1. ¿Noviocuna cushilla cazarashpapish qˈuipaca ima shinataj causancuna? (Jahuaman tiyaj dibujota ricui).

NOVIOCUNACA paicunapura achcata cˈuyanacushpami shuj punllaca cazarancuna. Novioca cazarana punllapi novia sumaj cashcata ricushpaca cushillami sintirin. Ishquindij cˈuyanacushpami huañungacama causashun nishpami yuyancuna. Chaita pajtachingapajca cada unomi cambiocunata rurana can. Jehová Diosmi cazaranata callarichirca. Cazadocuna cushilla causachun munashpami paica Bibliapi alli consejocunata cushca (Proverbios 18:22). Tucuicunami juchayujcuna canchij. Shinallataj Bibliapica cazarashcacunaca llaquicunatami charingacuna ninmi (1 Corintios 7:28).¿Cushilla causangapajca cazadocunaca imatataj rurana can?

2. ¿Familia ucupi cushilla causangapajca imatataj rurana canchij?

² Cˈuyaica minishtirishcami can. Bibliapica cazarashcacunaca cˈuyanacushpa, alli apanacushpami causana can ninmi.  Huahuacunata charishpacarin ashtahuanmi cˈuyanacuna can. Cusandij huarmindij cushilla alli causachunmi apóstol Pabloca: Cusaca quiquin cˈuyarij shinallataj, paipaj quiquin huarmitapish cˈuyachun. Huarmipish, paipaj cusata respetachun nircami (Efesios 5:33).

3. ¿Ima shinataj ñucanchij huarmita o cusata cˈuyashcata ricuchinchij?

³ “Cristoca tandanacushca crijcunata cˈuyashpami, paillataj curirca. Chai shinallataj cusacunapish, quiquin huarmicunata cˈuyaichij” nishpami Pabloca quillcarca (Efesios 5:25). Cunan punllacunapish Jesusta catijcunaca Jesús shinami caishujmanta chaishujmanta cˈuyanacushpa causanchij (Juan 13:34, 35; 15:12, 13-ta leyipai). Cazarashcacunaca huarmimanta o cusamanta huañuna cashpapish mana manchancunachu. Chashnami cˈuyanacushcata ricuchincuna. Huaquinpica problemacuna ricurijpica cazadocunaca mana achcata cˈuyanacushcatachari yuyancuna. ¿Chashna cajpica imatataj rurana can? Bibliapi mandashcacunatami pajtachina can. Bibliapica: Cˈuyaica “tucui llaquita apanllami, tucuita crinllami, tucuita shuyanllami, tucuita ahuantanllami”. “Chashna cˈuyaica manataj tucurinchu” ninmi (1 Corintios 13:7, 8). Noviocuna cazaracushpaca huañungacamami cˈuyanacushpa causashun nircacunami. Chaita yuyarishpami Jehová Diospaj ayudata mashcashpa, ima llaquicuna ricurijpipish ishquindijmanta perdonanacushpa problemacunata allichingacuna.

4, 5. a) ¿Huarmica imatataj rurana can? b) ¿Cusaca imatataj rurana can? c) ¿Huauqui Fredpish paipaj huarmipish alli causangapajca imatataj rurarcacuna?

⁴ Apóstol Pabloca: Huarmicunaca, “Mandaj Jesusta shinallataj paicunapaj quiquin cusacunata cazuchun. Tandanacushca crijcunapajca, Cristoca umami. Chai shinallataj cusapish huarmipajca umami” can nishpami yachachirca (Efesios 5:22, 23). Congregacionta Jesús cˈuyashpa mandaj shinallatajmi cusapish paipaj huarmita cˈuyaihuan mandana can. Cusapish huarmipish Diospaj ñaupajpica igualmi can. Jehová Diosca: Cˈarilla canaca mana allichu. Paita ayudaj, pai minishticushcata rurasha nircami. Chashnami Jehová Diosca huarmicunapish valishca cashcata ricuchirca (Génesis 2:18). Cusa paipaj familiata uma shina alli pushachunca huarmimi ayudana can. Jesús shina cˈuyaj cusa cajpica huarmica cushillami paipaj cusata cazunga, pai imata ruranata agllajpipish cushicushpami ayudanga.

