1. Malaquías 3:16-pi nishca shinaca ¿Jehová Diosca ima librotataj quillcacushca?

 JEHOVÁ DIOSCA huaranga huatacunatami shuj valishca libropi achca shuticunata quillcacushca. Puntapica Abelpaj shutimi quillcashca can. Paimi puntataca Jehová Diosta sirvi callarirca * (Lucas 11:50, 51). Bibliapica cai librotaca yuyarina libro, causaita chasquinapaj libro, causagrijcunapaj rollo nishpami rijsin. Cai yachaipica ñucanchijca cai librotaca “causaita chasquinapaj libromi” nishun (Malaquías 3:16-ta liyipai; Apocalipsis 3:5; 17:8).

2. a) ¿Causaita chasquinapaj libropica picunapaj shuticunataj tiyan? b) ¿Ñucanchij shuti chai libropi quillcashca cachunca imatataj rurana canchij?

² Cai libropica Diosta manchajcunapaj, Diosta respetajcunapaj, Diosta cꞌuyajcunapaj shuticunami quillcashca can. Caicunamanta huaquincunaca jahua pachapi causana esperanzatami charincuna. Cutin shujtajcunaca Paraíso Allpapi causana esperanzatami charincuna. Ñucanchijpaj shuticunapish Jehová Dioshuan alli apanacujpi, Jesuspi feta churajpica chai libropimi quillcashca canga (Juan 3:16, 36). Tucuicunami ñucanchij shutica chai libropi quillcashca cachun munanchij ¿nachu?

3, 4. a) ¿Dios quillcashca libropi ñucanchij shuti escribishca cajpipish huiñai causaita chasquingapajca imatataj rurana canchij? b) ¿Cai yachaipipish, catij yachaipipish imacunallamantataj yachashun?

 ³ Éxodo 32:33-pica Jehová Diosca Moisestaca: “Maijanpish ñucata pꞌiñashpa juchallijpaj shutillatami ñuca libromantaca anchuchisha” nircami. Caipi ricushca shinaca ñucanchij shutica lapizhuan escribishca shinallami can. Ñucanchij ima juchata rurajpica Yayitu Diosca ñucanchij shuticunatami borrai tucunlla (Apocalipsis 3:5). Chaimantami ñucanchij shuticuna esferohuan quillcashca laya cachun, Jehová Dios ama borrachunca Jehová Diosta punllanta sirvishpa catina canchij.

⁴ Cai yachaipipish, catij yachaipipish cai tapuicunatami cutichishun. ¿Causaita chasquinapaj libropi quillcashcacunahuanca imataj tucunga? Cutin ¿causaita chasquinapaj libropi mana quillcashcacunahuanca imataj tucunga? ¿Chai libropi quillcashcacunaca ima horastaj huiñai causaita charingacuna? Shinallataj ¿Jehová Diosta rijsina oportunidadta mana charijcunahuanca imataj tucunga? ¿Paicunapaj shuticunapish cai libropichu quillcashca canga?

¿PICUNAPAJ SHUTILLATAJ DIOSPAJ LIBROPICA QUILLCASHCA CAN?

5, 6. a) Filipenses 4:3-pi nishca shinaca ¿causaita chasquinapaj libropica picunapaj shuticunataj quillcashca can? b) ¿Chai shuticunaca ima horataj huiñaipaj quillcashca canga?

⁵ ¿Cai libropica maijancunapaj shuticunallataj can? Caicunamanta yachangapajca cinco grupo gentecunamantami parlashun. Maijan grupocunaca causaita chasquinapaj libropimi cancuna, cutin shujtajcunaca chai libropica mana cancunachu.

⁶ Callari grupoca jahua pachapi Jesushuan mandangapaj agllashca ungidocunami can. ¿Paicunapaj shuticunaca causaita  chasquinapaj libropichu quillcashca can? Ari. Apóstol Pabloca Filipos llajtapi causaj ungidocunamanca ‘cancunapaj shuticunaca causaita chasquinapaj libropimi quillcashca can’ nircami (Filipenses 4:3-ta liyipai). Pero paicunapaj shuticuna chai libromanta ama borrarichunca Yayitu Diostami huañuna horascama sirvishpa catina can. Chashnami paicuna huañugrishpa, o jatun llaqui punllacuna callarigrijpi paicunaca sellashca canga. Paicuna sellashca cajllapimi paicunapaj shuticunaca chai libromanta ña mana borraringa (Apocalipsis 7:3).

