1, 2. a) ¿Tucuri punllacunapica ima shinataj Isaías 60:22-ca pajtaricun? b) ¿ Ima shinataj Jehová Diospaj organizacionpi ayudai tucunchij?

“UCHILLACA huaranga huarangami tucunga. Uchilla llajtaca imatapish rurai tucuj pueblomi tucunga” (Isaías 60:22). Cai profeciaca tucuri punllacunapimi pajtaricun. Por ejemplo, huata 2015-pica 8.220.105 testigo de Jehovacunami muyundij Allpapi huillarcanchij. Paipaj llajta mirarina cashcata parlashpaca Jehová Diosca: ‘Ñuca chashna rurasha nishca punllapimi utca pajtachisha’ nircami. Chaimanta ñucanchijpish Diosmanta huillangapajca tucui imallata rurai tucushcatami rurana canchij. Achca huauquicuna panicunaca ñami precursor regularcuna, shujtajcunaca precursor auxiliarcunami. Huaquincunaca shujtaj llajtapimi huillanaman rishcacuna. Shujtajcunaca Tandanacuna Huasicunata rurashpami ayudacuncuna.

² Tucui huatacunami 2.000 mushuj congregacioncuna tiyai callarin. Mushuj congregacioncunapica huauquicunaca siervo ministerialcuna tucuchunmi minishtirin. Cutin siervo ministerialcunaca ancianocuna tucuchunmi minishtirin. Shinashpaca, Jesús rurachun nishcata  pajtachingapajca achca huauquicuna panicunami minishtirin (1 Corintios 15:58).

3, 4. ¿Diosta ashtahuan servingapajca imatataj rurai tucunchij?

³ (1 Timoteo 3:1-ta leyipai). Anciano o siervo ministerial tucushpa “crijcunata michij casha nijcunataca” apóstol Pabloca felicitarcami. Pablo nishca shimicunaca maijanpish imata japingapaj maquita chutashpa japingacama fuerzaricujtami entendichin. Por ejemplo, shuj huauquichari siervo ministerial tucusha nin. Diospaj ñaupajpi alli ricuringapajmi paipaj causaipi cambiashpa catin. Qˈuipaca siervo ministerial tucuchun shutichijpica, anciano tucungapajmi ashtahuan cambiocunata rurashpa catin.

⁴ Huaquin huauquicuna panicunaca Diosta ashtahuan servingapajmi paicunapaj causaipi achca cambiocunata ruracuncuna. Por ejemplo huaquincunaca precursormi tucusha nincuna, shujtajcunaca Betelpi o Tandanacuna Huasicunata rurashpami servisha nincuna. Jehová Diosta ashtahuan servingapajca Biblia ima shina ayudashcata ricushun.

5. ¿Jovencunaca imallata rurashpataj Diosta ashtahuan servi tucun?

⁵ Jovencunaca fuerzayuj cashcamantami Diosta ashtahuan servi tucuncuna (Proverbios 20:29-ta leyipai). Huaquin cˈaricuna huarmicunaca Betelpimi librocunata rurashpa, imprimishpa trabajancuna. Shujtajcunaca Tandanacuna Huasicunata shayachishpa, allichishpami ayudancuna. Cutin huaquincunaca Allpa chujchuicuna tiyajpi, ima llaquicuna tiyajpimi huauquicunata panicunata ayudancuna. Achca precursorcunapish shujtaj shimita yachashpami shujtaj llajtapi huillanaman rincuna.

6-8. a) ¿Jehová Diosta cushilla servingapajca huauqui Aaronca imatataj rurarca? b) ¿Diospaj ñaupajpi alli ricuringapajca imatataj rurana canchij?

⁶ Jehová Diosta cˈuyashpapish paita servicushpapish manachari cushilla sintirinchij. Aaron shuti huauquica uchillamantapachami tandanacuicunaman, huillanaman rij carca. Pero mana cushilla sintirircachu. ¿Diosta cushilla servingapajca imatataj rurarca?

