1. ¿Confianalla gentecunaca ima shinataj cancuna?

 CONFIANALLA gentecunaca paicuna ima nishcatami tucuita pajtachincuna. Ima llullacunatapish mana nincunachu (Salmo 15:4). Shujtajcunata ayudangapajpish listosmi cancuna. Ñucanchijpish paicuna layami casha ninchij. Chaita pajtachingapajca imata rurana cashcatami ricushun.

2. ¿Confianalla gentecuna cangapajca imatataj rurana canchij?

² Cullquita ganangapajca sinchita trabajana, achca esfuerzomi minishtirin. Chai shinallatajmi shujtajcuna ñucanchijpi confiachunca alli cualidadcunata charina, sinchi esfuerzo minishtirin. Jehová Diosca siempremi tucuita pajtachin, chaimantami ñucanchijca paipi confiashcanchij (Salmo 33:4). Paica ñucanchijpish pai shinallataj cachunmi munan (Efesios 5:1). Cai yachaipimi ñaupa tiempopi Diosta sirvijcunapish confianalla cashcata yachashun. Shinallataj confianalla gentecuna cangapaj cinco cualidadcunamantami yachashun.

3, 4. a) ¿Profeta Danielca confianalla, tucuita alli pajtachij cashcataca ima shinataj ricuchirca? b) ¿Ima tapuicunapitaj yuyarina canchij?

³ Profeta Danieltaca Babilonia llajtamanmi prezu aparcacuna. Shinapish Danielca tiempohuanca confianalla, alli runa cashcatami ricuchirca. Shuj cutinca Diospaj ayudahuanmi Nabucodonosorpaj muscushcacuna ima nisha nishcata huillarca. Chaipica Danielca rey Nabucodonosor mana allicunata ruracushcamanta Yayitu Dios paihuan pꞌiñarishca cashcatami  huillarca. Pero cai reyca dimastij pꞌiñami carca. Chaimantami Danielca chaita huillangapajca fuerzasta japina carca (Daniel 2:12; 4:20-22, 25). Achca huatacuna huashapish Babilonia llajtapica reypaj huasipimi shuj pata quinripi shuj maqui quillcashca ricurirca. Chai quillcashca ima nisha nishcatami chaitataj Danielca huillarca (Daniel 5:5, 25-29). Qꞌuipacarin Medo llajtamanta rey Dariopish, paita ayudajcunapish Daniel yalli yachaj cashcata, allita ruraj cashcatami cuentata curcacuna (Daniel 6:3, 4). Chaimantami Diosta mana sirvijcunapish Danielpi confiarcacuna.

⁴ Ñucanchijpish Danielpaj ejemplotami catina canchij. Chaimantami: “¿Mana Testigocunaca ñucamantaca imatataj yuyancuna? ¿Confianalla, tucuita pajtachij cashcatachu yuyancuna?” nishpa tapurina canchij. Confianalla, tucuita alli pajtachijcuna cashcata ricuchishpaca Jehová Diostami jatunyachishun.

5. ¿Hananiasca confianalla runa cashcataca ima shinataj ricuchirca?

⁵ Huata 455-pica Jerusalén llajtapi pircacunata shayachishca huashaca Nehemiasca confianalla cꞌaricunatami Jerusalenta mandachun churarca. Por ejemplo, Jerusalenpaj pircacunata cuidajcunata mandachunmi Hananiasta churarca. Hananiasca “shujtajcunata yalli Taita Diosta manchaj, imatapish chaitataj nij” runami carca (Nehemías 7:2). Paica Jehová Diosta cꞌuyashcamanta, paita manchashcamantami Dios mingashcacunataca  alli pajtachij carca. Ñucanchijpish Hananías shina cajpica tucuicunami ñucanchijpi confiangacuna.

6. ¿Tiquicoca confianalla, alli amigo cashcataca ima shinataj ricuchirca?

