1. ¿Jehová Diostaca ima shinallataj ni tucunchij?

JEHOVÁ DIOSCA shuj familiatami charin. Paicunamantaca Jesuspish, angelcunapishmi Yayitu Diostaca tandalla adorancuna (Colosenses 1:15; Salmo 103:20). Jesús cai Allpapi cashpaca paita catijcunamanca Jehovataca Yaya ni tucunguichijmi nircami. Shuj cutincarin paipaj discipulocunamanca Jehová Diosca ‘Ñuca Yaya cancunapaj Yayami can’ nircami (Juan 20:17). Ñucanchij Yayitu Diosman mingarishpa, bautizarishpaca huauqui panicunapajmi shuj familia shina tucunchij (Marcos 10:29, 30).

2. ¿Cai yachaipica imatataj yachashun?

² Huaquin huauqui panicunapajca Jehová Diosta shuj cꞌuyaj yayata shina ricunaca sinchimi can. Cutin shujtajcunapajca huauqui panicunaman cꞌuyaita ricuchinami sinchi can. Cai yachaipimi Jehová Diosta shuj yayata shina ricungapaj, paipajman cꞌuchuyangapaj Jesús ima shina yachachishcata ricushun. Shinallataj Jehová Diospaj ejemplota catishpaca huauqui panicunamanpish ima shina cꞌuyaita ricuchinatami yachashun.

3. ¿Ñucanchij “Yaya” nishpa Jehová Diosta mañashpaca ima shinataj paipajman ashtahuan cꞌuchuyashun?

³ Jehová Diosca cꞌuyaj Yayami can. Jesuspish Jehová Diosta Yaya nichunmi yachachirca. Shuj cꞌuyaj Yaya cashcamanta, Jehová Dios autoridadta charijpipish paihuanca ima horaspish parlai tucunchijmi. Jesusca paipaj discipulocunaman Jehová Diosta mañanata yachachicushpaca “ñucanchij Yaya” nishpa mañachunmi yachachirca (Mateo 6:9). Bibliapica Jehová  Diosmanta parlashpaca tucuita ruraj, jatun Mandaj, huiñaipaj Dios nishpami yachachin (Génesis 49:25; Isaías 40:28; 1 Timoteo 1:17). Pero Jesusca Jehová Diostaca “Yaya” nishpa ni tucushcatami yachachirca.

4. ¿Jehová Dios paipajman cꞌuchuyachun nishcataca ima shinataj yachanchij?

⁴ Huaquincunapajca Jehová Diosta shuj cꞌuyaj yayata shina ricunaca sinchimi can. ¿Imamanta? Paicuna uchillaraj cajpica tal vez yaya mamacunaca mana cꞌuyaita ricuchishcangacunachu. Pero Jehová Dios ñucanchij ima shina sintirishcata yachashpa, pai ñucanchijman cꞌuchuyasha nishcata yachashpaca cushillami sintirinchij. Bibliapica: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8). Jehová Diosca shuj propio yayata yalli cꞌuyajmi can.

5. Lucas 10:22-pi nishca shinaca ¿Jehová Diospajman cꞌuchuyangapajca imatataj rurana canchij?

⁵ Jesusca Jehová Diospajman ashtahuan cꞌuchuyachunmi ayudan. Paica allimi rijsin Jehová Dios ima shina cꞌuyaj, llaquij, mana pꞌiñarij cashcata. Chaimantami Jesusca: “Pipish ñucata rijsijca, ñuca Yayatapish ñami rijsin” nirca (Juan 14:9). Jesusca ñucanchij shuj punta huauqui shinami Jehová Diosta cazuchun, paita respetachun yachachin. Shinallataj Jehová Diospaj ñaupajpi alli ricuringapaj, paita cushichingapaj imata ruranatapishmi yachachirca. Jesusca cai Allpapi cashpaca Jehová Dios cꞌuyaj, alli cashcata intindichunmi ayudarca (Lucas 10:22-ta liyipai). Huaquin ejemplocunata ricushun.

6. ¿Jesús mañashcataca Jehová Diosca ima shinataj cutichirca?

