1, 2. a) ¿Imamantataj Diosta cꞌuyana canchij? b) ¿Cai yachaipica ima tapuicunatataj yachagrinchij?

JEHOVÁ DIOSCA ñucanchij Yayami can. Paita alli servijcunataca bendiciasha ninmi. Chashnami ñucanchijta cꞌuyashcata ricuchin. Shinallataj, “ñucanchijca pairaj cꞌuyashcamantami paitaca cꞌuyanchij” (1 Juan 4:19). ¿Imamantataj Diosta cꞌuyana canchij? Diosta ashtahuan cꞌuyashpaca paipimi ashtahuan crishun. Shinallataj ñucanchijta cꞌuyashcamanta ñucanchijta bendiciana cashcatami tucui shunguhuan crishun (Hebreos 11:6-ta leyipai).

² Jehová Diosca cꞌuyaj Yaya cashcamantami ñucanchijta bendiciasha nin. Bibliapica: ‘Crinaca imata japisha nicushcata japinataj cashcata shuyanami’ can ninmi (Hebreos 11:1). Dios ñucanchijta bendicianataca crinatajmi canchij. Chashnami Diospi tucui shunguhuan crishcata ricuchishun. Cunanca cai tapuicunatami yachagrinchij: ¿Imamantataj Dios cusha nishcacunata shuyana canchij? ¿Diosca ñaupa tiempopi paita servijcunataca ima shinataj bendiciarca? ¿Diosca paita servijcunataca ima shinataj bendiciacun?

3. ¿Malaquías 3:10-pica Diosca imatataj rurasha nin?

³ Jehová Diosca ñucanchijtaca bendiciashataj ninmi. Chaimantami tucui shunguhuan paita servishpa causana canchij. Paica: ‘Cancuna ñucata cazujpica ñucapish manachu jahua pacha ventanacunata pascashpa, tucui imatapish cancuna mana huaquichi tucungacama bendiciasha’ ninmi (Malaquías 3:10). Jehová Dios chashna bendiciasha nishcamantaca ¿manachu diosolopagui ninchij?

4. ¿Mateo 6:33-pi Jesús nishcacunataca imamantataj crina canchij?

⁴ Jesusca paita catijcunamanca: ‘Diosta servishpa causajpica paica cancunamanca ima illashcatami cunga’ nircami (Mateo 6:33-ta leyipai). Dios paipaj nishcacunata pajtachij cashcata yachashpami Jesusca chashna nirca (Isaías 55:11). Ñucanchijpish tucui shunguhuan Diosta crijpica paica: “Cantaca mana cungarishachu, mana saquishachu” ninmi (Hebreos 13:5, QC, 1989). Cai nishcacunata yuyarishpaca Mateo 6:33-pi Jesús nishcacunatami tucui shunguhuan crishun.

5. ¿Mateo 19:29-pi Jesús nishcacunata leyishpaca ima shinataj sintirinchij?

⁵ Apóstol Pedroca Jesustaca: ‘Ñucanchij tucuita saquishpa, quiquinta catishcamantaca ¿imatataj chasquishun?’ nishpami tapurca (Mateo 19:27). Pedro chashna tapushcamantaca Jesusca mana rimarcachu. Ashtahuanpish Jesusca paita catijcunamanca tucui shunguhuan Diosta servijpica paica cancunataca bendiciangami nircami. Apostolcunapish, shujtaj huauqui panicunapish  jahua pachapimi Jesushuan mandangacuna. Pero Jesusllatajmi cunan punllacunapish bendicioncunata charinguichij nirca. Paica cashnami nirca: “Maijanpish paipaj huasita, huauquicunata, panicunata, yaya mamata, huarmita, huahuacunata, allpacunata saquishpa ñucata catishcamantaca, patsaj cutinhuan yallitami japinga. Huiñai causaitami chasquinga” nircami (Mateo 19:29). Cunan punllacunapipish congregacionpi huauqui panicunaca ñucanchij yaya, mama, huauqui, pani, churicuna shinami can. Ñucanchijpish Diosta servingapaj tucuita saquishcamantaca cunan charishca bendicioncunaca chai saquishca cosascunatapish yallimi can.

6. ¿Jehová Dios ñucanchijta bendicianata crishpaca imatataj rurashun?