⁶ Cunanca apóstol Pablota ayudaj Tíquico runamanta yachashun. Apóstol Pablo carcelpi cajpica Tiquicomi paita ayudarca. Chaimantami apóstol Pabloca Tiquicomanta parlashpaca, “Jesusta alli sirvij, cꞌuyashca huauquimi can” nirca (Efesios 6:21, 22). Qꞌuipaca Éfeso llajtaman, Colosas llajtaman pai quillcashca cartacunata apachunmi mingarca. Shinallataj huauqui panicunatapish animachun, cushichichunmi mingarca. Cunan punllacunapipish Tíquico shinami ñucanchij pushaj ancianocunaca ñucanchijta cuidacun (Colosenses 4:7-9).

7. ¿Ancianocunapish, siervo ministerialcunapish ñucanchijmanca ima alli ejemplocunatataj cuncuna?

⁷ Ancianocunapish, siervo ministerialcunapish Daniel, Hananías, Tíquico shinami paicunaman mingashcacunataca alli pajtachincuna. Chaimantami paicunapi confianchij. Por ejemplo, chaupi semana tandanacuipajca ancianocunaca demostracioncunata, conferenciacunata, shujtaj asignacioncunatami chꞌican chꞌican huauqui panicunaman mingancuna. Huauqui panicunapish chai mingashcata alli pajtachijpica ancianocunaca yallitajmi agradicincuna. Fin de semana tandanacuipaj Bibliata yachacujcunata apashpapish, “pi conferenciata cungachu o mana cungachu” nishpaca mana sustarinchijchu. Predicangapajpish publicacioncunata charinataca segurosmi canchij. Cai huauquicuna ñucanchijta espiritualmente sinchiyachishcamantaca achcatami Yayitu Diosta agradicinchij. Shinapish ¿ñucanchijcuna confianalla cangapajca imatataj rurana canchij?

8. ¿Huauqui panicunamanta preocuparishpapish imatataj mana rurana canchij?

⁸ Ñucanchij huauqui panicunata cꞌuyashcamantami paicunata ayudasha ninchij. Shinapish paicunapaj causaipica mana yallitaj satirinachu canchij. Apostolcuna causashca tiempopica huaquincunaca shujtajcunamanta yangata parlanata, shujtajcunapaj causaipi satirinata, ima mana parlana cashcata parlanatami yachajcuna carca (1 Timoteo 5:13). Ñucanchijca paicuna layaca mana casha ninchijchu. Por ejemplo, shuj panichari ñucanchijmanca pai ungushca cashcata o ima llaquicunata charishcata huillan. Shinapish piman ama huillachunchari ñucanchijman mañan. Chaipica pai imata parlashcataca shujtajcunamanca mana huillanachu canchij * (Proverbios 11:13-ta liyipai). Cunanca shujtajcuna ñucanchijpi confiachunca ima ashtahuan rurana cashcata ricupashun.

9. ¿Familia ucupi canpi confiachunca imatataj rurana cangui?

⁹ Cambaj familia canpi confiachun esforzari. Ñucanchij familiamanta ima mana parlana cashcataca mana parlanachu canchij. Por ejemplo, shuj cusaca paipaj huarmi asichij costumbrecunata charishcataca mana parlanachu can. Paita cꞌuyashcamanta, paita pingaipi ama churangapajmi chaitaca pajtachina can (Efesios 5:33). Yaya mamacunapish jovencitocuna respetohuan tratachun munashcatami yuyaipi charina can. Chaimantami  paicunapaj huahuacunapaj pandarishcacunataca shujtajcunaman mana huillana can (Colosenses 3:21). Uchilla huahuacunapish familiata pingaipi churaj cosascunataca mana parlana cashcatami alli yachana can (Deuteronomio 5:16). Caicunata pajtachishpaca familia ucupica tucuicunami tandalla causangacuna.

10. ¿Shuj alli amigo cashcataca ima shinataj yachaj chayanchij?

