1, 2. a) ¿Huaquinpica imamantataj preocuparinchij? (Jahuapi tiyaj dibujota ricui). b) ¿Cai yachaipica imatataj yachashun?

DIABLOCA ‘león huacaricuj shinami pitapish millpungapaj muyundijta mashcashpa puricun’ (1 Pedro 5:8; Apocalipsis 12:17). Diablomantami tucuicuna problemacunata charishpa llaquilla, shaicushca shina sintirinchij. Ñaupa tiempopi Diosta servijcunapish huaquinpica llaquillami sintirircacuna. Por ejemplo rey Davidca paipaj problemacunamantami preocuparirca (Salmo 55:2). Apóstol Pablopish shujtaj huauqui panicunata yuyarishpami llaquilla carca (2 Corintios 11:28). Ñucanchij ima problemacunamanta sustarishca cashpaca ¿imatataj rurana canchij?

² Ñaupa tiempo Diosta servijcuna llaquilla cajpica Diosca ayudarcami. Cunan tiempopish ñucanchij llaquilla cajpica Yaya Diosca ayudasha ninmi. Bibliapica: ‘Diosmi ñucanchijta cuidacun. Chaimanta ima llaquicuna yuyailla canataca paiman mingaichij’ ninmi (1 Pedro 5:7). Cunanca ama yallitaj  sustarishca causangapajca Diosta mañana cashcata, paipaj Shimita leyina, ima leyishcata yuyarina cashcatami yachashun. Chashnallataj Diospaj espíritu ñucanchijta ayudachun saquina cashcata, shujtajcunahuan ñucanchij ima shina sintirishcata parlanacuna cashcatapishmi yachashun. Cai chuscu ayudacunata yachacushpaca cambaj causaipi ima shina pajtachinata yuyai.

3. ¿Ama yallitaj sustaringapajca imatataj rurana canchij?

³ Ñucanchij llaquicunamanta ama yallitaj sustaringapajca Diostami tucui shunguhuan mañana canchij. Llaquilla cajpica Diosca ñucanchij llaquicunata paiman tucuita huillachunmi munan. Rey Davidca: “Taita Dioslla, ñuca mañashcata uyahuai” nishpami mañarca. Qꞌuipaca: “Cambaj llaquitaca, Mandaj Diosman mingailla” nircami (Salmo 55:1, 22, QC, 1989). Huaquinpica problemacunata allichisha nishpami tucuita ruranchij. Chaita rurashca cashpaca ña ama ashtahuan sustaringapajmi Diosta tucui shunguhuan mañana canchij. Pero ¿Diosta mañashpaca imamantataj alli, tranquilo sintirinchij? (Salmo 94:18, 19).

4. ¿Llaquicunamanta sustarishca cashpaca imamantataj Diosta mañana canchij?

⁴ (Filipenses 4:6, 7-ta leyipai). Diosta tucui shunguhuan mañajpica paica ama yallitaj sustarishpa causachun, tranquilo sintirichunmi ayudanga. Jehová Dios ayudajllapimi yallitaj tranquilo sintiri tucunchij. Achca huauqui panicunaca Diosta mañashpami chashna sintirishcacuna. Canpish Diosta mañashpaca tranquilomi sintiri tucungui. Ima problemacuna ricurijpipish ñaupajman catichunmi Jehová Diosca fuerzasta cun. Paica: ‘Ama manchaichu, ama shaicurichu. Ñucami canman fuerzata cuj Taita Dios cani. Cantaca ayudacushallami’ ninmi (Isaías 41:10). Cai shimicunataca manataj cungarinachu canchij.

5. ¿Imamantataj Bibliata leyina canchij?

⁵ Bibliaca Diospaj yuyaicunatami charin. Chaimantami ima horapish llaquilla cashpaca Diospaj Shimita leyina canchij, imata leyishcatapish yuyarinami canchij. Diosca paipaj Shimipimi ñucanchijman consejota cun. Shinallataj ñucanchijta ruraj Diospaj consejocuna ima shina ayudashcatami yuyarina canchij. Cai consejocunata cazushpaca ña mana yallitaj preocuparishunchu, asha ashami tranquilo sintirishun. Jehová Diosca ama manchangapaj, ama shaicushca sintiringapajca Bibliatami leyina canguichij ninmi (Josué 1:7-9).