⁶ Jehová Dios ñucanchijta bendicianata crishpaca llaquicunata ahuantashunmi. Diosca cunan punllacunapica ñucanchijta bendiciacunmi. Shamuj punllacunapicarin ashtahuanmi ñucanchijta bendicianga (1 Timoteo 4:8). Dios ‘paita mashcajcunaman ima illashcata cuj cashcata tucui shunguhuan crishpaca’ paita servishpami catishun (Hebreos 11:6).

7. ¿Bibliapica imamantataj Dios cusha nishcacunata japina yuyailla causanataca barcota charicuj fierrohuan chꞌimbapuran?

⁷ Jesusca shuj urcupi yachachicushpaca: “Jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish chashnallatajmi llaquichircacuna” nircami (Mateo 5:12). Diosta servijcunapuramanta huaquincunaca jahua pachapimi causangacuna. Cutin shujtajcunaca cai Allpapimi huiñaita causangacuna. Chaita yachashpaca paicunapish ‘jatunta cushicushpami contentarincuna’ (Salmo 37:11; Lucas 18:30). Tucuicunami Dios cusha nishcacunata japina yuyailla causana canchij. Mama cuchapi jatun huaira shamujpi barcota sinchita charichunca shuj jatun fierrotami yacu ucupi shitancuna. Chashnallatajmi problemacuna ricurijpica ‘Dios cusha nishcacunata japina yuyailla causanaca, barcota charicuj jatun fierro shinami ñucanchijta sinchita charinga’ (Hebreos 6:17-20).

8. ¿Dios cusha nishcacunata yuyarishpaca ima shinataj sintirishun?

⁸ Problemacunamanta ama yalli sustaringapajca Dios cusha nishcata japina yuyaillami causana canchij. Shuj pomadaca aicha chugririshca cajpica alivianmi. Chashnallatajmi Dios cusha nishcacunata yuyarishpaca llaquicunamanta shungupi aliviarishca shina sintirishun. Ñucanchij tucui llaquicunata Diosman mingajpica ñucanchijta cuidangami. Caita yachashpaca ¿manachu cushilla sintirinchij? (Salmo 55:22). ‘Dios ñucanchij mañashcatapish yallita rurai tucushcataca’ tucui shunguhuanmi crina canchij (Efesios 3:20). Jehová Diosca mana ñucanchij mañashcallatachu cunga ashtahuanpish mañashcatapish yallimi cunga.

9. ¿Dios ñucanchijta bendiciachunca imatataj rurana canchij?

 ⁹ Jehová Dios ñucanchijta bendiciachunca paipimi tucui shunguhuan crina canchij, cazunapish canchij. Moisesca israelitacunamanca cashnami nirca: ‘Mandaj Diosca cancuna causachun pai cugricun llajtapica jahuanpi jahuanpimi allicunata cunga. Tucui cai mandashcacunata cunan ñuca cancunaman yachachishcataca cancunaca cazushpa pajtachishpami causana canguichij. Chashna rurajpimi Diosca allicunataca cunga’ nircami (Deuteronomio 15:4-6, QC, 1989). Cunan punllacunapish ¿Diosta servijpica pai ñucanchijta bendicianata crinchijchu? Ari. Pai imalla rurashcata ricushpami chaita crinchij.

10, 11. ¿Jehová Diosca ima shinataj Joseta bendiciarca?

¹⁰ Bibliapica ñaupa tiempopi paita servijcunata Jehová Dios ima shina bendiciashcatami parlan (Romanos 15:4). Josemanta parlashun. Josetaca paipaj huauquicunami Egipto llajtapi esclavo cachun jaturcacuna. Qꞌuipaca José mana imata rurajpipish shuj huarmica juchachircami. Chaimantami Josetaca carcelpi churarcacuna. ¿José carcelpi cajpica Yaya Diosca paita cungarircachu? Mana. Ashtahuanpish Bibliapica: ‘Prezupi cajpipish Mandaj Diosca Joseta llaquishpami paihuan carca. Joseca Mandaj Dios paihuan cajpimi tucui pai imata rurashcapish alli llujshirca’ ninmi (Génesis 39:21-23). José sinchi llaquicunata charishpapish mana pꞌiñarishpami Jehová Dios paita ayudachun shuyarca.