7. Apocalipsis 7:16, 17-pi nishca shinaca ¿shujtaj ovejacunapaj shuticunaca ima horataj huiñaipaj chai libropi quillcashca canga?

⁷ Catij grupoca yallitaj achca shujtaj ovejacunami can. Paicunapaj shuticunaca causaita chasquinapaj libropimi quillcashca can. Armagedón huashapish paicunapaj shuticunaca quillcashcami canga (Apocalipsis 7:14). Jesusca “cai gentecunaca ovejitacuna layami can, paicunami huiñai causaita chasquingacuna” nircami (Mateo 25:46). Pero shujtaj ovejacunaca Armagedón qꞌuipallaca huiñai causaitaca mana chasquingacunachu. Paicunapaj shuticunaca lapizhuan quillcashca shinallami canga. Jesús cai Allpata 1.000 huatacunata mandacushpaca paicunata michishpami causaita cuj pugyu yacucunaman pushanga. Chai tiempopica Jesusta cazujpi, Yayitu Diosta sirvijpica shujtaj ovejacunapaj shuticunapish huiñaipajmi quillcashca canga (Apocalipsis 7:16, 17-ta liyipai).

8. a) ¿Picunapaj shuticunataj causaita chasquinapaj libropica mana tiyanga? b) ¿Paicunahuanca imataj tucunga?

⁸ Quimsa grupoca chivocuna laya mana cazuj gentecunami can. Paicunapaj shuticunaca causaita chasquinapaj libropica mana canchu. Jesusca paicunataca Armagedón punllapica huiñaipajmi tucuchinga (Mateo 25:46). Apóstol Pablopish, “Jesusmi paicunataca juzgashpa huiñaipaj chingachinga” nircami (2 Tesalonicenses 1:9; 2 Pedro 2:9). Shinallataj ñaupa tiempomanta Yayitu Diospaj espíritu santota cꞌamijcunaca mana causaringacunachu. Paicunaca huiñaipajmi huañushca cangacuna (Mateo 12:32; Marcos 3:28, 29; Hebreos 6:4-6). Cunanca cai Allpapi causarigrij ishqui tucuri grupocunamantami parlashun.

CAI ALLPAPICA PICUNALLATAJ CAUSARINGACUNA

9. a) ¿Cai Allpapica maijan ishqui grupo gentecunataj causaringa? b) ¿Cai ishqui grupocunaca imapitaj chꞌican can?

⁹ Bibliapica cashcata rurajcunapish, mana cashcata rurajcunapish causaringacunami ninmi (Hechos 24:15-ta liyipai). Cashcata rurajcunaca huañuna horascama Yayitu Diosta sirvijcunami can. Cutin mana cashcata rurajcunaca Yayitu Diosta mana rijsishpa huañushcacunami can. Cashcata mana rurajcunaca mana allicunata rurashpami causarcacuna. ¿Cai ishqui grupocunapaj shuticunaca causaita chasquinapaj libropichu quillcashca can? Cai tapuita cutichingapajca cai ishqui grupocunamanta yachashun.

10. a) ¿Cashcata rurajcunaca imamantataj causaringacuna? b) ¿Paicunamanta huaquincunaca imatataj rurangacuna? (Cai revistapica causarinamanta parlaj “Caitami tapushcacuna” nishca yachaita ricui).

¹⁰ Chuscu grupoca “cashcata rurajcunami” can. Paicuna manaraj huañujpimi paicunapaj shuticunaca causaita chasquinapaj libropi ña quillcashca carca. ¿Paicunapaj shuticuna huañushca huashaca borrarircachu? Mana. Ashtahuanpish Lucas 20:38-pica: ‘Jehovaca huañushcacunapaj Diosca mana canchu. Ashtahuanpish causajcunapaj Diosmi can’  ninmi. Chaimantami paicunaca huañushca cashpapish Yayitu Diospaj yuyaipi cancuna. Paicuna causarijpica paicunapaj shuticunaca causaita chasquinapaj libropimi quillcashca canga. Pero paipaj shuticunaca lapizhuan quillcashca layallami canga (Lucas 14:14). Causarigrij cashcata rurajcunamanta huaquincunaca cai Allpapimi mandajcuna cangacuna (Salmo 45:16).

