1. ¿Jesús cai Allpata 1.000 huatacunata mandacujpica imataj tucunga?

 JESÚS cai Allpata 1.000 huatacunata mandacujpica ñucanchij huañushca familiacunapish, shujtaj huañushcacunapishmi causaringacuna. Chaita ricushpaca Jehová Diospish, tucui gentecunapishmi cushilla sintirishun (Job 14:15). Ima shinami ña ricushcanchij manaraj huañushpa allita rurajcunapaj shuticunaca causaita chasquinapaj libropimi quillcashca can. Chaimantami paicunaca huiñai causaita charingapaj causaringacuna (Hechos 24:15; Juan 5:29). Quizás ñucanchij huañushca familiacunaca callari causarigrijcunapuramantami canga. * Ashtahuanpish Diosta rijsina, sirvina oportunidadta mana charijcunaca juzgashca cangapajmi causaringacuna.

2, 3. a) Isaías 11:9, 10-pi nishca shinaca ¿causarigrijcunaca imacunallamantataj yachana cangacuna? b) ¿Cai yachaipica imatataj yachashun?

² Cai Allpapi causarigrijcunaca achcatami yachana cangacuna (Isaías 26:9; 61:11). Chaimi achca millón gentecunaman yachachina tucunga (Isaías 11:9, 10-ta liyipai). Manaraj huañushpa mana allita rurajcunaca Jesucristomanta, Jesús quishpichishcamanta, Diospaj Gobiernomanta, Diospaj shutita jatunyachinamantami yachana cangacuna. Manaraj huañushpa  allita rurajcunapish caicama Jehová Dios imata rurashcatami yachana cangacuna. Cai allita rurajcunamanta huaquincunaca tucui Bibliata manaraj quillcashcallapitajmi huañurcacuna. Chaimantami allita rurajcuna, mana allita rurajcunapish achcata yachana cangacuna.

³ Cai yachaipica cai catij tapuicunatami cutichishun. ¿Armagedón qꞌuipaca achca millón gentecunamanca ima shinataj yachachingacuna? ¿Chai yachachishcacunata cazujcunahuanpish, mana cazujcunahuanpish imataj tucunga? Cai tapuicunamanta yachanaca achca valishcami can. Shinallataj Daniel y Apocalipsis librocunamanta yachashpami huañushcacuna causarishpa paicuna ima tucunata ricushun. Callaringapajca Daniel 12:1 y 2-mantami yachashun.

4, 5. Daniel 12:1-pi nishca shinaca ¿cai tucuri punllacunapica imataj tucunga?

⁴ Daniel 12:1-ta liyipai. Daniel libropica cai tucuri punllacunapi ima tucuna cashcatami yachachin. Por ejemplo, Daniel 12:1-pica jatun mandaj Miguel o Jesucristomi ‘Diospaj pueblota cuidangapaj, pushangapaj jataringa’ nircami. Cai shimicunaca huata 1914-pimi Diospaj Gobiernopi Jesús mandai callarijpi pajtari callarirca.

⁵ Shinallataj Danielca cai tucuri punllacunapi jatun llaqui tiyanatami parlarca. Chai tiempopica Jesucristoca Diospaj pueblota quishpichingapaj shamunatapishmi nirca. Daniel 12:1-pi, Mateo 24:21-pipish chai jatun llaqui punllacunallamantatajmi parlan. Chai jatun llaqui punllacuna tucurigrijpi Armagedón nishca macanacui tiyajpica, Jesusca Diospaj pueblota difindingapajmi shamunga. Armagedonmanta quishpirigrijcunataca Apocalipsis libropica: ‘Pi mana yupai tucuipaj achca gentecunami can’ ninmi (Apocalipsis 7:9, 14).

6. ¿Achca gentecuna jatun llaqui punllacunamanta quishpirishca huashaca imataj tucunga? (Cai Allpapi causarinamanta parlaj “Caitami tapushcacuna” nishca yachaita ricui).

⁶ Daniel 12:2-ta liyipai. ¿Yallitaj achca gentecuna jatun llaqui punllacunamanta quishpirishca huashaca imataj tucunga? Daniel 12:2-pi nishca shinaca huañushcacunaca causaringami. Ñaupaca cai versoca jahua pachapi causarinamanta parlacushcatami crij carcanchij. Shinallataj cai verso 1918 huatamanta cutin causarij laya ashtahuan predicashpa catinamanta parlacushcatami crij carcanchij. * Pero cunanca cai versoca Armagedón qꞌuipa cai Allpapi causarinamanta parlacushcatami intindinchij.