¹¹ ¿Jehová Diosca ima shinataj Joseta bendiciarca? Asha huatacuna qꞌuipaca Faraonca Josetaca carcelmantami llujshichirca. Joseca humilde cashcamantami Faraón qꞌuipa mandaj tucurca (Génesis 41:1, 37-43). Josepish paipaj huarmindijmi ishqui churicunata charircacuna. Paica, “punta churitaca Manasesta shutichishpami cashna nirca: ‘Taita Diosca ñuca llaquicunataca cungachircami. Ñuca huasi ucupuracunatapish cungachircami’ nishpami chashna shutichirca. Qꞌuipa churitapish Efrainta shutichishpami:‘Taita Diosca ñucataca llaquita apacushca llajtapimari churicunayujta rurahuan’ nishpami chashna shutichirca” (Génesis 41:51, 52). Taita Diosca paita cazushcamantami Josetaca bendiciarca. José cazushcamantami paipaj familiapish, Egiptopi causaj gentecunapish mana yaricaihuan huañurcacuna. Dios ayudajllapimi chai bendicioncunata charishcata Joseca alli yacharca (Génesis 45:5-9).

12. ¿Jesusca llaquicunata apashpapish imamantataj Diosta cazurca?

¹² Jesucristo llaquicunata apashpapish Diostami cazurca. Chaimantami Diosca paita bendiciarca. Pero ¿Jesusca llaquicunata apashpapish imamantataj Diosta cazurca? Diospaj Shimipica: ‘Paica huañushca qꞌuipaca, cushicuna cashcata yachashpami paita asicujpipish mana pingarishpa huañurca’ ninmi (Hebreos 12:2). Jesusca Diospaj shutita jatunyachishpami cushilla sintirirca.  Cutin Jehová Diosca Jesús cazushcamantaca allitami rurarcangui nishpami achcata bendiciarca. Chaimanta Jesusca, ‘Dios mandashpa tiyana alli ladopimi tiyarirca’. Chashnallataj ‘Diosca tucui ima tiyajcunapaj jahuapimi Jesusta jatunyachirca. Tucui shuticunapaj jahuapi shuj jatun shutitapishmi paiman curca’ (Filipenses 2:9).

13, 14. ¿Diosta tucui shunguhuan servijpica paica ima shinataj ricun?

¹³ Problemacunata charishpapish Diosta alli servingapaj esforzarijpica paica ñucanchij rurashcacunata ricushpaca achcatami valichin. Ñucanchij imatapish mana rurai pudinchijchu nishpa yuyajpica Diosca entendinmi. Shinallataj trabajomanta shaicushca cajpi o familiata ima shina mantininata mana yachajpica Diosca ñucanchijta llaquinmi. Yallitaj llaquirishcamanta o shujtaj ungüimanta ñaupa shina Diosta servingapaj mana tanto rurai tucujpipish paica ñucanchijta llaquinmi (Hebreos 6:10, 11-ta leyipai).

¹⁴ Jehová Diosca ñucanchij mañashcacunata uyaj cashcata manataj cungarinachu canchij (Salmo 65:2). Paica ñucanchij llaquij Yayami, tucuipi cushichij Diosmi. Paimanta ama caruyachunmi ñucanchijta ayudasha nin. Chaipajca huaquinpica Diosta servijcuna ñucanchijta ayudachunmi paicunaman yuyaita cun (2 Corintios 1:3). Ñucanchij shujtajcunata llaquijpi, ayudajpica Jehová Diosca achcatami cushicun. Chaimantami Diospaj Shimipica: ‘Maijanpish huajcha runata llaquishpa imata cushpaca Mandaj Diosman mañachishca shinami. Chai allita rurashcamantaca tigra cungami’ ninmi (Proverbios 19:17; Mateo 6:3, 4). Huauqui panicunata ayudajpica Diosman imata mañachishca layami can. Chaimantami Diosca bendiciasha nin.

15. ¿Shamuj punllacunapi ima bendiciontataj chasquisha ningui? (Página 21-pi tiyaj dibujota ricui).

¹⁵ Ungidocunaca Jesús ‘coronata’ cuchunmi shuyacuncuna (2 Timoteo 4:7, 8). Pero jahua pachaman mana rigrijcunaca mana llaquirinachu can. Paicunapish shujtaj bendicioncunatami chasquingacuna. Bibliapica paicunataca Jesuspaj ‘shujtaj ovejacuna’ ninmi. Paicunaca cai Allpapi huiñai huiñaita causanatami shuyacuncuna. Chaipica ‘yallitaj sumajtami causangacuna’ (Juan 10:16; Salmo 37:11).