¹⁰ Cambaj amigocuna canpi confiachun esforzari. Casi tucuicunami ñucanchij ima shina sintirishcataca shuj amigohuan parlanata minishtinchij. Huaquinpica ñucanchij ima shina sintirishcata parlanaca asha sinchimi can. Shuj amigo ñucanchij parlashcata shujtajcunahuan parlashcata yachaj chayashpacarin dimastij llaquillami sintirinchij. Cutin shuj amigo ñucanchij ima parlashcata paipaj shungupi chingachijpica cushillami sintirinchij. Chaimi paica shuj alli amigo cashcata yachanchij (Proverbios 17:17-ta liyipai).

11. a) ¿Ancianocunapish, paipaj huarmicunapish confianalla cashcataca ima shinataj ricuchincuna? b) ¿Fotopi ricushca ancianomantaca imatataj yachanchij? Párrafo 11-paj fotocunamanta parlapai.

¹¹ Huauqui panicuna canpi confiachun esforzari. Ancianocunaca huauqui panicuna ima tucushcataca mana shujtajcunaman huillanachu can. Chashnami ancianocunaca shuj jatun acapanamanta miticuna laya can (Isaías 32:2). Ancianocuna shujtajcunaman ñucanchij ima nishcata mana parlajta yachashpaca paicunapimi confiai tucunchijlla. Chaimantami ñucanchijpish ancianocunamanca shujtajcunamanta parlachunca mana mañana canchij. Shinallataj ancianopaj huarmipish paipaj cusamanca huauqui panicunapaj causaimantaca mana tapunachu can. Chaimantami paicunataca achcata valoranchij. Ancianocunapish paicunapaj huarmicunaman huauqui panicuna parlashcata mana parlashpaca allitami rurancuna. Shuj ancianopaj huarmica: “Ñuca cusaca huauqui panicuna ima ayudata minishtishcata,  ayudata minishtijcunapaj shuticunatapish ñucamanca mana huillanchu. Ñuca cusa chaicunata huillajpica ñucaca paicunataca ima shina ayudanataca mana yachaimanchu. Ñuca cusa chashna mana huillashcamantami huauqui panicunataca tucuicunata igual tratani. Chaimantami ñucapish, ñuca cusaman ima shina sintirishcataca tucuita huillani. Ñucaca pai shujtajcunaman mana huillana cashcatami segura cani” ninmi. Ñucanchijpish shujtajcuna ñucanchijpi confiachunmi munanchij. Cunanca ñucanchijpish confianalla cangapajca cinco cualidadcunata minishtishcata ricushun.

12. ¿Confianalla cangapajca imamantataj cꞌuyaita minishtinchij?

¹² Confianalla cangapajca shujtajcunatami cꞌuyana canchij. Jesusca “Yayitu Diosta cꞌuyana, shujtajcunata cꞌuyanami ashtahuan importante can” nircami (Mateo 22:37-39). Ñucanchijca Yayitu Diosta cꞌuyashcamantami pai shina confianalla casha ninchij. Huauqui panicunatapish cꞌuyashcamantami paicuna ñucanchijman ima parlashcataca mana cutin tigra huillana canchij. Ñucanchijca huauqui panicunata pingachinata, paicunata llaquichinataca mana munanchijchu (Juan 15:12).

13. ¿Shujtajcuna ñucanchijpi confiachunca imamantataj humildes cana canchij?

¹³ Confianalla cangapajca humildesmi cana canchij. Humildes cashpaca tucuita yachajcuna layaca mana puntarashca imatapish huillashpa purishunchu (Filipenses 2:3). Tucuicuna mana yachaipaj huillashcacunata yachashcatapish mana parlashpa purishunchu. Shinallataj Bibliapi ima yuyaicuna mana tiyajpi, ñucanchij publicacioncunapi ima yuyaicuna mana tiyajpica ñucanchij yuyaicunallataca mana parlashpa purishunchu.

14. ¿Confianalla cangapajca imamantataj alli yuyaiyujcuna cana canchij?