7. a) ¿Huaquincunaca huiñaita causangapajmi causaringacuna nishpaca imatataj nisha nin? b) ¿Ñaupa tiempopi causarishcacunahuan Paraíso Allpapi causarigrijcunahuanca imapitaj chꞌican can?

⁷ ¿Daniel 12:2-pica ‘huaquincunaca huiñaita causangapajmi causaringacuna’ nishpaca imatataj nisha nin? Armagedón qꞌuipa causarijcuna Jehová Diosmanta yachashpa, Jesusta, Jehová Diostapish cazushpa huiñai causaita chasquinatami nisha nin (Juan 17:3). Ñaupa tiempopi causarishcacunaca cutinmi huañurcacuna (Hebreos 11:35). Cutin Paraíso Allpapi causarigrijcunaca huiñai causaita chasquishpaca manataj huañungacunachu.

8. ¿‘Huaquincunaca pingaichishca cangapajmi causaringacuna’ nishpaca imatataj nisha nin?

 ⁸ ¿Daniel 12:2-pica: ‘Huaquincunaca huiñaita pingaichishca cangapajmi causaringa’ nishpaca imatataj nisha nin? Huaquin causarijcuna Diosta mana cazusha nishcamanta huiñai causaita mana chasquinatami nisha nin. Paicunapaj shuticuna huiñai causaita chasquinapaj libropi mana quillcashca cashcamantami huiñaipaj tucuchishca cangacuna. Shinaca Daniel 12:2-pica huaquincuna causarishca huasha Diosta cazushcamanta huiñai causaita chasquigrishcatami parlan. Shinallataj caishujcunaca causarishca huasha Diosta mana cazushcamanta huiñaipaj tucuchishca canatapishmi parlan (Apocalipsis 20:12). *

9, 10. a) ¿Jatun llaqui punllacuna qꞌuipaca imataj ashtahuan tucunga? b) ¿Picunataj lucerocuna shina achijyangacuna?

⁹ Daniel 12:3-ta liyipai. ¿Ñalla tiyagrij jatun llaqui punllacuna huashaca imataj ashtahuan tucunga? Daniel 12:3-pimi caimanta parlan.

¹⁰ ¿Picunataj lucerocuna shina achijyangacuna? Mateo 13:43-pica Jesusca caimantami parlarca. Paica: “Chai punllacunapica cashcata rurajcunaca, paicunapaj Yayapaj Gobiernopimi inti achijyachij shina achijyachingacuna” nircami. Cai shimicunata nishpaca Jesusca jahua pacha Gobiernopaj huahuacunamantami parlacurca (Mateo 13:38). Shinaca Daniel 12:3-pica Jesushuan mandangapaj agllashca ungidocuna imallata ruragrishcatami parlacun.

11, 12. ¿Ungidocunaca 1.000 huatacunata mandacushpaca imatataj rurangacuna?

¹¹ Cai Allpata 1.000 huatacunata mandacushpaca ungidocunaca achcacunamanmi allita ruranata yachachingacuna. Paicunaca Jesushuanmi cai Allpapi achca gentecunaman yachachichun ayudangacuna. Ashtahuancarin Jesushuan mandangapaj agllashca ungidocunaca sacerdotecunapishmi cangacuna (Apocalipsis 1:6; 5:10; 20:6). Chaimi tucui gentecunata jambishpa jucha illajcuna tucuchun ayudangacuna (Apocalipsis 22:1, 2; Ezequiel 47:12). Caicunata ruracushpaca ungidocunaca dimastij cushillami sintiringacuna.

¹² ¿Picunamantaj allita ruranata yachachingacuna? Cai Allpapi causarijcunaman, Armagedonmanta quishpirijcunaman, chai tiempopi huacharishcacunamanpishmi yachachingacuna. 1.000 huatacuna huashaca Paraíso Allpapica tucuicunami jucha illaj cangacuna. Pero ¿paicunapaj shuticunaca ima horataj causaita chasquinapaj libropi huiñaipaj quillcashca canga?

13, 14. ¿1.000 huatacuna huashaca jucha illaj gentecunaca huiñai causaita chasquingapajca imatataj rurana canga?

¹³ Maijan jucha illaj cashpapish huiñai causaita chasquina derechotaca mana charinchu. Por ejemplo, Adán y Evaca jucha illajcunami carca. Pero huiñai causaita chasquingapajmi Jehová Diostaca tucuipi cazuna carcacuna. Shinapish Diosta mana cazushcamantami huiñai causaita chingachircacuna (Romanos 5:12).

