1. ¿Tandanacuicunapica imapajtaj comentariocunata cunchij?

 ¿IMAPAJTAJ tandanacuicunaman rinchij? Tandanacuicunamanca Jehová Diosta alabangapajmi rinchij (Salmo 26:12; 111:1). Shinallataj cai sinchi punllacunapi caishujmanta chaishujmanta animanacungapajmi rinchij (1 Tesalonicenses 5:11). Ñucanchij comentariocunata cushpaca caicunatami pajtachinchij.

2. ¿Ñucanchij tandanacuicunapica ima horallataj comentariocunata cui tucunchij?

² Ñucanchij tandanacuicunapica cada semanami comentariocunata cungapajca achca oportunidadta charinchij. Por ejemplo, fin de semanapica Huillaj revistata estudiacushpami chaipi comentariocunata cui tucunchij. Cutin chaupi semana tandanacuipica “Bibliapi curita mashcaj shina mashcashunchij” nishca partepi, “Tandanacushcacunahuan Bibliata yachashun” nishca partepi o shujtaj partecunapipishmi ñucanchij maquita alzashpa comentariocunataca cui tucunchij.

3. a) ¿Comentangapajca ima jarcaicunatataj charinchij? b) ¿Hebreos 10:24 y 25-mantaca imatataj yachanchij?

³ Ñucanchij comentariocunahuanmi Jehová Diosta alabashun ninchij, huauqui panicunatapish animashun ninchij. Shinapish maipica ishqui jarcaicunatami chari tucunchij. Puntapica, yallitaj manchaita charishcamantami comentariocunataca mana cunchij. Ishquipica, maquita achca cutin alzajpipish comentariocunata cuchun mana saquijpimi llaquirinchij. Pero ¿manchaita mishangapaj, ama llaquiringapajpish imatataj yuyarina canchij? Apóstol Pablo ima nishcatami yuyarina canchij. Apóstol Pabloca: “Tandanacuicunapi caishujmanta chaishujmanta animanacushunchij” nishpami consejarca (Hebreos 10:24, 25-ta liyipai). Apóstol Pablo nishca shinaca tandanacuicunapi comentariocunata cushpaca huauqui panicunata animanatami  mashcana canchij. Chaita pajtachingapajca ashalla shimicunahuanmi comentariocunata cui tucunchijlla. Chaita yuyarishpami mana manchashpa comentangapaj maquita alzashun. Shinallataj ñucanchijcuna comentachun mana saquijpica mana llaquirinachu canchij. Shujtaj huauqui panicuna comentacujta uyashpami cushiyarina canchij. Chashnami tandanacuicunapica caishujmanta chaishujmanta animanacushun (1 Pedro 3:8).

4. ¿Cai yachaipica imallatataj yachashun?

⁴ Puntapica shuj uchilla congregacionpi comentangapaj achca oportunidadcunata charishpa ima shina animanacunatami ricushun. Qꞌuipaca jatun congregacionpi achca huauqui panicuna comentasha nishpa ima shina animanacunatapishmi ricushun. Tucuripica shujtajcunata animangapaj ñucanchij comentariocuna ima shina cana cashcatami ricushun.

5. ¿Tandanacuicunapi ashacunalla cashpaca animaringapajca imatataj rurana canchij?

⁵ Uchilla congregacionpi o shuj grupopica tandanacuita pushaj comentariocunata cuchun mañajpica mana achca comentariocuna tiyanchu. Chaimantami pushaj huauquica maipica maijan maquita alzangacama shuyan. Chaimi animarinapaj randica desanimarinchij. ¿Comentariocunahuan animashpa catingapajca imatataj rurana canchij? Achca cutin comentangapaj listos cashunchij. Chashnami caishujcunapish comentariocunata cuchun animashun.

6, 7. ¿Comentariocunata ama manchashpa cungapajca imatataj rurana cangui?

⁶ Achca huauqui panicunaca tandanacuicunapi comentanataca achcatami manchancuna. ¿Can chashna sintirishpaca imatataj rurana cangui? Ama yalli manchaita charingapajca ima shina comentana cashcamantami informacionta mashcai tucungui.

⁷ Ña llujshishca Huillaj revistacunapimi b ima shina comentariocunata cunata yachai tucungui. Por ejemplo, allimi prepararina cangui (Proverbios 21:5). Imata yachachicushcata alli intindishpaca comentangapajca ratomi maquita alzangui. Mana cashpaca ashalla shimicunapimi comentariocunata cui tucungui (Proverbios 15:23; 17:27). Ashalla shimicunapi comentashpaca manchaitami saquingui. Huauqui panicuna intindichunca yallitaj palabracunata ninapaj randica ashalla shimicunapimi comentai tucungui. Cambaj propio shimicunahuan comentajpicarin shujtajcunaca can alli preparashcata, alli intindishcatapishmi cuentata cungacuna.

8. ¿Comentariocunata cungapaj esforzarijpica Jehová Diosca ima shinataj sintirin?