⁶ Jehová Diosca paita alli sirvijcunapaj mañashcataca shuj yaya shinami uyan. Por ejemplo, Jesús cai Allpapi cashpaca Jehová Diostami cutin cutin mañarca. Pai mañashcataca Jehová Diosca uyarcami (Lucas 5:16). Jesusca 12 apostolcunata agllacushpapish Yayitu Diostami mañarca (Lucas 6:12, 13). Shinallataj achca preocupado cashpapish Jehová Diostami ayudachun mañarca. Judas paita traicionajpi chai sinchi pruebacunata chꞌimbapurangapajpishmi mañarca. Jehová Diosca paipaj Churi mañajpica mana uyashpalla saquirircachu.  Ashtahuanpish shuj angeltami sinchiyachichun cacharca (Lucas 22:41-44).

7. ¿Jehová Dios ñucanchij mañashcacunata uyaj cashcata yachashpaca ima shinataj sintirinchij?

⁷ Cunan punllacunapish Jehová Diosca ñucanchij mañashcacunata uyashpami paica cutichin (Salmo 116:1, 2). India llajtamanta shuj panica dimastij preocuparishca cashpami Jehová Diosta ayudachun mañarca. Paica: “Ñucaca mayo de 2019-pi llujshishca JW Broadcasting^® programata ricushpami ama dimastij preocuparingapaj imata ruranata yacharcani. Jehová Diosca ñuca minishticun horasmi ñuca mañashcacunataca cutichishpa ayudarca” ninmi.

8. ¿Jehová Diosca ima shinallataj Jesusmanca cꞌuyaita ricuchirca?

⁸ Jehová Diosca ima shinami paipaj Churi cai Allpapi cajpi cꞌuyaita ricuchirca. Chashnallatajmi ñucanchijmanpish cꞌuyaita ricuchin (Juan 5:20). Jehová Diosca Jesustaca paipaj feta sinchiyachishpa, preocupado cajpipish animashpa, tucui imalla minishtirishca cosasta cushpami ayudarca. Jesús tucuipi allita rurajpimi paica achcata cꞌuyarca (Mateo 3:16, 17). Jesusca paipaj Yaya paita ayudacushcamantami mana pailla sintirirca (Juan 8:16).

9. ¿Jehová Dios ñucanchijta cꞌuyashcataca ima shinataj yachanchij?

⁹ Ñucanchijpish Jesús shinallatajmi Jehová Diospaj cꞌuyaita charishcanchij. Caipi yuyashun: Jehová Diosca ñucanchijta achcata cꞌuyashcamantami paipaj puebloman pushamushca. Diosta sirvijcunahuan tandalla cashpaca cushillami sintirinchij. Caishujmanta chaishujmantapishmi animanacunchij (Juan 6:44). Yayitu Diospaj ayudamantami ñucanchij feta sinchiyachingapajpish achca ayudacunata charinchij. Minishtirishca cosascunatapish cada punllami charinchij (Mateo 6:31, 32). Jehová Dios ñucanchijta achcata cꞌuyashcata yachashpaca ñucanchijpish paitaca ashtahuanmi cꞌuyanchij.

10. ¿Huauqui panicunaman Jehová Dios shina cꞌuyaita ricuchingapajca imatataj rurana canchij?

¹⁰ Jehová Diosca tucui huauqui panicunatami cꞌuyan. Pero maipica ñucanchijca shujtaj culturamanta cashcamanta o uchillapi ima shina huiñashcamantami huauqui panicunaman cꞌuyaita ricuchinaca sinchi cai tucun. Ñucanchij pandarishcacunahuanpishmi huauqui panicunata llaquichi tucunchij. Pero tucuicunami Jehová Dios ima shinami cꞌuyan chashnallataj huauqui panicunata cꞌuyangapaj esforzarina canchij (Efesios 5:1, 2; 1 Juan 4:19). Jehová Diospaj ejemplomanta ashtahuan yachashunchij.

11. ¿Jesusca ima shinataj Jehová Dios shina cꞌuyaj cashcata ricuchirca?