⁷ Bibliatami tucui punllacuna rezai callarirca. Tandanacuicunapajpish alli prepararishpami comentariocunata cui callarirca. Jehová Diostami ashtahuan mañai callarirca. Chaita rurashpami Jehová Diosta ashtahuan cˈuyarca. Qˈuipaca precursormi tucurca, llaquicunata charij huauquicunatami ayudarca, shujtaj llajtapipish huillanamanmi rirca. Chashnami cushilla sintirirca. Cunanca ancianomi can. Betelpimi servicun. Huauqui Aaronca: “Jehová Diosca ñucataca achcatami bendiciashca. Chaimantami paita ashtahuan servisha nini” ninmi.

⁸ Salmo librota quillcajca: “Mandaj Diosca alli shungumi. Munaichigari, ricuichigari. Mandaj Diospi shunguta churajcunaca cushichishcami” canga nircami (Salmo 34:8-10-ta leyipai).  Jehová Diosta cushicushpa ashtahuan servishpaca paipaj ñaupajpimi alli ricurishun. Paica ñucanchijta cuidanataca manataj saquingachu.

9, 10. ¿Imamantataj mana pˈiñarishpa shuyana canchij?

⁹ Tucuicunami Jehová Diosta ashtahuan servisha ninchij. Chaimantachari anciano, siervo ministerial o shujtaj privilegiocunata charingapaj achca tiempota shuyacungui. Pero manaraj chai privilegiocunata charishpaca ¿imatataj rurana cangui? Jehová Dios munashca tiempocamami mana pˈiñarishpa shuyana cangui (Miqueas 7:7). Shinallataj paillataj ayudana cashcatami tucui shunguhuan crina cangui. Abrahampi yuyashun, Jehová Diosca canmanca shuj huahuatami cusha nircami. Pero Isaac huacharichunca achca huatacunami pasarca. Abrahamca mana pˈiñarircachu. Ashtahuanpish tucui shunguhuan Diospi crishpami shuyarca (Génesis 15:3, 4; 21:5; Hebreos 6:12-15).

¹⁰ Imata shuyanaca sinchimi can (Proverbios 13:12). Ñucanchij shuyacushca mana utca pajtarijpica mana chaillapitaj yuyacunachu canchij. Chaita rurashpaca llaquirishpami ashtahuan servina munaita mana charishun. Chaipaj randica, congregacionpi ashtahuan ayudangapajca ima cambiocunatataj rurashpa catina cani nishpami cambiocunata rurana canchij. Shuyacushpaca quimsa yuyaicunata pajtachi tucushcata ricushun.

11. a) ¿Ñucanchij causaipica ima cambiocunatataj rurai tucunchij? b) ¿Imamantataj chaita rurashpa catina canchij?

¹¹ Ñucanchij causaipi cambiocunata rurashun. Bibliata rezashpa, rezashcapi cutin cutin yuyashpaca alli yuyayujmi tucushun, alli decisioncunatami agllashun. Chashna laya huauquicunami congregacionta ñaupajman pushachun minishtirin (Proverbios 1:1-4; Tito 1:7-9). Bibliata estudiashpaca Jehová Dios imallata yuyashcatami entendishun. Chashnami tucui punllacuna imata ruranata agllagrishpapish Dios munashca shina rurashun. Por ejemplo, shujtajcunahuan ima shina canata, cullquita ima shina gastanata, ima shina churarinatami entendishun.

12. ¿Ñucanchijman mingashcataca ima shinataj pajtachina canchij?

