manaraj decidishpaca ama desanimarichu. Bibliapica Pedro paipaj compañerocunapish linchicunata saquishcahuanmi Jesusta  catircacuna nijpipish paicunaca Jesusta catingapajca alli yuyashpami decidircacuna. Por ejemplo, Pedropish paipaj huauqui Andrespish seis quillacunata Jesusta ña rijsishcamanta, pai Mesías cashcata crishcamantami Jesusta catinata decidircacuna (Juan 1:35-42). Tal vez canpish Jehová Diosmanta Jesusmantami achcata yachashcangui. Chaimantachari shujtajcunaman huillasha ningui. Pero chai decisionta manaraj agllashpami alli yuyashpa decidina cangui. ¿Pedro, Andrés shujtajcunapish chai decisionta agllachunca imataj ayudarca?

3. ¿Alli huillajcuna cangapajca ima shinataj cana canchij?

³ Jesusta punta catijcunaca predicanata munaj, yachaj, mana manchajmi carcacuna. Shinallataj huillangapajmi esforzarircacuna. Chaimantami paicunaca alli huillajcuna carca. Cai yachaipimi paicunapaj ejemplota ima shina catinata yachashun.

4. ¿Imamantataj Pedroca pescadocunata japishpa trabajarca?

⁴ Pedroca paipaj familiata mantiningapajmi pescadocunata japishpa trabajaj carca. Chashna trabajanataca achcatami munaj carca (Juan 21:3, 9-15). Chashnallatajmi gentecunaman yachachinataca achcata munaj carca. Jehová Dios ayudajpimi Pedroca alli huillaj tucurca (Hechos 2:14, 41).

5. a) Lucas 5:8 al 11-pi nishca shinaca ¿Pedroca imamantataj manchaita charirca? b) ¿Bibliamanta yachacujca Pedro shina manchashpaca imatataj rurana can?

⁵ Maipica huillangapajmi manchaita charinchij. Pero Jehová Diosta cꞌuyashcamantami chai manchaitaca mishai tucunchij. Jesusca Pedrotaca gentecunaman huillachun invitashpaca: “Ama manchaichu” nircami (Lucas 5:8-11-ta liyipai). Jesusca manaraj chashna nishpaca Diospaj poderhuanmi Pedrotaca  achca pescadocunata japichun ayudarca. Chaimi Jesús achca poderta charijta ricushpaca Pedroca paihuanca mana huillai tucushachu nishpa yuyashcanga. Shinapish Pedroca Jesusta catinataca mana mancharcachu. ¿Canpish huillangapaj imallata rurana cashcata yachashpachu manchangui? Chashna sintirishpaca Jehová Diostapish, Jesustapish, shujtajcunatapish cꞌuyangapajmi esforzarina cangui. Chashnami Jesuspaj invitacionta chasquingui (Mateo 22:37, 39; Juan 14:15).

6. ¿Gentecunamanca imamantataj predicanchij?

⁶ Jesusca: “Tucui cai pachata richij, ñuca yachacujcunata ruraichij” nishpami mandarca. Ñucanchijpipish cai mandashcata cazusha nishcamantami predicanchij (Mateo 28:19, 20). Shinallataj huaquin gentecunaca “michij illajlla” oveja caita chaita puricuj shinami can. Paicunaca Diospaj Reinomanta yachanatami minishtincuna (Mateo 9:36). Jehová Diosca tucui laya gentecuna quishpirichun, mana llullata yachaj chayachunpishmi munan (1 Timoteo 2:4). Caicunata intindishpami tucui gentecunaman huillasha ninchij.

7. 1 Timoteo 2:3, 4-pi nishca shinaca ¿imamantataj predicanchij?

⁷ Pescadocunata japijcunaca cꞌatungapaj, micungapajmi pescancuna. Cutin ñucanchijca gentecuna quishpirichun munashcamantami predicanchij (1 Timoteo 2:3, 4-ta liyipai; 1 Timoteo 4:16).

8, 9. ¿Pescadocunata japijcunaca imatataj alli yachana can?

⁸ Jesús causashca punllapica, pescadocunata japij israelitacunaca ima laya pescadocunata japinata, mai lugarpi pescanatami alli yachana carca (Levítico 11:9-12). Pescadocunaca alli yacu tiyanpi, micunacuna tiyanpimi pasancuna. Pero pescadota japijcunapish ima horas pescanatami alli yachana can. Shuj isla del Pacificomanta huauquica shuj misionero huauquitami pescanaman invitarca. Cai huauquimanca misioneroca: “9 de la mañanatami tupashun” nircami. Pero cai huauquica: “Pescana horasmi rina canchij. Mana ñucanchij munashca horaspi” nircami.

