YACHAI 39
Cꞌuyashca amigocuna Jehová Diosta saquijpi llaquilla cajcunata animashunchij
“Imapish mana tiyan pambapimi paitaca pꞌiñachircacuna” (SALMO 78:40).
CANTO 102 Fuerza illajcunata ayudashunchij
CAITAMI YACHASHUN *
1. ¿Familiacunaca paicunapaj familiata congregacionmanta llujchijpica ima shinataj sintirincuna?
PITA congregacionmanta llujchijpica familiacunapish, amigocunapish dimastij llaquillami sintirinchij. Pani Hildaca: * “Ñuca cusaca 41 huatacunata cazarashca qꞌuipami huañurca. Chaimi ñucaca dimastij llaquilla sintirircani. Pero ñuca churi congregacionta paipaj huarmita, huahuacunata saquijpica dimastij shungu pꞌaquirishcami sintirircani” ninmi.
Shuj familia Jehovata sirvinata saquijpi ñucanchij llaquilla sintirijtaca Jehová Diosca allimi yachan. (Párrafo 2, 3-ta ricui). *
2, 3. Salmo 78:40, 41-pi nishca shinaca ¿Diosta sirvijcuna Jehová Diosta sirvinata saquijpica paica ima shinataj sintirin?
2 Jehová Diosca angelcuna paita sirvinata saquijpica llaquillami sintirishcanga (Judas 6). Israelitacunapish Yayitu Diostaca cutin cutinmi mana cazurcacuna. Chaimantami paica llaquilla sintirishcanga (Salmo 78:40, 41-ta liyipai). Cunan punllacunapish ñucanchij cꞌuyashca amigo o rijsishca Jehová Diosta sirvinata saquijpica Diosca llaquillami sintirin. Chaimantami paica llaquilla cajcunataca animashpa, apoyashpa catinga.
3 Cai yachaipica shuj cꞌuyashca familiata congregacionmanta llujchijpi Jehová Diospaj ayudata ima shina chasquinatami yachashun. Shinallataj llaquilla caj huauqui panicunatapish ima shina ayudanatami yachashun. Pero puntaca culpables ama sintiringapaj imata ruranatami yachashun.
CULPATAMI CHARINI NISHPA AMA YUYAI
4. ¿Yaya mamacunaca paicunapaj huahuacuna Jehová Diosta sirvinata saquijpica ima shinataj sintirincuna?
4 Achca huauqui panicunaca paicunapaj churicuna Jehová Diosta sirvinata saquijpica: “¿Imapitaj paicunataca ayudana carcanchij?” nishpami yuyancuna. Huauqui Lukeca paipaj churita congregacionmanta llujchishca qꞌuipaca cashnami nirca: “Ñucami culpata charini nishpami yuyarcani. Huaquinpica dimastijmi preocupado sintirircani. Maipicarin huacai solomi pasarcani. Shungu nanaitapishmi charircani” ninmi. Pani Elizabethpish paipaj churita congregacionmanta llujchijpica casi chashnallatajmi sintirirca. Paica: “¿Imapitaj pandarircani? Ñuca churiman Yayitu Diosmanta yachachingapajca mana sinchita esforzarishcanichu nishpami yuyarcani” ninmi.
5. ¿Maijanpish Jehová Diosta sirvinata saquijpica pipaj culpataj can?
5 Jehová Diosca cada unotami paita sirvinata o mana sirvinata decidichun saquishca. Huaquin jovencunaca Jehová Diosta mana sirvij familia ucupi huiñashpapish Yayitu Diosta rijsishpaca paita sirvinataca manataj saquishcacunachu. Cutin shujtajcunaca Jehová Diosta sirvij familia ucupimi huiñashcacuna. Pero huiñashpaca Diosta sirvinatami saquishcacuna. Shinapish cada unomi Jehovata sirvinata o mana sirvinataca decidi tucuncuna (Josué 24:15). Chaimanta yaya mamacunaca paicunapaj huahuacuna Diosta sirvinata saquijpica mana culpables sintirinachu can.