16. ¿1 Juan 3:19, 20-pi tiyaj shimicunaca Diosmanta imatataj yachachin?

¹⁶ Huaquinpica Diospajta mana achcata ruranchijchu nishpachari llaquirinchij. Mana cashpaca ñucanchij rurashcacunata ricushpaca Diosca cushillachu canga imachari nishpami yuyanchij. Maipicarin Dios cusha nishca bendicioncunata mana chasquipajmi cani nishpachari yuyanchij. Pero chashna yuyacushpaca ‘Dios ñucanchij shungutapish yalli, tucuita yachaj cashcatami’ yuyarina canchij (1 Juan 3:19, 20-ta leyipai). Ñucanchij rurashcacuna Diospaj ñaupajpi mana valingachu nishpa yuyacushpapish, paita cꞌuyashcamanta tucui shunguhuan servijpica ñucanchijta achcatami bendicianga (Marcos 12:41-44).

17. ¿Diosca paita servijcunataca ima shinataj bendiciacun?

¹⁷ Tucuri punllacunapimi causacunchij. Shinapish Jehová Diosca ¿ima shinataj ñucanchijta  bendiciacun? Diosca paimanta yachachunmi sumaj publicacioncunata, videocunata, shujtaj ayudacunatapish cushca. Chashnallataj pai ayudashcamantami tranquilo causai tucunchij. Marcos 10:29, 30-pi Jesús nishca shinaca mundo enteropi ñucanchij huauqui panicunahuanpish cꞌuyanacushpami tandalla causanchij (Isaías 54:13). Ashtahuanpish Diosca paita mashcangapaj esforzarijcunataca sumaj causaita cushpami bendiciacun (Filipenses 4:4-7).

18, 19. ¿Dios cusha nishca bendicioncunata yuyarishpaca ima shinataj sintirinchij?

¹⁸ Ñucanchij Yaya Diosca tucui paita servijcunatami bendiciashca. Por ejemplo, Bianca shuti panica Alemania llajtapimi causan. Paica cashnami nirca: “Ñuca llaquipi cajpi Jehová Dios ñuca ladopi cashcamanta paita ima shina pagui ninataca mana yachanichu. Llaqui punllacunapimi causanchij. Pero Jehová Diosmanta mana caruyajpica paica ñucata paipaj rigra ucupi cuidacuj shinami sintini. Paica ñuca rurashcacunatapish yallimi bendiciashca” ninmi.

¹⁹ Cutin pani Paulaca Canadá llajtapimi causan. Paica 70 huatacunatami charin. Pani Paulaca huasha nanaihuanmi causan. Mana tanto imata rurai tucushpapish Diospaj Shimita huillanataca mana saquinchu. Paica cashnami nin: “Telefonopi cayashpami Diospaj Shimita huillani, maipi cashpapish pudishcacamallami huillani. Ama llaquilla sintirinapajca shuj cuadernopimi versocunata quillcani, mana cashpaca publicacioncunapi tiyaj yuyaicunatami quillcani. Qꞌuipaca quillcashcatami cutin cutin yuyarinapaj ricuni. Llaquilla sintiricunapaj randica Dios cusha nishcacunatami yuyarishpa causana canchij. Ñucanchijcuna ima llaquipi cajpipish Jehová Diosca ayudangami” ninmi. Ñucanchijca manachari Pani Bianca, pani Paula shina llaquicunata charinchij. Shina cajpipish ñucanchijtapish shujtajcunatapish Dios ima shina ayudashcata yuyarinchijchari. Tucuicunami cunan punllacunapi Yaya Dios ñucanchijta ima shina bendiciashcata yuyarishpa, shamuj punllacunapipish ima shina bendicianata yuyarishpa cushilla sintirinchij.

20. ¿Diospaj munaita rurashpaca imatataj chasquishun?

²⁰ Yaya Diosta tucui shunguhuan mañajpica ñucanchijman bendicioncunata cuna cashcataca manataj cungarinachu canchij. Diospaj munaita rurashpaca pai cusha nishcatami japishun (Hebreos 10:35, 36). Chaimanta Jehová Diospi ñucanchij shunguta churashpa catishunchij. Chashnallataj Diosta alli servingapaj tucuita rurashunchij. Chashna rurashpaca Dios ñucanchijta bendicianataj cashcatami tucui shunguhuan crishun (Colosenses 3:23, 24-ta leyipai).