1. ¿Gentecunaca imamantataj shujtajcunapica ña mana confiai tucuncuna?

 JATUN empresacuna, politicocuna, religionta pushajcunaca mana allicunata rurashcamantami gentecunaca paicunapica mana confiancuna. Shinallataj amigocunapish, vecinocunapish, huaquinpicarin hasta familiacunapishmi mana allita rurancuna. Chaimantami achcacunaca paicunapipish ña mana confiancuna. Shinapish ñucanchijca tucui caicunata ricushpaca mana sustarinchijchu. Bibliapica cai último punllacunapica gentecunaca shujtajcunamanta caruyana cashcata, yangamanta juchachijcuna cana cashcata, amigocunapajpish contra tucuna cashcatami huillarca. Chashnami gentecunaca Diablo ima shina cashcata ricuchincuna (2 Timoteo 3:1-4; 2 Corintios 4:4).

2. a) ¿Ñucanchijca picunallapitaj confiai tucunchij? b) ¿Maijancunaca imatataj tapurincuna?

² Cutin ñucanchijca Yayitu Diospimi tucui shunguhuan confianchij (Jeremías 17:7, 8). Pai ñucanchijta cꞌuyashcata, ñucanchijta mana saquinataca segurosmi canchij (Salmo 9:10). Jesusca ñucanchijmantami huañurca, chaimantami paipipish confianchij (1 Pedro 3:18). Shinallataj Bibliapaj consejocunapish ñucanchijtami ayudashca, chaimantami Bibliapipish confiai tucunchij (2 Timoteo 3:16, 17). Ña ricushca shinaca ñucanchijca Yayitu Diospi, Jesuspi, Bibliapimi confianchij. Pero achcacunaca “¿ñucanchij huauqui panicunapica confiai tucunchijchu?” nishpami tapurincuna. Cunanca cai tapuimantami yachashun.

3. Marcos 10:29, 30-pi ricushca shinaca ¿ima bendicioncunallatataj charinchij?

³ Jehová Diosca ñucanchijtaca paipaj pueblo ucumanmi pushamushca. Chaimantami ñucanchijca achca bendicioncunata charishcanchij (Marcos10:29, 30-ta liyipai). Cai muyundij Allpapica  achca huauqui panicunaca Jehová Diostami cꞌuyancuna, pai mandashcacunatapish cazungapajmi esforzarincuna. Ñucanchij huauqui panicuna shujtaj shimita parlajpipish, shujtaj llajtamanta cajpipish, shujtaj laya churarijpipish paicunata rijsishpaca cushillami sintirinchij. Shinallataj tandallami paicunahuan Yayitu Diosta adoranchij (Salmo 133:1).

4. ¿Imamantataj huauqui panicunahuan cunanmantapacha alli apanacuna canchij?

⁴ Cunan punllacunapica ñucanchij huauqui panicunahuanca allimi apanacuna canchij. Paicunami llaqui horaspica ñucanchij ñaupajman catichun ayudancuna (Romanos 15:1; Gálatas 6:2). Shinallataj Jehová Diosta sirvishpa catichun, espiritualmente sinchi cachunmi animancuna (1 Tesalonicenses 5:11; Hebreos 10:23-25). Diabloca ñallami millai gentecunahuan Diospaj pueblota llaquichinga. Chai tiempopi huauqui panicunahuan mana apanacunaca llaquimi caiman. Chaimantami huauqui panicunahuan cunanmantapacha alli apanacuna canchij.

5. ¿Huaquincunapajca huauqui panicunapi confianaca imamantataj sinchi can?

⁵ Shuj huauqui o shuj panica paiman huillashcatachari shujtajcunaman huillashpa purirca. Caitami rurasha nishpapish manachari pajtachirca. Mana cashpaca llaquichircachari. Shuj huauqui o pani caicunata rurajta ricushpami paicunapi confianaca dimastij sinchi can. Chashna cajpipish ¿huauqui panicunapica imamantataj confiashpa catina canchij?

6. ¿Huauqui panicunapi confiangapajca imamantataj paicunata cꞌuyana canchij?