¹⁴ Ima shinami ricushcanchij 1.000 huatacuna qꞌuipaca cai Allpapi tucui causaj gentecunaca jucha illajcunami cangacuna. Pero  ¿chai jucha illaj gentecunaca Diospaj Gobiernota huiñaipajchu apoyangacuna? ¿O Adán y Eva shinachu Diosta mana cazungacuna? ¿Chaita yachangapajca Jehová Diosca imatataj ruranga?

15, 16. a) ¿Jucha illaj gentecunaca Jehová Diosta apoyashcataca ima horataj ricuchina canga? b) ¿Tucuri prueba huashaca imataj tucunga?

¹⁵ Diabloca 1.000 huatacunatami huichcashca canga. Chai tiempopica pitapish mana pandachi tucungachu. Pero 1.000 huatacuna huashaca cacharishcami canga. Chaimi jucha illaj gentecunataca pandachisha ninga. Chai tucuri pruebapica jucha illaj gentecunaca Diospaj Gobiernota shungumanta apoyashcata, Diospaj shutita jatunyachisha nishcata ricuchina oportunidadtami charingacuna (Apocalipsis 20:7-10). Paicuna Diosta cazunata agllajpica paicunapaj shuticunaca causaita chasquinapaj libropimi huiñaipaj quillcashca canga.

¹⁶ Huaquincunaca Adán y Eva shinami Diospaj Gobiernota mana apoyasha ningacuna. ¿Paicunahuanca imataj tucunga? Apocalipsis 20:15-pica: “Causaita chasquinapaj libropi mana quillcashcacunaca nina cuchamanmi shitashca carcacuna” ninmi. Diosta mana cazusha nijcunaca huiñaipajmi chingachishca cangacuna. Pero achcacuna Diosta cazunata agllashcamantami  paicunapaj shuticunaca causaita chasquinapaj libropica huiñaipaj quillcashca canga.

17. ¿Shuj angelca Danielmanca cai tucuri punllacunapi imataj tucunga nirca?

¹⁷ Armagedón qꞌuipa imalla tucuna cashcata yachashpaca cushillami sintirinchij. Pero shuj angelca Danielmanca cai tucuri punllacunapi imalla tucuna cashcatapishmi huillarca (Daniel 12:4, 8-10-ta liyipai; 2 Timoteo 3:1-5). Chai angelca: ‘Yachaicunapish ashtahuanmi miranga’ nircami. Chaimantami cai tiempopica Diospaj puebloca Daniel parlashca profeciacunataca alli intindinchij. Ashtahuanpish chai angelca: ‘Millaicunaca ashtahuan millaicunatami ruranga. Paicunaca imata mana intindingacunachu’ nircami.

18. ¿Millai gentecunahuanca imataj tucunga?

¹⁸ Cai tiempopica achca gentecunaca millaicunata rurashpapish alli causacuj shinami can (Malaquías 3:14, 15). Pero ñallami Jesusca paicunataca ovejacunamanta chivocunata chꞌicanyachij shina huiñaipaj tucuchingapaj chꞌicanyachinga (Mateo 25:31-33). Millai gentecunaca jatun llaqui punllacunapica mana quishpiringacunachu. Paraíso  Allpapipish manataj causaringacunachu. Malaquías 3:16-pi nishca shinaca paicunapaj shuticunapish causaita chasquinapaj libropica mana quillcashcachu canga.

19. ¿Cunanmantaca imatataj rurana canchij?

¹⁹ Cai tiempopica millai gentecuna shinaca mana canachu canchij (Malaquías 3:16-18-ta liyipai). Jehová Diosca paipaj pueblopica alli shungu gentecunatami tandachicun. Ñucanchijpish chai tandachishcacunapuramanta cangapajmi esforzarina canchij.

20. a) ¿Jehová Diosca Danielmanca imatataj nirca? b) ¿Canca ima pajtarichuntaj munangui?

²⁰ Cai tucuri punllacunapica Dios nishcacunami pajtaricun. Pero catij punllacunapipish pai nishcacunaca pajtarishpami catinga. Ñallami tucui millai gentecunaca tucuringa. Jehová Dios Danielman ima nishcapishmi pajtaringa. Jehová Diosca Danieltaca: “Tucuri punllacuna pajtajpimi can japina cashcata chasquingapaj jataringui” nircami (Daniel 12:13). Tucuicunami ñucanchij huañushca familiapish, Danielpish, shujtajcunapish causarichun munanchij. Chaimantami causaita chasquinapaj libropi ñucanchij shuticuna quillcashca cachunca Diosta sirvishpa catina canchij.