¹² Mingashcacunata alli pajtachishun. Israelitacuna Diospaj huasita allichicujpica, Nehemiasca huaquin cˈaricunamanmi cˈhican cˈhican ruraicunata mingarca. ¿Picunamantaj mingarca? Diosta cˈuyaj cˈaricunamanmi mingarca. Paicunaman imata mingajpipish alli pajtachijcuna cashcatami Nehemiasca yacharca (Nehemías 7:2; 13:12, 13). Cunan punllacunapipish  chashnallatajmi can. Imata rurachun mingashcata shuj huauqui alli pajtachijpica, tucuicunapaj ñaupajpimi alli ricuringa. Qˈuipaca ashtahuan ayudachunmi paimanca mingangacuna (1 Corintios 4:2). Cˈaricuna cashpa o huarmicuna cashpapish imata ñucanchijman mingajpica tucuitami alli pajtachina canchij (1 Timoteo 5:25-ta leyipai).

13. ¿Pipish ñucanchijta llaquichijpica imatataj José shina rurai tucunchij?

¹³ Jehová Diosmanta ama caruyashun. Maijanpish ñucanchijta llaquichijpica, ¿imatataj rurai tucunchij? Ñucanchij ima shina sintirishcatami parlai tucunchij. Mana culpata charishcata entendichisha nishpaca problematami ashtahuan jatunyachishun. Josepi yuyashun, paipaj huauquicunaca pˈiñajcunami carca. Qˈuipaca yangamantami juchachircacuna. Presopimi churarcacuna. Chashna llaquicunata charishpapish Jehová Dios imata cusha nishcacunataca yuyaipimi charirca. Jehová Diosmantapish mana caruyashpami tucui shunguhuan paita servishpa catirca (Salmo 105:19). Sinchi llaquicunata ahuantashcamantami alli runa tucurca. Chaimantami Egipto llajtata mandaj cachun mingarcacuna (Génesis 41:37-44; 45:4-8). Pipish ñucanchijta llaquichijpica, ama pˈiñarishpa cˈuyaihuan parlangapajmi Jehová Dios ayudachun mañana canchij (1 Pedro 5:10-ta leyipai).

14, 15. a) ¿Ima shina huillacushcataca imamantataj yuyarina canchij? b) ¿Gentecunaman huillangapajca imallatataj rurai tucunchij? (Página 15-pi tiyaj dibujota, página 18-pi tiyaj  cuadrotapish ricui).

¹⁴ Apóstol Pabloca Timoteotaca Diospaj Shimita gentecunaman ima shina alli yachachinata ricurayangui. Ashtahuanpish: “Canllataj cuidaringui. Imata yachachicushcatapish alli yuyaringui” nircami (1 Timoteo 4:13, 16). Timoteoca ñami achca huatacunata huillacurca. Shinapish ¿imamantataj Pabloca imata yachachicushcataca alli yuyaringui? nirca. Gentecunapaj causaica cambiajlla cashcamantami chashna nirca. Gentecuna paita uyachunca ashtahuan alli huillaj, ashtahuan alli yachachijmi tucuna carca. Ñucanchijpish chaillatatajmi rurashpa catina canchij.

¹⁵ Huaquin ladocunapi huillanaman rishpaca ashalla gentecunatami huasicunapi tarinchij. Shujtaj ladocunapica gentecunaca paicunapaj huasipichari can. Pero paicunapaj jatun huasicunamanca mana yaicui tucunchijchu. ¿Chai gentecunaman huillangapajca imatataj rurai tucunchij?

16. ¿Achca gentecuna tiyaj ladocunapica ima shinataj huillai tucunchij?

¹⁶ Huaquin huauquicuna panicunaca achca gentecuna tiyaj ladocunapimi huillanata munan. Carrocunata japina paradacunapi, mercadocunapi, parquecunapimi huillancuna. ¿Ima shinataj paicunaca parlashpa callarincuna? Huaquincunaca noticiacunapi imata uyashcata parlashpa, paicunapaj huahuacunamanta tapushpa o paicunapaj trabajomanta tapushpami parlai callarincuna. Gentecuna parlashpa catisha nijpica Biblia imata yachahishcata huillashpami paicuna imata yuyashcata tapuncuna. Chashnami Bibliamanta alhajata parlanacuncuna.

17, 18. a) ¿Callecunapi mana manchashpa huillangapajca imatataj rurai tucunchij? b) ¿Huillacushpaca imamantataj David shina yuyana canchij?