6. ¿Diosta sirvij jovencunaca yaya mamacuna Jehová Diosta sirvinata saquijpica ima shinataj sintirincuna?
6 Maipica shuj yaya o mamami Jehová Diosta sirvinata saquincuna (Salmo 27:10). Huahuacunaca yaya mamacunapaj ejemplota catinatami munancuna. Pero paicuna Jehová Diosta sirvinata saquijpica huahuacunaca yallitajmi llaquilla sintirincuna. Estherpaj yayataca congregacionmantami llujchircacuna. Estherca: “Ñuca papitoca Jehová Diosmantaca asha ashaca mana caruyarcachu. Ashtahuanpish paica menos pensadomi Yayitu Diosmanta caruyarca. Chaimi yallitaj huacarcani. Ñuca yayitutaca achcatami cꞌuyani. Chaimantami paita congregacionmanta llujchijpica ñucaca dimastij preocuparishca llaquilla sintirircani” ninmi.
7. ¿Jehová Diosta sirvij jovencunapaj yaya mamata congregacionmanta llujchijpica Jehová Diosca ima shinataj sintirin?
7 Cancunapaj yayata o mamata congregacionmanta llujchishca cajpica ñucanchijpish llaquillami sintirinchij. Jehová Diospish can ima shina sintirijtaca allimi yachan. Paica achcatami cꞌuyan. Cancuna paita sirvinata manataj saquijpica paica cushillami sintirin. Ñucanchijpish cancuna Diosta sirvinata manataj saquijpica cushillami sintirinchij. Cancunapaj yaya mamacuna Jehová Diosta sirvinata saquishcamantaca cancunaca culpata mana charinguichijchu. Ña ricushca shinaca Jehová Diosca cada uno paita sirvinata o mana sirvinata decidichunmi saquishca. Yayitu Diosman mingarishca tucui huauqui panicunaca “paicuna imata rurashcamantaca, cada quiquinmi chasquingacuna” (Gálatas 6:5).
8. ¿Diosta sirvinata saquij familiacuna cutin Jehová Diospajman tigrangacamaca imatataj rurai tucuncuna? (“ Jehová Diosca paipajman tigrachunmi munan” nishca recuadrota ricui).
8 Shuj cꞌuyashca amigo, familia Jehová Diosta sirvinata saquijpica cutin paicuna Yayitu Diosta tigra sirvichunmi munanchij. Pero paicuna Diosta sirvinata decidingacamaca ñucanchij feta sinchiyachishpa catishunchij. Chaita rurashpaca caishuj familiacunapajmi alli ejemplos cashun. Tal vez congregacionmanta llujshichishcacunapish cutinmi Yayitu Diosta sirvinata agllasha ningacuna. Ashtahuancarin Yayitu Diosta sirvinata mana saquishpaca canllatajmi fuerzasta charingui, cushillapish sintiringui. ¿Cambaj fe sinchi cachunca imallatataj rurana cangui?
CAMBAJ FE SINCHI CACHUN ESFORZARI
9. ¿Cambaj fe sinchi cachunca imatataj rurana cangui? (“ Familiacuna Jehová Diosta sirvinata saquijpica cai versocunami ayudanga” nishca recuadrota ricui).
9 Cancunapaj feta sinchiyachingapaj esforzari. ¿Chaipajca imatataj rurana cangui? Cada punlla Bibliata liyishpa, liyishcapipish cutin cutinmi yuyana cangui. Shinallataj tandanacuicunamanpishmi rina cangui. Pani Joannapaj ejemplopi yuyashun. Paipaj yaya, paipaj ñañaca Jehová Diosta sirvinatami saquirca. Pani Joannaca: “Ñucaca Abigailpaj, Esterpaj, Jobpaj, Josepaj, Jesuspaj ejemplomanta yachashpami tranquila sintirini. Paicunapaj ejemplomi ñuca yuyaipipish ama dimastij llaquilla sintirichun ayudan. Shinallataj JW Broadcasting programapi llujshishca cancioncunapishmi ñucata achcata animan” ninmi.