11. ¿Mana cashcata rurajcuna causarishpaca imata yachachichuntaj minishtingacuna?

¹¹ Último grupoca “cashcata mana rurajcunami” can. Paicunaca Yayitu Diosta mana rijsishcamantami mana alli cosascunata rurashpa huañurcacuna. Chaimantami paicunapaj shuticunaca causaita chasquinapaj libropica mana quillcashca can. Pero paicunata Yayitu Dios causachijpica paicunaca Yayitu Diosta rijsina oportunidadtami charingacuna. Paicunamanta huaquincunaca manchanai millai cosascunata rurashpami causajcuna carca. Chaimantami Diospaj Gobiernoca Dios yachachishcacunamanta paicunaman yachachinga. Paicuna chaicunata cazujpica Yayitu Diosca paicunapaj shuticunataca causaita chasquinapaj libropimi quillcanga.

12. a) ¿Mana cashcata rurajcunamanca picunataj yachachingacuna? b) ¿Mana cazusha nijcunahuanca imataj tucunga?

¹² ¿Cashcata mana rurajcunamanca picunataj yachachingacuna? Armagedonmanta quishpirishca achca gentecunapish, cashcata ruraj causarishcacunapishmi paicunamanca yachachingacuna. Cashcata mana rurajcunaca paicunapaj shuticuna causaita chasquinapaj libropi quillcashca cachunca, ¿imatataj rurana canga? Paicunaca Diospaj amigos cashpami Jehová Diosllata sirvina canga. Paicuna cambiashcata o mana cambiashcataca  Jesuspish, ungidocunapishmi alli ricungacuna (Apocalipsis 20:4). Cashcata mana rurajcunamanta maijan mana cambiasha nijpica, 100 huatacunata charijpipish Jesusca paitaca chingachingami (Isaías 65:20). Jehová Diospish, Jesuspish gentecunapaj shungutaca allimi rijsincuna. Chaimantami Paraíso Allpapica shujtajcunata pi llaquichichunca mana saquingacuna (Isaías 11:9; 60:18; 65:25; Juan 2:25).

¿HUIÑAI CAUSAITA CHARINGAPAJ, JUZGASHCA CANGAPAJMI CAUSARINGA NISHPACA IMATATAJ NISHA NIN?

13, 14. a) ¿Juan 5:29-mantaca imatataj intindij carcanchij? b) ¿Cunanca cai versotaca ima shinataj intindinchij?

¹³ Jesusca cai Allpapi causarigrijcunamantapishmi parlarca. Paica: “Pambana jutcucunapi cajcunaca tucuicunami Diospaj Churi rimashcata uyangacuna. Chai punllaca ñamari chayamucun. Chaipimi paicunaca causaringacuna: allita rurajcunaca huiñai causaita charingapajmi causaringacuna. Cutin mana allita rurajcunaca juzgashca cangapajmi causaringacuna” nircami (Juan 5:28, 29). ¿Chashna nishpaca Jesusca imatataj nisha nirca?

¹⁴ Juan 5:29-ta ricushpaca huaquincuna causarishca qꞌuipa allita ruragrishcata o mana allita ruragrishcata Jesús parlacushcatami crircanchij. Pero Jesusca allita ruragrijcunamanta o mana allita ruragrijcunamantaca mana parlacurcachu. Jesusca paicuna manaraj huañushpa ima shina causacushcatami parlacurca. Huaquincunaca manaraj huañushpaca allicunata o mana allicunatami rurajcuna carca. Pero Paraíso Allpapica Jehová Diosca causarishcacuna mana allicunata rurachunca ña mana saquingachu. Shinaca ¿Jesusca imatataj nisha nirca?

15. ¿Picunataj huiñai causaita chasquingapaj causaringacuna?

