1, 2. ¿Ageoca ñucanchij causan punllacunapi ima laya chujchui tiyanamantataj parlacurca?

HUATA 2015-pica Nepal llajtapimi jatun terremoto tiyarca. Chaipi causajcunaca: “Tiendacunapish, jatun edificiocunapish ratomi urmarca. ‘Huaquin gentecunaca chai terremotoca mana achcata demorarcachu’ nircacunami. Pero ñucanchijpajca chai terremotoca achcatami demorarca. Gentecunaca dimastijmi mancharircacuna” nircacunami. ¿Manachu ñucanchijpish chashna llaquicunata charishca cashpaca chaita cungarinaca sinchi canman?

² Pero cunan punllacunapica shujtaj chujchuimi tiyan. Caica mana shuj terremotochu can. Jehová Diosca ñaupa punllacunamanta cunan punllacunacamami tucui llajtacunataca chujchuchicun. Ageomi cai profeciamanta parlarca. Ageo 2:6-pica: “Tucuita Mandaj Diosca cashnapishmi nin: Ñallami jahua pachatapish, cai pachatapish, mama cucha yacutapish, chaquishca allpatapish chujchuchisha” ninmi.

3. ¿Ageopi parlashca chujchuihuan, cai Allpapi tiyaj chujchuihuanca imapitaj chꞌican can?

³ Terremoto tiyajpica achca llaquicunami tiyan. Pero Ageo parlashca profeciaca mana chashnachu can. Jehová Diosca: “Shinallataj tucui llajtacunapi causajcunatapish chujchuchishami. Tucui llajtacunapi causajcuna shamuchun munashcami shamunga. Shinallataj cai huasitaca sumajyachishami” ninmi (Ageo 2:7). ¿Ageo causashca punllacunapica chai profeciaca ima shinataj pajtarirca? ¿Cunan punllacunapish ima shinataj cai profeciaca pajtaricun? Cai yachaipimi cai tapuicunata ricushun. Shinallataj cai profecía pajtarichun ñucanchijpish ima shina ayudai tucushcatami yachashun.

4. ¿Jehová Diosca imamantataj profeta Ageomanca shuj valishca trabajota mingarca?

⁴ Jehová Diosca profeta Ageomanmi shuj valishca trabajota mingarca. Jesús manaraj cai Allpaman shamujpi huata 537-pica judiocunaca Babiloniamantami Jerusalenman tigrarcacuna. Paicunaca Jerusalenman tigrashcahuanmi Diospaj templotaca shayachi callarircacuna (Esdras 3:8, 10). Pero tiempo qꞌuipaca paicunatami contracunaca jarcai callarircacuna. Chaimi paicunaca desanimarircacuna, Diospaj templota shayachinatapish saquircacuna (Esdras 4:4; Ageo 1:1, 2). Chaimantami Jesús manaraj huacharijpi huata 520-pica Jehová Diosca Ageotaca paicunata animachun, Diospaj templo huasitapish shayachishpa ayudachun animarca (Esdras 6:14, 15). *

5. ¿Ageo nishca shimicunaca ima shinataj judiocunapaj feta sinchiyachirca?

⁵ Ageo nishca shimicunaca judiocuna Jehová Diospi paicunapaj feta sinchiyachichunmi animashcanga. Ageoca mana manchashpami desanimarishca judiocunamanca: “Tucui cai llajtapi causajcunapish, cai huasita rurashpa catichijlla, ama saquirichijchu. Ñucaca, cancunahuanmi cani tucuita ruraj Jehová Diosca” nishpami animarca (Ageo 2:4, NWT ). “Tucuita ruraj Jehová Dios” nishca shimita uyashpaca judiocunaca achcatami animarishcangacuna. Paicunaca Diospaj templota shayachingapajca Jehová Dios paipaj angelcunahuan ayudanapimi tucui shunguhuan confiana carcacuna.

6. ¿Ageo parlashca profecía pajtarijpica imataj tucurca?