⁵ Cathy shuti panica: “Soltera cashpaca imata ruragrishpapish ñucallami ruraj carcani, ñucallatajmi cuidarij carcani. Cunanca ñuca cusahuanmi tucuita parlanacuna cani. Huaquinpica sinchimi cashca. Pero Jehová Dios mandashcata cazushpami ishquindij cˈuyanacushpa tandalla causanchij” ninmi ^[1] (Página 14-pi notata ricui). Paipaj cusa Fred shutica: “Ñucapajca imata ruranata agllanaca siempremi sinchi cashca. Cazarashca qˈuipaca ñuca huarmipipish yuyana cashcamantami ashtahuan sinchi cashca. Pero Jehová Diosta ayudahuai nishpa mañana, ñuca huarmi imata nicujpipish  alli uyanami, shujlla shina cushilla causachun ayudashca” ninmi.

6. ¿Cazadocuna problemacunata charishpaca imatataj rurana can?

⁶ ¿Cazarashcacuna alli causangapajca imatataj rurana can? Bibliapica: ‘caishuj chaishuj ahuantanacushpa perdonanacuichij’ ninmi. Cusapish huarmipish juchayujcuna cashcamantaca pandarishpami llaquicunata charincuna. Ama cutin chai llaquicunallapitaj urmangapajca Bibliapi mandashca shina cˈuyanacushpami, perdonanacuna can. Chashna cˈuyanacushpaca shujlla shinami causangacuna (Colosenses 3:13, 14). Cazadocunaca mana utca pˈiñarishpa, llaquij cashpa, llaquichishcata mana yuyarishpami cˈuyanacushcata ricuchina can (1 Corintios 13:4, 5). Inti manaraj huashicujpimi ima problemacunatapish allichina can (Efesios 4:26, 27). Perdonta mañangapajca humilde canami minishtirin. Perdonahuai nishpaca ima problemacuna ricurijpipish allichishpa, cˈuyanacushpami causangacuna.

7, 8. a) ¿Cusandij huarmindij chayarinamantaca Bibliaca imatataj yachachin? b) ¿Cazadocunaca imamantataj cˈuyaita ricuchina can?

⁷ Bibliapica cusandij huarmindij chayarinataca Dios mandashca shina ricuchunmi yachachin (1 Corintios 7:3-5-ta leyipai). Chayarinacungapajca cada uno ima shina sintirishcatami parlanacuna can. Cusa mana cˈuyaita ricuchijpica chayarinacushpaca paipaj huarmica mana cushilla sintiringachu. Bibliapica cusaca paipaj huarmi ima shina cashcatami entindina can ninmi (1 Pedro 3:7). Cusaca paipaj huarmita paihuan chayarinatajmi can nishpaca mana obliganachu can. Ishquindijmanta cˈuyanacushpami chayarinacuna can. Cˈaricunaca huarmicunata yallimi chayarina munaita charincuna. Pero ishquindijmanta chayarinata munashpallami chayarinacuna can.

⁸ Bibliapica cazadocuna ima shina chayarina cashcataca mana parlanchu. Pero ima shina cˈuyanacuna cashcataca parlanmi (Cantares 1:2; 2:6). Jesusta catij cusapish huarmipish Bibliapi yachachishca shinami cˈuyanacuna can.

9. ¿Cazadocunaca imamantataj shujtajhuan canataca mana munana can?