¹⁴ Confianalla cangapajca alli yuyaiyujcunami cana canchij. Alli yuyaiyuj cashpaca ima hora upalla saquirina cashcata, ima hora parlana cashcatami yachashun (Eclesiastés 3:7). Maipica upalla saquirinaca imata parlanatapish yalli allimi can. Proverbios 11:12-pica: “Ashtahuanpish alli yuyaiyuj runaca, ima cajpipish shungupi chingachinllami” ninmi. Experienciata charij shuj anciano caita ima shina pajtachishcata ricushun. Paitaca shujtaj congregacioncunapi sinchi problemacuna tiyajpimi ayudachun cachancuna. Shujtaj ancianoca paimanta parlashpaca: “Shujtaj congregacioncunapi ima pasashcataca paica mana nunca huillanchu” ninmi. Cai ancianoca chashna imatapish mana parlajlla cashcamantami paipaj congregacionpi tiyaj ancianocunaca achcata respetancuna, paipimi confiancuna.

15. ¿Confianalla cangapajca imamantataj honrados cana canchij? Shuj ejemplomanta parlapai.

¹⁵ Confianalla cangapajca honradosmi cana canchij. Honrados cashpaca siempremi imatapish verdadta nishun, chashna rurajpica shujtajcunaca ñucanchijpimi confiangacuna (Efesios 4:25; Hebreos 13:18). Por ejemplo, shuj huauquica conferenciata cucushpa imapi mejorana cashcata huillachunmi mañanga. Chai huauquica felicitashpalla saquirinapaj randica paita imapi mejorana cashcata huillachunmi munanga. Bibliapica ‘correginaca upalla saquirinatapish yalli allimi can’ ninmi (Proverbios 27:5, 6). Shuj amigo corregijpica callaripica chaicunata chasquinaca asha sinchimi can. Pero chai consejocunata  pajtachinaca ñucanchijpajllatajmi ashtahuan alli can.

16. Proverbios 10:19-pi nishca shinaca ¿shujtajcuna ñucanchijpi confiachunca imacunamantataj jarcarina canchij?

¹⁶ Confianalla cangapajca imatapish ama parlangapajmi jarcarina canchij. Por ejemplo, redes socialespica imatapish ama churangapajmi jarcarina canchij (Proverbios 10:19-ta liyipai). Mana jarcarishpaca redes socialespichari ima mana huillana cashcata churashun. Chaicunataca achcacunami ricunga. Paicunaca shujtajcunamanpishmi chaicunata cachangacuna. Chaicunata rurashcamantami achcacunata llaquichishun. Cutin huaquin llajtacunapica autoridadcunaca Testigocuna ama predicachun, ama tandanacuchunmi jarcancuna. Chaipica ñucanchij contracunaca huauqui panicunamanta imatapish huillachunmi ningacuna. Pero ñucanchij upalla saquirishpaca jarcarijcuna cashcatami ricuchishun. Salmota quillcaj runapish chashnallatajmi nirca. Paica: “Ñuca shimipi frenota churashpami jarcarisha” nircami (Salmo 39:1). Ñucanchijpish imata ama parlangapaj jarcarijcuna cajpica ñucanchij familiacuna, amigocuna, huauqui panicuna, shujtaj gentecunapish ñucanchijpimi confiangacuna.

17. ¿Congregación ucupi caishujmanta chaishujmanta confianacungapajca imatataj rurana canchij?

¹⁷ Diospaj pueblo ucupi cashcamantami cushilla sintirinchij. Caipica huauqui panicunapurami confianacunchij. Tucuicunami cꞌuyanacunchij. Pero tucuicuna ñucanchijpi confiachunca punllantami esforzarishpa catina canchij. Cꞌuyaita ricuchingapaj, humildadta charingapaj, alli yuyaiyujcuna cangapaj, honrados cangapaj, jarcarijcuna cangapaj esforzarishpaca caishuj chaishujpi confianacushpami Yayitu Diosta tandalla sirvishun. Chaimanta Yayitu Dios shina confianalla cangapaj esforzarishpa catishunchij.