⁶ Jehová Diosca Ageomanca tucui llajtacunatami chujchuchigrini nishcata judiocunaman huillachunmi mandarca. Cai shimicunaca Diospaj templota shayachinata saquijcunataca achcatami animashcanga. Jehová Diosca Persia llajtatami chujchuchigrini nircami. Chai llajtaca tucui llajtacunamanta yalli jatun mandajmi carca. ¿Ageo huillashca profecía pajtarijpica imataj tucurca? Puntaca, judiocunaca Diospaj templotami shayachinata tucuchircacuna. Qꞌuipaca, mana judiocunaca judiocunahuanmi shuj shinalla Diospaj templopi Jehová Diosta adorarcacuna. Cai shimicunaca de seguromi judiocunataca achcata animashcanga (Zacarías 8:9).

7. ¿Cunan punllacunapica ima shinataj Ageo nishca profecía pajtarichun ayudacunchij?

⁷ ¿Cunan punllacunapica Ageo nishca profeciaca ima shinataj pajtaricun? Jehová Diosmi tucui llajtacunata chujchuchicun. Ñucanchijpish cai pajtarichunmi ayudacunchij. 1914 huatapica Jehová Diosca Jesucristotami paipaj Gobiernopi mandachun agllarca (Salmo 2:6). Tucui Allpata mandajcunaca Jesús mandai callarishcata yachashpami paicunaca pꞌiñarircacuna. ¿Imamantataj paicunaca chashna pꞌiñarircacuna? Jehová Diosca paipaj Gobiernopi mandachunmi ña shuj mandajta mandachun agllarca (Lucas 21:24). Diospaj puebloca 1919 huatamantami Diospaj Gobiernollami sumaj causaita cunga nishpa ashtahuan huillashpa caticushcacuna. Chaimantami Ageo nishca llajtacunata chujchuchina profeciataca cunan punllacunapi Diospaj alli huillaicunata mundo enteropi predicashpa pajtarichun ayudacunchij (Mateo 24:14).

8. Salmo 2:1 al 3-pi nishca shinaca ¿Diospaj Gobiernomanta predicajpica la mayoría gentecunaca ima shinataj sintirishcacuna?

⁸ ¿Diospaj Gobiernomanta uyashpaca huaquin gentecunaca imatataj rurashcacuna? Maijancunaca pꞌiñarishcami (Salmo 2:1-3-ta liyipai). Llajtacunata mandajcunaca Jehová Dios agllashca Gobiernotaca mana chasquisha  nincunachu. Paicunaca Diospaj Gobiernomanta predicajpica chaica mana alli huillaicunachu can nishpami yuyancuna. Huaquin gobiernocunacarin Jehová Diosmanta predicachunmi jarcashcacuna. Shujtaj gobiernocunacarin Diostami sirvinchij nishpapish paicunapaj mandanataca mana saquisha nishcacunachu. Jesuspaj punllacunapica Jesusta apoyajpimi Diosta sirvijcunataca catirashpa llaquichircacuna. Cunan punllacunapish Jesusta apoyajpimi Diosta sirvijcunataca catirashpa llaquichincuna (Hechos 4:25-28).

9. ¿Gentecuna Diosmanta mana uyasha nijpipish Jehová Diosca imatataj ruracun?

⁹ Huaquin gentecunaca Jehová Diospaj Gobiernomantaca mana uyasha nincunachu. Jehová Diosca Salmo 2:10 al 12-pica: “Cunanca jatun mandajcuna alli yuyaita japichij. Cai pacha juezcunapish ñuca cunashcata uyaichij. Mandaj Diospajtaca manchaihuan ruraichigari. Chujchushpa cushicuichigari. Pai pꞌiñarishpa cancunapaj causaita ama chingachichun paipaj Churita alli nichij. Pai pꞌiñarishpaca mana saquingachu. Paipi shunguta churajcunaca cushichishcami canga” ninmi. Jehová Diosca cꞌuyaimantami paipaj Gobierno parte tucuchun cai laya gentecunamanca tiempota cun. Pero ñami tucuri punllacunapi causacunchij (2 Timoteo 3:1; Isaías 61:2). Chaimantami gentecunataca Jehová Diosta sirvichun, paipaj Gobiernota apoyachun utca ayudana canchij.