¹¹ Yayitu Diosca tucuicunatami achcata cꞌuyan (Lucas 1:78). Cꞌuyaita ricuchijcunaca shujtajcuna llaquilla cajpica paicunata ayudangapaj, animangapajmi tucui pudishcata rurancuna. Jesusca gentecunata alli tratashpa, paicunaman cꞌuyaita ricuchishpami Jehová Dios gentecunamanta ima shina preocuparishcata ricuchirca (Juan 5:19). Bibliapica: “Chaipica michij illajlla, ovejacuna caita chaita puricuj shinata, achcacunata ricushpami paicunataca achcata llaquirca” ninmi (Mateo 9:36). Jesusca mana cꞌuyashpallachu saquirirca. Paica ungushcacunata, llaquilla cajcunatami ayudashpa cꞌuyaita ricuchirca (Mateo 11:28-30; 14:14).

12. ¿Huauqui panicunamanca ima shinallataj cꞌuyaita ricuchi tucunchij?

¹² Achca huauqui panicunami llaquicunata charincuna. Chaimantami paicunaca ñucanchij cꞌuyaita ricuchichun minishtincuna. Por ejemplo, shuj panichari ancha ungüihuan can. Pero paica ima shina sintirishcataca manachari huillan. ¿Paita ayudangapajca imatataj rurana canchij? Tal vez familiamanmi minishtirishca cosascunata cushpa ayudai tucunchij. Shinallataj micunitata apashpa, huasita pꞌichashpami ayudai  tucunchij. Cutin tal vez shuj huauquipish trabajo illajchari saquirirca. Cai huauqui trabajota cutin japingacamami pudishpaca cullquihuan ayudai tucunchij.

13, 14. ¿Ñucanchijpish Jehová Dios shina ima shinataj generosos cai tucunchij?

¹³ Jehová Diosca generosomi can (Mateo 5:45). Ñucanchijpish huauqui panicunata cꞌuyashcata ricuchingapajca paicuna ayudata mañangacamaca mana shuyanachu canchij. Ima shinami Jehová Dios ayudan chashnallatajmi ayudana canchij. Paica intitaca tucuicunamanmi cun. Cai intimantaca tucuicunami beneficiarinchij. Jehová Diosca imalla minishtishcacunata cushpami achcata cꞌuyashcata ricuchin. Ñucanchijpish caita yachashpaca cushillami sintirinchij.

¹⁴ Achca huauqui panicunaca caishuj huauqui panicunata ayudangapajmi Jehová Diospaj ejemplota catincuna. 2013 huatapica Filipinas llajtapimi jatun acapana tiyarca. Chaipica achca huauquicunami huasicunata, imalla charishcacunata chingachircacuna. Pero muyundij Allpamanta huauqui panicunaca paicunatami rato ayudarcacuna. Paicunaca cullquihuan o imacunallata rurashpami ayudarcacuna. Shinallataj casi shuj huatapajca 750 huasicunatami shayachircacuna. Cutin COVID-19 ungüi tiyajpipish huauqui panicunaca caishujmanta chaishujmantami ayudanacurcacuna. Huauqui panicunata ayudangapaj listos cashpaca paicunata achcata cꞌuyashcatami ricuchishun.

15, 16. Lucas 6:36-pi nishca shinaca ¿ima shinataj Jehová Diospaj ejemplota catina canchij?

¹⁵ Jehová Diosca cꞌuyaj Diosmi can. Chaimantami paica cada punlla ñucanchijtaca perdonan (Lucas 6:36-ta liyipai; Salmo 103:10-14). Jesuspish paipaj discipulocuna juchayujcuna cajpipish paicunatami cꞌuyashpa perdonarca. Ashtahuancarin tucuicunata cꞌuyashcamantami ñucanchijmanta huañurca (1 Juan 2:1, 2). Jehová Diospish, Jesuspish achcata cꞌuyashcata yachashpaca paicunapajmanmi ashtahuan cꞌuchuyanchij.

¹⁶ Huauqui panicunata perdonashpaca paicunamanmi cꞌuyaita ricuchinchij (Efesios 4:32). Maipica juchayujcuna cashcamantami paicunata perdonanaca sinchi can. Chashna cajpipish paicunata perdonangapajmi esforzarina canchij. Shuj panitaca La Atalaya revistapi  llujshishca “Perdónense liberalmente unos a otros” nishca temami paitaca shujtajcunata perdonachun ayudarca. * Paica: “Caita yachashpaca shujtajcunata perdonana ñucapajllataj alli cashcatami intindircani. Perdonashpaca paicuna llaquichishcamantaca mana resentidos saquirishunchu. Ashtahuanpish paicunahuan alli apanacungapajmi esforzarishun” ninmi. Huauqui panicunata cꞌuyashpaca paicunatami perdonashun, Jehová Diospaj ejemplotapishmi catishun.

