1, 2. ¿Imamantataj Romanos 5:12-ta yachana canchij?

ROMANOS 5:12 versotaca tucuicunami alli rijsinchij. Chaipica: “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” ninmi. Gentecunaman huillacushpaca cai versomantami yachachinchij.

² Por ejemplo, ¿Bibliaca imatataj yachachin? libropimi Romanos 5:12-ca achca cutin ricurin. Chaimantami ñucanchij huahuacunaman, shujtaj gentecunaman capítulo 3, 5, 6-ta yachachicushpaca cai versota leyinchij. Cai versohuanmi gentecuna imamanta huañushcata, imamanta quishpichichun minishtishcata, cai Allpa imamanta mana shuj paraíso cashcata paicunaman entendichinchij. Pero ¿imamantataj ñucanchijpish Romanos 5:12-ta yachana canchij? Ñucanchijpish cai versota yachashpaca Yaya Dios paipajman cꞌuchuyachun  saquishcamantami paita pagui nishun. Shinallataj tucui shunguhuanmi Diosta cazunata munashun, pai cusha nishcacunatapish shuyashpami catishun.

3. ¿Imatataj mana cungarina canchij?

³ Tucuicunami juchayuj cashcamantaca punllanta pandarinchij. Chaitaca mana cungarinachu canchij. Jehová Diosca ñucanchij juchayujcuna cashcataca yachanmi. Chaita yachashpapish paica ñucanchijta llaquishcamantami quishpichisha nin (Salmo 103:13, 14). Jesusca Yaya Diosta perdonahuai nishpa mañachunmi yachachirca (Lucas 11: 2-4). Jehová Dios ñucanchij juchacunata perdonashca cajpica ña mana ñucanchij pandarishcacunata yuyarishpa causanachu canchij. Cunanca Jehová Dios ñucanchij juchacunata imamanta perdonai tucushcata ricushun.

4, 5. a) ¿Romanos 5:12-ta entendingapajca imatataj rurana canchij? b) ¿Mana cꞌuyaipajta cꞌuyai nishpaca Bibliaca imatataj nisha nin?

⁴ Romanos 5:12-ta entendingapajca Romanos capítulo 6-tami alli yachana canchij. Chashnami Jehová Dios ñucanchij juchacunata imamanta perdonai pudishcata entendishun. Apóstol Pabloca tucuicunami juchayuj canchij nircami. Qꞌuipaca: “Diosca mana cꞌuyaipajta cꞌuyaihuanmi cashcata rurajta rurarca. Cristo Jesús cacharichijpimi cashcata ruraj tucurcanchij” nircami (Romanos 3:23, 24). Mana ‘cꞌuyaipajta cꞌuyaihuan’ nishpaca apóstol Pabloca, Diosca imata mana tigrachichun shuyashpa ñucanchijpaj allicunata rurashcatami nisha nirca.

⁵ Bibliamanta yachaj shuj runa nishca shinaca, Bibliapi ‘mana cꞌuyaipajta cꞌuyai’ nishpaca Jehová Diospish Jesuspish juchamanta, huañuimanta gentecunata quishpichingapaj paicuna imata rurashcatami nin. Chaimantami griego shimipi Jehovapish Jesuspish ‘mana cꞌuyaipajta cꞌuyaita’ ricuchirca nishpa quillcarcacuna. Cunanca Jehová Dios cꞌuyaita ricuchishpa ñucanchijmanta imata rurashcata, cunan punllacunapi ima shina ayudacushcata, shamuj punllacunapi ima bendicioncunata charina cashcatapishmi ricushun.

6. a) ¿Picunataj Diospaj bendicioncunata chasqui pudincuna? b) ¿Jesús paipaj Yayata cazushcamantaca achcacunaca ima bendicioncunatataj chasquingacuna?