¹⁷ Mana rijsishca gentecunahuan callecunapi parlanataca manchanchijchari. Nueva York llajtapica Eddie shuti huauquica precursomi can. Paica callecunapi huillanataca manchajmi carca. ¿Ama manchaita charingapajca imatataj rurarca? Diosta adorana tutapimi paipaj huarmihuan ima shina huillanata mashcarcacuna. Chashnami gentecuna mana uyasha nijpi imata ninata o gentecuna imata yuyashcata entendishpa ima shina huillanata yacharcacuna. Ashtahuanpish ima shina alli huillanataca shujtaj testigocunatami tapurcacuna. Cunanca Eddie huauquica cushicushpami callecunapi huillan.

¹⁸ Cushicushpa alli huillajpica Diosta ashtahuan servisha nishcatami shujtajcunaca ricunga (1 Timoteo 4:15-ta leyipai). Davidca: “Mandaj Diostaca punllanta alli nicushallami. Ñuca shimihuan alabanataca, manataj upallashachu. Mandaj Diospimi ñuca almaca cushicunga. Mana jatun tucushcacuna caita uyashpaca cushicungacunami” nircami. Ñucanchijpish chashna huillashpaca, shujtajcunapish Jehová Diosta servichunmi ayudai tucushun (Salmo 34:1, 2).

19. ¿Mana can munashca shina huillai tucushpapish imatataj rurai tucungui?

¹⁹ Davidca: ‘Mandaj Dioslla, tucui quiquin rurashcacunaca quiquinta alabachun. Quiquinpaj jucha illajcunaca alli nishca cachun. Quiquinpaj sumaj mandanata huillachun. Quiquin tucuita rurai tucuj cashcata parlachun. Huañujlla runacunaman quiquin tucuita rurai tucuj cashcata yachaj chayachingapaj, quiquin mandanaca jatun sumaj achij nicuj cashcata yachaj chayachingapajmi huillangacuna’ nircami (Salmo 145:10-12). Jehová Diosta cˈuyajcunaca shujtacunamanmi tucui shunguhuan huillanata munan. Pero yuyajcuna o ungushcacunaca huasin huasin huillashpaca manachari paicuna munashca shina achcata huillai tucuncuna. Shina cajpipish ¿imatataj rurai tucuncuna? Yuyarishun, ñucanchij ladopi caj gentecunaman o doctorcunaman, enfermeracunamanmi Diosmanta huillai tucunchij. Testigo de Jehová cashcamanta preso cashpapish shujtajcunaman Diosmanta parlai tucunchijmi. Chashna rurashpaca cushillami sintirishun (Proverbios 27:11). Ñucanchij familiacuna mana testigo cajpipish Diosta servishpami paita jatunyachinchij (1 Pedro 3:1-4). Jatun llaquicunata charishpapish Diospaj alli amigocuna tucushpami paita servicunchij.

20, 21. ¿Congregacionpi Diosta ashtahuan servicujta ricushpaca imatataj shujtajcunaca ruranga?

²⁰ Jehová Diospaj amigocuna tucushpa catishun. Paita ashtahuan alli servingapaj fuerzarishpa catishun. Paica achcatami bendicianga. Ñucanchij causaipi cambiocunata rurashpa, huillangapaj shujtaj horariocunata mashcashpaca, achca gentecunamanmi Dios cusha nishca sumaj causaimanta yachachishun. Ñucanchij huauquicunatapish panicunatapish ashtahuanmi ayudai tucushun. Congregacionpi ashtahuan ayudanata munashcata ricushpaca, paicunaca ashtahuanmi ñucanchijta cˈuyangacuna.

²¹ Achca huatacunata Diosta ña servicushpapish tucuicunami Diosta ashtahuan rijsishpa, paita ashtahuan servi tucunchij. Catij yachaipica Diosta ashtahuan servichun shujtajcunata ima shina ayudai tucushcatami yachashun.