⁹ Jehová Diosta tucui shunguhuan cˈuyashpa, huarmitapish, cusatapish cˈuyashpaca huarmimanta o cusamanta pipish caruyachichunca mana saquinachu canchij. Huaquin cazadocunaca televisionpi o internetpi mapata ruracujta ricushcamanta, shujtaj huarmita o shujtaj cˈarita munashcamantami juchapi urmashcacuna. Chai laya ruraicumantaca anchurinami canchij. Cazarashcacunaca shujtaj huarmihuan, shujtaj cˈarihuanca mana yanga pugllarinachu, mana yanga asirinachu can. Chashnami huarmita o cusataca mana llaquichishpa cˈuyashcata ricuchinchij.  Jehová Diosca ñucanchij imata yuyashcata, imata rurashcatapish tucuitami yachan. Chaimanta paipaj ñaupajpi alli ricurishun nishpaca cusandij huarmindij cˈuyanacushpami causana canchij (Mateo 5:27, 28; Hebreos 4:13-ta leyipai).

10, 11. a) ¿Cunanca mashnacunataj divorciarin? b) ¿Separarinamantaca Bibliaca imatataj yachachin? c) ¿Separarisha nijcunaca imatataj yuyarina can?

¹⁰ Huaquin cazadocunaca jatun llaquicunata charishpaca separarinatami yuyashcacuna. Cutin shujtajcunaca divorciarinatami yuyashcacuna. Huaquin llajtacunapica chaupi yalli cazadocunami divorciarishcacuna. Shinapish testigocunaca imamantapish mana divorciarinllacunachu. Chashna cajpipish achca cazado testigocunami jatun llaquicunata charincuna.

¹¹ Huaquin cazadocunaca jatun llaquicunata charishcata yuyashpami separarisha nincuna ^[2] (Página 14-pi notata ricui). Bibliapica: “Huarmica cusata ama shitachun. Shitashpapish ama cazarachun, mana cashpaca quiquin cusahuan cutin alli tucuchun. Shinallataj cusapish paipaj huarmitaca ama shitachun” ninmi (1 Corintios 7:10, 11). Jesuspish separarinalla cashcataca mana nircachu. Cazadocunaman Dios imata mandashcata yuyachishca qˈuipaca: Dios tandachishcataca, ni pi amataj chˈicanyachichun nircami (Mateo 19:3-6; Génesis 2:24). Diosca cazadocuna tandalla causachunmi munan (1 Corintios 7:39). Yuyarishun, ñucanchij imallata rurashcataca Diospaj ñaupajpimi ricuchina canchij. Chaimanta ima problemacuna ricurijpipish ama ashtahuan mirarichunmi utca allichina canchij.

12. ¿Huaquin cazadocunaca imamantataj separarisha nincuna?

¹² ¿Huaquin cazadocunaca imamantataj jatun llaquicunata charin? Huaquincunaca cazarashpaca mana paicuna yuyarishca shinachu causancuna. Chaimantami separarisha nincuna. Shujtajcunaca pˈiñarijlla cashcamanta, upalla saquirij cashcamanta, uchillamantapacha cada uno chˈican chˈican causaita charishcamantami problemacunata charincuna. Huaquinpica cullquimanta, familiamanta, huahuacunamantami problemacunata charincuna. Shina cajpipish huaquin cazadocunaca Jehová Diospaj ayudata mashcashpami paicunapaj problemacunata allichishcacuna.

13. ¿Cazadocunaca imallacunamantataj separari tucuncuna?

¹³ Huaquinpica cusa familiata mana mantinisha nijpi, cusa o huarmi yallitaj macajpi o Jehová Diosta servichun yallitaj jarcajpimi cazadocunaca separari tucun. Cazadocuna jatun problemacunata charishpaca ancianocunapaj ayudatami  mashcana can. Chai huauquicunaca achca experienciata charishcamantami Diospaj mandashcacunata cazuchun ayudanga. Shinallataj cazadocunaca Diospaj mandashcacunata pajtachishpa causangapajmi, Diosta mañana can. Diospaj espíritu ima shina cashcatapish paicunapaj causaipimi ricuchina can (Gálatas 5:22, 23) ^[3] (Página 14-pi notata ricui).