⁶ Adán juchapi urmashcamantami tucuicuna juchayuj tucushcanchij, huañunchijpish. Chaimantami Bibliapica: “Mandashcata shuj runa pꞌaquishcamantami, huañuica mandai callarirca” ninmi. Shinapish Diosca tucui gentecunata cꞌuyashcamantami paipaj churita cachashpa ñucanchijta quishpichirca (Romanos 5:12, 15, 17). Chaimantami tucuicuna achca bendicioncunata chasqui tucunchij. Shinallataj Jesús paipaj Yayata cazushcamantami achcacuna Diospaj ñaupajpi alli ricuringacuna, huiñai causaitapish charingacuna (Romanos 5:19, 21).

7. ¿Jehová Diosca paipaj churita cai Allpaman cachanatajchu carca?

 ⁷ ¿Jehová Diosca paipaj churita cai Allpaman cachanatajchu carca? Mana. Paica ñucanchijta cꞌuyashcamantami juchamanta, huañuimanta quishpichingapaj paipaj churita cacharca. Ñucanchijcuna mana cꞌuyaipaj cajpipish Jehová Diospish Jesuspish ñucanchijta cꞌuyashcatami ricuchircacuna. Chaimantami Diosca ñucanchij juchacunata perdonai tucun. Shinallataj huiñai causaitapish chari tucunchij. Jehová munashca shina causashpaca ñucanchijta quishpichishcamanta pagui nishcatami ricuchinchij.

8. ¿Ima yuyaitataj mana charina canchij?

⁸ Jatun juchacunata rurashca cajpipish Jehová Diosca perdonasha ninmi. Pero ¿ima yuyaitataj mana charina canchij? Ñucanchij ima mana allita rurajpipish Diosca ñucanchijta cꞌuyashcamanta perdonangallami nishpaca mana yuyanachu canchij. Apostolcuna causai punllacunapipish huaquin crijcunaca chashna yuyaitami charircacuna (Judas 4-ta leyipai). Cunanpish huaquin gentecunaca chashnallatajmi yuyancuna. Pero ñucanchijca paicuna shina ama yuyangapajmi cuidadota charina canchij.

9, 10. ¿Pabloca imamantataj ‘juchata ama rurangapajca huañushcacuna shinami canchij’ nirca?

⁹ Pabloca crijcunamanca ima juchapi urmajpipish Diosca perdonangallami nishpaca mana yuyanachu canguichij nircami. Chashna yuyaita ama charichunca paicunataca: ‘Juchata ama rurangapajca huañushcacuna shinami canguichij’ nircami (Romanos 6:1, 2-ta leyipai). ¿Imamantataj chashna nirca?

¹⁰ Jesús huañushcamantami Diosca apóstol Pablopaj juchacunatapish punta crijcunapaj juchacunatapish perdonarca. Shinallataj Diosca espíritu santohuanmi paicunataca paipaj churicuna cachun agllarca. Paicuna Diosta tucui shunguhuan servishpa catijpica jahua pachapimi Jesucristohuan mandana carcacuna. Pero Pablopish punta crijcunapish cai allpapirajmi causacurcacuna. Shinashpaca ¿imamantataj apóstol Pabloca ‘juchata ama rurangapajca huañushcacuna shinami canchij’ nirca? Paicunapaj causaita cambiashcamantami chashna nirca. Caita entendichingapajca Pabloca Jesuspaj ejemplotami churarca. Paica: ‘Jesusca mana huañuna cuerpohuan causarishcamanta huañuica mana paipaj amochu can’ nircami. Chashnallatajmi punta crijcunapish ‘juchata ama rurangapajca’ huañushca shina carcacuna. Pero Diospajta rurangapajca causacurcacunami (Romanos 6:9, 11). Mapa munaicuna paicunapaj causaita mandachun ña mana saquishcamantami cai crijcunaca tucui shunguhuan Diospaj nishcata cazungapaj esforzaricurcacuna.

11. ¿Cunan punllacunapish ima shinataj ‘juchata ama rurangapajca huañushcacuna shina canchij’?

¹¹ ¿Ñucanchijpish ima shinataj ‘juchata ama rurangapajca huañushcacuna shina canchij’? Diosta manaraj rijsishpaca mana alli cosascunatami rurarcanchij, ‘juchapaj esclavocunami carcanchij’ (Romanos 6:19, 20). Pero Diospaj Shimita yachashpaca Dios ima shina causachun munashcatami yacharcanchij. Chaimantami ñucanchij causaita cambiashpa Diosman mingarishpa  bautizarircanchij. Bautizarishca qꞌuipaca Dios munashca shinami causasha nishcanchij. Chashnami ‘juchamanta cacharichishca cashpa, cashcata rurajcuna’ tucurcanchij (Romanos 6:17, 18).