⁶ 1 Corintios capítulo 13-pica cꞌuyaita charina imamanta valishca cashcatami yachachin. Chai consejocunaca shujtajcunapi ashtahuan confiachun, llaquichijpipish paicunapi cutin tigra confiachunmi ayudanga (1 Corintios 13:4-8-ta  liyipai). Por ejemplo, 1 Corintios 13:4-pica: “Cꞌuyaita charijca pacienciata charijmi, llaquijmi” ninmi. Ñucanchijca Jehová Diospaj ñaupajpi ima juchata rurajpipish paica ñucanchijtaca pacienciahuanmi tratan. Chaimantami ñucanchijpish shujtajcuna paicunapaj shimicunahuan o ruraicunahuan ñucanchijta llaquichijpica, Yayitu Dios shina paicunataca pacienciahuan tratana canchij. Cutin verso 5-pica: ‘Cꞌuyaita charijca mana jahualla pꞌiñarinchu. Llaquichijpipish mana yuyaipi charicunllachu’ ninmi. Caipi nishca shinaca ñucanchij huauqui panicuna ñucanchijta llaquichijpipish chai llaquichishcacunataca mana yuyaricunallachu canchij. Shinallataj Eclesiastés 7:9-pi nishca shinaca ñucanchijca mana utca pꞌiñarinachu canchij. Chaipaj randica Efesios 4:26-pi ima nishcatami pajtachina canchij. Chaipica: “Inti huashicungacamaca ama pꞌiñarishcalla catichijchu” ninmi.

7. ¿Bibliapi tiyaj ima consejocunataj huauqui panicunapi confiachun ayudanga?

⁷ Jehová Diosca gentecunapaj pandarishcataca mana yuyaricunllachu. Chashnallatajmi ñucanchijtapish pi llaquichijpica mana yuyaricunalla canchij. Chashnami huauqui panicunapica ashtahuan confiai tucushun (Salmo 130:3). Ñucanchijca paicunapaj pandarishcacunallataca mana ricunachu canchij. Chaipaj randica paicunapaj alli ruraicunata, alli cualidadcunatami ricuna canchij (Mateo 7:1-5-ta liyipai). Paicunata cꞌuyashcamantami paicuna ñucanchijta de adrede mana llaquichishcataca tucui shunguhuan crishun (1 Corintios 13:7). Shinapish Jehová Diosca maijanpipish confiachunllaca mana munanchu. Ashtahuanpish paicunata alli rijsishpa paicunapi confiachunmi munan. *

8. ¿Huauqui panicunapi ashtahuan confiangapajca imatataj rurana canchij?

⁸ Shujtajcunata respetangapajca tiempomi minishtirin, chai shinallatajmi shujtajcunapi confiangapajca tiempota minishtinchij. Pero ¿shujtajcunapi confiangapajca imatataj rurana canchij? Paicunatami alli rijsina canchij. Shinallataj tandanacuicunapipish paicunahuanmi parlana canchij. Huillanaman llujshishpapish paicunahuanmi cana canchij. Paicunamanpish pacienciatami ricuchina canchij. Paicunallataj confianalla cashcata ricuchichunpishmi oportunidadta cuna canchij. Pita mana alli rijsishpaca ñucanchij ima shina sintirishcata, imata yuyashcataca quizás mana parlanchijchu. Pero paita asha asha rijsishpa catishpaca ñucanchij ima shina sintirishcatami asha asha parlai callarishun (Lucas 16:10). Pero shuj huauqui o shuj pani ñucanchij cushca confianzata mana valichijpi, shujtajcunaman ñucanchijmanta tucuita parlashpa purijpica, ¿imatataj rurana canchij? Paipi ña mana nunca confiana cashcataca mana yuyanachu canchij, ashtahuanpish asha tiempo pasachunmi saquina canchij. Shinallataj chai huauquimanta o chai panimantaca shujtajcunapi confianatapish manataj saquinachu canchij. Pero chashna tucujpica Bibliapi tiyaj huaquin ejemplocunamantami yachai tucungui.

9. a) ¿Autoridadta charijcuna juchata rurajpipish Anaca imatataj rurashpa catirca? b) ¿Anapaj ejemplomantaca imatataj yachai tucungui? Párrafo 9-paj dibujocunamanta parlapai.

⁹ ¿Autoridadta charij shuj huauquica canta llaquichishcachu? Chashna cajpica Anapaj ejemplomantami yachai tucungui. Ana causashca tiempopica sacerdote Elica Israel llajtapimi achca autoridadta charirca. Pero paipaj churicunaca sacerdotecuna cashpapish huaquin huarmicunahuanmi huainayajcuna carca. Chaita yachashpapish paicunapaj yaya  Elica paicunataca mana corregircachu. Chashna mana corregijpipish Jehová Diosca sacerdote canataca mana chai rato quichurcachu. Elí chashna pandarishcata yachashpapish Anaca Jehová Diosta adorangapajmi Diospaj carpa huasiman rij carca. Shuj cutinca Diospaj huasipi cashpami achca llaquihuan huañucushcamanta Jehová Diosta huacaihuan mañacurca. Chaita ricushpami Elica ‘canca machashcami cangui’ nishpa sinchita rimarca (1 Samuel 1:12-16). Shinapish Anaca “ñuca shuj cꞌari huahuata charishpaca cambaj carpa huasipi sirvichunmi canman cusha” nishpami Diosta mañashca carca. Anaca Elí paipaj huahuata alli cuidanapimi confiarca (1 Samuel 1:11). Tiempo huashacarin Jehová Diosca Elipaj huahuacunatami castigarca (1 Samuel 4:17). Shinapish Anataca shuj cꞌari huahuahuanmi bendiciarca (1 Samuel 1:17-20).