6. ¿Imamantataj Jesús nishcacunata yuyarina canchij?

⁶ Bibliapica Jesús gentecunahuan ima shina parlashcatami huillan. Jesusca cushichij shimicunahuanmi parlaj carca. Chaimantami  llaquilla cajcunapish shujtaj gentecunapish paita uyanata munajcuna carca (Mateo 11:28-30-ta leyipai). Jesusca Diosmanta yachachishpa, llaquilla cajcunata cushichishpa, gentecuna imata minishtishcata cushpami ayudarca (Marcos 6:30-32). Cunanca Jesucristoca jahua pachapimi Rey can. Jahua pachapi cashpapish apostolcunata ayudashca shinami ñucanchijtapish ayudanga. Paica ñucanchijta llaquishcamantami ayudasha nin. Chaimanta ima problemacunamanta sustarishca cajpica Jesucristoca ñucanchij ladopi cashca shinami canga. Paica minishticushca horaspimi ayudanga. Jesuspaj nishcacunata yuyarishpaca ñucanchij problemacunamanta mana yallitaj sustarishunchu. Dios cusha nishcacunatapish shuyashpami catishun (Hebreos 2:17, 18; 4:16).

7. ¿Diospaj poderhuanca imatataj rurai tucushun?

⁷ Jesusca: ‘Espíritu santota cuhuai nishpa Yaya Diosta mañajpica paica cungallami’ nircami (Lucas 11:10-13). Espíritu santoca Diospaj podermi can. Diospaj poderhuanmi ñucanchij causaipica ‘espiritupaj granota’ ricuchi tucunchij (Gálatas 5:22, 23-ta leyipai). Espiritupaj granota ñucanchij causaipi ricuchishpaca Yaya Dios shina cashcatami ricuchishun (Colosenses 3:10). Shinallataj shujtajcunahuanmi alli apanacushun. Llaquipi ama urmangapajpish imata ruranatami yachashun. Cunanca espiritupaj granota ricuchishpa ima shina causana cashcata ricushun.

8-12. ¿‘Espiritupaj granoca’ ima shinataj ñucanchijta ayudan?

⁸ ‘Cꞌuyaj cana, cushi cana, sumajta causana’. Shujtajcunata cꞌuyaihuan, respetohuan tratashpaca alli, tranquilomi sintirishun. Ashtahuanpish shujtajcunahuan pꞌiñanacunapaj randica paicunahuanmi sumajta causashun (Romanos 12:10).

⁹ ‘Mana utca pꞌiñarina, alli shungu cana, alli cana cana’. Efesios 4:32-pica: “Caishujhuan chaishujhuan alli caichij, caishuj chaishuj llaquijcuna, perdonacujcuna caichij” ninmi. Cai consejota cazushpaca shujtajcunahuan sumajtami causashun. Chashnami mana yalli sustarishun. Problemacuna ricurijpipish, ima shina allichinatami yachashun.

¹⁰ ‘Crina’. Huaquinpica cullquimanta, shujtaj cosascunamanta sustarishpami shaicushca shina sintirinchij (Proverbios 18:11). Pero apóstol Pabloca: “Imata charishcacunallahuan cushi caichij” nircami. Cai consejota catishpaca cullquimanta mana yalli sustarishunchu. Diospi shunguta churashpaca pai ñucanchij ima minishtishcata cunatami tucui shunguhuan crishun. Paica: “Cantaca manataj shitashachu, manataj cungarishachu” ninmi. Apóstol Pablo shinami ñucanchijpish, “Diosca ñucata ayudajmi. Pipish ñucata  imata ruranataca, mana manchanichu” nishun (Hebreos 13:5, 6).