10. Ageo 2:7 al 9-pi nishca shinaca ¿huaquincunaca ima shinataj sintirincuna?

¹⁰ Llajtacunatami chujchuchisha nishpa Ageo parlashca profeciamanta yachashpaca huaquin gentecunaca cushillami sintirincuna. Ageoca: “Tucui llajtacunapi causajcuna shamuchun munashcami shamunga” nircami. ¿Chaica imatataj nisha nin? Alli shungu gentecuna tucui llajtacunamanta Jehová Diosllata adorangapaj paipaj puebloman yaicuna cashcatami nisha nin (Ageo 2:7-9-ta liyipai). * Profeta Isaías, Miqueaspish tucuri punllacunapi chashna tucunatami huillarca (Isaías 2:2-4; Miqueas 4:1, 2).

11. ¿Huauqui Kenca punta cutin Diospaj Gobiernomanta uyashpaca imatataj rurarca?

 ¹¹ Huauqui Kenca central mundialpimi sirvicun. Paimanta yachashun. Pai Jehovamanta rijsishca horasmantaca ñami 40 huatacuna pasashca. Paica: “Ñucaman Jehová Diosmanta predicajpi tucuri punllacunapi causacushcata yachashpaca cushicurcanimi. Shinallataj huiñai causaita charingapajca Jehová Diosmanta yachana cashcata, cai mana alli mundomanta llujshina cashcatami intindircani. Jehová Diosta sirvingapajca paitami mañarcani. Qꞌuipaca tucui mana alli cosascunata huashaman saquishpami Jehová Diospaj Gobiernota apoyai callarircani. Chai Gobiernotaca pi mana cuyuchi tucunchu” ninmi.

12. ¿Cai tucuri punllacunapica Diospaj templo espiritual ñaupajpica imataj tucucushca?

¹² Cai tucuri punllacunapipish Jehová Diosca paipaj pueblotami bendiciashpa caticun. Cai tucuri punllacunapica achca gentecunami Diospaj pueblomanca yaicucushcacuna. 1914-pica ashacunallami Diospaj pueblopi carca. Pero cunan punllacunapica 8 millón yallimi Diospaj pueblopi, Jehovata sirvicunchij. Shinallataj cada huatami achca millón gentecunaca ñucanchijhuan Jesús huañushcata yuyarina tandanacuiman rincuna. Chashnami alli shungu gentecunaca Diospaj templo espiritual ñaupajpi cai Allpapi Jehová Diosta sirvicunchij. ¿Cai templo espiritualca imatataj ricuchin? Caica Jehová Diosllata alli adorangapaj, pai imacunallata rurashcatami ricuchin. Gentecuna Jehová Diosmanta yachashpa, paicunapaj causaipi cambiocunata rurashpaca Jehovapaj shutitami jatunyachincuna (Efesios 4:22-24).

13. ¿Cunan punllacunapica ima shujtaj profeciataj pajtaricun? (Página unopi tiyaj fotota ricui).

¹³ Achca gentecuna Jehová Diosta sirvingapaj paipaj puebloman yaicucushcamantami Isaías capítulo 60-pi tiyaj profeciatapish pajtachicuncuna. Isaías 60:22-pica: “Uchillaca huaranga huarangami tucunga. Uchilla llajtaca imatapish rurai tucuj pueblomi tucunga. Mandaj Dios ñucami ñuca chashna rurashami nishca punllapi chashna rurajpi chaica utca pajtanga” ninmi. Diospaj puebloman yaicujcunaca alli cualidadcunatami charincuna. Chaimantami paicunaca Diospaj Gobiernomanta huillangapajpish listos cancuna. Diosta sirvijcunaca paicunapaj alli ruraicunahuanmi Diospaj obrata apoyacuncuna. Chashnami paicunaca: “Llajtacunapaj  lechetamari chuchunguichij” nishca profeciata pajtachicuncuna (Isaías 60:5, 16). Cashna huauqui panicunahuanmi 240 llajtacunapi Yayitu Diosmanta huillai tucushcanchij. Shinallataj publicacioncunatapish mil yalli shimicunapimi traducicunchij.