10. ¿Huaquincuna Davidta llaquichijpipish paica shujtajcunapi confiashpa catishcataca ima shinataj ricuchirca?

¹⁰ ¿Shuj amigoca canta llaquichishcachu? Chashna cajpica rey Davidpaj ejemplomantami yachai tucungui. Rey Davidpaj churi Absalonca paipaj gobiernotami quichusha nirca. Davidpaj amigo Ahitofelpish Absalontami apoyarca. Paipaj churi, paipaj amigo chashna rurajta ricushpaca Davidpajca sinchimi cashcanga. Chashna jahuapish Davidca shujtajcunapimi confiashpa catirca. Por ejemplo, Davidca paipaj amigo Husaipimi confiarca. Husaica Davidpaj contracunataca mana apoyarcachu. Ashtahuancarin paipaj causaita peligropi churagrishcata yachashpapish Davidtami apoyarca (2 Samuel 17:1-16).

11. ¿Nabalpaj shuj sirvijca shujtajcunapi confiashcataca ima shinataj ricuchirca?

¹¹ Achcata charij Nabalpaj shuj sirvijmantapishmi yachai tucunchij. Davidca paipaj soldadocunahuanmi Nabalpaj sirvijcunata cuidashca carca. Tiempo qꞌuipaca Davidca paipaj soldadocunapaj asha micunata carachunmi Nabalta mañarca. Pero Nabalca ima micunataca mana cusha nircachu. Chaimantami Davidca achcata pꞌiñarishpa Nabalpaj huasi ucupura cꞌaricunata huañuchinata yuyarca. Chaita yachashpaca Nabalpaj shuj sirvijca miticushpalla rinapaj randica, David imata yuyacushcatami Nabalpaj huarmi Abigailman tucuita huillarca. Chai sirvijca Abigaíl yuyaiyuj huarmi cashcamanta chai tucuita allichinapimi confiarca. Chaimi Abigailca fuerzasta japishpa David paipaj huasi  ucupuracunata ama llaquichichun jarcanaman rirca (1 Samuel 25:2-35). Abigailpish David mana llaquichinapimi confiarca.

12. ¿Apostolcuna pandarijpipish Jesusca paicunapi confiashcataca ima shinataj ricuchirca?

¹² Jesusca paipaj discipulocuna pandarijpipish paicunapimi confiashpa catirca (Juan 15:15, 16). Shuj cutinca Santiagopish, Juanpish Jesustaca paipaj Gobiernopi alli puestota cuchunmi mañarcacuna. Chashna mañajpipish Jesusca paicuna Jehová Diosta mana cꞌuyashcata o paipaj discipulocuna ña mana cana cashcataca mana nircachu (Marcos 10:35-40). Shinallataj Jesús huañunapaj ashalla horascuna faltajpipish paipaj tucui discipulocunaca shitashpami rircacuna (Mateo 26:56). Pero Jesusca paicuna juchayujcuna cashcata yachashpapish paicunata huañungacamami cꞌuyarca (Juan 13:1). Jesús causarishca qꞌuipacarin paipaj 11 apostolcunamanca paicunapi confiashcamantami predicacionta pushachun, paipaj ovejitacunata cuidachunpish mingarca (Mateo 28:19, 20; Juan 21:15-17). Jesusca paicunapi confiashpaca mana pandarircachu. Paipaj 11 apostolcunaca huañungacamami allita rurashpa catircacuna. Caipi ricushca shinaca Anapish, Davidpish, Nabalpaj sirvijpish, Abigailpish, Jesuspish juchayujcunapimi confiarcacuna. Ñucanchijpish paicuna shinami ñucanchij huauqui panicunapi confiana canchij.

13. ¿Maipica shujtajcunapi confianaca imamantataj sinchi can?

¹³ Maijancunaca “cai huauqui o cai panica shujtajcunamanca mana imata parlangachu” nishpami paicunapi confiashpa imata parlancuna. Pero cai huauqui panicuna shujtajcunaman parlajpica llaquillami sintirincuna. Shuj cutinca shuj panica pai ima tucushcatami shuj ancianoman huillarca. Pero cai ancianoca cai pani ima nishcataca paipaj huarmimanmi parlarca. Chaimantami cayandij punllapica ancianopaj huarmica cai panita animangapaj cayarca. Cai panica chai anciano paipaj huarmiman parlashcatami cuentata curca, chaimantami resentirirca. Pero cai panica mana resintirishcalla saquirircachu, ashtahuanpish shujtaj anciano ayudachunmi mañarca. Chai ancianoca ancianocunapi confiashpa catina cashcatami intindichirca.