¹¹ ‘Manso shungu cana, quiquinllataj jarcarij cana’. Chashna cashpaca ñucanchijllatajmi imatapish ninamanta o imatapish ruranamanta jarcarishun. Ashtahuanpish ucu shungullapi pꞌiña canamanta, shujtajcunata cꞌamishpa rimanamantapish jarcarishunmi (Efesios 4:31).

¹² Diospi tucui shunguta churangapaj, ñucanchij llaquicunata paiman mingangapajca humildesmi cana canchij (1 Pedro 5:6, 7). Humildes cajpica Diosca ñucanchijta cuidangami. Ñucanchijlla tucuita mana rurai pudishcataca mana cungarinachu canchij. Chaita yachashpaca ñucanchij llaquicunamanta sustaricunapaj randica Diosllapimi ñucanchij shunguta churashun (Miqueas 6:8, NM).

13. ¿Jesusca imashi tucushun nishpa ama huañuricuichijchu nishpaca imatataj entendichisha nirca?

¹³ Jesusca: “Caya punlla imashi tucushun nishpa ama huañuricuichijchu” nircami (Mateo 6:34-ta leyipai). Cai consejota pajtachinaca ñucapajca sinchimi canga nishpachari yuyanchij. Pero Jesusca cai consejota cushpaca imamantapish nunca mana sustarina cashcataca mana nicurcachu. Ña yachacushca shinaca huaquinpica Rey Davidpish, Apóstol Pablopish llaquicunata charishcamantaca sustarircacunami. Ashtahuanpish Jesusca paita catijcunamanca imamantapish yallitaj sustarishpaca mana imata allichi pudishcatami entendichisha nirca. Cada punllami problemacunata charishun. Chaimanta ñaupa punllacunapi ima problemacunata charishcata, shamuj punllacunapi ima problemacuna tiyanamantaca mana yalli sustarinachu canchij. Ama yalli sustarishca cangapajca ¿ima shinataj Jesuspaj consejota pajtachina canchij?

14. ¿David shina imatataj rurana canchij?

¹⁴ Huaquinpica imapi pandarishcata yuyarishpami llaquilla sintirinchij. Achca huatacuna pasajpipish imapi pandarishcamantami llaquirishpalla causai pudinchij. Rey Davidpish paipaj pandarishcacunata yuyarishpaca llaquillami sintirirca. Paica: “Ñuca shungupica yallitaj llaquihuan canica. Caparicunica” nircami (Salmo 38:3, 4, 8, 18). Pero Davidca Jehová Dios llaquij, perdonaj cashcataca tucui shunguhuanmi  crirca. Chaimantami Jehová paita perdonashcata yachashpaca cushilla sintirirca (Salmo 32:1-3, 5-ta leyipai). Ñucanchijpish Jehová Dios llaquij, perdonaj cashcataca mana cunganachu canchij.

15. a) ¿Davidmantaca imatataj yachanchij? b) ¿Problemacunamanta ama yalli sustaringapajca imatataj rurana canchij? ( “Problemacunamanta ama yalli sustaringapajca caita rurai” cuadrota ricui).

¹⁵ Huaquinpica ima llaquipi cashcamantami sustarinchij. Por ejemplo Salmo 55-ta David quillcacushpaca paita huañuchisha nijpica manchaitami sintirca (Salmo 55:2-5). Pero Davidca chaipi sustarinapaj randica Diospi shunguta churashpami Diostaca ñucata ayudahuayari nirca. Chashna jahuapish Davidca paipish problemacunata allichingapaj esforzarina cashcatami ricurca (2 Samuel 15:30-34). ¿Davidmantaca imatataj yachanchij? Problemacunamanta sustaricunapaj randica ima shina allichinatami ricuna canchij. Shinallataj Jehová Dios ñucanchijta ayudanatami tucui shunguhuan crina canchij.

