UCHILLAMANTAPACHAMI Diospaj Shimita yachanata munaj carcani. Ñuca mamaca revistacunata, librocunatami charij carca. Chai revistacunapi, librocunapi tiyaj dibujocunataca achcatami ricunata munaj carcani. Pero ñuca yayaca ñuca mama Diospaj Shimita ñucaman yachachichunca mana munarcachu. Chashna jahuapish yachashpami catinata munarcani. Ñuca yaya mana huasipi cajpimi ñuca mamaca Diospaj Shimita yachachij carca. Diospaj Shimita yachashpaca ñucapish ñuca mama shinami Diosta servisha nircani. Chaimantami 1943 huatapi 10 huatacunata charishpa bautizarircani.

Ñuca mamapish ñucapish siempremi huillanaman rij carcanchij. Gentecuna Diospaj Shimita uyachunca gramófono nishcahuanmi uyachij carcanchij. Chai gramofonoca jatunmi carca, 10 libratami pezaj carca. Huambra cashcamanta ñucapajca chai gramofonota apanaca sinchimi carca.

 14 huatacunata charishpaca precursormi casha nircani. Chaimantami ñuca mamaca siervo para los hermanos nishca huauquihuan parlanacuiraj nirca (siervo para los hermanos nishca huauquicunataca cunanca superintendente de circuito nishpami rijsinchij). Cai huauquihuan parlanacujpica paica precursor cangapaj imapi trabajanata yachanarajmi cangui nircami. Ñucaca chaitami rurarcani. Ishqui huatacunata trabajashca qꞌuipami shujtaj superintendenteman ñucaca precursormi tucunata munani nijpi precursor tucuilla nircami.

1949 huatapica ñucanchij charishcacunata saquishpami Middleton llajtapi servinaman rircanchij. Chaipimi precursor shina ñuca mamahuan servi callarircanchij. Chuscu quillacuna qꞌuipaca shuj huauquihuanmi precursorcuna shina ashtahuan servisha nircanchij. Chaimantami sucursalpi trabajaj huauquicunaca Irlam llajtapi tiyaj mushuj congregacionpi servinaman richij nirca. Cutin ñuca mamaca shuj panihuanmi shujtaj congregacionpi servishpa saquirirca.

Ñucaca 17 huatacunallatami charircani. Chai congregacionpi ashalla huauquicuna tiyashcamantami ñucapish ñuca compañeropish tandanacuipi yachachij carcanchij. Qꞌuipaca Buxton llajtapi shujtaj congregacionmanmi servinaman rircani. Chai congregacionpica ashalla huauqui panicunami tiyarca. Paicunaca ayudachunmi minishtircacuna. Huaquin congregacioncunapi servishcamantami qꞌuipa punllacunaca Jehová Diosta ashtahuan alli servi tucurcani.

1951 huatapica Escuela de Galaadman ringapajmi shuj hojata jundachircani. Pero 1952 huatapi diciembre quillapica soldado tucuchunmi cuartelmanta cayarca. Ñucaca Diospaj Shimita huillaj cashcamantami cuartelmanca mana ri pudinichu nircani. Shina nijpimi ñucataca 6 quillacunata carcelpi churarca. Cárcel ucupi cajpimi Escuela de Galaad clase 22-man richun shuj cartata cacharca. Carcelmanta llujshishca qꞌuipaca 1953 huatapica julio quillapimi Estados Unidos llajtaman barcopi rircani.

Estados Unidos llajtaman chayashpaca “Sociedad del Nuevo Mundo” nishca jatun tandanacuimanmi  rircani. Chai qꞌuipa Escuela de Galaadman chayangapajmi trenta japircani. Carcelpi cashcamanta ashalla cullquitami charircani. Chaimantami trenpi ricuj shuj runataca busmanta paganapaj 25 centavosta mañarcani. Qꞌuipaca busta japishpami South Lansing puebloman chayarcani.

Escuela de Galaadpica, “tucuicunahuanmi paicuna ima shina cajpipish, paicuna shina” tucuna canguichij nishpa yachachirca (1 Corintios 9:22). Escuela de Galaadta tucuchishca qꞌuipaca Paul Bruun, Raymond Leach huauquicunatapish ñucatapish Filipinas llajtapi servinamanmi cacharca. Chaiman ringapajca visata llujchingacamami huaquin quillacunata shuyarcanchij. Visata llujchishca qꞌuipaca barcopi rishpami huaquin llajtacunata pasarcanchij. 47 punllacunatami barcopi rircanchij. 19 de noviembre de 1954 huatapimi Filipinas llajtaman chayarcanchij.

Filipinas llajtaman chayashpaca mushuj shimita, mushuj costumbrecunatami yachana carcanchij. Chaipi causaj gentecunaca tagalo shimitami parlajcuna carca. Puntaca Quezón City nishca llajtapimi servircanchij. Chai llajtapica achca gentecunami inglés shimita rimajcuna carca. Chaimantami 6 quillacunata chaipi cashpapish tagalo shimitaca ashallata yacharcanchij. Pero qꞌuipaca ashtahuanmi chai shimita yachai tucurcanchij.

1955 huatapica shuj cartatami ñucanchijman cacharca. Chai cartapica: “Leach huauquipish canpish superintendente de circuitomi canguichij” nircami. Ñucaca 22 huatacunallatami charircani. Shinapish superintendente tucushpaca ‘gentecuna ima shina cajpipish, paicuna shina’ tucuna cashcatami yachana carcani.