⁸ Pero ¿manchaihuan caticushcamanta shuj o ishqui cutinlla comentariocunata cushpaca imatataj yuyaipi charina cangui? Jehová Diosca can comentariocunata cungapaj esforzarishcataca achcatami valoran (Lucas 21:1-4). Shinallataj paica can mana cui tucushcata cuchunca mana mañanchu. Caicunatami yuyaipi charina cangui (Filipenses 4:5). Chaimanta mashna comentariocunata cui tucushcata ricui. Manchaita ama charingapajpish Jehová Diosta mañai. Callaripica ashalla shimicunapi shuj comentariota cungapaj esforzari.

9. ¿Shuj jatun congregacionpi comentariocunata cunaca imamantataj sinchi can?

⁹ Cutin cambaj congregacionpica achca publicadorcunachari tiyan. Chaimantachari mana tanto comentariocunata cui tucungui. Pani Daniellepi yuyashun. c Paica tandanacuicunapimi comentariocunata cunata achcatami  munan. Paica Diosta adorangapaj, shujtajcunata animangapajpishmi comentasha nin. Comentashpaca imata yachachishcacunatapishmi ashtahuan alli intindin. Pero shuj jatun congregacionpi sirvinaman rishpaca achca comentariocunataca ña mana cui tucurcachu. Maipicarin shuj cutinlla comentanatapish mana pudircachu. Paica: “Tandanacuicunapi comentanaca ñucapajca shuj valishca regalomi can, chaimi maquita cutin cutin alzashpapish mana comentai tucushpaca llaquilla sintirircani. Huaquinpicarin ‘tandanacuita pushajcunaca ñucallatami mana comentachun saquin’ nishpami yuyaj carcani” ninmi.

10. ¿Comentariocunata cungapajca imatataj rurai tucungui?

¹⁰ ¿Canpish maipica pani Danielle shina sintirishcanguichu? Chashna sintirishca cashpaca maipica maquita mana alzashpa comentariocunata mana cunatachari decidishcangui. O mana cashpaca comentariocunata uyanallatachari decidishcangui. Pero ama saquirichu, ¿tandanacuicunapi comentariocunata cungapajca imatataj rurai tucungui? Tandanacuicunapajca mana shuj comentariollatachu allichina cangui. Ashtahuan comentariocunata allichishpaca punta parrafocunapi mana comentai valishpapish, catij parrafocunapimi comentai tucungui. Huillaj revistapaj shuj yachaita estudiacushpapish cada parrafopaj yuyaicunatami alli intindina cangui. Chai yuyaicunata yuyarishpami yachaipi imallata yachachishcata intindina cangui. Chashnami chꞌican chꞌican parrafocunapaj alli comentai tucungui. Shinallataj sinchi yuyaicunata intindichingapajmi comentariocunata allichi tucungui (1 Corintios 2:10). Chai sinchi yuyaicunamanta comentana horaspica huaquincunallami maquita alzancuna. Shinapish ¿caicunata pajtachishpapish mana shuj comentariota cushpaca imatataj rurai tucungui? Manaraj tandanacui callarijpica tandanacuita pushaj huauquimanca maijan parrafopi quiquin comentasha nishcatami huillai tucungui.

11. ¿Imatataj yuyarina canchij? (Filipenses 2:4).

¹¹ (Filipenses 2:4-ta liyipai). Dios yuyaita cujpimi apóstol Pabloca ñucanchijllapi mana yuyashpa shujtajcunapaj alli canata mashcachun consejarca. ¿Caitaca ima shinataj tandanacuicunapi pajtachi tucunchij? Shujtajcunapish comentariocunata cusha nishcatami  yuyarina canchij. Chaita yuyarishpami paicunapish comentachun saquina canchij.

12. ¿Huauqui panicuna animarichunca imata rurachuntaj saquina canchij? (Fotomantapish parlapai).

¹² Caita intindingapajca shuj ejemplota ricushun. Por ejemplo, cambaj amigocunahuan parlacushpaca mana canlla tucui tiempota parlashpa catinata munanguichu ¿nachu? Ashtahuanpish canca paicunapish parlachunmi munangui. Pero can paicuna parlachun mana saquijpica llaquiringacunami. Chashnallatajmi ñucanchij tandanacuicunapipish pasan. Huauqui panicuna achca comentariocunata cuchunmi munanchij. Paicunata comentachun saquijpi, paicunapaj crishcacunamanta parlachun saquijpica achcatami animaringacuna (1 Corintios 10:24). Shinaca ¿achcacuna comentachunca imatataj rurai tucunchij?

13. ¿Ashtahuan huauqui panicuna comentariocunata cuchunca imatataj rurai tucunchij?

¹³ Ñucanchij comentariocunaca ashalla shimicunapimi cana can. Chashna rurajpica shujtaj huauqui panicunapish comentariocunata cuchunmi tiempota cushun. Ancianocunapish, achca huatata Diosta sirvijcunapishmi cashna ashalla shimicunapi comentariocunata cushpa alli ejemplota ricuchi tucuncuna. Shinallataj ashalla shimicunapi comentashpapish mana achca yuyaicunamantachu parlana canchij. Parrafopi ricurij tucui yuyaicunamanta can parlajpica shujtajcunaca comentariocunata mana cui valingachu. Por ejemplo, cai parrafopica ishqui yuyaicunamantami parlacun. Puntapica comentariocunata ashalla shimicunapi cunamanta, shinallataj mana tucui yuyaicunata parlanamantami parlacun. Cai parrafomanta cantaraj comentachun nijpica shuj yuyaillamanta parlashpa callari.