⁹ Apostolcunapaj punllacunapica Jesusta catijcunapish maipi, ima hora gentecuna cajta ricushpami huillajcuna carca. Por ejemplo, templopi, sinagogacunapi, mercadocunapi, huasin huasin rishpami huillajcuna carca (Hechos 5:42; 17:17; 18:4). Shinallataj ñucanchijpish gentecuna huasipi cai horasmi predicana canchij. Gentecuna maipi tiyajtapishmi mashcana canchij (1 Corintios 9:19-23).

10. ¿Jehová Diosca huillangapajca ima ayudacunatataj cushca?

¹⁰ Pescadota japijcunaca minishtishca herramientacunata alli utilizanatami yachana can. Ñucanchijpish huillangapajca alli ayudacunatami minishtinchij. Jesusca paipaj discipulocunamanca imata apanata, maipi huillanata, imata ninatapishmi yachachirca (Mateo 10:5-7; Lucas 10:1-11). Cunan punllacunapish Jehová Diosca huillangapajca publicacioncunata, huaquin ayudacunatami cushca. Shinallataj caicunatapish ima shina utilizachunmi yachachishca. * Jehová Dios ñucanchijta yachachichun saquishpaca alli yachachijcunami tucushun (2 Timoteo 2:15).

11. ¿Diosmanta huillajcunaca imamantataj mana manchaj cana canchij?

¹¹ Pescadocunata japijcunaca casi siempremi tuta horas pescanaman rina can. Chaimi mana yuyashcapi sinchita tamyai  tucun, huairapish jatari tucun. Chaimantami mana manchaj cana minishtirin. Ñucanchijpish gentecunaman huillangapajca mana manchajmi cana canchij. Huillai callarishpa o testigo de Jehová tucushpaca sinchi huairata shina, tamyata shinami tal vez jarcaicunata charingui. Jesusca: “Cancunataca ovejacunata atujcunapaj chaupiman cachaj shinami cachani” nircami (Mateo 10:16). Ñucanchij familiacuna jarcajpi, amigocuna burlarijpi o gentecuna mana uyasha nijpimi Jesús nishca jarcaicunahuan chꞌimbapuranchij.

12. Josué 1:7 al 9-pi nishca shinaca ¿mana manchaj cangapajca imatataj rurana cangui?

¹² ¿Mana manchaj cangapajca imatataj rurana cangui? Jesús jahua pachamanta predicacionta pushacujtaca mana cungarinachu cangui (Juan 16:33; Apocalipsis 14:14-16). Shinallataj Jehová Dios ñucanchijta cuidanatami tucui shunguhuan crina cangui (Mateo 6:32-34). Cambaj feta sinchiyachishpaca mana manchajmi tucungui. Pedropish caishuj compañerocunapish sinchi feta charishcamantami negociocunata huashaman saquishpa Jesusta catircacuna. Canpish sinchi feta charishcamantami cambaj amigocunaman, familiacunaman Bibliata yachai callarishcata huillashcangui. Tandanacuicunamanpishmi ri callarishcangui. Shinallataj Dios mandashcacunata pajtachingapajmi huaquin cambiocunataca rurashcangui. Chashnami mana manchaj cashcata ricuchishcangui. Chashna esforzaricushcamantami Jehová  Diosca cantaca manataj saquinga (Josué 1:7-9-ta liyipai).

13. ¿Mana manchaj cangapajca imacunatataj rurana cangui?

¹³ Mana manchaj cangapajca Jehová Diostami ayudahuai nishpa mañana cangui (Hechos 4:29, 31). Jehová Diosca can mañashcacunata uyashpaca manataj saquingachu. Paica ñaupa tiempopi paita sirvijcunatami ayudarca. Cantapish paicunata shina ayudanapi yuyai. Cambaj causaipipish problemacunahuan chꞌimbapurachun cambiocunata rurachun ima shina ayudashcapi yuyai. Jehová Diosca ñaupa tiempopica paipaj pueblotami puca cuchata chꞌimbachun ayudarca. Shinallataj cantapish Jesuspaj discípulo tucuchun ayudanataca mana cungarinachu cangui (Éxodo 14:13). Salmo 118:6-pi ima nishcataca ama cungaringui. Chaipica: “Mandaj Diosca ñucahuanmari, mana manchanichu. Runacuna imata ruranataca mana manchanichu” ninmi.

14. ¿Cai parrafopi parlashca ishqui panicunamantaca imatataj yachai tucunchij?