17. Mateo 5:16-pi nishca shinaca ¿ima shinataj Jehová Diospaj shutita jatunyachi tucunchij?

¹⁷ Diospaj pueblopi cashcamantami achcata agradicinchij. Shujtajcunapish ñucanchijhuan Yayitu Diosta sirvichunmi munanchij. Chaimanta Jehová Diospaj shutitapish, Diospaj pueblotapish ama yangapi churangapajmi esforzarina canchij. Ñucanchij alli comportarijta ricushpami shujtajcunaca Jehová Diosta sirvinata munangacuna (Mateo 5:16-ta liyipai).

18. ¿Mana manchashpa huillangapajca imatataj yuyaipi charina canchij?

¹⁸ Yayitu Diosmanta predicanata manataj saquijpimi huaquincunaca ñucanchijtaca catirashpa llaquichingacuna. ¿Mana manchashpa huillangapajca imatataj rurana canchij? Jehová Dios, Jesús ñucanchijta ayudanataca allimi yuyarina canchij. Jesusca paipaj discipulocunamanca: “Imatataj nishun, imatataj rimashun nishpa ama chai yuyailla canguichijchu. Cancuna ña rimagrijpica, imalla rimana cashcata Taita Diosmi rimachinga. Mana quiquincunapaj yuyaimantachu rimanguichij, ashtahuanpish cancunapaj Yayapaj espiritumi cancunataca rimachinga” nircami (Mateo 10:19, 20).

19. ¿Huauqui Robertpaj ejemplomantaca imatataj yachanchij?

¹⁹ Sudáfrica llajtapi causaj huauqui Robertpaj ejemplopi yuyashun. Huauqui Robertca Bibliamantami estudiai callarirca. Ñapish mana yuyashcapimi paitaca cuartelman militarcunaca apasha nircacuna. Cai huauquica cuartelmanca  mana risha nircachu. Chaimi militarcunaca juezpajman pusharca. Paica imamanta mana chaipi participashcatami juezmanca intindichirca. Chashnami Robertca huauqui panicunata valorashcata ricuchirca. Cai juezca mana yuyashcapimi paitaca: “¿Pitaj cambaj huauqui panicunaca?” nishpa tapurca. Chaimi chai huauquica chai punllapaj tiyaj versota yuyarirca. Chai versoca Mateo 12:50-mi carca. Chaipica: “Maijanpish jahua pachapi caj ñuca Yayapaj munaita rurajcunami ñuca huauqui, ñuca pani, ñuca mamaca nircami” ninmi. Jehová Diosmi cai tapuita cutichichun, shujtaj tapuicunatapish cutichichunca paipaj espíritu santohuan ayudarca. Diosca huauqui Robert mana manchashpa huillashcamantami cushilla sintirishcanga. Shinallataj ñucanchijpish mana manchashpa huillajpica Jehová Diosca cushillami sintiringa.

20. Juan 17:11, 15-pi nishca shinaca ¿imatataj rurashpa catina canchij?

²⁰ Huauqui panicunahuan Diospaj pueblopi cashcamanta valorashunchij. Yaya Jehová Diosta, cꞌuyaj huauqui panicunatami charinchij. Chaimantami Jehová Diostaca agradicina canchij. Pero Diablopish, paita apoyajcunapish Jehová Diosca mana cꞌuyanchu nishpa yuyachun, huauqui panicunahuanpish chꞌicanyanacushpa causachunmi munan. Jesusca paipaj Yayataca canta sirvijcuna tandalla cachun cuidahuangui nishpami mañarca (Juan 17:11, 15-ta liyipai). * Yayitu Diosca Jesús mañashcatami cutichishca. Chaimanta Jesuspaj ejemplota catingapaj, Yayitu Dios cꞌuyashcatapish amataj cungaringapaj, huauqui panicunatapish shuj familiata shina ricungapaj esforzarishunchij.