¹⁵ Manaraj huañushpa allita rurajcunapaj shuticunaca causaita chasquinapaj libropimi ña quillcashca can. Chaimantami paicunaca huiñai causaita chasquingapaj causaringacuna. Juan 5:29-pi, Hechos 24:15-pipish allita rurajcuna huiñai causaita chasquingapaj causarinatami parlan. Romanos 6:7-pica: “Maijanpish huañushpaca paipaj juchamanta perdonashcami can” ninmi. Shinaca allita rurajcuna huañushpaca paicunapaj juchacunamantami ña perdonashca can. Pero paicuna allita rurashcataca Jehová Diosca manataj cungarinchu (Hebreos 6:10). Shinapish allita rurajcuna causarishpaca, paicunapaj shuticuna causaita chasquingapaj libropi quillcashca saquirichunmi allita rurashpa catina canga.

16. ¿“Mana allita rurajcunaca juzgashca cangapajmi causaringacuna” nishpaca imatataj nisha nin?

¹⁶ Mana allita rurajcuna huañushpaca paicunapaj juchacunamantami ña perdonashca cancuna. Pero paicuna Jehová Diosta mana sirvishcamantami paicunapaj shuticunaca causaita chasquinapaj libropica mana quillcashca can. Shinaca Juan 5:29-pi, Hechos 24:15-pi parlaj mana allita rurajcunaca juzgashca cangapajmi causaringacuna. Paicuna juzgashca cangapaj causaringacuna nishpaca * paicuna cambiashcata o mana cambiashcata Jesús ricuna cashcatami nisha nin (Lucas 22:30). Mana allita rurajcuna causarishpaca mana allicunatami saquina can, Jehová Diostapishmi sirvina can. Chaimi tiempohuanca  Jehová Diosca paicunapaj shutitaca causaita chasquinapaj libropi quillcanga.

17, 18. a) ¿Cai Allpapi causarigrijcunaca imatataj pajtachina canga? b) ¿Paicunataca imacunamantataj juzganga?

¹⁷ Jesús cai Allpata 1.000 huatacunata mandacujpica mushuj rollocunami tiyanga. Chai rollocunapi yachachishcacunatami causarigrijcunaca cazuna canga. Caimanta parlashpaca apóstol Juanca: “Shinallataj huañushcacunataca jatuncunatapish, uchillacunatapish jatun tiyarina ñaupajpi shayacujtami ricurcani. Rollocunapishmi pascarirca. Shinapish shujtaj rollomi pascarirca. Chai rolloca causaita chasquinapaj rollomi carca. Rollocunapi quillcashca shinallatajmi huañushcacunataca paicunapaj ruraicunamanta juzgarca” nircami (Apocalipsis 20:12, 13).

¹⁸ ¿Causarigrijcunataca manaraj huañushpa imata rurashcamantachu juzganga? Mana. Paicunaca huañushpami paicunapaj juchacunamanta ña perdonashca can. Paicunataca paraíso Allpapi Dios yachachishcacunata cazushcamanta o mana cazushcamantami juzganga. Diosta sirvij Noé, Samuel, David, Daniel, shujtajcunapish Jesucristomanta yachashpami paipi feta churana canga. Manaraj huañushpa mana allita rurajcunapish chaitami pajtachina canga.

19. ¿Diosta mana cazusha nijcunahuanca imataj tucunga?

¹⁹ Pero ¿Diosta mana cazujcunahuanca imataj tucunga? Apocalipsis 20:15-pica: “Ashtahuanpish causaita chasquinapaj libropi mana quillcashcacunaca nina cuchamanmi shitashca carcacuna” ninmi. Caipi nishca shinaca paicunataca huiñaipajmi tucuchinga. Chaimantami ñucanchij shuticuna causaita chasquinapaj libropi quillcashca cachun, chaimanta ama borrarichunpish esforzarina canchij.

20. ¿Jesús cai Allpata 1.000 huatacunata mandacujpica imatataj rurashun? Página unopi tiyaj dibujomanta parlapai.

²⁰ Jesús cai Allpata 1.000 huatacunata mandacujpica alajami canga. Chai tiempopica tucui causarigrijcunamanca Diosmantami yachachina tucunga. Shinallataj paicunataca Dios cazusha nishcamanta o mana cazusha nishcamantami juzgangacuna (Isaías 26:9; Hechos 17:31). Pero ¿tucui causarigrijcunamanca ima shinataj yachachishun? Catij yachaipimi caimanta ashtahuan yachashun.