10. Salmo 32:6 al 8-pi nishca shinaca ¿dimastij llaquilla sintirishpaca imatataj rurana canchij?
10 Can yallitaj sustarishca cashpaca Jehová Diosta mañanata amataj saqui. Imatapish alli yuyangapaj, alli decidingapaj Jehová Diosta ayudachun mañai (Salmo 32:6-8-ta liyipai). Maipica dimastij llaquilla sintirishcamantami Jehová Diosman tucuita parlanaca sinchi can. Pero Yayitu Diosca can ima shina sintirijtaca allimi yachan. Chaimantami paica cantaca achcata cꞌuyan. Can ima shina sintirishcatapish shungumanta parlachunmi munan (Éxodo 34:6; Salmo 62:7, 8).
11. Hebreos 12:11-pi nishca shinaca ¿maijanta congregacionmanta llujchijpica imatataj mana cungarina canchij? (“ Juchata rurajcunataca Jehová Diosca cꞌuyaimantami congregacionmanta llujshichichun mandan” nishca recuadrota ricui).
11 Pushaj ancianocuna imata decidishcata apoyashunchij. Jehová Diosca cꞌuyaimantami juchata ruraj huauqui panicunataca congregacionmanta llujshichichun mandashca. Chaita rurashpaca huauqui panicunatapish congregacionmanta llujshichishcacunatapishmi benefician (Hebreos 12:11-ta liyipai). Pero huaquincunaca deganami ancianocunaca chai huauqui panicunata congregacionmanta llujchin nishpachari yuyangacuna. Pero paicunaca allimi yachancuna cai juchata rurajcuna mana allita rurashcata. Tucuita mana alli yachashpapish ancianocunapimi confiana canchij. Comité judicialta ruraj huauquicunaca Biblia yachachishca shina, Jehová munashca shinami juzgancuna (2 Crónicas 19:6).
12. ¿Huaquincunaca Jehová Diospaj disciplinata chasquishpaca ima shinataj beneficiarishcacuna?
12 Cambaj familiata ancianocuna congregacionmanta llujchijpi chai decisionta apoyashpaca paicuna Jehová Diospajman cutin tigrachunmi ayudashun. Párrafo 4-pi parlashca pani Elizabethca: “Ñuca churita congregacionmanta llujchijpica paihuanca mana apanacui, parlai tucurcanichu. Chaimi ñucapajca sinchi carca. Pero ñuca churica cutin Jehová Diosta sirvinata decidishpaca: ‘Ñucata congregacionmanta llujchishcamantami achcata beneficiarishcani. Ñucaca Jehová Diospaj disciplinata chasquina importante cashcatami intindini’ nircami” ninmi. Paipaj cusa Markpish: “Huaquin huatacuna qꞌuipaca ñuca churica: ‘Cancuna ñucamanta caruyashcamanta, mana parlashcamantami Jehová Diospajman tigranata decidircani. Chaimantami Jehová Dios ñucata cutin paipaj puebloman tigrachun ayudashcamanta cushicuni’ nircami” ninmi.
13. ¿Llaquilla cashpaca picunapaj ayudatataj mashcana cangui?
13 Can ima shina sintirishcataca cambaj amigocunaman parlai. Shinallataj experienciata charij huauqui panicunahuan tiempota pasangapaj esfozari. Chashnami animarishca sintiringui (Proverbios 12:25; 17:17). Párrafo 9-pi parlashca pani Joannaca: “Ñucaca maipica ñucallami sintirij carcani. Pero ñuca amigocunahuan parlashpaca mana ñucalla sintirircanichu” ninmi. ¿Maijan huauqui panicuna paicuna nishcacunahuan canta llaquichijpica imatataj rurana cangui?
14. ¿Imamantataj caishujmanta chaishujmanta ahuantanacushpa perdonanacuna canchij?