Superintendente cashpaca ñuca punta conferenciataca shuj tienda ñaupajpimi curcani. Chai punllacunapi Filipinas llajtapica plazacunapi, callecunapi, mercadocunapi, parquecunapi, canchacunapimi, conferenciacunata cujcuna carca. Chaimantami chꞌican chꞌican ladocunapi conferenciacunata curcani. Shuj punllaca San Pablo pueblopaj mercadopica shuj  conferenciatami cugrircani. Pero animalta tamiyacujpimi ña mana conferenciata cui tucurcani. Chaimantami huauquicunamanca: “Tandanacuna Huasipimi conferenciata cugrini” nircani. Paicunaca mercadopi conferenciata mana cushcamantami mana shuj conferencia cashcata laya ricurcacuna.

Huauqui panicunaca paicunapaj huasicunapimi pozadata cujcuna carca. Paicunapaj huasicuna maucalla cashpapish limpiomi carca. Achca cutinmi pambapi shuj esterata churashpa dormij carcani. Huasi ucupi armana baño mana tiyashcamantami canllapi armana carcani. Shujtaj ladocunaman ringapajca buspimi rij carcani. Cutin islacunaman ringapajca barcopimi rij carcani. Cai tucui huatacunapica mana shuj propio carrota charishcanichu.

Tagalo shimita yachangapajca mana shuj cursoman rircanichu. Ashtahuanpish tandanacuiman rishpa, huillanaman rishpami huauqui panicunahuan tagalo shimita yacharcani. Chai shimita parlacushpa pandarijpica huauqui panicunaca pacienciata charishpami ayudarcacuna. Shina ayudashcamantami paicunataca achcata pagui nini.

Asha tiempocuna qꞌuipaca shujtaj trabajocunatami charircani. 1956 huatapica huauqui Nathan Knorrmi Filipinas llajtaman shamurca. Chai huatallapitajmi shuj jatun tandanacuita charircanchij. Chai tandanacuimanta televisionpi, periodicopi trabajajcunahuan parlachunmi ñucata mingarca. Chaita ruranataca mana yacharcanichu, pero shujtaj huauquicunami ima shina parlanata ñucaman yachachirca. Manaraj shuj huata pajtajpimi cutin shujtaj jatun tandanacui tiyarca. Chaimanta chai jatun tandanacuipipish ayudarcanimi. Estados Unidos llajtamantami huauqui Frederick Franzca chai jatun tandanacuiman shamurca. Huauqui Franzca Filipinas llajtapi causaj gentecuna laya churarishca ropata churarishpami conferenciata curca. Chashna churarishcata ricushpami  huauqui panicunaca cushilla sintirircacuna. Huauqui Franz chashna rurajta ricushpami ñucapish chai llajta gentecuna shina tucuna cashcata entendircani.

Superintendente de distrito cashpaca shujtaj ruraicunatapishmi yacharcani. Chai tiempopica La felicidad de la Sociedad del Nuevo Mundo nishca peliculatami ricuchij carcanchij. Chai peliculataca parquecunapi, plazacunapi, shujtaj ladocunapimi shuj maquinahuan ricuchij carcanchij. Chai máquina achijyachij cashcamantami chuspicuna, shujtaj animalcunapish maquinapi pegarijcuna carca. Maquinata chai rato pꞌichanaca sinchimi carca. Cashna laya tandanacuicunata ruranaca mana jahuallachu carca. Gentecuna chai peliculata ricushpaca tucui llajtacunapi Testigo de Jehovacuna tiyashcatami ricurcacuna. Shina ricuchishcamantami cushilla sintirircanchij.

Maijan ladocunapica curacunaca autoridadcunapajman rishpami jatun tandanacuicunata ama charichun jarcasha nircacuna. Huaquinpica conferenciata cucujpica Diospaj Shimita ama uyachunmi curacunaca iglesiapi campanacunata tocachijcuna carca. Chashna jahuapish gentecunaca Diosmanta yachanataca manataj saquircacunachu. Cunan tiempopica chai pueblocunapica achca testigo de Jehovacunami tiyan.

1959 huatapica sucursalpi servichunmi invitarca. Chaipica achcatami yacharcani. Asha tiempo qꞌuipaca superintendente de zona nishpami ñucata nombrarca. Chaimantami shujtaj llajtacunata visitachun cacharca. Shina visitacushpami shuj panita rijsircani. Paica Janet shutimi carca. Janetca Tailandia llajtapimi servicurca. Paihuanmi asha tiempota cartacunata escribijcuna carcanchij. Qꞌuipaca cazararcanchijmi. 51 huatacunatami ishquindij Diosta cushilla servicushcanchij.

 33 llajtacunapi achca huauqui panicunata visitashcamantami cushilla sintirini. Shujtaj llajtacunapi ayudanaman rishcamantami tucui laya gentecunata ima shina tratana cashcata yachashcani. Chashna visitashpami Jehová Dios tucui laya gentecunata cꞌuyashcata ricushcani (Hechos 10:34, 35).

Filipinas llajtapi servinaca ñucanchijpajca sumajmi cashca. Cai llajtaman chayamujpica 20 mil testigocunallami tiyarca, pero cunanca 200 mil testigocunami tiyan. Janetpish ñucapish Filipinas sucursalpimi servicunchij. 60 huatacunata cai llajtapi servicushpapish, Jehová Diospaj mandashcacunata catina cashcatami entendishcani. Cai huatacunapica Diosca paita servijcunataca huaquin cambiocunata rurachunmi mandashca. Ñucanchijpish chai mandashcacunatami cazushcanchij.

Diospaj mandashcacunata pajtachingapaj esforzarishcamantaca cushillami sintirinchij. Shinallataj huauqui panicunata ayudangapaj huaquin cambiocunatami rurana cashcanchij. Shinami tucui laya gentecunata ayudashpa catishun ninchij.