14. ¿Cunan punllacunapica gentecunaca imatataj decidina can?

¹⁴ Cunan punllacunapica llajtacunatami chujchuchisha nishca profeciaca gentecuna alli decidichunmi ayudacun. ¿Gentecunaca Diospaj Gobiernotachu apoyangacuna? ¿O cai mundopi tiyaj gobiernocunapichu confiangacuna? Diosta sirvijcunaca cai Allpapi tiyaj leycunataca cazunchijmi. Pero politicapica mana chagrurinchijchu (Romanos 13:1-7). Allimi yachanchij Diospaj Gobiernolla tucui llaquicunata tucuchina cashcata. Cai Gobiernoca mana cai mundopajchu can (Juan 18:36, 37).

15. ¿Apocalipsis libropica Diosta sirvijcunaca ima pruebacunahuantaj chꞌimbapuranga nin?

¹⁵ Apocalipsis libropica tucuri punllacunapi Diosta sirvijcuna huaquin pruebacunata charinatami ricuchin. Chaimantami Diosta sirvijcunaca jarcaicunata, llaquicunata chꞌimbapurashun. Cai Allpapi tiyaj gobiernocunaca paicunata adorachunmi obligangacuna. Pero paicunata mana apoyajpica catirashpami llaquichisha ningacuna (Apocalipsis 13:12, 15). Apocalipsis 13:16-pica: “Shinallataj uchillacunata, jatuncunata, charijcunata, huajchacunata, amopajta rurajcunata, amopajta mana rurajcunatapish tucuicunata alli lado maquipi cashpa, frentepi cashpapish, ricuna sellota churachunmi mandarca” ninmi. Ñaupa punllacunapica esclavocunami paicunapaj maquipi o frentepi señalta charijcuna carca. Chashnami paicunapaj pi amo cashcata yachai tucurcacuna. Cunan punllacunapipish gobiernocunaca tucuicuna maquipi o frentepi shuj señalta charichunmi munangacuna. ¿Caica imatataj ricuchin? Gentecunaca paicunapaj ruraicunahuan, paicunapaj yuyaicunahuan cai Allpapi tiyaj gobiernocunata apoyashpa, politicapish chagrurishpami paicunaca cai señalta charishcata ricuchincuna.

16. ¿Imamantataj ñucanchij crishcacunataca Jehová Diospi cunanmanta sinchiyachina canchij?

¹⁶ ¿Ñucanchijpish cai señalta ama charingapajca imatataj rurana canchij? Cai señalta frentepi, maquipi ama charingapajca gobiernocunataca mana apoyanachu canchij. Shinallataj politicapipish mana chagrurinachu canchij. Paicunata mana apoyasha nishcamantami Diosta sirvijcunaca achca llaquicunata charishun. Apocalipsis libropica frentepi o maquipi mana señalta charijcunaca: ‘Pi mana cꞌatui tucungachu, imata mana randi tucungachu’ ninmi (Apocalipsis 13:17). Diosta sirvijcunaca allimi yachanchij Apocalipsis 14:9, 10-pi tiyaj señalta charijcunahuan ima tucunata. Pero ñucanchijca chai señaltaca mana charisha ninchijchu. Ashtahuanpish Jehová Diospajllami casha ninchij (Isaías 44:5). Cunanmantami Jehová Diospi tucui shunguhuan confiashcata ricuchina canchij. Chaita rurajpica Jehová Diosca paipajlla cashcamantami cushilla sintiringa.

17. ¿Jehová Diosca imamantataj pacienciata charin?