14 Huauqui panicunaman pacienciata ricuchingapaj esforzarishunchij (Santiago 3:2). Juchayuj cashcamantami panicunaca ruraihuan o paicunapaj rimaihuanmi llaquichi tucuncuna. Apóstol Pabloca: ‘Maijan caishujta pꞌiñashpa juchachijpica, caishuj chaishuj ahuantanacushpa, perdonanacuichij’ nircami (Colosenses 3:13). Shuj panipaj familiataca congregacionmantami llujchircacuna. Paica: “Maijan turi ñañacunaca ayudashun yuyashpapish juchayujcuna cashcamantami ñucataca llaquichishcacuna. Pero Jehová Diosmi paicunata perdonangapaj ayudan” ninmi. Huaquin huauqui panicunapaj familiacunaca Diosta sirvinatami saquishcacuna. ¿Llaquilla caj familiacunataca ima shinataj ayudai tucunchij?
TUCUICUNA HUAUQUI PANICUNATA AYUDASHUNCHIJ
15. ¿Diosta sirvij huauqui panicunataca paicunapaj familiata congregacionmanta llujchijpica ima shinataj ayudana canchij?
15 Jehová Diosta sirvinata manataj saquij familiacunaman cꞌuyaita ricuchishunchij. Pani Miriampaj turitaca congregacionmantami llujchircacuna. Chaimantami Miriamca congregacionman rinataca mancharca. Paica: “Ñucaca shujtajcunaca imatashi ninga nishpami mancharcani. Pero ñuca huaquin amigocunaca paicunapishmi ñuca turimantaca llaquilla cashcarcacuna. Paicunaca ñuca turimantaca mana malta rimajcunachu carca. Chaimantami ñucallaca mana sintirircani” ninmi. Shuj panica: “Ñuca churita congregacionmanta llujchijpica ñuca cꞌuyashca turi ñañacunami ñucataca animanaman shamurcacuna. Paicunaca imata ninata mana yachashpapish ñucahuanmi huacarcacuna, animaj shimicunatami quillcarcacuna. Paicuna chashna animajpica ñucaca tranquilami sintirircani” ninmi.
16. ¿Llaquilla caj huauqui panicunataca tucuicuna ima shinallataj apoyana canchij?
16 Llaquilla caj familiacunaca paicunata cꞌuyachun animachunmi minishtincuna (Hebreos 10:24, 25). Huaquinpica huaquin huauqui panicunaca paicunapaj familiacunata congregacionmanta llujchijpica huaquin huauqui panicunaca paicunahuan mana parlashcata, paicunamanta caruyashcatami sintincuna. Pero chaitaca mana ruranachu canchij. Joven huauqui panicunaca paicunapaj yaya mamata congregacionmanta llujchijpica paicunata animachun, paicunata felicitachunmi ashtahuantajca minishtincuna. Pani Mariapaj cusatami congregacionmanta llujchircacuna. Paipaj cusaca familiata saquishpami rirca. Pani Mariaca: “Huaquin turi ñañacunaca huasimanmi shamurcacuna. Paicunaca ñucahuan yanushpa, ñuca huahuacunamanpish Bibliamanta yachachishpami ayudarcacuna. Shinallataj llaquilla sintirijpica paicunapish llaquillami sintirircacuna. Ñucahuanmi huacarcacuna. Huaquincuna ñucamanta huashalla rimai callarijpipish paicunaca difindishpami ayudarcacuna. Chashnami ñucataca achcata animashca” ninmi (Romanos 12:13, 15).
Llaquilla caj huauqui panicunata apoyangapaj esforzarishunchij. (Párrafo 17-ta ricui). *
17. ¿Ancianocunaca llaquilla caj huauqui panicunata ayudangapajca imatataj rurana can?
17 Pushaj ancianocunaca llaquilla caj familiacunata animana responsabilidadtami charinguichij (1 Tesalonicenses 5:14). Tandanacuicuna manaraj callarijpi o tucurishca huasha paicunata animangapaj esforzarichij. Paicunata visitashpapish Yayitu Diosta mañaichij. Pudishpaca paicunata predicanaman, familiahuan Diosta adoranamanmi invitai tucunguichij. Ancianocunaca llaquilla caj huauqui panicunamanmi cꞌuyaita ricuchina can. Shinallataj paicuna imapi minishtijpica ayudanami can (1 Tesalonicenses 2:7, 8).