14. ¿Mashna cutincuna maquita alzagrishcataca imamantataj alli yuyana cangui? (Fotocunamantapish parlapai).

¹⁴ Comentariocunata cungapaj mashna cutincuna maquita alzagrishcataca allimi yuyana cangui. Tucui tiempo maquita alzajpica tal vez pushaj huauquica canllamanmi comentariocunata cunga. Chashnami shujtajcuna  comentariocunata cuchunca mana saquishun. Shujtajcunacarin cada parrafopaj canlla maquita alzacujta ricushpaca “ñuca comentachunca mana minishtincunachu” nishpachari yuyangacuna (Eclesiastés 3:7).

15. a) ¿Tandanacuicunapi comentariocunata mana cui tucushpaca imatataj mana rurana canchij? b) ¿Tandanacuita pushaj huauquica imallata pajtachingapajtaj esforzarina can? (“ Tandanacuita alli pushanata yachai” nishca recuadrota ricui).

¹⁵ Achca huauqui panicuna comentariocunata cusha nijpica maipica manachari achca comentariocunata cui tucushun. Huaquinpicarin shuj cutinllapish comentariota manaraj cujpimi ña tandanacuica tucurin. Chashna tucujpica llaquillachari sintirinchij. Shinapish comentariocunata cuchun mana saquijpipish mana resintirinachu canchij (Eclesiastés 7:9).

16. ¿Comentariocunata cujcunata animangapajca imatataj rurana canchij?

¹⁶ Ashallata comentai tucushpapish shujtajcunapaj comentariocunatami alli uyana cangui. Chashnami paicunataca tandanacui huasha felicitai tucungui. Cashna felicitashpaca comentariota cucushca shinallatajmi paicunata animai tucungui (Proverbios 10:21, NWT). Shujtajcunata animangapajca felicitanatami yachana canchij.

17. a) ¿Huahuacuna comentachunca yaya mamacunaca ima shinataj ayudai tucuncuna? b) ¿Videopi ricushca shinaca shuj comentariota rurangapajca imallatataj rurana can? (Notata ricui).

¹⁷ ¿Tandanacuicunapica ima shinataj caishujmanta chaishujmanta ashtahuan animari tucunchij?  Can uchilla huahuacunata charishpaca paicuna intindi tucushcata comentachunmi ayudai tucungui (Mateo 21:16). Huaquin tandanacuicunapica sinchi yuyaicunatami yachanchij. Por ejemplo, cazarashcacunapaj problemacunamanta, huainayana mana alli cashcamantapishmi yachanchij. Chai yachaicuna mana huahuacunapaj cajpipish shuj o ishqui parrafocunapi intindirinalla yuyaicunamanta comentachunmi ayudai tucungui. Shinallataj comentariocunata mana siempre cui tucushcatapish huahuacunaman intindichina cangui. Caita intindichijpica, shujtajcunaman comentariota cujpica paicunaca mana llaquilla sintiringacunachu (1 Timoteo 6:18). d

18. ¿Comentashpa ama jatunyaringapajca imatataj rurana canchij? (Proverbios 27:2).

¹⁸ Tucuicunami Jehová Diosta jatunyachingapaj, huauqui panicunata animangapajpish alli comentariocunata rurai tucunchij (Proverbios 25:11). Huaquinpica ñucanchij causaimantami ashalla shimicunapi parlai tucunchij. Shinapish mana ñucanchijmanta yalli parlanachu canchij (Proverbios 27:2-ta liyipai; 2 Corintios 10:18). Chaipaj randica Jehová Diosmanta, paipaj Shimimanta, Diosta sirvijcunamantapishmi ashtahuan parlai tucunchij (Apocalipsis 4:11). Shinapish shuj parrafopi ñucanchij imata yuyashcata cutichichun mañajpica parlai tucunchijllami. Catij parrafopimi chashna cutichichun animan.

19. a) ¿Tandanacuicunapi caishujhuan chaishujhuan animanacungapajca imatataj rurana canchij? (Romanos 1:11, 12). b) ¿Canca imamantataj tandanacuicunapi comentanata munangui?

¹⁹ Imata comentasha nishpapish shujtajcunata animanatami siempre mashcana canchij. Chaipajca huaquincunaca manchaita mishashpami ashtahuan comentangapaj esforzarina canchij. Cutin shujtajcunaca comentanata mana manchashpapish shujtajcuna comentachunmi saquina canchij. Huauqui panicuna comentajpipish alli uyanatami yachana canchij. Tandanacuicunapi chashna ñucanchijllapi mana yuyashpami caishujmanta chaishujmanta animanacushpa catishun (Romanos 1:11, 12-ta liyipai).