12. ¿Imatataj cada uno agllana canchij?

¹² Apóstol Pabloca: “Cancunapaj huañujlla cuerpota, jucha mandachunca ama saquichijchu. Chaimanta aicha munaicunataca ama cazuichijchu” nircami (Romanos 6:12). Cada unomi mapa munaicuna ñucanchijta mandachun saquinata o mana mandachun saquinata agllana canchij. Chaimanta tapurishunchij: ¿Mapa munaicunamanta mana jarcarishpa mana allicunata ruranchijchu? Mana cashpaca ¿chai mapa munaicunata utcachu ñuchanchij yuyaimanta anchuchinchij? Dios ñucanchijta cꞌuyashcamanta pagui nishcata ricuchingapajca paita cazungapajmi esforzarina canchij.

13. a) ¿Corinto llajtamanta crijcunamantaca imatataj yachanchij? b) ¿Roma llajtamanta crijcunamantaca imatataj yachanchij?

¹³ Corinto llajtapica huaquincunaca shuhuacuna, machajcuna, huainayajcuna, yanga dioscunata adorajcuna, cꞌaripura, huarmipura mapata rurashpa causajcunami carca. Pero Diosta rijsishpaca Diosta cꞌuyashcamantami paicunapaj causaita cambiarcacuna. Mapa munaicunata rurashcamantaca pingarircacunami (Romanos 6:21; 1 Corintios 6:9-11). Roma llajtapi causaj crijcunapish paicunapaj causaitami cambiana carcacuna. Pabloca: ‘Cancunapaj aichapi imalla tiyajcunatapish millaita rurachichun juchamanca ama cuichijchu. Ashtahuanpish huañushcacunapaj chaupimanta causarishca shina cashcamanta, cancunallataj Diosman curichij. Cancunapaj aichapi imalla tiyajcunatapish Dios munashcata rurangapaj Diosman cuichij’ nircami (Romanos 6:13). Pabloca paicuna allicunata rurajpica Jehová Dios paicunata ayudanata yacharcami.

14, 15. ¿Imatataj tapurina canchij?

¹⁴ Cunan punllacunapish huaquincunaca Corinto gentecuna shinami mapa ruraicunata rurashpa causarcacuna. Pero Diosta rijsishpaca paicunapaj causaita cambiarcacunami. Chashnami ‘maillashcacuna’ shina laya carca. Tucuicunami Diosta cushichingapajca ñucanchij causaita cambiana cashcanchij. Pero Dios ñucanchijta cꞌuyashcamanta pagui nishcata ricuchingapajca ¿imatataj rurana canchij? Mapa munaicunata huashaman saquishpami Diosta servishpa causana canchij.

¹⁵ Corinto crijcuna shina jatun juchacunata ruranamantaca caruyanami canchij. Jatun juchacunapi urmashpa catijpi Dios ñucanchijta cꞌuyashcamanta perdonachunca mana shuyanachu canchij. Pero huaquincuna mana tucui juchacunachu jatun juchacuna can nijpipish ¿Diostaca tucuipi  cazungapaj esforzarinichu? nishpami tapurina canchij (Romanos 6:14, 17).

16. ¿Pablomantaca imatataj yachanchij?

¹⁶ Apóstol Pabloca: “Ñucaca ñuca munaita ruracuj cashcamanta juchaman cꞌatushcami cani” nircami. Qꞌuipaca: “ñuca rurasha nishcataca mana ruranichu, ashtahuanpish pꞌiñacushcatarajmi rurani” nircami (Romanos 7:14, 15). ¿Pablomantaca imatataj yachanchij? Paica 1 Corintios 6:9-11-pi parlashca juchacunata mana ruracushpapish shujtaj juchacunapi urmashcatami cuentata curca. Pabloca Diosta cushichisha nishpami allicunata rurangapaj sinchita esforzarirca (Romanos 7:21-23-ta leyipai). Ñucanchijpish Pablo shinami Diosta tucui shunguhuan cazungapaj esforzarina canchij.