¹⁷ Jehová Diosca cai tucuri punllacunapica achca pacienciatami charishca. Paica tucuicuna arrepintirishpa, alli decisionta agllashpa paita sirvichunmi munan (2 Pedro 3:9, NWT ). Pero Yayitu Diosca mana tucui vida shuyangachu. Paita mana chasquisha nijcunaca ima shinami Faraón causashca punllacunapi tucuchishca carca chashnallatajmi tucuchishca canga. Jehová Diosca faraontaca: “Ñucaca cantapish, can mandacun gentecunatapish llaquichingapaj ñuca maquita chutajpica ñami tucuicuna cai pachamanta illanguichijman. Ñucaca imatapish  rurai tucuj cashcata canpi ricuchishpa, tucui cai pachapi ñuca shuti huillashca cachunmi cantaca churarcani” ninmi (Éxodo 9:15, 16). Tucui gentecunami Jehová Dioslla alli Mandaj cashcataca yachangacuna (Ezequiel 38:23). ¿Caica ima shinataj pajtaringa?

18. a) ¿Ageo 2:6, 20 al 22-pi tiyaj profeciaca ima tucuri chujchuimantataj parlan? b) ¿Ageo 2:6, 20 al 22-pi parlashca profecía shamuj punllacunapi tucui pajtarinataca ima shinataj yachanchij?

¹⁸ Profeta Ageo huañushca qꞌuipaca apóstol Pabloca Ageo 2:6, 20 al 22-pi nishca profecía tucuri punllapaj pajtarina cashcatami ricuchirca (Ageo 2:6, 20-22-ta liyipai). Pabloca: “Cunancarin Diosca: ‘Shuj cutinhuan rimashpaca, mana cai pachallatachu chujchuchisha, ashtahuanpish jahua pachandijmi chujchuchisha’ nircami. Chashna: ‘Shuj cutinhuan chujchuchishami’ nishcaca, Dios rurashca cuyuchipajcunata anchuchina cashcatami nisha nin. Chaipimi, mana cuyuchinapaj cashcacunalla saquiringa” nircami (Hebreos 12:26, 27). Cai profeciaca Ageo 2:7-pi parlaj profeciahuanca mana igualchu can. Ageo 2:6, 20-22-pi tiyaj profeciaca Diosta mana sirvisha nijcuna Faraón shina tucurina cashcatami ricuchin.

19. a) ¿Imataj mana chujchuchishca canga? b) ¿Chaitaca ima shinataj yachanchij?

¹⁹ ¿Imataj mana chujchuchishca o tucuchishca canga? Apóstol Pabloca: “Chaimanta mana cuyuchipaj shuj Gobiernota chasquigrishcamantaca Dios yallitaj llaquij cashcata ricuchishpa catichun tucui shunguhuan sirvishpa catishunchij. Dios Yallitaj llaquij cashcata ricuchishcamantami manchaihuan, achca respetohuan, pai munashca shina paitaca adorai tucunchij” ninmi (Hebreos 12:28, NWT ). Ageo 2:6, 20 al 22-pi nishca chujchui pajtarishca qꞌuipaca Diospaj Gobiernollami tiyanga (Salmo 110:5, 6; Daniel 2:44).

20. a) ¿Gentecunaca imatataj utca decidina can? b) ¿Ñucanchijpish paicunata ayudangapajca imatataj rurana canchij?

²⁰ Mana achca tiempo tiyanchu. Chaimanta gentecunaca utcami Yayitu Diosta sirvinata agllana can. Cai mundota apoyashpaca tucui chingachishcacunami canga. Pero paicunapaj causaipi cambiocunata rurashpa Jehová Diosta sirvinata decidishpaca huiñai causaitami charingacuna (Hebreos 12:25). Ñucanchijpish gentecunaman predicashpa paicuna alli decisionta agllachun ayudashunchij. Chaimanta achca gentecuna Diospaj Gobiernota apoyachun tucui pudishcata rurashunchij. Jesús nishca shimicunatapish yuyaipi charishunchij. Paica: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nircami (Mateo 24:14).