14. ¿Diosta mana servij huarmita o cusata charijcunataca Bibliaca imatataj nin?

¹⁴ Huaquinpica cusa o huarmimi Jehová Diosta mana servin. Shina cajpipish Bibliapica mana separarinachu can ninmi (1 Corintios 7:12-14-ta leyipai). Cusa o huarmi Jehová Diosta servishcamantami mana crij huarmipish o cusapish jucha illaj shina Diospaj ñaupajpi alli ricurin. Paicunapaj huahuacunapishmi Diospaj ñaupajpi alli ricurin. Chaimantami Pabloca: ¿Huarmica ima shinataj cambaj cusataca mana quishpichi tucushcata yachangui? Shinallataj ¿Cˈarica ima shinataj cambaj huarmita mana quishpichi tucushcata yachangui? nircami (1 Corintios 7:16, NM). Achca huauquicuna panicunami paicunapaj huarmita o cusata testigo de Jehová tucuchun ayudashca.

15, 16. a) ¿Testigo huarmimanca Bibliaca imatataj rurachun mandan? b) ¿Mana testigo huarmi o cusa separarijpica testigoca imatataj mana rurai tucun?

¹⁵ Apóstol Pedroca huarmicunataca paicunapaj cusacunata respetachun nircami. “Paipaj huarmi tucuipi alli cazujta ricushpami, Diospaj Shimita mana crij cusapish, mana imata huillajpipish crij tucunga. Cancuna ima mana allita mana rurajpi, tucuipi alli cazujpica, chaita ricushpa crij tucungallami” nircami. Bibliamanta parlashpalla causanapaj  randica Diosta servij huarmica “mana pˈiñarij, alli shungu” cashpami, paipaj cusataca testigo de Jehová tucuchun ayudai tucun (1 Pedro 3:1-4). Diospaj ñaupajpipish huarmica valishca shinami ricuringa.

¹⁶ Bibliaca “maijan mana crij shitajpica shitachunlla. Chaipica crij huauqui cashpa, pani cashpapish, ña mana huatashcachu. Ashtahuanpish ñucanchijtaca, Diosca sumajta causachunmi cayarca” ninmi (1 Corintios 7:15). Testigo cusa o huarmica Diosta mana servijtaca mana paihuan saquirichun obliganachu can. Separarishpapish testigoca mana shujtajhuan cazarai tucunchu. Shitashpa rij huarmi o cusaca qˈuipataca tigrasha ningachari. Diostapish servisha ningachari.

17. ¿Cazadocunaca paicunapaj causaipica imatataj puntapi churana can?

¹⁷ Tucuri punllacunapi causacushcamantaca achca llaquicunatami charinchij (2 Timoteo 3:1-5). Cai pachapaj millai ruraicunamanta caruyangapajca Jehová Diospaj alli amigocunami tucuna canchij. Apóstol Pabloca tucuri punllacunamanta parlashpami: cusacunaca ‘cunanmantaca mana huarmiyuj cashca shina causaichij’. Shinallataj ‘cai pachapi imalla charishcahuan cushicujcunapish, mana cushicuj shina caichij’ nircami (1 Corintios 7:29-31). ¿Huarmi illaj shina o cusa illaj shina causana cashcatachu nirca? Mana. Ashtahuanpish tucuri punllacunapi causacushcamantaca, paicunapaj causaipi Jehová Diosta adoranata puntapi churana cashcatami nirca (Mateo 6:33).

18. ¿Cazadocuna cushilla causangapajca imatataj rurana can?

¹⁸ Cunan punllacunapica achca cazadocunami llaquicunata charin. Shina cajpipish Jehová Diosmanta, congregacionmanta mana caruyashpa, paipaj mandashcacunata cazushpa, paipaj espíritu yuyachishca shina causashpaca cazarashcacunaca cushillami causai tucun. Chashna rurajpica “Taita Dios tandachishcataca” ni pi manataj chˈicanyachingachu (Marcos 10:9).