JEHOVÁ DIOSPI CONFIASHPA CATISHUNCHIJ
18. 2 Pedro 3:9-pi nishca shinaca ¿Jehová Diosca paimanta caruyashcacuna imata rurachuntaj munan?
18 Jehová Diosca ‘shujllapish ama chingarichun, ashtahuanpish tucuicuna arrepintirichunmi’ munan (2 Pedro 3:9-ta liyipai). Jehová Diosca ñucanchijta achcata cꞌuyashcamantami paipaj Churita curca. Maijan huauqui panicuna jatun juchata rurashpa congregacionmanta caruyajpipish Yayitu Diospajca paicunapaj causaica valishcami can. Paica paimanta caruyashcacuna cutin tigrachun, Jesús parlashca shuj chingarishca jovenmantapish yachachunmi munan (Lucas 15:11-32). Diosmanta caruyaj huauqui panicunaca cutinmi Diospajman tigrashcacuna. Paicunataca congregacionpipish huauqui panicunaca allimi chasquishcacuna. Párrafo 12-pi parlashca pani Elizabethca paipaj churi cutin congregacionman tigrajpica cushillami sintirirca. Paica: “Turi ñañacuna ñucata Jehová Diospi confiachun animashcamantami achcata agradicini” ninmi. *
19. ¿Imamantataj Jehová Diospi confiashpa catina canchij?
19 Jehová Diosca ñucanchijmanca alli consejocunatami cun. Chaimantami paipi confiana canchij. Yayitu Diosca generoso, cꞌuyajmi can. Diosca paita cꞌuyajcunata, paita cazujcunataca achcatami cꞌuyan. Ñucanchij llaquicunahuan cai horasca Yayitu Diosca manataj saquingachu (Hebreos 13:5, 6). Párrafo 12-pi parlashca huauqui Markca: “Ñucanchij llaquicunahuan cai horas Jehová Diospi confiajpica paica ñucanchijtaca manataj saquinchu” ninmi (2 Corintios 4:7). Jehová Diosca ñucanchij llaquicunahuan cai horasmi fuerzata cushpa catinga. Chaimanta shuj cꞌuyashca familia Yayitu Diosta sirvinata saquijpica ñucanchij feta Jehová Diospi sinchiyachishpa, paipi confiashpa catishunchij.
CANTO 44 Shungu pꞌaquirishcami mañacuni
^ párr. 5 Shuj cꞌuyashca familia o amigo Jehová Diosta sirvinata saquijpica llaquillami sintirinchij. Cai yachaipimi Yayitu Diospish paita sirvijcuna paita sirvinata saquijpi ima shina sintirishcata ricushun. Shinallataj Diosta sirvijcunapaj familiata congregacionmanta llujchijpi, paicunata ima shina ayudanata, paicunapaj feta sinchiyachishpa ima shina catinatami yachashun. Tucuripica Diosta sirvinata saquijcunapaj familiacunata huauqui panicuna ima shina animanata, apoyanatami yachashun.
^ párr. 1 Cai yachaipica huaquin shuticunatami cambiashcanchij.
^ párr. 18 2 Pedro 3:9, NWT: Maijan gentecuna yuyashca shinaca Jehová Diosca pai cusha nishcata pajtachingapajca mana uniyanchu. Paica shujllapish ama chingarichun. Ashtahuanpish tucuicuna arrepintirichunmi cancunamanca pacienciata ricuchin.
^ párr. 80 FOTOCUNAMANTA: Shuj huauqui Jehová Diosta, familiata saquijpica paipaj huarmi, huahuacunami llaquilla sintirincuna.
^ párr. 82 FOTOCUNAMANTA: Ishqui ancianocunaca congregacionmanta shuj familiata animangapajmi visitacuncuna.