14. ¿Shuj huauquica ancianocunapi tigra confiai callaringapajca imatataj rurarca?

¹⁴ Shuj huauquica achca tiempotami ishqui ancianocunahuan pꞌiñarishca purirca. Paica chai ancianocunapi mana confiana cashcatami yuyarca. Pero qꞌuipaca pai cꞌuyashca shujtaj huauqui ima nishcatami yuyarirca. Cai huauquica: “Huauqui panicunaca mana ñucanchij contracunachu can, ashtahuanpish Diablomi ñucanchijpaj contra can” nircami. Chaita yuyarishpami resintirishca huauquica chai shimicuna cierto cashcata cuentata curca. Chaimantami Yaya Diosta mañashpa tiempohuanca cai ishqui ancianocunahuan alli apanacui callarirca.

15. ¿Huauqui panicunapi cutin tigra confianaca maipica imamantataj sinchi can? Pani Gretepaj ejemplomanta parlapai.

¹⁵ ¿Congregacionpica ima responsabilidadta quichushcacunachu? Chashna quichujpica tal vez achca llaquillami sintirinchij. Cunanca pani Gretemanta, paipaj mamamantapishmi parlashun. Paicunaca Jehová Diosta alli sirvijcunami carca. Cai panicunaca Alemania llajtapimi causarcacuna. Chai tiempopica Nazi nishca gobiernomi Testigocuna ama predicachun, publicacioncunatapish ama llujchichun jarcarcacuna. Chashnapish pani Gretemanca Huillaj revistamanta copiacunata rurachunmi huauquicunaca mingarcacuna. Pero huauquicunaca Gretepaj yaya Testigocunapaj contra cashcatami yachaj chayarcacuna. Gretepaj yaya autoridadcunaman imata ruracushcata huillanatami  mancharcacuna. Chaimantami Huillaj revistamanta copiacunata rurachunca huauquicunaca ña mana saquircacuna. Chai jahuapish Segunda Guerra Mundialpica pani Greteta, paipaj mamatapish huauqui panicunaca mana saludarcacunachu, revistacunatapish mana curcacunachu. Chaimi pani Greteca achca llaquilla sintirirca. Pero tiempohuanca pani Greteca Jehová Dios paicunata perdonashcatami intindirca. Chaimi paipish huauqui panicunata perdonangapaj, paicunapi cutin tigra confiangapaj esforzarirca. *

16. ¿Huauqui panicunapi cutin tigra confiangapajca imamantataj esforzarina canchij?

¹⁶ Canpish chashna laya llaquicunata charishca cashpaca, huauqui panicunapi cutin tigra confiangapajmi esforzarina cangui. Chaipajca achca tiempo o esfuerzomi minishtiringa. Pero chaita rurangapajmi esforzarina cangui. Caipi yuyashunchij. Imata micushcamanta huijsata nanachijpica chaicunamantami qꞌuipa punllacunapica cuidadota charinchij. Pero chaillamantaca micunataca mana saquinchijchu. Chai shinallatajmi maijan ñucanchijta llaquichijpipish tucui huauqui panicunapi confianataca mana saquina canchij, tucuicuna juchayujcuna cashcataca allimi yuyarina canchij. Huauqui panicunapi cutin tigra confiashpaca cushillami causashun. Congregacionpipish tucuicuna tandalla, alli apanacuchunmi ayudashun.

17. a) ¿Huauqui panicunapica imamantataj confiana canchij? b) ¿Catij yachaipica imatataj yachashun?

¹⁷ Achca gentecunaca shujtajcunapi mana confiancunachu. Pero ñucanchijca huauqui panicunata cꞌuyashcamantami paicunapi confianchij. Paicunapi confiashcamantami cushilla, tandalla causanchij. Shamuj punllacunapicarin llaquicunatapishmi ahuantashun. Pero ¿maijan huauqui o pani ñucanchijta llaquichijpica imatataj rurana canchij? Jehová Dios paicunata valorashcatami yuyarina canchij. Bibliapi tiyaj yachachishcacunatapishmi pajtachina canchij. Huauqui panicunata ashtahuan cꞌuyangapajpishmi esforzarina canchij. Bibliapi parlaj Diosta sirvijcunamantapishmi yachana canchij. Chashnami alli amigocunata charishun (Proverbios 18:24). Cai yachaipica shujtajcunapi confiana cashcatami yachashcanchij. Pero ¿huauqui panicuna ñucanchijpi confiachunca imatataj rurana canchij? Caitaca catij yachaipimi yachashun.