16. Diospaj shuti imata nisha nishcata yachashpaca ¿ima shinataj sintirinchij?

¹⁶ Huaquinpica shamuj punllacunapi imashi tucushun nishpami sustarinchij. Chashna cajpipish ima manaraj tucujpica mana sustarinachu canchij. Maipica jatun llaquipi urmashun nishpami yuyanchij, pero qꞌuipamanca ima mana tucunchijchu. Chashna sustaricushpaca Jehová ñucanchijta ayudai pudishcata yuyarinami canchij. Paica ‘Ñucaca ñuca ima tucusha nishcami tucusha’ ninmi (Éxodo 3:14, NM). Diosca ñucanchijman cusha nishcatami tucuita pajtachinga. Chaimantami paica Jehová shuti can. Caita yachashpaca shamuj punllacunapi ima llaqui japinamanta mana yalli sustarinachu canchij. Ñucanchij ima problemata charishpapish o ima problemata charishca cashpapish ama chai yuyailla catichunmi Jehová Diosca ayudanga. Shamuj punllacunapicarin ñucanchijmanca achca bendicioncunatami cunga.

17, 18. ¿Problemacunata charishpaca imamantataj shujtajcunahuan parlanacuna canchij?

¹⁷ Shujtajcunaman ima shina sintirishcata, imata sustarishcatami parlai tucunchij. Ñucanchij cusahuan o huarmihuan, shuj alli amigohuan o congregacionmanta shuj ancianohuanmi parlanacui pudinchij.  Paicuna ñucanchijta uyashpa, alli shimicunahuanmi ayudai tucun. Bibliapica: “Ima llaquimanta shungu pꞌaquirijpica ima yuyaipish chingarinmi. Shina cajpipish cꞌuyaihuan rimashca shimicunaca cushichinmari” ninmi (Proverbios 12:25). Bibliaca cai consejotapishmi cun: “Imapish alli cachunca taucapura yuyarinacushpami callarina. Pita mana tapushpalla alli ruranata yuyashpaca, llaqui tucunllami” ninmi (Proverbios 15:22).

¹⁸ Shinallataj tucui semanacuna tandanacuiman rishpami ñucanchij problemacunamanta mana yalli sustarishun. Ñucanchij huauqui panicunahuan tandanacujpica paicunaca ñucanchijmanta sustarishpami animota cun (Hebreos 10:24, 25). Chashna caishujmanta ‘chaishujmanta cushichinacushpaca’ ima llaquita ahuantangapaj fuerzastami charishun (Romanos 1:12).

19. ¿Llaquicunata ahuantanapajca imamantataj Diospajman cꞌuchuyana cangui?

¹⁹ Shuj huauquica Canadá llajtapimi causan, congregacionpi ancianomi can. Paica cashnami nin: “Ñucaca profesormi cani, chaimantami maipica shaicushca sintirini. Shuj ungüitami charini, chai ungüimantami llaquilla, sustarishpa causani. Pero ñaupajman catingapajca Diospajman cꞌuchuyangapajmi esforzarini. Shinallataj ñuca huarmimanmi ima shina sintirishcata parlani. Ñuca amigocunahuanpishmi parlanacuni. Congregacionmanta ancianocunapish, superintendentepish Jehová Diospaj yuyaita charichunmi ayudashcacuna. Shinallataj doctorpajman rishpami ñuca ungüi ima shina cashcata yacharcani. Doctormi alli sintiringapaj ashtahuan samarina cashcata, ejerciciota rurana cashcata entendichirca. Chashnami asha asha alli sintiri callarircani. Cunanca ima llaquita mana allichi tucushpaca Diospaj maquipimi mingani” ninmi.

20. a) ¿Ñucanchij llaquicunataca ima shinataj Diosman mingai tucunchij? b) ¿Catij yachaipica imatataj yachashun?

²⁰ Cai yachaipica ñucanchij llaquicunata Diosman mingana cashcatami yachashcanchij. Chaipajca Diostami mañana canchij. Bibliata leyina, imata leyishcatapish yuyarinami canchij. Chashnallataj Diospaj espíritu santo ayudachun saquinami canchij. Shujtajcunahuan ñucanchij llaquicunamanta parlanami canchij. Tandanacuicunamanpish rinata mana cungarinachu canchij. Catij yachaipica Dios cusha nishcacunata japina yuyailla causana cashcatami yachashun (Hebreos 11:6).