17. ¿Imamantataj honrados cana canchij?

¹⁷ Diosta servingapajca honradosmi cana canchij (Proverbios 14:5; Efesios 4:25-ta leyipai). Diabloca “llullapaj yayami” can. Ananiaspish paipaj huarmipish llullashcamantami huañurcacuna. Paicuna shinaca mana casha ninchijchu (Juan 8:44; Hechos 5:1-11). Honrado nishpaca mana llullanallamantachu parlacun. Dios cꞌuyashcamanta pagui nishcata ricuchingapajca ¿ima shujtaj ruraicunapitaj honrados cana canchij?

18, 19. ¿Ima shinataj honrados cashcata ricuchinchij?

 ¹⁸ Tucuipimi honrados cana canchij. Por ejemplo, Jehová Diosca israelitacunamanca: ‘Ama shuhuanguichijchu, ama llullanguichijchu, caishuj chaishuj ama umanacunguichijchu. Cancunapaj Diosca jucha illaj cashcamanta, cancunapish jucha illajlla caichij’ nircami (Levítico 19:2, 11). Shujtajcunaman llullacunata mana nishpapish paicunata umashpaca mana honrados cashcatami ricuchinchij.

¹⁹ Caita yuyashun: Shuj runaca trabajomanta utca llujshisha nishpami paipaj jefeman o compañerocunamanca: “Doctorpajmanmi rigrini” nin. Pero chaica mana ciertochu can. Paica farmaciapi randinallapaj o doctorman paganallapajmi rina can. Ashtahuanpish paseanaman rinaraicullami trabajomanta utca llujshisha nin. ¿Cai runaca honrado cashcatachu ricuchirca? Mana. Cai runaca shujtajcunata umangapajmi chashna nirca. Huaquinpica gentecunaca paicunata ama castigachun nishpa o imata japinallapajmi shujtajcunata crichincuna. Pero Diosca shujtajcunataca “ama umanguichijchu” ninmi. Chaimantami Dios munashcata rurashpa paipajlla causana canchij (Romanos 6:19).

20, 21. ¿Dios ñucanchijta cꞌuyashcamanta pagui ningapajca imacunamantataj jarcarina canchij?

²⁰ Machanamanta, huainayanamanta shujtaj jatun juchacunamantapish jarcarinchijmi. Chashna jahuapish Dios tucui millashca cosascunamantami jarcarina canchij. Por ejemplo mana huainayashpapish mapa cosascunata ricunamanta, shujtaj mapa ruraicunamantapish jarcarinami canchij. Shinallataj mana machashpapish, casi machangacamaca mana ubyanachu canchij. Chai mapa munaicunamanta jarcarina sinchi ricurijpipish jarcari tucunchijmi.

²¹ Pabloca: “Cancunapaj huañujlla cuerpota, jucha mandachunca ama saquichijchu. Chaimanta aicha munaicunataca ama cazuichijchu” nircami. Tucui shunguhuanmi cai consejota cazuna canchij (Romanos 6:12; 7:18-20). Juchayujcuna cashcamantami huaquinpica pandarinchij. Chashna cajpipish juchapi ama urmangapaj esforzarishpaca Jehovatapish Jesustapish ñucanchijta cꞌuyashcamanta pagui nishcatami ricuchishun.

22. ¿Dios cꞌuyashcamanta paita pagui nishpaca imatataj charishun?

²² Jehová Diosca cꞌuyashcamantami ñucanchij juchacunata perdonashca. Paica perdonashpa catisha ninmi. Chaimantami Diostaca achcata pagui ninchij. Shujtajcunapaj mana alli ruraicuna alli shina ricurijpipish allicunata rurashpami catina canchij. Chashna rurashpaca ¿imatataj charishun? Pabloca: “Cunanca juchamanta cacharichishca, Diospajta rurajcunami canguichij. Chaimanta japinataca, jucha illaj canata, tucuripica huiñai causaitami charinguichij” nircami (Romanos 6:22).