¹⁴ Huaquincunaca shujtajcunahuan parlanatami manchancuna. Pero Jehová Diosca paicuna mana manchajcuna cachunmi ayudashca. Masae shuti panimantami parlashun. Cai panica: “Ñuca crishcacunamanta shujtajcunahuanca mana nunca parlai tucushachu” nishpami yuyarca. Paipajca mana rijsishcacunahuan parlanaca shuj jatun pircata huichiyacuj shinami carca. Chaimantami Diostapish, gentecunatapish ashtahuan cꞌuyangapaj esforzarirca. Shinallataj tucuri punllacunapi causacushcamanta predicana importante cashcatami yuyarirca. Predicana munaita charingapajpish Diostami mañarca. Chaita rurashpaca manchaitami mishai tucurca. Precursora regularpishmi tucurca. Josué 1:7, 9-pi nishca shinaca, Diosca mushuj publicadorcunataca ama manchaj cachunmi ayudan. Tomoyo shuti panimantapish yachashun. Cai pani huasin huasin huillai callarijpica shuj huarmica: “Cancuna testigo de Jehovacunami canguichij. Mana imata uyasha ninichu” nishpami sinchita caparishpa punguta huichcarca. Tomoyo shuti panica mana desanimarishpami paipaj compañeramanca: “Ñuca imata manaraj nijpimi chai señoraca ñucanchij testigo de Jehová cashcata ña yachashca. Chaimantami achcata cushicuni” nircami. Cai panica cunanca precursora regularmi can.

15. ¿Pescadocunata japij shinaca imatataj rurana canchij?

¹⁵ Pescanata yachajcunaca utcami jatarincuna. Shinallataj tamyajpi, sinchi huaira tiyajpipish pescanata tucuchingacamami saquirincuna. Diosta sirvijcunapish huillanata tucuchingacamami tucui pudishcata rurana canchij (Mateo 10:22).

16. ¿Sinchi trabajocunata pajtachingapajca imatataj rurana canchij?

¹⁶ Valishca trabajocunata pajtachinaca maipica mana jahuallachu can. Pero juchayuj cashcamantami fácil trabajocunata ruranata munanchij. Chaimantami valishca trabajocunata pajtachingapajca huaquin ruraicunamanta jarcarishpa esforzarina canchij. Shinapish Jehová Dios paipaj espíritu santohuan ayudajllapimi chai trabajocunataca pajtachi tucushun (Gálatas 5:22, 23).

17. 1 Corintios 9:25 al 27-pi nishca shinaca ¿apóstol Pabloca allita rurangapajca imatataj rurarca?

¹⁷ Apóstol Pabloca allita rurangapajca paipaj cuerpotaca huajtaj shinami cazuchirca (1 Corintios 9:25-27-ta liyipai). Paica Jesusta catijcunataca, cancuna munashcacunamanta jarcarishpa “allita ruraichij, ama maipish  cachun ruraichijchu” nircami (1 Corintios 14:40). Ñucanchijpish Jehovata adorashpa catingapaj, gentecunaman predicangapaj, yachachingapajpish achcatami esforzarina canchij (Hechos 2:46).

18. ¿Jehová Dios cushilla sintirichunca imatataj rurana canchij?

¹⁸ Shuj pescadorca achca pescadocunata japishpami alli pescador cashcata ricuchin. Pero alli publicador cashcata ricuchingapajca achcacunata o ashallacunata Diosta rijsichun ayudashcataca mana nisha ninchu (Lucas 8:11-15). Tucuicuna mana shaicushpa predicashpa, yachachishpaca Diostapish Jesustapish cazucushcatami ricuchinchij. Chaimi Jehová Diosca cushilla sintiringa (Marcos 13:10; Hechos 5:28, 29).

19, 20. ¿Imamantataj utca predicana canchij?

¹⁹ Maijan llajtacunapica huaquin quillacunallatami pescai tucuncuna. Pescanata yachajcunaca chai quillacuna tucurinata yachashpaca utcami pescancuna. Ñucanchijpish tucuri punllacuna quichquiyamucushcata yachashpami utca predicana canchij. Chaimantami publicador cangapajca cambaj causaipi tucui alli cachunca mana shuyana cangui. Ashtahuanpish gentecuna quishpirichunmi utca ayudana cangui (Eclesiastés 11:4).

²⁰ Cunanmi predicanata munaj cangapaj Bibliamanta ashtahuan yachangapaj, mana manchashpa huillangapaj esforzarina cangui. Muyundij Allpapica 8 millón yalli Diosmanta huillajcunami tiyan. Canpish paicunahuanmi tandalla huillai tucungui. Chashnami Jehová Dios ‘cushicuita cujpica’ contento sintiringui (Nehemías 8:10). Jehová Dios huillanaca caipimi tucurin ningacamami predicashpa catina cangui. Catij yachaipica Diospaj Gobiernomanta huillashpa catingapaj imata rurana cashcatami yachashun.